Read Jinghpaw Common Language Bible 2009 YEREMIA 25 Bible Online

YEREMIA 25 - Jinghpaw Common Language Bible 2009 bible

YEREMIA 25

¹Yuda Hkawhkam Yoshia a kasha Yehoiakim hkaw dung ai mali ning ngu na shaning hta, Yuda amyu masha ni yawng hte seng ai dai MADU kaw na mungga ngai lu la nngai. (Dai gaw Babelon mung e Hkawhkam Nebuhkadneza hkaw dung ai nnan na shaning hta rai nga ai.)

²Ngai gaw Yuda amyu masha ni hte Yerusalem amyu masha ni hpe,

³“Yuda Hkawhkam Amon a kasha Yoshia hkaw dung ai shi masum ning kaw nna dai ni du hkra hkun masum ning tup, dai MADU ngai hpe hkang da ai hte maren, shi tsun ai ga nang hpe tsun dan na matu, ngai galoi mung n yit n hprai ai sha htawn tsun lai wa ni ai. Rai ti mung, nang gaw n madat ai hte myit n lawm nga ndai.

⁴Dai MADU gaw shi a shangun ma ni rai nga ai myihtoi ni hpe nang hpang de matut shangun dat ti mung, nang gaw n madat n mara ai hte hpa zawn n nawn kau ya nga ndai.

⁵Shanhte gaw nang hpe dai na a n hkru ai asak hkrun lam hte nang galaw nga ai n shawp n kap ai amu ni kaw na kayin wa na matu tsun nga ai. Dai MADU gaw na a nji nwa ni hpe prat tup jaw lup madu sha lu na nang hpe jaw da sai mungdan hta nang matut shanu nga lu na rai ndai.

⁶Shanhte gaw nang hpe kaga hpara ni hpe n nawku na matu mung, na a lata hte galaw tawk ai hpara sumla ni hpe nawku ai lai hte dai MADU hpe n shapawt na matu mung tsun shadum da nga sai. Nang gaw dai MADU a ga hpe madat mara ai rai yang, shi nang hpe ari jaw na n rai.

⁷Rai ti mung, nang gaw shi a ga hpe n madat nga ai hpe dai MADU shi hkum nan tsun ai, shing rai na malai, nang gaw na a lata hte tawk ai hpara sumla ni hte shi hpe pawt shangun nit dai; na a ntsa e shi a ari du shangun nga ndai.

⁸“Shing rai nang gaw shi a ga hpe n madat nit dai majaw, Chyahtum Chyalai N-gun Rawng ai dai MADU gaw,

⁹‘Ngai gaw dingdung maga de na amyu masha ni yawng hte hpe nye a shangun ma Babelon Hkawhkam Nebuhkadneza a matu shangun dat ya na nngai. Ngai gaw Yuda mung hte de a mung masha ni mahkra hte grup yin e nga ai amyu baw ni mahkra hpe mung, gasat kau na matu shanhte hpe woi sa wa na nngai. Shing rai ngai gaw ndai amyu masha ni hte makau grup yin na amyu baw ni hpe lung gasat kau ai hte dai shara ni gaw prat dingsa katsi katsang shara, hkrit hpa hte yu kajawng mat na zawn re ai shara shatai kau na nngai. Dai MADU ngai nan tsun ni ai.

¹⁰Ngai gaw shanhte a kabu gara jahtau ai nsen, mani pyaw ai nsen, kabu gara ai hkungran poi lusha sha ai nsen ni hpe jasim kau na we ai. Shanhte a pyengdin ni a matu wan sau lu na mara ai n rai, dai sha n-ga, lusha hpa mung nga na ra ai n rai.

¹¹Dai mungdan ting gaw shingran sharat katsi katsang tai mat wa nna yu kajawng mat na zawn re ai shara tai mat na ra ai, shing rai grup yin mungdan ni yawng gaw Babelon Hkawhkam wa hpe shaning sanit shi ning tup galaw daw jau na mara ai.

¹²Dai hpang, ngai gaw Babelon amyu masha ni hte de a hkawhkam wa hpe shanhte galaw ai yubak mara a majaw, ari jaw na we ai. Ngai gaw dai mungdan hpe jahten sharun kau nna prat dingsa katsi katsang shara shatai kau na we ai.

¹³Ngai gaw Yeremia hku nna tsun ai shaloi, ndai laika buk hta ka matsing da ai tsin-yam tsindam mahkra hte amyu baw ni hpe ngai jahkrit shama na ngu ai hte maren, Babelon mung masha ni hpe ru yak tsin-yam tsindam mahkra hte ari jaw na we ai.

¹⁴Ngai gaw Babelon amyu masha ni hpe shanhte galaw dan sai amu hte maren, matai dawp na nngai, shing rai amyu baw ni hte hkawhkam kaba ni gaw shanhte hpe mayam shatai kau na ma ai,’” ngu nna tsun wu ai.

¹⁵Dai MADU Israela a Karai Kasang gaw ngai hpe, “Ndai sabyi gawm hta nye a pawt sindawng ai hte jahpring da u. Dai hpe ngai nang hpe shangun dat ai masha amyu baw ni yawng hpang de la sa nna, dai gawm kaw na shanhte hpe lu shangun u.

¹⁶Shanhte gaw dai gawm kaw nna lu ai shaloi, shanhte hpang de ngai shangun dat ai hpyen majan a majaw, shanhte gaw ndi nda rai nna ndum ndam rai nang hkawm wa na mara ai,” ngu nna tsun wu ai.

¹⁷Dai re ai majaw, ngai gaw dai gawm hpe dai MADU a lata kaw nna la nhtawm MADU ngai hpe sa shangun dat ai masha amyu baw ni yawng hpang de dai hpe sa jaw ai hte dai gawm kaw nna shanhte hpe lu shangun se ai.

¹⁸Yerusalem hte Yuda mare ni yawng, de a hkawhkam ni hte mung up hkang du salang ni yawng hte gaw arau sha dai gawm kaw na lu nga ma ai. Shanhte gaw katsi katsang shara, hkrit hpa shara hte yu kajawng na zawn re ai shara tai masai; amyu masha ni mung shanhte a mying hpe ya du hkra naw galaw nga ai arawn alai hte maren dagam dala shara tai nga ai.

¹⁹Ndai gaw gawm kaw na lu na kaga masha amyu baw ni yawng a mying jahpan ni rai nga ai: Egutu hkawhkam, shi a du salang ni hte ningbaw ni; Egutu masha ni yawng hte Egutu mung hta nga ai maigan masha ni yawng; Uza mung na hkawhkam ni yawng; Ashkelon na Hpilisti mare ni yawng a hkawhkam ni, Gaza, Ekron hte naw ngam nga ai Ashdod na hkawhkam ni yawng; Edom, Moba hte Amon mung na masha ni yawng; Turu hte Sidon mung na hkawhkam ni yawng; Ka-ang Panglai zunlawng mungdan ni a hkawhkam ni yawng; Dedan, Tema hte Buza mare ni; kara kadun rep ai amyu masha ni yawng; Arabi hkawhkam ni yawng; nam mali kata na amyu bawsang ni a hkawhkam ni yawng; Zimri, Elam hte Medi hkawhkam ni yawng; dingdung maga de nga ai ni ai tsan ai kaw na hkawhkam ni yawng. Ginding aga ntsa e nga ai masha amyu baw shagu gaw dai gawm kaw na la lu na rai ma ai. Yawng a jahtum e, Babelon hkawhkam wa mung dai gawm kaw na lu na ra ai.

²⁷Dai hpang, dai MADU gaw ngai hpe, “Chyahtum Chyalai N-gun Rawng ai dai MADU Israela a Karai Kasang ngai nan shanhte hpang de shangun dat ai hpyen majan a majaw shanhte lu nang, madawn ai hte kataw mat nna n lu sharai rawt mat hkra dai ntsin lu na matu ngai hkang da ni ai lam shanhte hpe tsun u.

²⁸Shanhte gaw lu na matu na a lata kaw nna dai gawm hpe n la hkraw ai rai yang, Chyahtum Chyalai N-gun Rawng ai dai MADU gaw shanhte dai kaw na lu nan lu ra ai ngu, shanhte hpe tsun u, nga ai.

²⁹Nye a mare hta jahten sharun ai amu hpe ngai shawng hpang dat na nngai. Shanhte gaw ari jaw ai n hkrum na ga ai nga nna shanhte myit nawn nga ma ni? N rai law, ngai gaw ga ntsa ting hta nga ai masha amyu baw ni yawng a ntsa e hpyen majan shabyin dat na rai nga nngai majaw, shanhte mung ari hkrum sha na mara ai. Chyahtum Chyalai N-gun Rawng ai dai MADU ngai nan tsun ni ai.

³⁰Yeremia e, nang gaw ngai tsun ai lam yawng mayawng hte hpe hkaw tsun na rai nga ndai. Nang gaw ndai amyu masha ni hpe, ‘Dai MADU gaw sumsing lamu kaw na shabam ai hte sumsing lamu a tsaw ai shara kaw nna mu shangoi dat na ra ai. Shi gaw shi a amyu masha ni hpe shabam nna, sabyi si kabye ai wa zawn marawn jahtau na ra ai. Ginding aga ntsa na masha shagu hte gaw shi a nsen hpe na na mara ai,

³¹shi a ngoi kadu ai nsen gaw mungkan ga a jahtum de du hkra hpungtang kashaw mat wa na ra ai. Dai MADU gaw masha amyu baw ni hte amu rawng nga ai. Shi gaw tara jeyang na matu amyu masha ni yawng hpe woi la na ra ai, n shawp n kap ai ni hpe sat kau na ra ai, nga nna Dai MADU tsun nu ai,’” ngu nna tsun lu na rin dai.

³²Chyahtum Chyalai N-gun Rawng ai dai MADU gaw amyu mi a hpang amyu mi a ntsa e tsin-yam tsindam du nga ai mung, ginding aga a jahtum maga de nna laru kaba mung majaw lung wa na ra ai nga nna mung tsun ai.

³³Dai shani e, dai MADU sat kau ai moi mang ni gaw ginding aga maga mi kaw nna maga mi de du hkra, jawng taw nga na mara ai. Shanhte a matu kadai mung sharung shayawt na ma ai n rai, shanhte hpe kadai mung hpai la nna lup makoi kau na mara ai n rai. Dai ni gaw namhpun hpe sumpum da ai zawn ga ntsa e taw nga na mara ai.

³⁴Ningbaw ni e hkrap nga mu, nye a amyu masha ni hpe bau rem ai ni e, ja ja marawn hkrap nga mu! Yawn hkyen sharung shayawt ai hte ga nhpu e galwi nga mu. Nang hpe sat kau na aten du ra ai rai nna, sagu la ni hpe zawn nang sat kau ai hkrum na rai ndai.

³⁵Na a matu hprawng lawt lu na lam hpa mung nga na n rai.

³⁶Dai MADU gaw shi a pawt sindawng ai hta na a amyu baw hpe jahten kau nu ai hte na a ngwi pyaw sim sa ai mungdan hpe katsi katsang di kau nu ai majaw nang yawn madai nga ndai hte myit ru yawn hkyen ai hte hkrap sharung nga ndai.

³⁷

³⁸Hkanghkyi gaw shi a lungpu hpe kau da ai zawn, dai MADU gaw shi a amyu masha ni hpe kau da nu ai. Hkrit kajawng hpa hpyen majan hte dai MADU a pawt sindawng ai gaw dai mungdan hpe katsi katsang re ai nam mali shara shatai kau nu ai.