Read Jinghpaw Common Language Bible 2009 YEREMIA 3 Bible Online

YEREMIA 3 - Jinghpaw Common Language Bible 2009 bible

YEREMIA 3

¹Dai MADU gaw, “Lasha langai ngai gaw shi a madu jan hpe jahka kau nna, num dai gaw shi kaw na pru mat wa ai hte kaga masha wa a madu jan tai ai rai yang, shi gaw dai numsha hpe bai la lu na n rai. Dai zawn re ai amu gaw lamu ga hpe tsep kawp awu asin di nga ai. Rai ti mung, Israela e, nang chyawm gaw sumtsaw law law lu yu nga ndai, ya chyawm gaw nang ngai hpang de nhtang wa mayu nga nit hka!

²Kawng pungding ni hpe sharawt mada yu u. Shawa num zawn nang n galaw yu ai shara mi nga nga a ni? Arab masha gaw zaibru jang e lagyim ala nga ai zawn, nang gaw nmaw lam makau dingyang hkan sumtsaw ni hpe ala nga ndai. Nang gaw lamu ga hpe shawa num amu hte awu asin di kau nga nit dai.

³Shing re ai lam ni a majaw, marang n htu mat ai hte ginhtawng nnan shang wa yang na marang mahpawng n htu mat nga ai. Nang gaw shawa num langai zawn sha rai nga ndai; nang hta kaya kahpa myit hpa mung n rawng nga ndai.

⁴“Ya chyawm gaw, nang ngai hpe, ‘Nang gaw nye wa rai nga ndai, ngai naw kaji ai ma aten kaw nna nang ngai hpe tsaw ra nga nit dai.

⁵Nang gaw tut nawng masin pawt ai n rai; nang gaw ngai hpe htani htana mana shachyoi nga ai n rai,’ ngu nna tsun ai. Israela e, dai hku nang tsun nit dai, rai ti mung nang dang galaw ai n hkru ai amu yawng hpe nang galaw ndai.”

⁶Yoshia hkawhkam tai nga yang, dai MADU gaw ngai hpe, “Israela ngu ai sadi n dung ai numsha gaw kaning re ai amu galaw nu ai hpe nang mu nit ni? Shi gaw ngai kaw na kayin mat wa nhtawm kawng shagu a ntsa hte tsit lali ai hpun npu shagu hta shawa num zawn amu galaw nu ai.

⁷Shi gaw ndai amu yawng galaw ngut ai hpang, ngai hpang de kaja wa nhtang wa na, ngai myit nawn kau nngai. Rai ti mung, shi nhtang wa ai n rai, sadi n dung ai shi a kana Yuda gaw dai lam yawng hpe mu nu ai.

⁸Shi gaw ngai kaw na kayin mat wa nhtawm shawa num tai mat sai majaw ngai gaw Israela hpe jahka kau nhtawm tsan tsan de sa kau dat ai hpe Yuda wa mung mu nu ai. Rai ti mung, Israela a sadi n dung ai kana Yuda gaw hkrit ai n rai. Shi mung shawa num tai wa nhtawm,

⁹loi mi mung kaya n chye mat nu ai. Shi gaw lamu ga hpe awu asin di nga ai; nlung hte hpun ni hpe nawku ai lai hku nna numshaw lashaw amu shut hpyit nga wu ai.

¹⁰Ndai amu ni yawng ngut boi ai hpang, Israela a sadi n dung ai kana, Yuda chyu sha ngai hpang de nhtang wa na matu jahpai chyai nga ai; shi gaw myit matu n ding nga ai. Dai MADU ngai nan tsun ni ai.”

¹¹Dai hpang, dai MADU gaw ngai hpe Israela gaw shi kaw na kayin mat wa manu tim, shi gaw sadi n dung ai Yuda hta grau nna kaja na matu sakse madun dan nu ai, nga nna tsun sai.

¹²Shi gaw Israela hpe ning ngu sa tsun na matu ngai hpe tsun wu ai: “Sadi n dung ai Israela e, ngai hpang de nhtang wa marit. Ngai gaw matsan chye dum nga nngai, masin pawt na nngai n rai; ngai gaw nang hpe htani htana apawt nga na nngai n rai.

¹³Nang gaw mara lu nga ndai, nang gaw dai MADU na a Karai Kasang hpe gumlau kau nit dai hpe chyu sha yin la u. Nang gaw tsit lali ai hpun npu shagu hta maigan karai ni hpe na a tsaw ra myit jaw ya nhtawm nye a hkang da ai ga ni hpe nang n madat kau sai lam ni hpe yin la u. Dai MADU ngai nan tsun ni ai.

¹⁴“Sadi n dung ai amyu masha ni e, nhtang wa marit; nang hpe ngai madu nngai. Ngai gaw nanhte hta na marai langai mi hpe mare shagu hta na mung, amyu lakung shagu na marai lahkawng hpe mung la na nngai, ngai gaw nang hpe Ziun Bum de woi nhtang wa na nngai.

¹⁵Ngai gaw nye a ga madat mara chye ai mung du ni nanhte hpe jaw na nngai, shanhte gaw nang hpe hpaji byeng-ya hte mung, chye na hkawn hkrang ai nyan hte mung up na mara ai.

¹⁶Dai hpang, nanhte gaw dai mungdan hta law htam wa myit dai shaloi, amyu masha ni gaw nye a Ga Shaka Sumpu hte seng ai lam galoi mung tsun na mara ai n rai. Shanhte gaw de a lam hte seng nna mung, dai hpe adum nga na matu mung, galoi mung myit yu na mara ai n rai; shanhte gaw dai hpe pyi ra na n rai, shanhte gaw kaga langai mi hpe mung galaw na mara ai n rai.

¹⁷Dai aten du ai shaloi, Yerusalem gaw ‘Dai MADU a Tingnyang,’ ngu nna shamying na mara ai; Masha amyu baw ni yawng mung ngai hpe nawku na matu sa zup wa na mara ai. Shanhte gaw du ja ai hte n hkru ai myit masin hte maw mawn ai lam hpe galoi mung hkan galaw na ma ai n rai.

¹⁸Israela gaw Yuda hte matut nna shanhte gaw dingdung maga na mungdan hta bawng dung hkrum nga ai kaw na wa nhtawm prat dingsa madu nga na matu na a nji nwa ni hpe ngai jaw da sai lamu ga de nhtang wa na mara ai.

¹⁹Dai MADU gaw, “Israela e, ngai gaw nang hpe nye a kasha zawn hkap la mayu nngai ngai gaw nang hpe mungkan ting hta awng sharawng mai ai hte grau nna tsawm htum ai mungdan hpe jaw nngai. Ngai gaw nang hpe ngai hpe wa ngu shaga shangun mayu ai hte ngai kaw na galoi mung bai n kayin mat wa shangun mayu nngai.

²⁰Rai ti mung sadi n dung ai madu jan zawn, nang ngai hta sadi n dung mat nit dai. Dai MADU ngai nan tsun ni ai,” ngu nna tsun ai.

²¹Kawng pungding ni a ntsa e garu ai nsen langai na ai: dai gaw Israela amyu masha ni jahtau hkrap ai hte hpyi nem ai nsen rai nga ai; hpa majaw nga yang, shanhte gaw yubak lam ni hta asak hkrung nna dai MADU shanhte a Karai Kasang hpe malap kau manu ai.

²²Dai MADU kaw na kayin mat wa ai nanhte yawng hte e, nhtang wa marit; shi gaw nang hpe shamai shatsai nna nang hpe sadi dung shangun na ra ai. Nang gaw, “Rai sa, shi gaw anhte a Karai Kasang rai nga ai majaw, anhte dai MADU hpang de sa wa nga ga ai.

²³Anhte gaw kawng pungding ntsa hkan e anhte a tara maigan nawku ai lai hte loi mi pyi karum hkrum nga ga ai n rai, Israela a matu karum la lam gaw dai MADU anhte a Karai Kasang kaw na chyu sha du sa wa nga ai.

²⁴Rai ti mung, kaya kahpa a karai, Bala hpe nawku ai gaw moi chyaloi nhkoi prat kaw nna anhte a kaji kawa ni galaw shakut da sai sut gan ngu ai dumsu uhpung, sagu bainam uhpung hte shayi shadang sha ni hpe jahtum kau ya nu ai.

²⁵Anhte gaw kaya kahpa hte kaleng taw nga ang saga ai, anhte a kaya kahpa gaw anhte hpe ka-up da mi ga. Anhte hte anhte a kaji kawa ni gaw dai MADU anhte a Karai Kasang hpe tut nawng yubak galaw kau saga ai; anhte gaw shi a hkang da ai ga hpe galoi mung n madat kau saga ai.”