Read Jinghpaw Common Language Bible 2009 YEREMIA 40 Bible Online

YEREMIA 40 - Jinghpaw Common Language Bible 2009 bible

YEREMIA 40

¹Hpyen luksuk ni a hpyen du Nebuzaradan gaw ngai hpe Rama mare e dat tawn ai hpang, dai MADU gaw ngai hpe mungga tsun wu ai. Ngai gaw Babelon mung de bawng dung hkrum mat wa ai Yerusalem mare masha ni hte Yuda mung masha ni yawng hte rau dai yang e sumri gyit sharen da ai hkrum nga nngai.

²Hpyen du wa gaw ngai hpe san san shaga la nna, “Dai MADU na a Karai Kasang gaw ndai mung hpe jahten sharun ai hte jahkrit shama nu ai,

³ya chyawm gaw, shi tsun ai hte maren, galaw na amu hpe shi shadik nu ai. Na a amyu masha ni gaw dai MADU hpe shut hpyit ai hte shi tsun ai ga hpe n madat ai majaw, ndai lam yawng byin wa sai.

⁴Ya chyawm gaw, ngai na a lata hkri hkraw hta gyit da ai hpri sumri hpe raw dat kau ya nna, nang hpe shalawt dat na nngai. Ngai hte rau Babelon mung de hkan mayu yang mung hkan nang lu ai, ngai nang hpe lanu lahku na nngai. Rai ti mung, nang n hkan mayu ai rai yang, hpa n ra ai. Mungdan ting hta nang lata la na shara dam nga lit dai, nang ra sharawng ai shara shagu de nang sa mai nga ndai,” ngu nna tsun wu ai.

⁵Ngai hpa mung n htan ai sha nga nga yang, Nebuzaradan gaw, “Babelon hkawhkam wa, Yuda mare ni a ntsa e up hkang na du aya dang da ai Shahpan a kashu, Ahikam a kasha Gedalia hpang de nhtang wa su. Nang shi hte rau nga nga nna mung masha ni a lapran e mung shanu nga u, shing n rai, nang sawn yu nna htuk dum ai kaning re ai shara de rai tim, nang sa wa lu na rai ndai,” ngu nna tsun wu ai. Dai hpang shi gaw ngai hpe kumhpa hte lusha loi mi jaw dat nna shabawn dat wu ai, ngai mung nye a lam ang ai de pru mat wa nngai.

⁶Ngai gaw Mizpa mare hta nga ai Gedalia hpang de wa nna, dai mungdan hta naw ngam nga ai amyu masha ni hte rau nga nga nngai.

⁷Yuda amyu masha du salang ni hte hpyen luksuk nkau mi gaw lata n sharawt asum n hkam ai sha nga nga ma ai. Babelon Hkawhkam wa gaw Gedalia hpe Yuda mung du aya hta dang ya nhtawm, Babelon mung de woi la n hkrum ai amyu masha ni yawng hte dai mung na matsan mayan htum ai amyu masha ni hpe up hkang shangun nga ai lam hpe shanhte na ma ai.

⁸Dai rai nna, Nehtania a kasha Ishmaela, Karea a kasha Yohanan hte Yonahtan, Tanhumet a kasha Seraia, Netohpa amyu Ehpai a shadang sha ni hte Mahka amyu Yezania ni gaw shanhte a masha ni hte rau Mizpa mare e nga ai Gedalia hpang de du ma ai.

⁹Gedalia gaw shanhte hpe, “Babelon masha ni hpang de lata sharawt asum hkam shang wa na matu nanhte hpa n hkrit n tsang ra ai lam nanhte hpe ngai tsun made ai. Ndai mung hta shanu nga nna Babelon hkawhkam wa hpe daw jau mu, shaloi, nanhte gaw lam shagu hta kaja wa lu na madai,” ngu nna tsun wu ai.

¹⁰Ngai nan chyawm gaw ndai Mizpa mare hta nga nga nna, Babelon masha ni du sa wa ai shaloi, nanhte a dat kasa tai nga na nngai. Rai ti mung nanhte gaw sabyi ntsin, namsi hte tsanlun sau ni hpe shinggyin nna mahkawng da mai nga myit dai, nanhte madu da ai kahtawng ni hkan nanhte nga lu na rai myit dai,” ngu nna tsun wu ai.

¹¹Dai aten laman hte hta, Babelon hkawhkam wa gaw Israela masha nkau mi hpe Yuda mung e nga shangun ai hte Gedalia hpe dai mung a mung du aya dang da ma ai lam hpe Moba mung, Amon mung, Edom mung hte kaga mung hkan shanu hkawm nga ai Israela amyu masha ni yawng na ma ai.

¹²Dai rai nna shanhte gaw shabra kau hkrum ai mungdan hkan nna pru wa nhtawm Yuda mung de nhtang wa ma ai. Shanhte gaw Mizpa mare e Gedalia hpang de sa nhtawm, dai mare hta sabyi ntsin hte namsi namsaw law law shu la lu ma ai.

¹³Dai hpang, Yohanan hte lata garai n sharawt ai hpyen luksuk ni a hpyen du ni gaw Mizpa mare e nga ai Gedalia hpang de sa nna

¹⁴shi hpe, “Amon Hkawhkam Bali gaw nang hpe sat na matu Ishmaela hpe shangun dat sai lam nang n chye n ni? Shing ngu san nga ti mung Gedalia gaw dai ga hpe n kam wu ai.

¹⁵Dai hpang, Yohanan gaw shi hpe, “Ngai mahtang Ishmaela hpe sa sat kau n-ga; dai zawn galaw ai amu hpe kadai mung chye lu na n rai. Nang hpe sat na matu hpa majaw shi hpe ahkang jaw na rai ta? Shing n rai jang, nang kaw hpawng nga ai Yuda masha ni yawng hpe dumbri dumbra byin shangun kau nhtawm dai gaw Yuda mung e naw ngam nga ai amyu masha ni yawng a ntsa e tsin-yam tsindam shabyin dat na mu ai,” ngu nna alak mi tsun wu ai.

¹⁶Rai ti mung, Gedalia mahtang, “Dai amu hpe hkum galaw et! Ishmaela hpe lakap nna nang tsun nga ai lam gaw n teng nga ai!,” ngu nna htan wu ai.