Read Jinghpaw Common Language Bible 2009 YEREMIA 34 Bible Online

YEREMIA 34 - Jinghpaw Common Language Bible 2009 bible

YEREMIA 34

¹Babelon Hkawhkam Nebuhkadneza hte shi a hpyen luksuk ni, shi a up hkang ai npu hta rawng nga ai amyu baw ni yawng hte amyu bawsang ni yawng kaw na hpyen hpung ni hte hpawn re ai hpyen hpung ni, Yerusalem mare hte de a makau grup yin kahtawng ni hpe gasat nga ma ai shaloi, dai MADU ngai hpe mungga tsun wu ai.

²Dai MADU Israela a Karai Kasang gaw Yuda Hkawhkam Zedekia hpe sa tsun na matu ngai hpe hkang dat ni ai gaw, “Dai MADU ngai nan dai mare hpe Babelon hkawhkam a lata de ap kau nna, shi gaw dai mare hpe nat kau na ra ai.

³Nang gaw lawt lu na ra ai n rai; nang gaw rim hkrum ai hte shi a lata de ap kau ai hkrum na rai ndai. Nang gaw shi hpe myi man chyaw mu lu na ra ai, shi hte ga tsun lu na rai ndai. Nang gaw Babelon mung de sa wa na rai ndai.

⁴Zedekia e, nang hte seng nna ngai tsun ai ga hpe madat u. Nang gaw hpyen majan hta sat kau hkrum na ra ai n rai.

⁵Nang gaw ngwi pyaw sim sa ai hte si wa nna, amyu masha ni gaw na a shawng na na a nji nwa hkawhkam ni hpe lup makoi ai shaloi, manam pyaw ai baw nat nawng mu ai zawn, amyu masha ni gaw dai hte maren, na a matu manam pyaw ai baw nat nawng na mara ai. Shanhte gaw na a matu sharung shayawt nna, ‘Anhte a hkawhkam wa si mat sahka!,’ nga nna tsun na mara ai. Dai MADU ngai nan tsun ni ai,” ngu nna tsun ai.

⁶Dai hpang, ngai gaw Yerusalem mare hta Hkawhkam Zedekia hpang de ndai mungga jaw nga yang,

⁷Babelon hkawhkam wa a hpyen luksuk ni gaw Yerusalem hpe htim gasat nga ma ai. Dai hpyen luksuk ni gaw Lahkisha hte Azeka ngu ai Yuda mung hta naw ngam nga ai bunghku kum ai mare yan hpe mung htim gasat ma ai.

⁸Hkawhkam Zedekia hte Yerusalem masha ni gaw shanhte a mayam num mayam la rai nga ai Hebre mayam ni hpe shalawt dat na matu myit hkrum ga sadi tawn da mu ai,

⁹shing rai kadai mung Israela hpu nau wa hpe mayam zawn yam lu na mu ai n rai.

¹⁰Amyu masha ni yawng hte shanhte a ningbaw ni gaw shanhte a mayam ni hpe shalawt dat na hte shanhte hpe galoi mung mayam bai n yam na matu myit hkrum shagrin da ma ai. Shanhte gaw mayam ni hpe kaja nan shalawt dat ma ai,

¹¹rai ti mung, dai hpang shanhte a myit ni galai shai mat ai hte shanhte hpe bai nhtang woi la nna kalang mi bai atik anang mayam shatai da ma ai.

¹²Dai hpang dai MADU

¹³Israela a Karai Kasang gaw, amyu masha ni hpe tsun shaga na matu ngai hpe ning ngu hkang da wu ai: “Ngai gaw shanhte hpe Egutu mung kaw nna hkye mawai la ai hte mayam tai nga ai kaw na shanhte hpe shalawt la ai shaloi, na a nji nwa ni hte ngai ga shaka tawn da ni ai. Ngai gaw shanhte hpe

¹⁴Hebre mayam kadai hpe rai tim shanhte a matu kru ning daw jau ngut ai hpang sanit ning ngu na hta dai mayam wa hpe dat dat na matu hkang da ni ai. Rai ti mung, na a nji nwa ni gaw ngai hpe hpa n nawn nga ma ai hte ngai tsun ai ga hpe n madat ma ai.

¹⁵Nang gaw nhtoi loi hkring mi lai mat wa ai hpang, na a myit galai mat nhtawm ngai sharawng awng ai amu galaw myit dai. Nanhte yawng hte gaw na a hpu nau Israela ni hpe shalawt dat na matu myit hkrum shagrin da nga myit dai; nang gaw ngai hpe nawku ai shara Nawku Htingnu kata nye a man e ga shaka tawn da nit dai.

¹⁶Rai ti mung, nang gaw na a myit hpe galai shai kau nhtawm ngai hpe n kaw n law di kau nit dai. Nanhte yawng hte gaw mayam num mayam la ni hpe shanhte myit ra sharawng ai hte maren, nang dat dat kau sai rai tim, bai woi la nna shanhte hpe kalang mi bai atik anang mayam shatai da nit dai.

¹⁷Dai majaw, nang gaw ngai shaga ai ga hpe n madat mara ndai; na a hpu nau Israela ni a shanglawt ahkaw ahkang hpe nang n jaw ndai nga nna dai MADU ngai nan tsun ni ai. Grai kaja sai, dai majaw, hpyen majan hte mung, ana zinli hte mung, kawsi hpang gara ai hte mung si htum mat wa chye ai shanglawt ahkaw ahkang, ngai nang hpe jaw ya na de ai. Nang hpe ngai shapraw dan na tsin-yam tsindam hta mungkan mungdan amyu baw shagu hte hpe ngai jahkrit shama shangun na nngai.

¹⁸Yuda mung hte Yerusalem na du salang ni hte hpawn hkawhkam htingnu na du salang ni, hkinjawng ni hte ningbaw ni yawng gaw lahkawng brang di nna kahtam ga da ai dumsu kasha lapran hku hkawm lai wa let ngai hte ga shaka tawn da ma ai. Rai ti mung, shanhte gaw dai ga shaka hpe jahten kau nna de a ga matsun ni hpe n hkan ma ai. Dai majaw, shanhte dumsu kasha hpe lahkawng brang di kahtam ga kau ma ai zawn ngai mung ndai amyu masha ni hpe dai amu shapraw dan na we ai.

²⁰Shanhte hpe sat kau na matu asak hkan tam nga ai shanhte a gumlau hpyen ni a lata de ngai shanhte hpe ap kau na nngai, shing rai shanhte a moi mang ni hpe ntsa malen u ni hte matse labye dusat ni e sha kau na mara ai.

²¹Ngai gaw Yuda Hkawhkam Zedekia hte shanhte hpe sat kau na matu asak tam hkrum nga ai shi a du salang ni hpe mung gumlau hpyen ni a lata de ap kau na nngai. Ngai gaw nang hpe htim gasat nna majan jahkring da ai Babelon hpyen luksuk ni a lata de shanhte hpe ap kau na we ai.

²²Ngai aming jaw dat ai hte shanhte gaw mare de bai nhtang shang wa na mara ai. Shanhte gaw dai mare hpe htim gasat nhtawm rim la ai hte dai mare hpe nat kau na mara ai. Ngai gaw Yuda mung na mare kahtawng ni hpe kadai mung n shanu nna shingran sharat katsi ai zaibru jang zawn shatai kau na nngai. Dai MADU ngai nan tsun ni ai.”