Read Jinghpaw Common Language Bible 2009 YEREMIA 32 Bible Online

YEREMIA 32 - Jinghpaw Common Language Bible 2009 bible

YEREMIA 32

¹Yuda Hkawhkam Zedekia hkaw dung ai shi ning hte Babelon mung e Nebuhkadneza hkaw dung ai shi matsat ning hta dai MADU kaw na pru ai mungga ngai hpe ning nga tsun ai.

²Dai aten hta Babelon hkawhkam wa a hpyen luksuk ni gaw Yerusalem hpe htim gasat nga ma ai, ngai gaw hkawhkam htingnu wang e nga ai htawng hta rawng da hkrum nga nngai.

³Hkawhkam Zedekia gaw ngai hpe dai shara hta sharen da ai hte dai MADU tsun shangun ai amu a majaw ngai hpe mara shagun da mi ai; dai MADU tsun ai gaw, “Ndai mare hpe Babelon hkawhkam a lata hta ap ya na nngai,

⁴Hkawhkam Zedekia mung lawt lu na ra ai n rai; Shi gaw Babelon hkawhkam a lata de ap kau ai hkrum na ra ai; shi gaw Hkawhkam Nebuhkadneza hte shada da myi man hkrum ga tsun let mu hkat na mara ai.

⁵Zedekia gaw Babelon mung de woi la hkrum na ra ai, shi gaw dai mung hta ngai hte hkrum kanawn ai aten du hkra, dai shara hta shi naw nga nga na ra ai. Shi gaw Babelon mung masha ni hpe gasat ti mung, awng dang na ra ai n rai. Dai MADU ngai nan tsun ni ai,” nga ai.

⁶Dai MADU gaw ngai hpe ning nga tsun ai,

⁷nye a kawa di Shalum a kasha Hanamela gaw ngai hpang de sa du nna Benyamin mungdaw, Anahtot mare e nga ai shi a sun hpe mari la na, hpyi lajin na wu ai. Hpa majaw nga yang, ngai gaw shi a ni htum ai jinghku wa rai nga nngai hte nye a matu dai sun hpe mari la na ahkaw ahkang lu nga nngai, ngu wu ai.

⁸Dai hpang dai MADU tsun ai hte maren, Hanamela gaw ngai nga ai htawng wang kata de shang sa wa ai hte dai sun hpe mari la na matu ngai hpe san jahkrup wu ai. Dai MADU gaw ngai hpe teng teng tsun nu ai gaw ngai chye nngai.

⁹Ngai gaw Hanamela a sun hpe mari la ai hte gumhpraw shekela shi sanit shi hpe shen ya ni ai.

¹⁰Ngai gaw ga sadi laika hta lata masat kumla ka ai hte dazik dawk da nhtawm de a matu sakse hkam ai hte gumhpraw hpe joi hte shen ya ni ai.

¹¹Dai hpang, ngai gaw mari la sai ga sadi laika kanan lahkawng rai nga ai ga sadi hte de a mabyin lam ni hpe ka da nna dazik dawk da ai kanan laika langai mi hte dazik hpa mung n dawk ai laika kanan langai mi hpe mung la nna,

¹²Hanamela a man e mung, ga sadi laika hta tinang mying shakap ai sakse ni a man e mung, htawng wang kata hta dung nga ai masha ni yawng a man e mung, Masea a kashu Neria a kasha Baruk hpe ap ya ni ai.

¹³Shanhte yawng a man e ngai gaw Baruk hpe,

¹⁴“Chyahtum Chyalai N-gun Rawng ai dai MADU Israela a Karai Kasang gaw mari la sai sun hte seng ai dazik kap ai ga sadi laika hte dazik n dawk ai laika kanan hpe la nna, ga di bu hta bang da u, dai gaw shaning na na kyem mazing da lu na ra ai, nga nna nang hpe hkang da nit dai.

¹⁵Chyahtum Chyalai N-gun Rawng ai dai MADU Israela a Karai Kasang gaw dum nta ni, sun hkauna ni hte sabyi sun ni hpe ndai mung hta bai lu mari na marin dai, ngu nna tsun nu ai,” nga ai.

¹⁶Ngai gaw dai ga sadi laika hpe Baruk a lata hta ap ya ngut ai hpang ngai ning ngu akyu hpyi nngai:

¹⁷“Tsaw Htum ai MADU e, nang gaw na a daru magam n-gun hte lahpum hpe shada nna ginding aga hte sumsing lamu hpe hpan da nit dai; na a matu hpa mung grai yak la nga ai n rai.

¹⁸Nang gaw masha hkying mun ni hpe dinggrin tsaw ra myit madun dan ti mung, shanhte a kanu kawa ni a shut hpyit ai yubak ni a majaw amyu masha ni hpe mung, ari jaw nga ndai. Nang gaw galu kaba ai hte daru magam n-gun rawng ai Karai Kasang rai nga ndai; nang gaw Chyahtum Chyalai N-gun Rawng ai MADU rai nga ndai.

¹⁹Nang gaw hpaji rawng ai shatawng shada lam ni hpe shachyen nna mauhpa magam bungli ni hpe galaw nga ndai; nang gaw amyu masha ni galaw ai amu baw hkum sumhpa ni hpe mu nga ndai; shanhte galaw shapraw ai amu hte maren, nang shanhte hpe kumhpa jaw ya nga ndai.

²⁰Lai sai aten ni hta, nang gaw Egutu mung e lamik kumla ni hte mauhpa amu ni hpe madun dan nit dai; dai ni du hkra nang gaw shanhte hpe Israela mung hte kaga amyu baw ni a ka-ang hta matut nna madun dan nga ndai, shing re ai a majaw, nang gaw ya du hkra shara shagu hkan e mying dan hkung nga ndai.

²¹Anhte a gumlau hpyen ni hpe na a lamik kumla ni hte mauhpa amu madun dan ai hte hkrit gari shangun mu ai; nang gaw na a daru magam n-gun hte lahpum shada nna na a amyu masha Israela ni hpe Egutu mung kaw nna woi shapraw wa nit dai.

²²Shanhte a kaji kawa ni hte nang ga sadi tawn da ai hte maren, nang gaw ndai ngamu ngamai ai sut hte ningru ningja ai lamu ga hpe mung shanhte hpe jaw nit dai.

²³Rai ti mung, shanhte gaw ndai mung de shang wa nna, dai mung hpe madu sha wa ai shaloi, shanhte gaw na a hkang da ai ga ni hpe mung, na a sharin achyin ai matsun ga hte maren nga na matu mung, n madat n mara nga ma ai; shanhte hkan galaw na matu nang hkang da ai lam hpa hpe mung shanhte n galaw shatup ma ai. Nang gaw shanhte a ntsa e dai jahten shabyak ai lam yawng shapraw dan nit dai.

²⁴“Babelon masha ni gaw mare hpe gasat la na matu mare grup grup hkan kaduk ni htu da nna shanhte htim gasat ma ai. Hpyen majan, kawsi hpang gara ai hte ana zinli ni gaw dai mare hpe shanhte a hpyen ni a lata de hkrat sum shangun nga ai. Nang tsun ai hte maren, yawng mayawng byin mat wa nga ai hpe nang mu lu nga ndai.

²⁵Ti mung, Tsaw Htum ai MADU e, nang gaw ndai mare Babelon masha ni a lata hta hkrat mat na rai yang pyi, sakse ni a man e ndai sun mari na matu ngai hpe hkang dat ai wa rai nga ndai,” ngu nna tsun ni ai.

²⁶Dai hpang, dai MADU gaw ngai hpe,

²⁷“Ngai gaw shinggyim masha yawng a MADU a Karai Kasang rai nga nngai. Nye a matu chyawm gaw hpa mung grai yak nga li ai n rai.

²⁸Ngai gaw ndai mare hpe Babelon Hkawhkam Nebuhkadneza hte shi a hpyen luksuk ni hpe ap kau na we ai. Shanhte gaw dai mare hpe gasat kau ai hte,

²⁹dai hpe wan nat kau na mara ai. Ngai hpe pawt sindawng shangun na nga, nta ni a ntsa e Bala hpara hpe manam pyaw ai baw nat nawng nna, kaga hpara ni hpe sabyi ntsin ru jaw ai hkungga nta ni hte hpawn shanhte gaw dai mare hpe jahkru kau na mara ai.

³⁰Shanhte a labau npawt nnan hpang wa ai shani kaw nna Israela hte Yuda amyu masha ni gaw shanhte galaw dan sai amu ni hte ngai hpe myit n pyaw shangun ma ai hte pawt sindawng shangun masai.

³¹Ndai mare hpe de hpang wa ai shani kaw nna mare masha ni gaw ngai hpe pawt sindawng shangun ai hte myit kahtet shangun nga ma ai,

³²Yuda mung hte Yerusalem mare na amyu masha ni gaw n hkru ai amu ni yawng hpe galaw mu ai majaw, shanhte hte hpawn shanhte a hkawhkam ni, mung up hkang ai du salang ni, hkinjawng ni, hte myihtoi ni hpe shamyit kau na matu ngai daw dan kau ni ai.

³³Shanhte gaw ngai hpe shingdu dat kau ma ai; ngai gaw shanhte hpe matut nna sharin achyin nga ti mung, shanhte n madat n mara ai hte sharin n hkam la nga ma ai.

³⁴Shanhte gaw ngai hpe nawku na matu gaw gap da ai Nawku Htingnu hta pyi, matsat shabat re ai hpara sumla ni hpe tawn da nna dai hpe awu asin di kau ma ai.

³⁵Shanhte gaw shanhte a shayi shadang sha ni hpe Molek hpara a matu shagu hkungga nawng jau na nga, Hinom Kadit hta Bala hpara tawn hkungri ni hpe gap da nga ma ai. Dai amu galaw na matu, ngai shanhte hpe hkang da ni ai n rai; shanhte gaw dai zawn re ai amu galaw na hte Yuda amyu masha ni yubak hkrum na matu ngai n myit nngai,” ngu nna tsun nngai.

³⁶Dai MADU Israela a Karai Kasang gaw ngai hpe, “Yeremia e, amyu masha ni gaw hpyen majan, kawsi hpang gara ai hte ana zinli ni hte ndai mare hpe Babelon Hkawhkam wa a lata de ap kau shangun na ra ai, nga nna tsun shajang ma ai. Yu u, ngai hpa tsun na lam hpe madat u.

³⁷Nye a pawt sindawng ai hte masin kahtet ai hta ngai shanhte hpe shaden shabra kau dat ai mungdan ni yawng hta na amyu masha ni hpe ngai shinggyin la na nngai; ngai gaw shanhte hpe ndai shara de bai woi wa nhtawm ndai yang e shim lum ai hte shanhte shanu nga lu mu ga.

³⁸Shing rai, shanhte gaw nye a amyu tai nna, ngai gaw shanhte a Karai Kasang tai nga na nngai.

³⁹Ngai gaw shanhte hte shanhte a aru arat ni a mai kaja lam a matu asak hkrun lam tup hta ngai hpe aten shagu shagrau sha-a na ngu ai yaw shada lam langai sha shanhte hpe jaw na nngai.

⁴⁰Ngai gaw shanhte hpe htani htana prat dingsa na ga shaka tawn da na nngai. Shanhte a matu mai kaja ai amu galaw nga ai hpe ngai galoi mung jahkring kau na n rai. Ngai gaw shanhte hpe shanhte a myit masin mahkra hte ngai hpe hkrit hkungga shangun na nngai, shanhte gaw ngai kaw nna galoi mung n kayin mat wa lu na mara ai.

⁴¹Ngai gaw shanhte a matu mai kaja ai amu galaw ai lam hta ngai awng sharawng nga na nngai, ngai gaw shanhte hpe ndai mung hta e prat ting shagrin shangang da na nngai.

⁴²“Ngai gaw ndai amyu masha ni a ntsa e ndai tsin-yam tsindam hpe shapraw ai zawn ngai ndat da ai ga sadi hte maren, mai kaja ai lam mahkra shanhte hpe jaw na nngai.

⁴³Amyu masha ni gaw ndai mung hta masha rai ti mung, yam nga rai ti mung, n shanu lu ai katsi katsang re ai zaibru jang zawn tai mat nna Babelon masha ni a lata hta ap kau ai hkrum na ra ai nga nna tsun nga ma ai. Rai ti mung, ndai mungdan hta yi sun hkauna ni hpe kalang mi bai mari la lu na mara ai.

⁴⁴Amyu masha ni gaw Benyamin mung hta Yerusalem grup yin kahtawng ni, Yuda mung a mare ni, bum ga na kahtawng ni, layang ga na mare ni hte Yuda mung dingda maga na mare ni hta yi sun hkauna ni mari lu nna, ga sadi laika ka ai hte dazik dawk nhtawm, sakse galaw shangun na mara ai. Ngai gaw amyu masha ni hpe shanhte a mungdan de bai wa shangun na nngai. Dai MADU ngai nan tsun ni ai,” ngu nna tsun ai.