Read Jinghpaw Common Language Bible 2009 YEREMIA 30 Bible Online

YEREMIA 30 - Jinghpaw Common Language Bible 2009 bible

YEREMIA 30

¹Dai MADU Israela a Karai Kasang gaw

²ngai hpe, “Ngai nang hpe tsun ai lam magup hte hpe ka matsing da u,

³hpa majaw nga yang, nye a amyu masha ni rai nga ai Israela hte Yuda ni hpe ngai bai gram lajang na aten gaw du wa nga ai. Ngai gaw shanhte a kaji kawa ni hpe jaw tawn da ai mungdan de shanhte hpe bai woi wa na nngai, dai mungdan hpe kalang mi bai madu sha lu na mara ai. Dai MADU ngai nan tsun ni ai,” nga nna tsun ai.

⁴Dai MADU gaw Israela hte Yuda amyu masha ni hpe ning ngu nna tsun ai:

⁵“Ngai gaw hkrit kahpra ai nsen, hkrit hpa nsen hte ngwi pyaw sim sa lam n re ai nsen ni hpe na nngai.

⁶Ya chyawm gaw dai lam hpe jahkring da nna myit sawn yu mu! Lasha gaw ma shangai ya lu nga a ni? Shinggyim machyi ai num zawn shi a lata ni hte shi a kan ntsa e jum tawn da ai lasha shagu hpe hpa majaw ngai mu a ta? Masha shagu hpa majaw nsam dai daram sum nga ma ta?

⁷Hkrit hpa nhtoi gaw du magang wa ra ai; dai hte shadawn lu ai kaga nhtoi mi n nga nga ai- nye a amyu masha ni a matu ru yak tsin-yam tsindam aten rai nga ai, rai ti mung, shanhte naw ngam nga na mara ai.”

⁸Chyahtum Chyalai N-gun Rawng ai dai MADU gaw, “Dai shani du jang, shanhte a du hta mara da ai kandang hpe ngai agrawp daw kau nna shanhte a sumri ni hpe raw kau ya na nngai. Shanhte gaw maigan masha ni a mayam galoi mung tai na masai n rai.

⁹Shing rai na malai, shanhte gaw shanhte a MADU Karai Kasang rai nga ai ngai hpe mung, hkawhkam hku nna hkaw shadun hkrum na Dawi a aru arat hpe mung daw jau wa na mara ai.

¹⁰Nye a amyu masha ni e, hkum hkrit nga myit; Israela amyu masha ni e, hkum hkrit gari nga myit. Ngai gaw nanhte hpe sumtsan mung hte nanhte bawng dung hkrum ai mungdan kaw nna hkye mawai la na nngai. Nanhte gaw dum nta de bai nhtang wa nna, ngwi pyaw sim sa ai hte nga lu na rai myit dai; nanhte gaw shim lum nga lu nna, kadai mung nanhte hpe jahkrit shama lu na mara ai n rai.

¹¹Ngai gaw nanhte kaw du sa nna hkye la na nngai. Ngai gaw nanhte hpe shabra kau dat ai shara na masha amyu baw ni yawng hpe shamyit kau na nngai, rai ti mung, ngai gaw nanhte hpe shamyit kau na nngai n rai. Ngai gaw nanhte hpe ari n jahkrum ai sha dat dat na n rai; rai ti mung ngai nanhte hpe ari jaw ai shaloi, matsan dum la na nngai. Dai MADU ngai nan tsun ni ai.”

¹²Dai MADU gaw shi a amyu masha ni hpe, “Nanhte a ningma ni gaw tsi la n lu nga ai, nanhte machyi hkrum ai nma ni shamai shatsai la lu nga ai n rai.

¹³Nanhte hpe lanu lahku na kadai n nga nga ai, nanhte a hpye ai nma hpe tsi lajang na tsi n nga nga ai, nanhte a matu shamai shatsai ya na myit mada shara n nga nga ai.

¹⁴Nanhte hpe tsaw ra ai ni yawng nanhte hpe malap kau manit dai; shanhte gaw nanhte hpe galoi mung yu lajang ma ai n rai. Nanhte a yubak mara ni law nga ai hte nanhte galaw ai n hkru ai amu kaba nga ai majaw, ngai gaw nanhte hpe gumlau hpyen wa hpe zawn htim gasat ni ai, nanhte hkam la na ari gaw laja lana rai nga ai.

¹⁵Nanhte a machyi nma ni hte seng nna hpa mung aput angun hkum rai myit; nanhte a matu tsi tsi ya na hpa mung n nga nga ai. Nanhte a yubak mara ni law nga ai hte nanhte galaw ai n hkru ai amu kaba nga malit dai majaw, dai zawn ngai nanhte hpe ari jaw nngai.

¹⁶Rai ti mung, ya chyawm gaw, nanhte hpe kawa sha ai ni yawng hte gaw kawa sha kau ai hkrum na mara ai, nanhte a gumlau hpyen ni yawng bawng dung masha ni zawn woi la ai hkrum na mara ai. Nanhte hpe dip gamyet sha ai ni yawng dip gamyet sha ai hkrum na mara ai, nanhte hpe hpya lu hpya sha ai ni yawng hpya lu hpya sha ai bai hkrum na mara ai.

¹⁷Ngai gaw nanhte hpe kalang mi bai hkam kaja shangun na nngai; Nanhte a gumlau hpyen ni, ‘Ziun gaw kau da ai hkrum nga ai; kadai mung shi hpe lanu lahku ai n rai,’ nga nna tsun ma ti mung, ngai gaw nanhte a ningma ni hpe shamai shatsai ya na we ai. Dai MADU ngai nan tsun ni ai,” nga ai.

¹⁸Dai MADU gaw, “Ngai gaw nye a amyu masha ni hpe shanhte a mungdan de wa shangun ai hte dinghku shagu a ntsa e matsan dum ai myit madun dan na nngai; Yerusalem gaw bai de da ai hkrum nna, de a hkawhkam htingnu bai dung nga na ra ai.

¹⁹Dai yang e nga ai amyu masha ni gaw mahkawn shakawn na mara ai; shanhte gaw kabu gara jahtau garu na mara ai. Nye a shaman chyeju ga a majaw, shanhte law htam mayat maya wa na mara ai; nye a shaman chyeju gaw shanhte hpe shagrau sha-a lam jaw ya na ra ai.

²⁰Ngai gaw moi shawng de na amyu masha baw a daru magam n-gun dai mungdan hpe bai jaw ya nna, dai gaw kalang mi bai ngang ngang agrin nga na ra ai; Ngai gaw shanhte hpe dip gamyet sha ai ni hpe ari jaw na nngai.

²¹Shanhte a up hkang du wa gaw shanhte a amyu kaw na du sa wa na ra ai, shanhte a hkawhkam kasha gaw shanhte a amyu masha ni kaw na pru wa na ra ai. Ngai shi hpe saw shaga ai shaloi, shi gaw ngai kaw shani sa wa na ra ai, saw shaga n hkrum ai sha, kadai wa sa gwi na rai nga a ta? Shanhte gaw nye a amyu masha ni tai na mara ai, ngai gaw shanhte a Karai Kasang tai na nngai. Dai MADU ngai nan tsun ni ai,” nga nna tsun ai.

²³Dai MADU a pawt sindawng ai gaw laru rai nga ai hte ja ai bungsha gaw n hkru ai ni a baw ntsa e ahpawt na ra ai. Shi galaw na matu yaw shada da ai amu yawng mayawng hpe galaw shangut da ai aten du hkra, dai MADU a myit kahtet ai gaw kawp mat na ra ai n rai. Shi a amyu masha ni gaw dai lam hpe du wa na nhtoi ni hta asan apra sha chye wa na mara ai.