Read Jinghpaw Common Language Bible 2009 YEREMIA 18 Bible Online

YEREMIA 18 - Jinghpaw Common Language Bible 2009 bible

YEREMIA 18

¹Dai MADU gaw ngai hpe,

²“Di bu sama wa a nta de yu wa su, dai yang e, ngai nang hpe nye a mungga jaw na we ai,” ngu nna tsun ai.

³Dai rai nna, ngai gaw dai shara de sa nhtawm, shi a di bu leng kayin ai amu galaw nga ai di bu sama wa hpe sa mu nngai.

⁴Di bu sama ai wa a lata hta adaw atang rai nna ga mat ai aten shagu, shi gaw kagam ga hpe hta la nna kaga bai galaw nga ai.

⁵Dai hpang, dai MADU gaw ngai hpe,

⁶“Di bu sama wa gaw kagam ga hte di bu galaw nu ai zawn, ngai gaw nang Israela amyu masha ni hte galaw lu na ahkang n lu mai nga a ni? Kagam ga gaw di bu sama wa a lata hta rai nga ai zawn nang gaw nye a lata hta rai nga ndai.

⁷Kaning re ai aten hta rai tim, gara amyu baw, gara mungdan hpe ngai baw kau nna, agrawp daw kau na hte jahten shabyak kau na matu ngai tsun timung,

⁸ngai lakap nna tsun ai amyu baw gaw shi a n hkru ai amu kaw na kayin wa ai rai yang, ari jaw na matu ngai tsun da ni ai rai tim, dai hpe ngai galaw na n rai.

⁹Lam maga mi hku tsun ga nga yang, gara amyu, gara mungdan hpe hkai da na hte gaw da na matu ngai tsun nga ti mung,

¹⁰amyu baw gaw nye a ga hpe n madat n mara ai hte n hkru ai amu galaw nga ai rai yang gaw ngai galaw na ngu nna tsun da ai lam ni hpe ngai galaw na nngai n rai.

¹¹Dai re ai majaw, ngai gaw Yuda mung masha ni hte Yerusalem mare masha ni hpe gumlang maw mawn ai hte shanhte hpe ari jaw na matu jin jin rai nga ni ai lam, shanhte hpe tsun dan u. Yubak lam hkan shangun ai asak hkrun lam ni hpe kau da nhtawm shanhte a arawn alai hte shanhte hkan galaw nga ai n hkru ai amu ni kaw nna kayin wa na matu shanhte hpe tsun u.

¹²Shanhte gaw, ‘N rai law, anhte hpa majaw rai na ga ta? Anhte yawng gaw adu ja ai hte n hkru nga ga ai hte maren, anhte byin mayu ai lam galaw na ga ai,’” ngu nna htan na mara ai.

¹³Dai MADU gaw, “Shawng de dai zawn re ai amu galoi mung byin yu sai rai yang, masha amyu baw shagu hpe san yu mu. Israela amyu masha ni gaw hkrit hpa amu galaw manu ai!

¹⁴Lebanon a tsaw ai lunghkrung bum ni hta hkyen galoi mung n hkrat sani? Katsi ai bum kaw na lwi hkrat wa ai hka shi hka gaw hkyet mat chye nga a ni?

¹⁵Timung, nye a amyu masha ni ngai hpe malap kau manu ai; shanhte gaw hpara sumla ni hpe manam pyaw ai baw nat nawng ma ai. Shanhte gaw shanhte hkawm sa ang ai hkrun lam hta ahtu kataw mat ma ai; shanhte gaw moi na lam dingsa hta loi mi mung n hkan mat ma ai; shanhte gaw n san da ai lam ntsa hkan e she, hkawm nga ma ai.

¹⁶Shanhte gaw ndai mungdan hpe hkrit kajawng shara hte htani htana asawng asang shara shatai kau manu ai. Dai shara hku lai hkawm ai ni yawng mayawng hte gaw shanhte mu mada ai lam ni a majaw mau kajawng na mara ai; shanhte gaw mau mahka mat ai hte shanhte a baw ni hpe kanga na mara ai.

¹⁷Ngai gaw shanhte hpe sinpraw nbung e shapoi kau ai ga nhpu zawn, nye a amyu masha ni hpe shanhte a gumlau hpyen ni a man e shabra kau na we ai. Ngai gaw shanhte hpe shingdu kayin kau na nngai; tsin-yam tsindam du ai shaloi, ngai shanhte hpe karum na nngai n rai,” ngu nna tsun ai.

¹⁸Dai hpang, amyu masha ni gaw, “Anhte Yeremia hpe lam lama mi jawm galaw yu ga! Anhte hpe sharin shaga na matu hkinjawng ni, anhte hpe hpaji jaw la na matu hpaji rawng ai masha ni, hte Karai Kasang a mungga hkaw tsun na matu myihtoi ni tut nawng e nga nga na mara ai. Shi tsun ai ga hpe n madat ai sha, shi hpe mara jawm tam yu ga,” ngu nna tsun ma ai.

¹⁹Dai rai nna ngai gaw, “MADU e, ngai hpa tsun nga ai hpe na ya e law, nye a gumlau hpyen ni nye a lam hte seng nna hpa tsun nga ma ai hpe madat ya e law.

²⁰Mai kaja ai lam hpe n hkru n kaja ai hte htang mai nga a ni? Shanhte mahtang ngai di hkrat bang na nye a matu nhkun htu manu ai. Shanhte hpe nang sindawng kahtet mat hkra, shanhte a malai ngai nang kaw kaning rai du sa ai hte tsun shaga ai ga ni hpe adum nga u.

²¹Rai ti mung, ya chyawm gaw MADU e, shanhte a kashu kasha ni hkuwa hkrum nna si mat manu ga; shanhte mung hpyen majan hta sat kau ai hkrum manu ga; numsha ni hpe ma n lu shangun ai hte gaida shabyin ya u; dinghku la ni mung ana zinli hta si htum mat nna shabrang ni majan pa hta sat kau ai hkrum manu ga.

²²Sadi jaw ai lam n nga ai sha, shanhte a dum nta ni hpe hpya ayai kau ya na matu tara n lang ai masha u hpung mi hpe shangun dat u; shanhte hpe hkrit kajawng ai hte hkrap shabam shangun u. Shanhte gaw ngai hpe rim na matu mahkam hkam ai hte ngai di hkrat bang na nye a matu nhkun htu da manu ai.

²³Rai ti mung, MADU e, ngai hpe sat na matu shanhte a maw mawn ai lam yawng hte hpe nang chye nga ndai. Shanhte a n hkru ai amu hpe mara hkum raw ya et; shanhte a yubak hpe mung hkum dat ya et. Shanhte hpe hkrat sum shangun u; nang pawt sindawng nga yang, shanhte hpe daw dan u,” ngu nna hpyi lajin se ai.