Read Jinghpaw Common Language Bible 2009 YEREMIA 46 Bible Online

YEREMIA 46 - Jinghpaw Common Language Bible 2009 bible

YEREMIA 46

¹Dai MADU gaw masha amyu baw ni hte seng nna ngai hpe tsun ai, dai gaw

²shawng nnan Egutu mung hte seng ai mungga rai nga ai. Yuda Hkawhkam Yehoiakim hkaw dung ai mali ning hta e, Babelon Hkawhkam Nebuhkadneza gaw Uhprat hka nu makau na Hkarhkeme shara hta Egutu Hkawhkam Niko a hpyen luksuk ni hpe gasat dang kau ai hte seng nna shi tsun da ai ga gaw ndai rai nga ai:

³“Egutu du salang ni gaw, ‘Nanhte a hpyen ninggang ni hpe jin jin di nna majan pa de rawt sa wa mu!

⁴Nanhte a hpyen gumra hking byau nhtawm dai ni hta lung jawn mu! Hpyen gumra ni hpe dingren shatsap da nna nanhte a hpri gupchyawp ni chyawp da mu! Nanhte a hpyen nri ni hpe masen da mu! Nanhte a hpyen hking ni hpe sumraw da mu!,’ nga nna jahtau tsun ma ai.

⁵Rai ti mung, dai MADU gaw, “Ngai hpa baw mu a ta?,” nga nna san wu ai. “Shanhte gaw hkrit ai hte nhtang mat wa ma ai. Shanhte a hpyenla ni gaw nhtang kayat hkrum ma ai; hkrit gari ai gaw shanhte hpe ka-up kau nna, shanhte gaw lawan lu ai daram lawan nna shingdu de n kayin yu nga ai sha, kagat mat wa ma ai.

⁶Kagat laram ai ni n hprawng lu ma ai; hpyenla ni mung n hprawng lawt lu ma ai. Dingdung maga, Uhprat hka nu makau e shanhte ahtu kataw ma ai.

⁷Nila hka nu zawn tung rawt wa nna, hka nu hpungtun zawn de a hkin-gau hpe lip kau ai wa kadai rai nga a ni?

⁸Dai gaw Egutu mung rai nna, Nila hka nu zawn tung rawt wa nhtawm, hka nu hpungtun zawn de a hkin-gau ni hpe lip kau nga ai. Egutu gaw, ‘Ngai rawt wa nna mungkan ga hpe ka-up kau na nngai; Ngai gaw mare ni hte dai hta shanu nga ai mare masha ni hpe shaza kau na nngai.

⁹Hpyen gumra ni pru sa nna, hpyen leng ni hkawm taleng nga na hkang dat nu ai! Ehtiopi mung hte Libya mung na hpyen ninggang ni hpe lang nga ai hpyenla ni hte Ludi mung na ndan chye shachyen ai masha ni pru wa mu ga,’” ngu nna tsun wu ai.

¹⁰Ndai gaw Chyahtum Chyalai N-gun Rawng ai Tsaw Htum ai dai MADU a shani rai nga ai: dai ni gaw shi matai dawp na ra ai; dai ni gaw shi a gumlau hpyen ni hpe ari jaw na ra ai. Shi a nhtu gaw hkru kat wa ai aten du hkra shanhte hpe sha kau na ra ai, shanhte a asai hpe myit dik hkra lu na ra ai. Chyahtum Chyalai N-gun Rawng ai Madu gaw dai ni e, dingdung maga Uhprat hka kau e shi a tsin-yam hkrum sha ai masha ni hpe nawng ya nga ai.

¹¹Egutu masha ni e, Gilead mung de lung wa nna, dai yang e, tsi mawan tam la mu! Na a tsi mawan yawng gaw akyu n rawng ai hpe sha sakse madun nga ai; hpa hte mung nang hpe tsi shamai ya lu ai n rai.

¹²Masha amyu baw ni na a kaya kahpa lam na masai; na a hkrap agru ai nsen hpe masha shagu na masai. Hpyenla shada da ahtu nna, shan gaw ga de kataw mat ma ai.

¹³Dai MADU gaw Babelon Hkawhkam Nebuhkadneza Egutu mung hpe sa gasat na lam ngai hpe tsun wu ai. Shi gaw,

¹⁴“Egutu mung na mare ni rai nga ai Migdola, Memhpi hte Tahpan mare ni hta ndai shiga htawn tsun mu: dai gaw ‘Nanhte a hkum hpe makawp maga na matu jin jin rai nga mu; nanhte kaw nga ai ni yawng gaw hpyen majan hta shaza hkrum na rai myit dai!

¹⁵Nanhte a chyalai n-gun rawng ai Api hpara gaw hpa majaw kadawng mat a ni? Dai MADU gaw dai hpara hpe agrawp daw kau nu hka!

¹⁶Nanhte a hpyenla ni gaw ahtu kataw mat manu ai; shanhte langai hte langai gaw, ‘Tin tin rai ga! Anhte a amyu masha ni nga ai dum nta de wa saga, shaloi gumlau hpyen ni a nhtu kaw na lawt lu na ga ai!,’ ngu nna tsun ma ai.

¹⁷“Egutu hkawhkam wa hpe, ‘Shi a Ahkaw Ahkang Hpe Ginlut Kau Ai Garu Shakawng Shakat Wa,’ ngu nna mying nnan langai shamying ya ma ai.

¹⁸Chyahtum Chyalai N-gun rawng ai dai MADU ngai gaw hkawhkam rai nga nngai. Ngai gaw ahkrung nga ai Karai Kasang rai nga nngai. Tabora bum gaw bum ni yawng hta grau tsaw nga ai rai nna, Hkarmela bum gaw panglai hta grau tsaw ai shara hta nga nga ai dai hte maren, nanhte hpe htim gasat ai wa gaw dai zawn n-gun rawng ai wa rai na ra ai.

¹⁹Egutu masha ni e, bawng dung sa wa na matu jin jin rai nga mu! Memhpi mare gaw masha kadai mung n shanu ai hte shingran sharat katsi ai shara tai mat na ra ai.

²⁰Egutu mung gaw grai tsawm ai dumsu u pra zawn rai nna, dingdung maga de na jinghkam ni a balen tuk bang ya hkrum nga ai.

²¹Shi saw shaga da ai hpyenla ni pyi dumsu kasha ni zawn karum la lam n lu nga ma ai. Shanhte gaw n tsap lu ai hte n gasat lu ma ai; shanhte yawng gaw kayin kagat mat wa ma ai. Shanhte hpe daw dan ai nhtoi hte shanhte hpe jahten shabyak na aten gaw du nga sai.

²²Gumlau hpyen a luksuk shani sa wa yang, lapu ashi ai zawn, Egutu wa hprawng mat nga ai. Masha ni hpun ni kran kadang nna htat ai maling hpe jahten kau ai zawn, shanhte gaw shi hpe ningwa hte gasat ma ai.

²³Shanhte a hpyenla ni gaw n dang hti hkra law nga ma ai; shanhte gaw dinggam-yaw ni hta pyi grau law nga ma ai.

²⁴Egutu masha ni gaw kaya kahpa hkrum nga ma ai; shanhte gaw dingdung masha ni a up hkang ai npu hta taw nga ma ai. Dai MADU ngai nan tsun ni ai.”

²⁵Chyahtum Chyalai N-gun rawng ai dai MADU Israela a Karai Kasang gaw Amon hpara ngu ai Htebe hpe mung, Egutu mung hte dai mung na hpara ni hte hkawhkam ni hpe mung rau hpawn ari jaw na ra ai. Ngai gaw Egutu hkawhkam hte shi hta kam hpa shamyet shanat nga ai ni yawng hpe woi la nna,

²⁶shanhte hpe sat kau mayu ai ni a Babelon Hkawhkam Nebuhkadneza hte shi a hpyen dap ni a lata de ap kau na we ai. Rai ti mung kade n na yang, mung masha ni gaw lai sai aten ni hta nga lai wa sai zawn, shanhte gaw Egutu mung hta kalang mi bai shanu nga lu na mara ai. Dai MADU ngai nan tsun ni ai.

²⁷“Nye a amyu masha ni e, hkum hkrit nga myit, Israela amyu masha ni e, hkum hkrit kajawng nga myit. Ngai gaw nanhte hpe sumtsan mung kaw nna mung, nanhte bawng dung nga ai mungdan kaw nna mung, hkye hkrang la na nngai. Nanhte gaw dum nta buga de bai nhtang wa nhtawm, ngwi pyaw sim sa ai hte nga lu na marin dai; nanhte gaw shim lum nga lu ai hte kadai mung nanhte hpe jahkrit lu na n rai.

²⁸Ngai gaw nanhte kaw sa nna hkye la na nngai. Ngai nanhte hpe shabra kau dat ai mungdan na masha amyu baw yawng hpe ngai jahten kau na nngai. rai ti mung, ngai nang hpe jahten kau na n rai. Ngai gaw nanhte hpe ari n jaw ai sha dat dat na n rai; rai ti mung, ngai nang hpe ari jaw ai shaloi, ngai gaw teng man rap ra nga na nngai. Dai MADU ngai nan tsun ni ai.”