Read Jinghpaw Common Language Bible 2009 YEREMIA 41 Bible Online

YEREMIA 41 - Jinghpaw Common Language Bible 2009 bible

YEREMIA 41

¹Dai shaning a shata sanit ngu na hta, hkawhkam amyu rai nga nna, hkawhkam wa a hpyen du kaba Elishama a kashu, Nehtania a kasha Ishmaela gaw marai shi hte rau mung du Gedalia hpe sa hkrum na matu Mizpa de pru sa mat wa ma ai, shanhte yawng lusha jawm lusha nga ma yang,

²Ishmaela hte rau marai shi hte gaw shanhte a nhtu ni shaw la nhtawm Gedalia hpe sat kau ma ai.

³Ishmaela gaw Mizpa mare e Gedalia hte rau nga ai Israela masha mahkra hpe mung, dai yang e nga ang ai Babelon hpyen masha ni hpe mung sat kau wu ai.

⁴Hpang shani ngu na, Gedalia hpe sat kau ai lam kadai mung garai n chye yang,

⁵Shehkem, Shilo hte Samari mare kaw na marai matsat shi du sa ma ai. Shanhte gaw shanhte a nhka mun ni hpe shangun kau nhtawm shanhte a bu hpun palawng ni hpe gang je kau let, shanhte a hkum ni hpe kahtam jahpye kau ma ai. Shanhte gaw Nawku Htingnu kata hta nawng jau na matu lusha hkungga hte manam pyaw ai baw lang sa wa ma ai.

⁶Shaloi, Ishmaela gaw shanhte hte hkrum shaga na matu hkrap ngu hkrap ngoi ai nsen hte Mizpa mare kaw nna pru sa wa wu ai. Shi shanhte hpang de du ai shaloi shi gaw, “Chyeju hte Gedalia hte hkrum lu na matu shang wa marit,” ngu nna tsun wu ai.

⁷Shanhte gaw mare ka-ang de du shang wa ai hte rau, Ishmaela hte shi a masha ni gaw shanhte hpe sat kau ma ai, shanhte a moi mang ni hpe mung hka htung kata de kabai bang kau ma ai.

⁸Rai ti mung, dai hpung hta lawm ai marai shi chyawm gaw Ishmaela hpe, “Chyeju hte anhte hpe hkum sat kau mi! Anhte lu ai hkaulan mam, muk-yaw mam, tsanlun sau hte lagat jahku ni hpe pa ga e makoi da ga ai,” ngu nna tsun ma ai. Shaloi shi gaw shanhte hpe shalawt tawn da wu ai.

⁹Ishmaela e sat kau ai masha ni a moi mang ni hpe kabai bang ai hka htung gaw Israela Hkawhkam Basha htim gasat shang wa ai shaloi Hkawhkam Asa htu da ai hka htung rai nga ai. Ishmaela gaw dai hka htung hpe moi mang ni hte jahpring da wu ai.

¹⁰Dai hpang, shi gaw hkawhkam wa a shayi sha ni hte Gedalia a up hkang ai npu hta taw nga na matu hpyen du Nebuzaradan hkang da ai hte maren Mizpa mare hta naw ngam nga ai amyu masha ni mahkra hte hpe, woi wa shangun wu ai. Ishmaela gaw shanhte hpe bawng masha hku rim woi wa ai hte Amon mung maga de rawt sa mat wa nga ma ai.

¹¹Ishmaela galaw ai n hkru ai du daw sai hkaw amu a lam hpe Yohanan hte shi hte rau rai nga ai hpyen luksuk hpyen du ni yawng na ma ai.

¹²Dai rai nna, shanhte gaw shanhte a masha ni hte shi a hpang hkan shachyut nang ma yang, Gibeon mare na hka lawng kaba makau e hkan dep nang ma ai.

¹³Ishmaela rim woi wa ai bawng masha ni gaw Yohanan hte shi hte rau rai nga ai hpyen du ni hpe mu ai shaloi, shanhte kabu gara nga ma ai,

¹⁴shing rai shanhte hpang de kayin kagat shang mat wa ma ai.

¹⁵Rai ti mung, Ishmaela hte shi a manang marai matsat hte gaw Yohanan a lata na hprawng lawt mat wa ai hte Amon mung de shang mat wa ma ai.

¹⁶Dai hpang Ishmaela gaw Gedalia hpe sat kau da ai hpang Mizpa mare kaw na naw ngam nga ai bawng masha ni hpe zawn woi wa ai share shagan hpyenla ni, numsha ni, ma kaji ni hte unuk ni hpe Yohanan hte shi a hpyen du ni woi lakawn da ma ai.

¹⁷Ishmaela gaw Babelon hkawhkam wa e san tawn da ai mung du Gedalia hpe sat kau wu ai majaw shanhte gaw Babelon masha ni hpe hkrit nga ma ai. Dai majaw, shanhte gaw Babelon masha ni a lata kaw nna hprawng lawt lu na matu Egutu mung de htawt sa wa yang Betlehem makau na Hkimham shara hta shanhte hkring sa la nga ma ai.