Read Jinghpaw Common Language Bible 2009 YEREMIA 26 Bible Online

YEREMIA 26 - Jinghpaw Common Language Bible 2009 bible

YEREMIA 26

¹Yoshia a kasha Yehoiakim Yuda hkawhkam tai wa ai kade n na yang,

²Dai MADU gaw ngai hpe, “Nawku Htingnu wang kata e tsap let Yuda mare ni kaw na du sa wa ai amyu masha ni nawku na matu ngai nang hpe hkang da ni ai lam yawng shanhte hpe htawn tsun u. Ngai tsun shangun ai ga hpa hpe mung hkum shangam kau et.

³Amyu masha ni gaw nye a ga hpe madat let shanhte a n hkru ai lam ni kaw nna mahkoi kau da dam ma nhten? Shanhte hkan sa lu ai rai yang, shanhte a n hkru n shawp ai arawn alai ni yawng a matu shanhte a ntsa e ngai shatawng shada da ai jahten shabyak lam hte seng nna nye a myit hpe ngai galai kau na we ai,” ngu nna tsun wu ai.

⁴Dai MADU gaw amyu masha ni hpe tsun shana na matu ngai hpe, “Ngai nang hpe sharin achyin ya sai matsun maroi lam hta hkan sa nna nye a ga hpe nang madat mara nga u,

⁵nang hpang de shangun dat ya ai nye a shangun ma ni rai nga ai myihtoi ni a n-gup aga ni hpe tut nawng myit maju jung nga na dai MADU ngai nan hkang da ni ai. Rai ti mung shanhte tsun ai ga ni hpe nang galoi mung n madat yu ndai.

⁶Nang gaw matut nna n madat n mara ai rai yang, Shilo hpe ngai galaw kau ai zawn ndai Nawku Htingnu hpe mung ngai di kau na we ai. Ndai mungkan ga na masha amyu baw ni yawng hte gaw ndai mare a amying hpe dagam dala shara zawn lang na mara ai,” ngu nna tsun wu ai.

⁷Hkinjawng ni, myihtoi ni hte amyu masha ni yawng hte gaw dai lam ni hte seng nna Nawku Htingnu kata e ngai tsun ai ga ni hpe na ma ai,

⁸dai MADU ngai hpe tsun shaga na matu hkang dat ai ga yawng tsun ngut ai hte rau, shanhte gaw ngai hpe gang magra da ai hte ning nga jahtau tsun ma ai: “Ndai lam a majaw nang gaw sat kau hkrum na ging nga ndai!

⁹Ndai Nawku Htingnu gaw Shilo zawn tai mat nna, ndai mare gaw masha kadai n nga ai jahten shabyak kau hkrum na ra ai ngu nna dai MADU a mying hta hpa majaw nang tsun n ta?,” ngu nna san ma ai. Shaloi amyu masha ni gaw ngai hpe shinggrup da nga ma ai.

¹⁰Yuda ningbaw ni gaw byin lai wa sai lam hpe na ma ai shaloi, shanhte gaw hkawhkam htingnu kaw nna dai MADU a Nawku Htingnu de tin tin sa wa nhtawm Chyinghka Ningnan hta shanhte wa nga nga ma ai.

¹¹Dai hpang hkinjawng ni hte myihtoi ni gaw ningbaw ni hte amyu masha ni hpe, “Anhte a mare hpe ninghtan shai ai hku shi tsun nu ai majaw ndai wa gaw si ging ai wa rai nga ai. Nanhte gaw shi a lam hpe nanhte a na hte nan shi a nsen hpe na manit dai,” ngu nna tsun ma ai.

¹²Dai hpang, ngai gaw, “Nanhte na ai ndai Nawku Htingnu hte ndai mare hpe ninghtan shai ai hku lam shagu htawn tsun na, dai MADU gaw ngai hpe shangun dat nga sai.

¹³Nang shamu shamawt ai arawn alai lam hte nang galaw nga ai amu ni hpe nang galai shai kau nna, dai MADU na a Karai Kasang a hkang da ai ga madat lu na rin dai. Dai zawn nang hkan galaw ai rai yang, nang hpe shi jaw na ari hpe shi tsun da ti mung, dai jahten shabyak ai lam hpe shi myit galai kau na ra ai.

¹⁴Nye a matu chyawm gaw, na a lata hta rai nga nngai. Nanhte myit yu nna rap ra ai hte ding man ai hku ngai hpe galaw mi.

¹⁵Rai ti mung, ndai amu hpe atsawm chye da mu; nanhte ngai hpe sat ai rai yang, nanhte hte ndai mare masha ni mara lu na marin dai; hpa majaw nga yang, ndai lam shadum jahprang na matu, dai MADU gaw ngai hpe shangun dat nga ai,” ngu nna tsun ni ai.

¹⁶Dai hpang, ningbaw ni hte amyu masha ni gaw hkinjawng ni hte myihtoi ni hpe, “Ndai wa gaw dai MADU anhte a Karai Kasang a amying hta anhte hpe tsun mi ai; shi si ging ai wa n rai,” nga nna tsun ma ai.

¹⁷Dai hpang, myit su salang nkau mi gaw rawt tsap nna zup hpawng nga ai mung masha ni hpe,

¹⁸“Yuda Hkawhkam Hezekia hkaw dung ai shaloi, Morashi masha myihtoi Mihka gaw amyu masha ni yawng hte hpe myihtoi ga tsun let, Chyahtum Chyalai N-gun Rawng ai dai MADU gaw, ‘Ziun gaw hkauna galau ai zawn, galau kau hkrum na ra ai; Yerusalem gaw ga sumpum tai mat na ra ai, Nawku Htingnu kawng gaw nam maling tai mat na ra ai,’ ngu nna tsun nu ai.

¹⁹Hkawhkam Hezekia hte Yuda mung masha ni gaw myihtoi Mihka hpe n sat ai sha tawn da nga ai. Dai hku galaw na malai, Hezekia mung dai MADU hpe shagrau nna shi hpe hpyi nem wu ai. Dai MADU gaw shanhte hpe ari jaw na matu tsun mu ti mung, shi a myit galai kau wu ai. Ya anhte chyawm gaw anhte ni a ntsa e, hkrit hpa tsin-yam tsindam shadu la hkyen nga saga ai,” nga nna tsun ma ai.

²⁰(Kiriat Yerim mare na, Shemaia a kasha Uria ngu ai masha langai wa mi gaw dai MADU a amying gang nna ndai mare hte mungdan hpe lakap nna Yeremia tsun ai zawn myihtoi ga tsun wu ai.

²¹Hkawhkam Yehoiakim hte shi a hpyenla ni hte du salang ni gaw Uria hpe hpa tsun sai lam na ma ai, hkawhkam wa gaw shi hpe sat kau na shakut nga ai. Rai ti mung, Uria gaw dai lam hpe na wu ai; shi gaw hkrit gari ai hte Egutu mung de hprawng mat wa wu ai.

²²Rai tim Hkawhkam Yehoiakim gaw Akbora a kasha Elnahtan hte rau masha nkau mi Uria hpe sa woi la na matu Egutu mung de shangun dat wu ai.

²³Shanhte gaw shi hpe sa woi la nhtawm Hkawhkam Yehoiakim hpang de woi wa ma ai. Hkawhkam wa gaw shi hpe sat kau nna, shi a moi mang hpe shawa lup wa hta sa kabai kau ma ai.)

²⁴Rai ti mung, Shahpan a kasha Ahikam gaw ngai hpe karum la ai majaw, ngai gaw mung masha ni a lata de ap kau n hkrum ai hte sat kau ai mung n hkrum nga nngai.