Read Jinghpaw Common Language Bible 2009 YEREMIA 24 Bible Online

YEREMIA 24 - Jinghpaw Common Language Bible 2009 bible

YEREMIA 24

¹Dai MADU gaw Nawku Htingnu ndaw e tawn da ai lakum si rawng ai ka lahkawng ngai hpe madun dan ai. (Dai gaw Yehoiakim a kasha Yuda Hkawhkam Yehoiahkin hte Yuda mung na up hkang du salang ni, lasama ni hte kung kyang ai bungli galaw masha ni hte rau Yerusalem mare kaw nna Babelon mung de Babelon Hkawhkam Nebuhkadneza woi mat wa ai hpang byin ai lam rai nga ai.)

²Shawng na ka hta shawng myin sai lakum si ni hte kaja ai lakum si ni rawng nga ai. Kaga langai mi hta chyawm gaw n sha mai ai lakum si ni hte n kaja ai lakum si ni rawng nga ai.

³Dai hpang dai MADU gaw ngai hpe, “Yeremia e, nang hpa mu n ta?,” nga nna san ai. Ngai gaw, “Lakum si ni hpe mu nngai; kaja ai lakum si ni gaw grai kaja nna, n kaja ai lakum si gaw sha n mai hkra, n kaja nga ai,” ngu nna htan nngai.

⁴Dai rai nna, dai MADU gaw ngai hpe,

⁵“Dai MADU Israela a Karai Kasang ngai nan Babelon mungdan de woi la hkrum sai amyu masha ni gaw ndai kaja ai lakum si ni zawn tai na ngai nawn nga nngai; ngai gaw shanhte hpe matsan dum ai hte lakawn la na nngai.

⁶Ngai gaw shanhte hpe sin yu nga nna, ndai mungdan de bai woi wa na nngai. Ngai gaw shanhte hpe sharawt nna gang kadawng kau na n rai. Shanhte hpe ngai hkai da nna baw kau na we ai n rai.

⁷Ngai gaw dai MADU rai nga nngai hpe chye na matu, chye mayu ai myit shanhte hpe ngai jaw na nngai. Shaloi, shanhte gaw myit masin mahkra hte ngai hpang de kayin wa na mara ai majaw, shanhte gaw nye a amyu masha ni tai nna, ngai mung shanhte a Karai Kasang tai na nngai.

⁸“Yuda Hkawhkam Zedekia, shi hte rau nga ai mung masa ninghkrin ni hte ndai mung hta naw ngam nga ai Yerusalem mare masha ni hte Egutu mung de na sa htawt nga ai ni hpe dai MADU ngai nan n sha mai hkra, n kaja ai lakum si ni zawn shanhte yawng hte hpe ngai shatai kau na mawe ai.

⁹Mungkan ga na masha amyu baw ni yawng hkrit gari mat hkra, dai zawn re ai tsin-yam tsindam shanhte a ntsa e ngai shapraw na we ai. Ngai shanhte hpe shabra kau ai shara shagu hkan e, mung masha ni gaw shanhte hpe mani asawng ai, shatu asan ai, jahpoi jahpyak ai hte shanhte a amying mung dagam dala ga tsun hkrum na mara ai.

¹⁰Shanhte hte shanhte a kaji kawa ni hpe ngai jaw da sai mungdan hta shanhte hta na langai mi mung n ngam mat hkra shanhte hpang de hpyen majan, kawsi hpang gara ai hte ana zinli ni shabyin dat na nngai,” ngu nna tsun ai.