Read Jinghpaw Common Language Bible 2009 YEREMIA 19 Bible Online

YEREMIA 19 - Jinghpaw Common Language Bible 2009 bible

YEREMIA 19

¹Dai MADU gaw ngai hpe ga namtau langai sa mari la na matu tsun wu ai. Shi gaw amyu masha ni kaw na salang nkau mi hte asak kaba sai hkinjawng nkau mi hte hpawn,

²Hinom Kadit de hkrang ai Di bu Shaga Chyinghka lam hku ga sa wa na ngai hpe tsun wu ai. Dai shara e ngai htawn tsun na mungga shi ngai hpe jaw wu ai.

³Dai MADU gaw ngai hpe, “Yuda mung na hkawhkam ni hte Yerusalem masha ni e, Chyahtum Chyalai N-gun Rawng ai dai MADU Israela a Karai Kasang ngai tsun ai ga hpe madat mu. Ngai gaw ndai shara hta dai zawn re ai tsin-yam tsindam hpe shapraw dat na nngai, shaloi dai lam hpe na ai ni langai hte langai gaw hkrit kajawng mat na mara ai.

⁴Ngai gaw ndai amu hpe galaw na nngai, hpa majaw nga yang, amyu masha ni gaw ngai hpe kau da manu ai; shanhte mung, shanhte a kaji kawa ni mung, Yuda hkawhkam ni mung n chye ai kaga karai ni hpe ndai shara ni hta shagu hkungga ni nawng jau ai hte matsat shabat di kau manu ai. Shanhte gaw ndai shara hta mara n kap ai amyu masha ni a asai ni hte jahpring manu ai,

⁵shanhte a kashu kasha ni hpe shagu hkungga shatai nna wan nat nawng na nga, Bala hpara a matu tawn hkungri ni hpe gaw da manu ai. Shing re ai amu galaw na matu shanhte hpe ngai galoi mung n hkang da nngai; dai lam nye a myit hta galoi mung rawng nga li ai n rai.

⁶Dai majaw, dai shara hpe Tohpet shing n rai Hinom Kadit ngu nna galoi mung shamying na ra ai n rai, shing ngu na malai, Masha Sat Ai Kadit ngu nna shamying ai aten du wa na ra ai.

⁷Ngai gaw Yuda mung masha ni hte Yerusalem mare masha ni a myit maw ai lam yawng hte hpe ndai shara e shabyak kau ya na we ai. Shanhte a gumlau hpyen ni shanhte hpe dang kau ai hte majan pa e shanhte hpe sat kau shangun na we ai. Shanhte a moi mang ni hpe ntsa malen u ni hte matse labye dusat ni a matu lusha zawn ngai jaw na we ai.

⁸Dai zawn re ai hkrit hpa jahten sharun lam hpe ndai mare hta ngai shabyin dat na nngai; dai mare hku lai hkawm ai masha langai hte langai gaw yu kajawng ai hte mau mahka mat na mara ai.

⁹Gumlau hpyen ni gaw mare hpe wang tawn da nna dai mare masha ni hpe sat kau na matu shakut na mara ai. Hpyen ni mare hpe wang shing grup tawn ai gaw hkrit tsang shara rai nga ai majaw, mare kata e nga ai masha ni gaw langai hte langai sha n-ga, shanhte a kashu kasha ni hpe pyi, sha kau na mara ai,” ngu nna tsun ai.

¹⁰Dai hpang, dai MADU gaw ngai hte rau sa wa ai masha ni a man e, dai namtau hpe ga kau na matu ngai hpe tsun ai hte

¹¹Chyahtum Chyalai N-gun Rawng ai MADU gaw, “Namtau hpe bai n lajang la lu hkra, ndai ga mat ai ga namtau zawn ndai mare masha ni hte ndai mare hpe ga kau na nngai. Shanhte a moi mang ni hpe makoi mayang na shara pyi n nga ai majaw, amyu masha ni gaw shanhte a si mang ni hpe Tohpet shara hta pyi lup makoi na mara ai.

¹²Ndai mare hte ndai mare hta shanu nga ai mare masha ni hpe Tohpet shara zawn, ngai shatai kau na nngai ngu nna ngai ga sadi jaw nngai.

¹³Nta numgaw hkan e, shagan ni hpe manam pyaw ai baw wan nat nawng nna, kaga hpara ni hpe hkungga nawng jau ai zawn sabyi ru jaw ma ai majaw, Yerusalem mare nta ni hte Yuda hkawhkam ni a nta ni gaw Tohpet shara zawn teng teng awu asin tai mat na ra ai nga nna shanhte hpe htawn tsun u,” ngu nna tsun ai.

¹⁴Dai hpang, ngai gaw shi a mungga hpe hkaw tsun na matu dai MADU shangun dat ai Tohpet kaw nna pru sa mat wa nngai. Ngai gaw Nawku Htingnu a wang kata de shang tsap ai hte amyu masha ni yawng a man e,

¹⁵Chyahtum Chyalai N-gun Rawng ai dai MADU Israela a Karai Kasang gaw, “Nang adu ja nga ndai hte ngai tsun ai ga hpe n madat nga ndai majaw ngai galaw na ngu tsun da ni ai hte maren, ndai mare hta mung, makau grup yin na kahtawng shagu hta mung ari mahkra ngai shapraw na we ai,” ngu nna tsun nu ai.