Read Jinghpaw Common Language Bible 2009 YEREMIA 17 Bible Online

YEREMIA 17 - Jinghpaw Common Language Bible 2009 bible

YEREMIA 17

¹Dai MADU gaw, “Yuda amyu masha ni e, na a yubak hpe hpri masen hte ka da nga ai; dai gaw na a kraw lawang hta hpailung masen hte mung, na a tawn hkungri ni a njut shara ni hta mung, tawk ka da nga ai.

²Na a amyu masha ni gaw tawn hkungri ni hta mung, tsit lali ai hpun shagu hte kawng pungding ni hkan Ashera hpara num a matu sharawt tawn ai sumla ni hpe nawku myit dai. Shanhte gaw nam na bum ntsa hkan e mung nawku ma ai. Na a mungdan ting hta nang shut kau ai yubak lam ni yawng a majaw na a sut gan hte arung arai ni hpe kashun la kau ya na matu, na a gumlau hpyen ni a lata de ngai ap kau na we ai.

⁴Ngai nang hpe jaw da ai mungdan hpe nang sum kau nna nang n chye ai mungdan hta na a gumlau hpyen ni hpe nang daw jau na rai ndai, hpa majaw nga yang nye a masin kahtet ai gaw wan zawn rai nna, dai gaw htani htana hkru nga na ra ai.

⁵Dai MADU gaw, “Ngai kaw na kayin mat wa ai masha ni hte shinggyim masha ni hte si chye ai masha a n-gun hta kam hpa nga ai ni hpe ngai daw dan na we ai.

⁶Shi gaw zaibru jang hte katsi katsang hkun hkraw ai shara hta tu nna hpa mung n nga ai jum ga hta tu ai sumwum langai hte bung nga ai. Mai kaja ai amu shi hta galoi mung byin ai n rai.

⁷“Rai ti mung, ngai gaw ngai hpe kam hpa nga ai wa hpe shaman ya na nngai.

⁸Shi gaw hka kau e tu nga ai hpun hte bung nna, hka de ru hkram sa wa nga ai. Ginhtawng ta du ai shaloi, kahtet kang ai hpe shi hkrit ai n rai; hpa majaw nga yang, de a hpun lap ni naw tsit lali nga ai; Marang n htu ai shaloi mung shi hta tsang shara hpa mung n nga nga ai; asi mung tut nawng asi nga ai.

⁹“Masha a myit masin hpe kadai chye lu nga a ni? Grai masu magaw ai hta jan nna hpa mung n nga nga ai; dai gaw shamai shatsai la na matu nau wa machyi sawng mat nga ai.

¹⁰Ngai MADU nan masha a myit mang ai lam ni hpe sawk tam yu nna shinggyim masha ni a myit masin ni hpe chyam dinglik yu nga nngai. Langai hte langai hpe tinang a arawn alai hte tinang galaw ai amu hte maren, ngai shabrai jaw na nngai,” ngu nna tsun ai.

¹¹N ding n man ai hku gumhpraw lu ai wa gaw tinang n di tawn ai udi hpum ai u hte bung nga ai. Shi gaw aprat hpungngang garai n du yang, shi a sut gan ni hpe shamat kau nna, jahtum e, shi gaw hpa mung n re ai angawk angak masha tai mat na ra ai.

¹²Anhte a Nawku Htingnu gaw hpung shingkang hte hpring ai tingnyang hte bung nna, dai gaw npawt kaw nna tsaw ai bum ntsa e dung nga ai.

¹³MADU e, nang gaw Israela a myit mada shara rai nga ndai; nang hpe kau da ai ni yawng kaya kahpa hkrum na mara ai. Shanhte gaw asak hka hpawk ngu ai nang MADU hpe kau da nga masai majaw ga nhpu hta ka da ai amying ni zawn shanhte hkoi mat wa na mara ai.

¹⁴MADU e, ngai hpe shamai shatsai la e, shaloi ngai tsep kawp hkam kaja wa na ring ngai; ngai hpe hkye mawai la e, shaloi ngai hkum tsup hkra shim lu na ring ngai. Nang gaw ngai shakawn kungdawn ai wa rai nga ndai!

¹⁵Amyu masha ni gaw ngai hpe, “Dai MADU gaw anhte hpe jahkrit shama shangun ai ga kanang rai nga ma ta? Shi anhte hpe ya shapraw dan ru ga,” nga nna tsun ma ai.

¹⁶Rai ti mung, MADU e, ngai gaw shanhte a ntsa e tsin-yam tsindam du shangun na matu nang hpe galoi mung shadut yu ai n rai; shanhte a matu ru tsang hkrum ai nhtoi hpe ngai ra marit nngai n rai. MADU e, ndai lam nang chye nga ndai; ngai tsun sai ga ni hpe nang chye nga ndai.

¹⁷Ngai hpe hkum hkrit kajawng shangun et; ru tsang hkrum ai shaloi, nang gaw nye a shim lum ai kam hpa shara rai nga ndai.

¹⁸Ngai hpe zingri zingrat ai ni hpe kaya kahpa jahkrum u, rai ti mung MADU e, ngai hpe ngam da e. Shanhte hpe hkrit hpa amu ni hte jahpring ya u; rai ti mung ngai hpe hkum jahkrit shama et. Shanhte a ntsa de tsin-yam tsindam du shangun nna shanhte hpe atsai awai agrawp kau u.

¹⁹Dai MADU gaw ngai hpe, “Yeremia e, Yuda hkawhkam ni mare de shang wa pru wa re ai shaloi lang ai Amyu Masha ni a Chyinghka de sa nna nye a shiga tsun shabra u; dai hpang kaga Yerusalem a chyinghka ni yawng de mung sa su.

²⁰Hkawhkam ni hpe mung, Yuda mung masha ni yawng hte Yerusalem mare hta shanu nga nna ndai chyinghka hku shang ai ni langai hte langai hte hpe ngai hpa tsun ai lam madat la na matu tsun dan su.

²¹Shanhte gaw shanhte a asak hkrun lam hpe tsaw ra ai rai yang, Bansa Nhtoi hta shanhte lit hpa mung n gun hpai lu na lam, Yerusalem mare chyinghka lam hku nna arai hpa mung n hpai jashawn lu na lam,

²²Bansa Nhtoi hta e shanhte nga ai dum nta kaw na arai hpa mung n hpai shapraw lu na lam rai nga ai. Shanhte gaw Bansa Nhtoi e amu galaw lu na ma ai n rai; shanhte a kaji kawa ni hpe ngai hkang da ni ai hte maren Bansa ai shani hpe chyoi pra ai shani zawn shanhte hkan sa lu na lam tsun u.

²³Shanhte a kaji kawa ni mahtang nye a ga hpe n madat ma ai, myit maju n jung ma ai. Shing rai galaw na malai, shanhte gaw du ja ai ni tai nhtawm nye a ga hpe madat mara ma ai n rai, ngai kaw na sharin achyin hkam la nga ma ai n rai.

²⁴Shanhte gaw nye a hkang da ai ga ni yawng hpe hkan sa madat mara lu na lam ndai amyu masha ni hpe tsun u. Shanhte gaw Bansa Nhtoi hta dai mare a chyinghka lam hku lit hpa mung n hpai lai lu na ma ai. Shanhte gaw chyoi pra ai shani zawn dai Bansa Nhtoi hpe hkan sa lu nna amu bungli hpa mung galaw lu na ma ai n rai.

²⁵Dai hpang, Dawi hkam la lu ai hkawhkam daru magam n-gun hte maren, shanhte a hkawhkam ni hte hkawseng shadang sha ni Yerusalem mare chyinghka lam hku shang wa lu na mara ai. Yuda mung masha ni hte Yerusalem mare masha ni gaw rau sha gumra leng hte gumra ni a ntsa e jawn lu na mara ai; Yerusalem mare gaw amyu masha ni hte tut nawng hpring chyat nga na ra ai.

²⁶Yuda mare ni hte Yerusalem grup yin kahtawng ni kaw na amyu masha ni sa du na mara ai; shanhte gaw Benyamin mungdaw kaw nna mung, layang ga de na mung, bum ga de na mung, dingda Yuda mung kaw nna mung sa du na mara ai. Shanhte gaw nye a Nawku Htingnu de wan nat hkungga ni hte shagu hkungga ni, lusha hkungga hte manam pyaw ai baw hte chyeju dum hkungga ni hpe mung la sa na mara ai.

²⁷Rai ti mung, shanhte gaw nye a ga hpe madat mara nna chyoi pra ai shani hku nna Bansa Nhtoi hpe hkan sa lu na ma ai. Shanhte gaw dai nhtoi e Yerusalem mare chyinghka lam ni hku lit hpa mung hpai lai lu na ma ai n rai. Shanhte dai hku galaw ai rai yang, dai Yerusalem mare chyinghka ni hpe ngai wan nat kau na we ai. Dai wan gaw Yerusalem a hkaw htingnu ni hpe hkru kau na ra ai; langai mi mung dai wan hpe sat kau lu na ra ai n rai,” nga nna tsun ai.