Read Jinghpaw Common Language Bible 2009 YEREMIA 4 Bible Online

YEREMIA 4 - Jinghpaw Common Language Bible 2009 bible

YEREMIA 4

¹Dai MADU gaw, “Israela amyu masha ni e, nang kayin wa mayu ai rai yang, ngai hpang de kayin wa marit. Nang ngai hta sadi dung ai rai yang ngai n dawng ai hpara sumla ni hpe htawt kau u,

²dai gaw nye a mying gang let dagam ai gaw, na a matu ding man ai amu tai na ra ai. Masha amyu baw ni yawng mung shanhte hpe shaman ya na matu ngai kaw hpyi na mara ai, shanhte gaw ngai hpe shakawn kungdawn na mara ai,” ngu nna tsun ai.

³Dai MADU gaw Yuda hte Yerusalem amyu masha ni hpe, “Jahkam da ai na a sun hkauna ni hpe shawt tawn u; na a nli tum ni hpe ju prang hkan hkum gat et.

⁴Dai MADU ngai hte tawn da ai na a ga shaka hpe shagrin da u; Yuda hte Yerusalem amyu masha ni e, na a hkum hpe ngai hta ap nawng tawn u. Dai hku nang n galaw ai rai yang, nang galaw kau sai n hkru ai amu ni a majaw nye a pawt sindawng ai gaw wan zawn hkru na ra ai. Dai gaw hkru nna dai hpe kadai mung krip lu na ra ai n rai,” ngu nna tsun wu ai.

⁵Mungdan ting hta pahtau dum mu! Mahku nsen pra pra hte ja ja jahtau mu! Bunghku kum da ai mare ni de hprawng kagat mat wa na matu Yuda hte Yerusalem amyu masha ni hpe tsun u.

⁶Ziun de hkrang ai lam madun dat mu! Shim lum lam a matu kagat mu! Hkum kanung nga myit! Dai MADU gaw tsin-yam tsindam hte hten byak lam kaba hpe dingdung maga kaw nna woi sa wa nga ai.

⁷Hkanghkyi gaw shi a makoi gyem shara kaw nna pru wa ai zawn, masha amyu baw ni hpe jahten ai wa gaw rawt sa wa nu ai. Shi gaw Yuda hpe jahten kau na matu du sa nga ai. Yuda a mare ni gaw hten run taw mat nna, kadai mung dai shara ni hta shanu nga na mara ai n rai.

⁸Dai rai nna lachyit nba bu hpun ai hte hkrap ai hte sharung shayawt nga mu; hpa majaw nga yang, dai MADU a sindawng kahtet ai gaw Yuda mung kaw nna dawm la kau nu ai n rai.

⁹Dai MADU gaw, “Dai shani e, hkawhkam ni hte du salang ni gaw myit n-gun htum mat na mara ai; hkinjawng ni mak mat nna, myihtoi ni mau mahka mat na mara ai,” ngu nna tsun wu ai.

¹⁰Dai hpang ngai gaw, “Tsaw Htum ai MADU e, nang gaw Yerusalem amyu masha ni hpe atsai awai hkalem kau nu hka! Dai yang e ngwi pyaw sim sa lam nga na ra ai, ngu nang tsun nit dai, rai ti mung ntawng nhtu gaw shanhte a du ni hta nga nga sai,” ngu nna tsun nngai.

¹¹Zaibru jang e bung nga ai kahtet kang ai nbung gaw shanhte hpang de bung wa na lam, Yerusalem amyu masha ni hpe tsun dan na aten gaw du wa nga sai. Dai nbung gaw numhkaw hpe sha shapoi kau lu ai nbung bungli ahpawt ai zawn sha rai na ra ai n rai.

¹²Dai MADU a hkang da ai ga hte du sa ai nbung gaw dai hta grau ja ai nbung rai na ra ai! Dai gaw dai MADU shi nan shi a amyu masha ni hpe tara jeyang na lam tsun shana nga ai rai nga ai.

¹³Yu u, gumlau hpyen gaw sumwi ni zawn sa wa mara ai. Shanhte a majan hpyen leng ni gaw nbung bung hpoi zawn rai nga ai, shanhte a hpyen gumra ni gaw galang ni hta grau nna lawan nga ma ai. Anhte sum mat saga ai! Anhte daw dan ai hkrum saga ai!

¹⁴Yerusalem e, na a myit masin kaw na n hkru ai hpe kashin kau u, shaloi hkye hkrang la hkrum na ndai. Nang gaw kade na hkra yubak hte seng ai myit mang lam ni hpe matut myit na ngu wu ni?

¹⁵Dan a mare hte Ehprim a kawng ni kaw nna shiga htawn ai ni gaw n kaja ai shiga ni hpe ndau shabra ma ai.

¹⁶Shanhte gaw masha amyu baw ni hpe sadi jaw na matu mung, grai tsan ai mungdan kaw nna du sa nga ai gumlau hpyen ni a lam Yerusalem hpe tsun dan na matu mung du sa ma ai. Dai gumlau hpyen ni gaw Yuda mung na mare ni a hpang maga e marawn jahtau na mara ai.

¹⁷Shi a amyu masha ni gaw dai MADU hpe gumlau manu ai majaw sun sin nga ai masha ni zawn dai masha ni Yerusalem hpe wang da na mara ai. Dai MADU nan tsun nu ai.

¹⁸Yuda e, Nang hkan nga ai sat lawat hte nang galaw da sai amu ni a majaw ndai lam nang hkum nan hkrum sha nit dai. Na a yubak gaw ndai nni nkri hpe shabyin dat nu ai; dai gaw na a myit masin hku achyaw galun ya nga sai.

¹⁹Machyi ai law! Ngai gaw dai machyi ai hpe n hkam lu nngai! Nye a myit masin! Nye a myit masin ja ja htuk htak nga li ai! Ngai atsin sha nga lu ai n rai; Ngai gaw pahtau dum ai nsen hte majan a jahtau garu ai nsen hpe na nngai.

²⁰Tsin yam tsindam gaw langai hpang langai hkan nga ai; mungdan ting hten run taw nga sai. Anhte a sum ni akajawng sha hten mat sai; de a sumpan grang ni adaw atang je mat sai.

²¹Ngai gaw kade na hkra laja lana re ai majan hpe mu nna pahtau ngoi ai nsen hpe na lu na rai ta?

²²Dai MADU gaw, “Nye a amyu masha ni gaw myit n su ma ai; shanhte ngai hpe n chye ma ai. Shanhte gaw angawk ai ma kaji ni zawn rai ma ai; shanhte hta chye na hkawn hkrang ai nyan hpa mung n rawng ma ai. Shanhte gaw n hkru ai amu galaw ai hta myit let ma ai, rai ti mung mai kaja ai amu galaw ai hta hkrat sum ma ai,” ngu nna tsun ai.

²³Ginding aga hpe ngai mada yu ai shaloi-dai gaw akrin ayang rai nga ai; sumsing lamu de mada yu ai shaloi, nhtoi n nga nga ai.

²⁴Bum ni hpe ngai mada yu ai shaloi, dai ni ashun nga ma ai, kawng ni kade nde ashun nga ma ai.

²⁵Dai yang e shinggyim masha ni n nga ai hpe ngai mu nngai; ntsa malen u ni chyawm gaw pyen pyau nga masai.

²⁶Ga sau kaja ai mungdan gaw zaibru jang tai mat sai; Dai MADU a pawt sindawng ai a majaw mare ni hten run mat sai.

²⁷(Dai MADU gaw ginding aga ting katsi katsang shara tai mat na ra ai, rai ti mung shi gaw dai hpe tsep kawp jahten kau na ra ai n rai, nga nna tsun nu ai.)

²⁸Ginding aga gaw sharung shayawt nna; sumsing lamu gaw sin mak mat na ra ai. Dai MADU gaw shi tsun nu ai ga hpe shi a myit hta jashai kau na ra ai n rai. Shi gaw shi a daw dan ai amu hpe galaw nu ai, bai dawm la kau na ra ai n rai.

²⁹Gumra jawn ai ni hte ndan lang ai ni a garu ai nsen a majaw masha shagu hprawng htaw mat wa na mara ai. Nkau mi nam maling de hprawng mat wa na mara ai; kaga ni gaw lunghkrung ntsa hkan lung wa na mara ai. Mare shagu akrin akraw di kau hkrum na ra ai; kadai mung dai shara hkan bai nga na mara ai n rai.

³⁰Yerusalem e, nang gaw hten run mat nit hka! Nang gaw hpa majaw hkyeng mang ai hpun palawng hpun n ta? Nang gaw hpa majaw ja rai sumli nna na a myi ni hpe tsi chya shatsawm da wu ni? Nang gaw na a hkum hpe kaman lila a matu shatsawm nga ndai! Na a sumtsaw ni nang hpe ningdang kau manu ai, nang hpe sat kau mayu ma ai.

³¹Ngai gaw shinggyim machyi ai numsha hte kasha alat shangai ai numsha a jahtau kyik ai nsen zawn jahtau hkrap ai nsen hpe na ni ai. Dai gaw Yerusalem a jahtau ai nsen rai nna ba galawp ai hte shi a lata ladawn nna, “Ngai gaw hten run ai hkrum nga nngai! Shanhte gaw ngai hpe sat na matu sa wa nga ma hka!,” ngu nna tsun nga ai.