Read Jinghpaw Common Language Bible 2009 YEREMIA 28 Bible Online

YEREMIA 28 - Jinghpaw Common Language Bible 2009 bible

YEREMIA 28

¹Dai shaning hta nan, Yuda Hkawhkam Zedekia hkaw dung hpang ai mali ning e shata manga hta, Gibeon mare na Azura a kasha myihtoi Hanania gaw Nawku Htingnu kata hta ngai hpe ga tsun wu ai. Shi gaw ngai hpe hkinjawng ni hte amyu masha ni a man e

²Chyahtum Chyalai N-gun Rawng ai dai MADU Israela a Karai Kasang ning nga tsun sai lam tsun wu ai: “Ngai gaw Babelon hkawhkam wa a daru magam n-gun hpe shadaw kau ni ai.

³Ngai gaw Hkawhkam Nebuhkadneza Babelon mung de la mat wa ai Nawku Htingnu sut gan ni yawng hpe ndai shara hta lahkawng ning laman e bai la wa na nngai.

⁴Ngai gaw Babelon mung de rim hkrum mat wa ai Yuda mung masha ni yawng hte hpawn Yuda Hkawhkam Yehoiakim a kasha Yehoiahkin hpe mung ndai shara de woi wa na nngai. Rai sa, ngai gaw Babelon hkawhkam wa a daru magam n-gun hpe shadaw kau ya na nngai. Dai MADU ngai nan tsun ni ai.”

⁵Dai hpang, Nawku Htingnu kata hta tsap nga ai hkinjawng ni hte mung masha ni yawng a man e ngai gaw Hanania hpe,

⁶“Mau na zawn re ai she rai sahka! Dai MADU gaw dai amu hpe galaw u ga, ngai myit mada nga nngai. Nawku Htingnu sut gan ni yawng hte bawng dung hkrum mat wa ai mung masha ni yawng hpe Babelon mung kaw nna shi bai woi wa na lam tsun ai na a myihtoi ga shi shadik ya na hpe ngai teng teng myit mada nga nngai.

⁷Rai ti mung, nang hte amyu masha ni ngai tsun ai ga madat mu.

⁸Nang hte nye a aten garai n du ai shawng e, moi shawng na myihtoi ni gaw masha amyu law law ni hte n-gun ja ai mungdan ni hta hpyen majan, kawsi hpang gara ai hte ana zinli ni byin pru wa na lam htoi da masai.

⁹Rai ti mung dai MADU gaw kaja wa teng teng myihtoi wa hpe shangun dat wu ai shaloi myihtoi wa a ga ni gaw dik wa nga ai zawn, myihtoi wa gaw ngwi pyaw sim sa lam hpe htoi yang, dai hpe chyu sha hkap la lu nga ai,” ngu nna tsun wu ai.

¹⁰Dai hpang, Hanania gaw nye a du na kandang hpe la kau ya nhtawm dai hpe adaw achyen rai hkra gang daw kau nu ai hte,

¹¹amyu masha ni yawng a man e, “Ndai gaw masha amyu baw ni yawng a du hta Hkawhkam Nebuhkadneza mara tawn da ai kandang hpe shi shadaw kau na ra ai; shi gaw dai amu hpe lahkawng ning laman shangut kau na ra ai nga nna dai MADU tsun da ai ga hpe tsun nu ai,” ngu nna tsun ai. Dai hpang, ngai pru mat wa nngai.

¹²Tawng marang mi lai mat ai hpang, dai MADU gaw ngai hpe

¹³Hanania hpang de ning ngu sa tsun na matu hkang dat wu ai: “Nang gaw hpun kandang hpe shadaw kau lu ti mung, de a shara hta hpri kandang hpe shi tawn da na ra ai, nga nna dai MADU tsun nu ai.

¹⁴Chyahtum Chyalai N-gun Rawng ai dai MADU Israela a Karai Kasang gaw ndai masha amyu baw ni yawng a ntsa e hpri kandang mara da ya na ra ai, shanhte gaw Babelon Hkawhkam Nebuhkadneza hpe daw jau na mara ai, nga nna tsun nu ai. Shi gaw nam na matse labye dusat ni pyi Nebuhkadneza hpe daw jau na mara ai nga nna dai MADU tsun nu ai,” nga ai.

¹⁵Dai hpang ngai gaw Hanania hpe ndai lam matut tsun ni ai, “Hanania e, madat u! Dai MADU gaw nang hpe shangun dat ai n rai; Nang gaw ndai amyu masha ni hpe masu ga tsun nna kam shangun nga ndai.

¹⁶Dai rai nna, nang gaw dai MADU hpe gumlau na matu amyu masha ni hpe tsun nit dai majaw, shi gaw nang hpe dawm kau na ra ai; dai ning na shaning garai n htum yang, nang si na ndai ngu nna dai MADU shi nan tsun sai,” ngu wu ai.

¹⁷Hanania gaw dai shaning na shata sanit hta si mat wa sai.