Read Jinghpaw Common Language Bible 2009 YEREMIA 29 Bible Online

YEREMIA 29 - Jinghpaw Common Language Bible 2009 bible

YEREMIA 29

¹Ngai gaw Hkawhkam Nebuhkadneza Yerusalem kaw nna Babelon mung de woi wa ai bawng dung masha ni rai nga ai hkinjawng ni, myihtoi ni, amyu masha ni hpe up hkang ai salang ni hte kaga masha ni yawng hpang de laika ka dat nngai.

²Hkawhkam Yehoiahkin hte shi a kanu, hkawhkam htingnu na mung bawng salang ni, Yuda mung hte Yerusalem na ningbaw ni, lasama ni hte kung kyang ai ndup masha ni rim hkrum mat wa ai hpang ngai ka dat nngai.

³Yuda Hkawhkam Zedekia gaw Babelon Hkawhkam Nebuhkadneza hpang de shangun dat ai Shahpan a kasha Elasa hte Hilkia a kasha Gamaria yan a lata hta ngai laika ya dat nngai. Dai laika hta ning nga rawng nga ai:

⁴“Chyahtum Chyalai N-gun Rawng ai dai MADU Israela a Karai Kasang gaw Yerusalem kaw nna Babelon mung de bawng dung hkrum na matu Nebuhkadneza hpe ahkang jaw da sai dai amyu masha ni yawng hpe tsun dan ma ai lam ning nga nga ai:

⁵‘Dum nta ni hpe gaw gap nna de nga mu. Sun ni hkai nna dai sun hta hkai da ai lusha ni hpe di sha mu.

⁶Num la nna kashu kasha shaprat mu. Nanhte a kashu kasha ni hpe dinghku de ya nna shanhte mung kashu kasha shaprat mu ga. Nanhte gaw mayat maya ai lam hta jat wa lu nna dai hta hkum yawm wa myit.

⁷Ngai nanhte hpe bawng dung shangun ai mare ni hta mai kaja ai amu magam a matu shakut shaja nga mu. Shanhte ngamu ngamai wa ai rai yang, nanhte mung ngamu ngamai na ra ai majaw, shanhte a matu ngai kaw akyu hpyi nga mu.

⁸Nanhte kaw hkan nga nang ai myihtoi ni hte shanhte chyu sha du na ra ai aten a lam hpe lu tsun dan ai nga nna tsun ai kaga masha ni hku nna mi rai tim, nanhte hkum nan masu hkalem ai n hkrum myit ga, dai MADU Israela a Karai Kasang ngai nan nanhte hpe shadum jahprang sadi jaw nga nngai. Shanhte a yup mang ni hpe hkum kam myit.

⁹Shanhte gaw nye a amying gang nna masu magaw ai lam hkrai, nanhte hpe tsun nga ma ai. Ngai gaw shanhte hpe shangun dat ai n rai. Dai MADU ngai nan dai ga hpe tsun ni ai.”

¹⁰Dai MADU gaw, ‘Babelon mung hta sanit shi ning ladu hkrum ai shaloi, nanhte a matu nye a myit tsang ai lam ngai madun dan na mawe ai; nanhte hpe dum nta de bai woi wa na ngu ai nye a ga sadi hpe shadik shatup na nngai.

¹¹Nanhte a matu ngai hta rawng ai yaw shada lam ni hpe ngai chyu sha chye nngai, dai yaw shada lam gaw tsin-yam tsindam n rai, ngamu ngamai shangun na lam rai nga ai; nanhte myit mada nga ai du na ra ai aten hte seng ai yaw shada lam ni rai nga ai.

¹²Dai hpang, nanhte gaw ngai hpe shaga na myit dai. Nanhte gaw ngai kaw sa nna akyu hpyi na myit dai. Ngai mung nanhte hpe htan ya na nngai.

¹³Nanhte gaw ngai hpe myit masin mahkra hte hkan tam myit dai majaw, ngai hpe mu tam na marin dai.

¹⁴Rai sa, nanhte ngai hpe mu tam na marin dai; ngai gaw nanhte hpe nanhte a mungdan hta bai wa shanu shangun na nngai. Ngai gaw nanhte hpe mungdan shara shagu hkan na hte nanhte hpe ngai shaden shabra kau dat ai shara shagu hkan na shinggyin la ai hte nanhte hpe shaden shabra kau ai mungdan kaw na ngai bai woi wa na nngai, nga nna tsun ai. Dai MADU ngai nan tsun ni ai,’ nga ai.

¹⁵“Dai MADU gaw nanhte a matu Babelon mung e myihtoi ni hpe san da ya mi ai nga nna nanhte tsun myit dai.

¹⁶Dawi up hkang sai mungdan hpe up hkang ai hkawhkam wa hte dai mare na amyu masha ni ngu ai nanhte hte rau bawng dung n hkrum yu ai nanhte a makyin jinghku ni yawng hte lakap nna dai MADU tsun ai ga hpe madat la mu.

¹⁷Chyahtum Chyalai N-gun Rawng ai dai MADU gaw, ‘Ngai gaw shanhte a ntsa e hpyen majan, kawsi hpang gara ai hte ana zinli shapraw na nngai; n sha mai hkra yat mat ai lakum si ni zawn ngai shanhte hpe shatai kau na nngai.

¹⁸Ngai gaw shanhte hpe hpyen majan, kawsi hpang gara hte ana zinli ni hte hkan shachyut na nngai; mungkan ga na masha amyu baw ni yawng shanhte hpe mu mada ai hte hkrit kajawng mat na mara ai. Shanhte hpe ngai shaden shabra kau ai shara shagu hkan amyu masha ni gaw shanhte hta byin lai mat wa sai lam ni a majaw mau kajawng ai hte hkrit gari wa na mara ai. Masha amyu masha ni gaw shanhte hpe asawng asang di ai hte shanhte a amying hpe dagam dala ga zawn lang na mara ai.

¹⁹Nye a shangun ma ni rai nga ma ai myihtoi ni hku nna shanhte hpe mungga matut manoi tsun dat nga ti mung, shanhte n madat n mara ma ai majaw, ndai lam shanhte hta byin wa na ra ai. Shanhte n madat n mara ma ai.

²⁰Babelon mung de ngai shangun dat nna bawng dung hkrum nga ai nanhte e, dai MADU ngai hpa tsun ai hpe madat la mu,’ ngu nna tsun ai.

²¹Chyahtum Chyalai N-gun Rawng ai dai MADU Israela a Karai Kasang gaw shi a amying gang let masu hkalem ga hte nanhte hpe tsun nga ai Kolaia a kasha Ahab hte Masea a kasha Zedekia yan hte lakap nna tsun wu ai. Shi gaw Babelon Hkawhkam Nebuhkadneza a lata hta ap kau na ra ai hte nanhte a man e shanhte hpe sat kau na ra ai, nga nna dai MADU tsun ai.

²²Yerusalem kaw nna Babelon mung de woi la hkrum ai bawng dung amyu masha ni gaw marai langai ngai hpe dagam dala ga tsun mayu ai shaloi, shanhte gaw, ‘Babelon hkawhkam wa e jahkrung ju kau hkrum ai Zedekia hte Ahab yan zawn dai MADU gaw nang hpe shatai u ga!,’ nga nna tsun na mara ai.

²³Shanhte gaw hkrit hpa yubak ni rai nga ai numshaw ai amu hte dai MADU a amying gang let masu hkalem ga ni tsun ai mara ni a majaw, dai gaw shan a matu hpang jahtum na lam tai na mara ai. Dai amu gaw dai MADU a ra sharawng ai lam hte ninghtan shai nga ai; shan galaw sai amu hpe shi chye nga ai, shan hte ninghtan shai ai hta shi gaw sakse langai mi rai nga ai. Dai MADU nan dai ga tsun nu ai,” ngu nna tsun ai.

²⁴Chyahtum Chyalai N-gun Rawng ai dai MADU Israela a Karai Kasang gaw Nehelam masha Shemaia a matu mungga ngai hpe jaw ya ni ai, dai wa gaw shi a amying gang let, Yerusalem amyu masha ni mahkra hpe mung, Masea a kasha hkinjawng Zehpania hte kaga hkinjawng ni mahkra hpang de mung shagun dat wu ai. Zehpania hpe Shamaia shagun dat ai laika gaw ndai hku rai nga ai.

²⁶“Dai MADU gaw Yehoiada a malai nang hpe hkinjawng aya dang da nit dai; nang gaw ya kaw nna Nawku Htingnu kata hta hkinjawng kaba wa rai nga nit dai. Myihtoi tai masu ai mana shagu hpe shi a du hta hpri saidawng hte gyit kawan da na gaw, na a amu rai nga lit dai.

²⁷Amyu masha ni hpe myihtoi zawn nga nna shaga nga ai Anahtot masha Yeremia hpe dai lam nang hpa majaw n daru kau nga n ta?

²⁸Babelon mung hta bawng dung ai amyu masha ni gaw dai mung hta aten na na nga ra ai hte dum nta ni hpe gaw gap nna de nga mu, sun ni galaw nna tu kaba wa ai namsi ni sha mu, nga nna tsun nu ai majaw shi hpe jahkring kau lu na rai nga ai,” ngu nna tsun wu ai.

²⁹Zehpania gaw ngai hpe laika hti dan ai hte

³⁰dai MADU gaw ngai hpe

³¹Babelon mung e bawng dung nga ai ni yawng hpang de Shemaia hte lakap nna ndai mungga hpe shagun dat na matu tsun ni ai: “Dai MADU ngai gaw Shemaia hte shi a aru arat ni mahkra hpe ari jaw na we ai. Ngai shi hpe n shangun ti mung, myihtoi wa zawn nanhte hpe shi htoi nu ai; shi gaw nanhte hpe masu hkalem ga ni hte kam shangun nu ai. Nanhte hta shi a aru arat ni pra na mu ai n rai. Shi gaw ngai hpe gumlau na matu shanhte hpe tsun mu ai majaw nye a amyu masha ni gaw ngai galaw na mai kaja ai amu ni hpe mu lu na matu shi hkrung nga lu na ra ai n rai. Dai MADU ngai nan tsun ni ai.”