Read Jinghpaw Common Language Bible 2009 YEREMIA 44 Bible Online

YEREMIA 44 - Jinghpaw Common Language Bible 2009 bible

YEREMIA 44

¹Dai MADU gaw Egutu mung na Migdola, Tahpan hte Memhpi mare ni hte Egutu mung a dingda daw de nga nga ai Israela amyu masha ni yawng hte seng nna ngai hpe tsun wu ai.

²Chyahtum Chyalai N-gun Rawng ai dai MADU Israela a Karai Kasang gaw, “Yerusalem hte Yuda mung na kaga mare ni mahkra a ntsa e ngai shapraw dan sai jahten shabyak lam hpe nanhte nan mu manit dai. Ya rai tim pyi, dai ni gaw naw hten run nga nna, kadai mung dai hkan e nga nga ma ai n rai,

³hpa majaw nga yang, shanhte a amyu masha ni gaw n hkru ai amu galaw nna ngai hpe masin pawt shangun nga ma ai. Shanhte gaw shanhte mung, nanhte mung, nanhte a nji nwa ni galoi mung n nawku yu ai kaga karai ni hpe shagu hkungga nawng ya nna daw jau nga ma ai.

⁴Ngai n dawng ai ndai hkrit hpa amu ni hpe n galaw na matu nanhte hpe tsun shadum nga na nye a shangun ma ni rai nga ai myihtoi ni hpe nanhte hpang de ngai shangun da nga nngai.

⁵Rai ti mung, nanhte gaw n madat ai hte myit maju n jung nga myit dai. Nanhte gaw nanhte a n hkru n shawp ai arawn alai ngu ai kaga hpara ni hpe nawng jau ai lai hpe n kabai kau lu nga myit dai.

⁶Dai rai nna, ngai gaw nye a pawt sindawng ai hte masin kahtet ai hpe Yuda mare ni a ntsa e mung, Yerusalem mare lam ni a ntsa hkan e mung ru jaw da ni ai, ngai gaw dai ni hpe wan jahkru kau ni ai. Dai shara ni gaw dai ni rai nga ai hte maren, shingran sharat katsi mat ai hte yu hkrit shara tai mat nga ai.

⁷“Dai rai nna, Chyahtum Chyalai N-gun Rawng ai dai MADU Israela a Karai Kasang ngai gaw nanhte a hkum hpe shaza kau na matu ndai zawn n hkru n shawp ai amu hpe nanhte hpa majaw galaw nga myit ta? Nanhte gaw lasha ni, numsha ni, ma kaji ni hte chyu chyu ai ma shangai ni langai mi mung n ngam mat hkra jahten kau hkrum na myit ra sharawng nga myit ni?

⁸Nanhte sa du shanu nga ai ndai Egutu mung hta, hpara sumla ni hpe nawku ai lai hte kaga hpara ni hpe nawng jau ai lai galaw let, ngai hpe hpa majaw pawt sindawng shangun nga myit ta? Nanhte hkum hpe shaza na matu mung, mungkan ga na masha amyu baw shagu gaw nanhte hpe asawng asang shatan nhkan ga tsun kau na matu mung, na a mying gaw dagam dala, matsa mawa ga tsun ai zawn lang na matu mung, nanhte gaw ndai n hkru ai amu hpe galaw nga myit ni?

⁹Yuda mung na mare ni hte Yerusalem mare lam ni hta nanhte a nji nwa ni galaw ai yubak, nanhte hte nanhte a madu jan ni galaw ai yubak ngu ai dai n hkru n shawp ai amu ni yawng hpe nanhte malap kau manu ni?

¹⁰Rai ti mung, nanhte gaw dai ni du hkra nanhte a hkum hpe shagrit shanem nga myit dai n rai. Nanhte gaw ngai hpe hkrit hkungga nga myit dai n rai; nanhte hte nanhte a nji nwa ni hpe ngai jaw da sai tara ni yawng hte maren, hkan sa shadik shatup nga myit dai n rai.

¹¹Dai rai nna, Chyahtum Chyalai N-gun Rawng ai dai MADU Israela a Karai Kasang ngai gaw nanhte hpe kayin ninghkap nna Yuda amyu ting hpe jahten kau na nngai.

¹²Egutu mung hta shingbyi na matu myit daw dan nna sa shanu nga ai naw ngam nga ai Yuda masha ni a matu chyawm gaw shanhte yawng shamyit kau hkrum na mara ai hpe ngai mu lu na nngai. Egutu mung hta nga ai dai kaji ai kaw na kaba htum ai du hkra na shanhte yawng gaw hpyen majan hta mung, kawsi hpang gara ai hta mung, si htum mat na mara ai. Shanhte gaw yu hkrit hpa shara tai mat na mara ai, masha amyu baw ni shanhte hpe asawng asang di nna shanhte a amying hpe dagam dala matsa mawa ga tsun ai zawn lang na mara ai.

¹³Ngai gaw Yerusalem hpe ari jaw ai zawn Egutu mung hta sa shanu nga ai ni hpe mung, hpyen majan, kawsi hpang gara ai hte ana zinli ni hte ari jaw na nngai.

¹⁴Egutu mung hta sa shanu nga ai, ngam nga ai Yuda masha ni gaw langai mi mung lawt wa lu nna asak hkrung nga lu na mara ai n rai. Shanhte hta na langai wa mi mung kalang mi bai wa nga na matu shanhte marit nga ai Yuda mung de nhtang wa lu na mara ai n rai. Hprawng lawt lu ai ni hta jan nna, langai mi mung nhtang wa lu na mara ai n rai,” ngu nna tsun ai.

¹⁵Dai hpang, kaga hpara ni hpe shagu hkungga nat nawng ai shanhte a madu jan ni hpe chye nga ai lasha ni yawng hte dai shara hta sa tsap nga ai numsha ni yawng hte wunawng wuwa kaba ngu ai Egutu mung a dingda daw de shanu nga ai Israela amyu masha ni mung lawm hkra rai nna ngai hpe,

¹⁶“Dai MADU a amying hta nang anhte hpe tsun nit dai lam hpe anhte n madat na ga ai.

¹⁷Anhte tsun sai hte maren shadik na ga ai majaw, lam shagu hpe anhte hkan galaw na ga ai. Anhte a karai num ngu ai Sumsing lamu hkawhkam jan hpe shagu hkungga nawng jau na ga ai; anhte hte anhte a ji wa ni, anhte a hkawhkam wa hte anhte a du salang ni gaw Yuda mare ni hte Yerusalem mare lam hkan galaw yu sai hte maren, shi hpe sabyi hkungga ru jaw na ga ai. Shaloi, anhte hta lusha n taw n tsang lu wa ai hte ngamu ngamai wa nna, tsin-yam tsindam hpa mung hkrum hkra na ga ai n rai.

¹⁸Rai ti mung, anhte gaw Sumsing lamu a hkawhkam jan hpe shagu hkungga nawng jau ai hte sabyi hkungga ru jaw ai amu hpe hprai kau ai rai yang, anhte hta hpa akyu mung n hkam la lu na ga ai; anhte a amyu masha ni mung, hpyen majan hte kawsi hpang gara ai hta si htum mat na mara ai,” ngu nna tsun ma ai.

¹⁹Numsha ni gaw, “Sumsing lamu a hkawhkam jan hte bung ai muk ni galaw nna shi hpe shagu hkungga nawng jau ai hte sabyi hkungga ru jaw ai shaloi, anhte a madu wa ni, anhte a numsha ni galaw ai amu ni hpe myit hkrum karum ma ai,” ngu nna bai kahtap tsun ma ai.

²⁰Dai hpang, ngai hpe ndai zawn nga nna htan ai lasha hte numsha ni yawng hpe ngai gaw,

²¹“Nanhte hte nanhte a nji nwa ni, nanhte a hkawhkam ni hte nanhte a du salang ni hte mung masha ni, Yuda mare ni hte Yerusalem mare lam ni hta nanhte nawng jau ai shagu hkungga lam ni hpe dai MADU n chye ai hte malap kau na wu ai ngu nna nanhte myit nawn da mu ni?

²²Nanhte a n hkru n shawp ai hte matsat shabat re ai arawn alai ni hpe dai MADU gaw loi mi pyi n lu sharang nu ai majaw, nanhte a mungdan gaw dai ni rai nga ai hte maren shingran sharat katsi mat ai hte dai mung hta kadai mung shanu nga ai n rai. Dai gaw yu hkrit hpa shara tai mat nna dai mungdan a mying hpe mung masha amyu ni dagam dala ga tsun ai hta lang nga ma ai.

²³Nanhte gaw dai MADU a hkang da ai ga ni hpe n madat n mara ai sha, kaga hpara ni hpe shagu hkungga nawng jau ai hte dai MADU hpe shut kau mu ai majaw, ya ndai mu lu ai tsin-yam tsindam gaw nanhte a ntsa e du nga sai,” ngu nna tsun wu ai.

²⁴Chyahtum Chyalai N-gun Rawng ai dai MADU Israela a Karai Kasang gaw Egutu mung hta sa shingbyi shanu nga ai Yuda amyu masha ni hpe tsun nga ai ga hpe masha yawng grau nna numsha ni hpe ning ngu tsun nga ai: “Nanhte hte nanhte a madu jan ni gaw Sumsing lamu a hkawhkam jan hpe dagam ga sadi ni jaw da manit dai. Nanhte gaw dai hpara num hpe shagu hkungga nawng jau ai hte shi hpe sabyi hkungga ru jaw let nanhte a ga sadi ni hpe shadik na nga, nanhte ga shaka la manit dai. Dai lam grai kaja manit dai! Nanhte a ga ndat ni shadik mu! Nanhte ga sadi tawn da ai ndat ga ni hpe matut galaw mu!

²⁵

²⁶Rai ti mung, ya chyawm gaw Egutu mung hta nga ai Israela amyu masha ni yawng hte e, dai MADU ngai nan nye a chyalai n-gun rawng ai amying hta ga shaka da sai ga hpe madat mu: ‘Ahkrung nga ai hte Tsaw Htum ai MADU a mying hte ngai dagam nngai,’ nga nna nye a mying gang let nanhte hta na langai wa mi mung dai ga shaka hpe galoi mung bai n tsun lu myit ga, ngai gaw nye a daru magam mying gang let dagam da ni ai.

²⁷Nanhte gaw ngamu ngamai na myit dai n rai, rai ti mung, shamyit kau hkrum na myit dai. Nanhte kaw na langai mi mung n ngam mat ai aten du hkra, nanhte yawng gaw hpyen majan hte ana zinli hta si htum mat na marin dai.

²⁸Rai ti mung, nanhte hta na nkau mi gaw si hkrung si htan kaw na hprawng lawt wa nhtawm Egutu mung kaw nna Yuda mung de nhtang wa na marin dai. Shaloi asak naw hkrung nga lu ai ni gaw nye a ga mahtang, shing n rai, shanhte a ga mahtang teng ai n teng ai hpe chye wa na mara ai.

²⁹Ndai shara hta nanhte hpe ngai ari jaw na hte nanhte a ntsa e teng teng jahten sharun ai amu shabyin na matu nye a ga sadi ni dik tup wa ai hpe dai MADU ngai nan nanhte hpe sakse madun na mawe ai.

³⁰Yuda Hkawhkam Zedekia hpe shi a gumlau hpyen rai nga ai hte shi hpe sat kau na matu tam nga ai Babelon Hkawhkam Nebuhkadneza a lata de ngai ap kau ai zawn, Egutu mung a Hkawhkam Hohpra hpe mung shi hpe sat na matu asak tam nga ai shi a gumlau hpyen ni a lata de ngai ap kau na we ai,” ngu nna tsun wu ai.