Read Jinghpaw Common Language Bible 2009 YEREMIA 23 Bible Online

YEREMIA 23 - Jinghpaw Common Language Bible 2009 bible

YEREMIA 23

¹Shi a amyu masha ni hpe jahten shabyak ai hte shabra kau ai up hkang du ni a ntsa e, dai MADU a tara jeyang ai gaw kade wa hkrit hpa rai nga a hka!

²Da ndai gaw dai MADU Israela a Karai Kasang shi a amyu masha ni hpe yu bau sin ang ai up hkang du ni hpe lakap nna tsun ai ga rai nga ai: “Nang gaw nye a amyu masha ni hpe n yu ndai; nang gaw shanhte hpe shabra kau ai hte shaden kau nit dai. Ya chyawm gaw nang galaw tawn sai n hkru ai amu ni a majaw, ngai nang hpe ari jaw na de ai.

³Ngai shanhte hpe shabra kau dat ai mungdan ni kaw nna naw ngam nga ai nye a amyu masha ni hpe ngai shinggyin la na nngai, shing rai ngai gaw shanhte hpe shanhte a daidaw buga de bai woi wa na nngai. Shanhte gaw kashu kasha law law mayat maya wa nna law htam wa na mara ai.

⁴Shanhte hpe yu gawn na matu up hkang du ni hpe ngai lit shatsam da nngai. Nye a amyu masha ni gaw galoi mung hkrit tsang ai hte hkrit kajawng ra sana ma ai n rai. Ngai mung shanhte hpe ari bai jaw na we ai n rai. Dai MADU ngai nan tsun ni ai.”

⁵Dai MADU gaw, “Dawi a aru arat kaw na teng man ai hkawhkam langai mi hpe ngai lata san da ai aten du wa na ra ai. Dai hkawhkam wa gaw hpaji rawng ai hte up hkang nna, mungdan ting hpe ding hpring ai hte teng man ai hku up hkang na ra ai.

⁶Shi hkawhkam tai nga ai shaloi, Yuda amyu masha ni shim lum nga na mara ai, Israela amyu masha ni ngwi pyaw sim sa ai hte nga lu na mara ai. Shi gaw ‘Anhte A Hkye Hkrang La MADU,’ ngu nna shamying hkrum na ra ai.

⁷Dai MADU gaw, “Israela amyu masha ni hpe Egutu mung kaw nna woi shapraw wa ai ahkrung nga ai Karai Kasang rai nga ai ngu nna amyu masha ni ngai hpe galoi mung n dagam ai aten du wa nga ai.

⁸Shing ngu dagam na malai, Israela amyu masha ni hpe dingdung mung kaw nna mung, ngai shanhte hpe shabra kau dat ai kaga mungdan ni yawng kaw na mung woi shapraw wa ai ahkrung nga ai Karai Kasang hta shanhte ngai hpe dagam na mara ai. Dai hpang shanhte gaw shanhte a mungdan majing hta nga lu na mara ai,” ngu nna tsun ai.

⁹Nye a myit masin gaw daw hten mat ni ai, ngai gaw gari ashun nga nngai. Dai MADU a majaw mung, shi a chyoi pra ai mungga ni a majaw mung, ngai gaw chyaru nang ai masha wa hte sabyi ntsin ladu lai hkra lu nang ai masha wa zawn rai nga nngai.

¹⁰Mungdan gaw dai MADU hta sadi n dung ai amyu masha ni hte hpring nga ai; shanhte gaw n hkru ai asak hkrun lam hta hkawm sa nna shanhte a daru magam n-gun hpe n sawn n ang ai hku lang nga ma ai. Dai MADU a dagam ga a majaw mungdan gaw yawn madai ai hte udat shara ni ahkun ahkraw rai nga ai.

¹¹Dai MADU gaw, “Myihtoi ni hte hkinjawng ni gaw karai kata ni rai ma ai; Ngai gaw Nawku Htingnu kata hta nan n hkru ai amu galaw nga ai shanhte hpe rim kau se ai.

¹²Shanhte hkan ai lam ni gaw manen ai hte nsin sin mat na ra ai; Ngai gaw shanhte hpe ahtu kataw shangun na nngai. Ngai gaw shanhte a ntsa e tsin-yam tsindam shapraw dat na nngai, shanhte hpe ari jaw na aten du wa nga sai. Dai MADU ngai nan tsun ni ai.

¹³Samari mung na myihtoi ni a yubak mara hpe ngai mu se ai: shanhte gaw Bala a mying gang nna shaga ma ai, nye a amyu masha ni hpe lam woi shadam kau manu ai.

¹⁴Rai ti mung, shanhte hta grau sawng ai Yerusalem mare na myihtoi ni hpe ngai mu se ai: shanhte gaw num shaw la shaw amu shut hpyit nhtawm masu magaw ga ni tsun ma ai; shanhte gaw amyu masha ni hpe shut ai amu galaw na karum ya ma ai, shaloi, n hkru ai amu galaw nga ai hpe kadai mung jahkring da lu na ra ai n rai. Shanhte yawng gaw nye a man e n hkru ai Sodom hte Gomora mare masha ni zawn rai ma ai.

¹⁵“Dai rai nna, ndai gaw Chyahtum Chyalai N-gun Rawng ai dai MADU ngai nan Yerusalem myihtoi ni hte seng nna tsun ai ga rai nga ai: Ngai gaw shanhte hpe hka ai hpun ru sha na matu hte gung rawng ai ntsin hpe lu shangun na matu jaw nngai; hpa majaw nga yang, shanhte gaw mungdan ting hta karai kata arawn alai ni hpe shachyam shabra dat manu ai.

¹⁶Chyahtum Chyalai N-gun Rawng ai dai MADU gaw Yerusalem amyu masha ni hpe, “Myihtoi ni hkaw tsun ai ga ni hpe hkum madat ya myit; shanhte gaw nang hpe shut ai myit mada shara ni hte jahpring ya nga ma ai. Shanhte gaw shanhte myit shingran mu ai lam hpe sha nang hpe tsun dan ma ai, ngai tsun sai mungga ni hpe tsun ma ai n rai.

¹⁷Ngai tsun ai ga hpe madat hkam la na matu lale ai amyu masha ni hpang de shanhte hte rau hkawm sa ai rai yang, lam shagu hta mai kaja wa na ra ai nga nna shanhte matut tsun ma ai. Dai zawn adu ja nga ai ni langai hte langai hpe tsin-yam tsindam hkra lu na ra ai n rai, nga nna shanhte hkaw tsun na mara ai,” ngu nna tsun wu ai.

¹⁸Ngai gaw, “Ndai myihtoi ni langai mi mung dai MADU a makoi magap da ai myit mang lam ni hpe n chye nga ma ai. Shanhte hta na langai mi mung shi tsun ai shi a mungga hpe na yu, chye na hkawn hkrang yu, madat sumhting yu ai hte myit maju jung nga ai n rai.

¹⁹Shi a pawt sindawng ai gaw nbung laru rai nga nna dai sindawng kahtet ai bungsha gaw n hkru ai wa a baw ntsa e ahpawt na ra ai,

²⁰dai bungsha gaw shi galaw na matu myit shatawng da ai arai yawng mayawng hte hpe shi myit dik ai aten du hkra ahpawt nga nna, sim mat na ra ai n rai. Shi a amyu masha ni gaw du wa na aten ni hta dai lam hpe dan dan leng leng chye wa na mara ai,” ngu nna tsun ni ai.

²¹Dai MADU gaw, “Ndai myihtoi ni hpe ngai n shangun nngai, rai ti mung, shanhte pru sa ma ai. Ngai shanhte hpe hpa mungga mung n tsun nngai, rai ti mung, shanhte gaw ya du hkra nye a amying hte hkaw tsun ma ai.

²²Shanhte gaw nye a makoi magap da ai myit mang lam ni hpe chye ya ma ai rai yang gaw, nye a amyu masha ni hpang de nye a mungga hkaw tsun na ma ai; shanhte hkawm sa ai n hkru ai asak hkrun lam ni hte shanhte galaw ai n shawp n kap ai amu ni hta na shanhte hpe shabai la lu na ma ai.

²³Ngai gaw shara mi hta chyu sha nan nan rai nga ai wa n rai, shara shagu hkan nga nga ai Karai Kasang rai nga nngai.

²⁴Kadai mung ngai n mu lu ai shara hta n makoi lu nga ai. Ngai gaw sumsing lamu hte ginding aga ntsa shara shagu hta nga nga nngai hpe nang n chye n ni?

²⁵Nye a amying gang nna masu magaw ga hkaw tsun ai hte shanhte a yup mang shingran ni hta ngai gaw shanhte hpe nye a mungga madun dan ni ai nga nna hkaw tsun ai ndai myihtoi ni tsun shaga ai ga ni hpe ngai chye nngai.

²⁶Ndai myihtoi ni gaw shanhte myit ra ai hku pau tsun ai masu magaw ga ni hte nye a amyu masha ni hpe kaden du hkra lam woi shadam na rai nga ma ni?

²⁷Shanhte a kaji kawa ni gaw ngai hpe malap kau ai hte Bala hpara hpang de myi man yawng mat wa ma ai zawn, shanhte tsun hkai ai yup mang shingran ni a majaw nye a amyu masha ni ngai hpe malap kau shangun na shanhte myit nawn ma ai.

²⁸Yup mang mu ai myihtoi wa gaw yup mang hpe chyu sha hkai dan u ga; rai ti mung, nye a mungga hpe na la ai myihtoi wa gaw mungga hpe kangka ai hte htawn tsun u ga. Yihku hte hkaulan mam hpe kaning rai shadawn mai nga a ta?

²⁹Nye a mungga gaw wan zawn mung, nlung ni hpe adup ga ai sumdu zawn mung rai nga ai.

³⁰Kaga ni a ga ni hpe hta la nna, nye a mungga zawn shanhte hpe hkaw tsun ai myihtoi ni hpe ngai hkap daw na nngai.

³¹Shanhte a n-gup aga hte tsun nna dai ni gaw ngai kaw nna pru wa ai mungga ni re ngu nna hkaw tsun ai myihtoi ni hpe mung ngai hkap daw na nngai.

³²Dai MADU ngai nan tsun ai ga hpe madat mu! Masu magaw ga amyu amyu hte hpring nna, shanhte a yup mang shingran ni hpe tsun hkai ai myihtoi ni hpe ngai hkap daw na nngai. Shanhte a masu magaw ga ni, kaman lila grang ai ga ni, ndai yup mang shingran ni tsun hkai ai hte nye a amyu masha ni hpe lam woi shadam nga ma ai. Ngai gaw shanhte hpe shangun dat ai n rai, shanhte gaw ndai amyu masha ni a matu dik nna hpa karum shingtau ya lu ma ai n rai. Dai MADU ngai nan tsun ni ai,” ngu nna tsun ai.

³³Dai MADU gaw ngai hpe, “Yeremia e, nye a amyu masha ni kaw nna marai langai ngai, myihtoi langai ngai, hkinjawng langai ngai nang hpe, ‘Dai MADU a mungga gaw hpa wa rai nga a ta?,’ nga nna san yang, nang gaw shi hpe, ‘Nang gaw dai MADU hpe lit shali ndai majaw shi gaw nang hpe kabai kau na ra ai,’ ngu nna tsun na rai nga ndai.

³⁴Nye a amyu masha ni kaw na marai langai ngai, myihtoi langai ngai, hkinjawng langai ngai gaw, ‘Dai MADU gun ai lit,’ nga nna n-gup aga hte tsun ai rai yang, ngai gaw shi hte shi a dinghku masha ni hpe ari jaw na we ai.

³⁵Shing nga na malai, ‘Dai MADU kaning nga mahtai jaw a ta? Dai MADU hpa lam tsun nu ta?,’ nga nna shi a manang ni hte jinghku ni langai hte langai shada da san mai nga ai.

³⁶Dai rai nna, shanhte gaw, ‘Dai MADU gun ai lit,’ ngu ai ga hpe galoi mung tsun lu na n rai; hpa majaw nga yang, marai langai ngai dai ga tsun a yang gaw, nye a mungga hpe shi a lit teng teng ngai shatai na we ai. Amyu masha ni gaw Chyahtum Chyalai N-gun Rawng ai dai MADU ahkrung nga ai Karai Kasang ngu ai shanhte a Karai Kasang a mungga ni hpe jashai kau manu ai.

³⁷Yeremia e, ‘Dai MADU gaw nang hpe kaning nga mahtai jaw nit ta? Dai MADU kaning nga tsun a ta?,’ nga nna myihtoi ni hpe san mai nga ai.

³⁸Shanhte gaw nye a hkang da ai ga hpe n madat ai sha, ‘Dai MADU a lit,’ ngu ai ga hpe lang nga ma ai rai yang,

³⁹ngai gaw shanhte hpe teng teng magawn la nhtawm shanhte a kaji kawa ni hpe ngai jaw da ai mare hte shanhte hpe ngai kaw nna tsan ai shara de kabai kau na we ai, ngu nna shanhte hpe tsun u.

⁴⁰Ngai gaw htani htana n malap kau lu ai kaya kahpa lam hte jahpoi jahpyak lam shanhte a ntsa e shapraw dan na we ai,” ngu nna tsun wu ai.