Read Jinghpaw Common Language Bible 2009 YEREMIA 5 Bible Online

YEREMIA 5 - Jinghpaw Common Language Bible 2009 bible

YEREMIA 5

¹Yerusalem amyu masha ni e, na a nmaw lam hku hprawng mu! Makau grup yin de mada yu mu! Nanhte hkum ni hpe yu yu mu! Shawa gat ginra ni hkan sawk tam yu mu! Ding hpring ai amu galaw nna Karai Kasang hta kangka nga na matu shakut ai masha langai mi hpe nang mu tam n ni? Nang mu tam ai rai yang, dai MADU gaw Yerusalem hpe mara dat ya na ra ai.

²Nang gaw dai MADU hpe nawku na matu tsun tim pyi, nang tsun ai ga hpe nang lachyum n shapraw nga ndai.

³Dai MADU gaw kaja wa kangka ai hpe tam nga ai. Shi nang hpe kayat ti mung, nang hpa zawn n nawn nga ndai; shi nang hpe agrawp mani kau ti mung, sharin la na matu nang ningdang kau nga ndai. Nang gaw du ja nna na a yubak ni kaw na n kayin wa nga ndai.

⁴Dai hpang, ngai gaw, “Ndai ni gaw matsan mayan ni hte n dum n hprang ai ni chyu rai ma ai. Shanhte gaw angawk ai hku hkawm sa ma ai; shanhte gaw shanhte a Karai Kasang hpa hpyi ai hpe mung, dai MADU shanhte hpe hpa galaw shangun mayu ai hpe mung n chye ma ai.

⁵Ngai gaw daru magam n-gun rawng ai amyu masha ni kaw sa nna shanhte hte ga shaga na nngai. Shanhte gaw shanhte a Karai Kasang hpa hpyi ai hpe mung, dai MADU shanhte hpe hpa galaw shangun mayu ai hpe mung kaja wa n chye ma ai. Rai ti mung, shanhte yawng gaw dai MADU a ahkang aya hpe shinggan kau nna shi a ga madat na matu ningdang kau ma ai.

⁶Dai re ai majaw, maling na hkanghkyi ni gaw shanhte hpe sat kau na mara ai; zaibru jang na chyahkyawn ni gaw shanhte hpe gang amya je kau na mara ai, rawngteng ni gaw shanhte a kahtawng ni hkan lagyim hkawm na mara ai. Ndai amyu masha ni pru hkawm yang, shanhte gaw ashep ashin rai gang je kau hkrum na mara ai, hpa majaw nga yang, shanhte a yubak mara ni law nga ai hte lang hte lang, Karai Kasang kaw na htak mat mat rai ma ai.

⁷Dai MADU gaw, “Ngai gaw hpa majaw nye a amyu masha ni a yubak ni hpe raw ya ang nga a ni? Shanhte gaw ngai hpe kau da ai hte karai ajet n rai nga ai ni hpe nawku manu ai. Ngai gaw nye a amyu masha ni hkru kat ai aten du hkra jaw sha ni ai, rai ti mung, shanhte gaw lashaw numshaw amu shut hpyit nhtawm shawa num ni hte shanhte a aten shama nga ma ai.

⁸Shanhte gaw ushat hkru nna shi ra ai hku hkawm nga ai laugung zawn rai nna langai hte langai gaw tinang a htingbu wa a madu jan hpe ra katu nga ma ai.

⁹Ngai gaw shanhte hpe dai zawn re ai amu ni a matu ari n jaw ang ai hte dai zawn re ai amyu baw hpe matai nhtang ang nngai kun?

¹⁰Ngai gaw nye amyu masha ni a sabyi sun ni hpe hkyen kau na matu gumlau hpyen ni hpe dat dat na nngai, rai ti mung dai ni hpe tsep kawp jahten kau na matu n rai. Ngai gaw lakung ni hpe ashin kau na matu shanhte hpe tsun na nngai, hpa majaw nga yang, dai lakung ni gaw nye a n rai nga ai.

¹¹Israela hte Yuda amyu masha ni gaw ngai hpe htum hkra gumle gumlau galaw masai. Dai MADU ngai nan tsun ni ai,” ngu wu ai.

¹²Dai MADU a amyu masha ni gaw shi hpe nyet kau ai hte, “Shi gaw teng teng hpa amu mung galaw na ra ai n rai. Anhte gaw laja lana re ai aten du na ra ai n rai; anhte kaw majan mung, hkuwa mung du wa na ra ai n rai,” ngu nna tsun ma ai.

¹³Myihtoi ni gaw hpa n rai ma ai, rai ti mung nbung kanu ni rai ma ai, shanhte hta dai MADU kaw na mungga n rawng ma ai, nga nna shanhte tsun masai. Chyahtum Chyalai N-gun rawng ai MADU Karai Kasang gaw ngai hpe, “Yeremia e, ndai amyu masha ni dai zawn nga ai ga tsun manu ai majaw, ngai gaw nye a mungga ni hpe na a n-gup hta wan zawn shatai na we ai. Amyu masha ni gaw hpun zawn tai nna, wan gaw dai hpe hkru kau na ra ai,” ngu nna tsun wu ai.

¹⁵Israela amyu masha ni e, dai MADU gaw nang hpe gasat na matu sumtsan mung kaw na masha amyu baw langai mi hpe woi wa nga ai. Dai ni gaw n-gun atsam rawng ai hte moi chyaloi nhkoi na amyu rai nna dai ni a ga hpe nang n chye na nga ndai.

¹⁶Shanhte a ndan lang masha ni gaw n-gun rawng ai share ninghkrin ni rai nna, matsan dum myit n rawng ai sha masha sat ai ni rai ma ai.

¹⁷Shanhte gaw na a nsi naisi ni hte lusha ni hpe sha kau na mara ai; shanhte gaw na a shadang sha ni hte shayi sha ni hpe sat kau na mara ai. Shanhte gaw na a yam nga hpung hte sagu bainam hpung ni hpe mung sat kau ya na mara ai, na a sabyi ru ni hte lakum hpun ni hpe mung jahten kau ya na mara ai. Nang kam nga ai bunghku kum ai mare ni hpe mung shanhte a hpyen luksuk ni jahten kau ya na ra ai.

¹⁸Dai MADU gaw, “Dai nhtoi hta e pyi gaw, nye a amyu masha ni hpe ngai atsai awai jahten kau na nngai n rai.

¹⁹Shanhte gaw ngai hpa majaw ndai amu ni hpe galaw ai lam shanhte san ai shaloi, Yeremia e, dai gaw shanhte ngai kaw nna kayin mat wa nhtawm shanhte a mungdan hta nan maigan karai ni hpe daw jau ma ai, dai rai nna shanhte gaw shanhte a matu n rai nga ai mungdan hta tsasam masha ni hpe daw jau na mara ai ngu nna shanhte hpe tsun u,” ngu nna tsun ai.

²⁰Dai MADU gaw, “Yaku a aru arat ni hpe tsun dan mu, Yuda amyu masha ni hpe tsun mu:

²¹Myi tu ti mung myi n mu lu, na tu ti mung na n na lu ai angawk angak re ai hte myit n su ai amyu masha ni e, madat mu.

²²Ngai gaw dai MADU rai nga nngai; nang ngai hpe hpa majaw n hkrit kamyin nga n ni? Nang gaw hpa majaw nye a man e n hkrit gari nga n ta? Ngai gaw panglai hka n lai lu hkra zaibru hpe agrin nga ai lamu ga jarit zawn tawn da ni ai. Panglai hka ni kanawng ti mung, dai hpe lai lu ai n rai; hka leng ni hta wa ti mung shanhte lai di lu ai n rai.

²³Rai ti mung, amyu masha ni e, nang gaw du ja ai hte gumlau nga ndai; nang gaw ngai kaw nna kayin mat wa ai hte ngai hpe kau da nit dai.

²⁴Shaning shagu nmut ta aten hta, nshung shang marang hte ginhtawng shang marang ni hpe ngai jahtu ya ti mung, ngai hpe shagrau sha-a na matu nang galoi mung n myit dum nga ndai.

²⁵Shing rai na malai, na a shut hpyit ai yubak mara ni gaw nang hpe dai mai kaja ai a amu ni kaw na hkum shingdang kau ya nit dai.

²⁶“N hkru ai masha ni gaw nye a amyu masha ni hta shanu lawm nga ma ai; shanhte gaw ntsa malen u ni hpe rim na matu sumgawn ni hpe jahkrat da ai masha ni zawn la lagyim ma ai. Rai ti mung shanhte gaw masha rim na matu shanhte a mahkam ni hpe tawn da manu ai.

²⁷Jaugawng wa gaw shi a u rawng hta u law law hte jahpring da ai zawn, shanhte mung shanhte a nta ni hta lagu la lu ai arai ni hte jahpring da ma ai. Shing re ai majaw, shanhte gaw n-gun lagaw rawng wa nna sut su ai ni tai wa nga masai.

²⁸Shanhte gaw hpa majaw hpum sau ai hte lu pyaw sha pyaw nga ma ta? Shanhte a n hkru ai amu galaw ai lam ni hta shadaw shadang n nga nga ai. Shanhte gaw jahkrai ma ni hpe shanhte a ahkaw ahkang n jaw ma ai, dip gamyet sha hkrum ai ni hpe teng man rap ra ai tara n madun ma ai.

²⁹“Rai ti mung, Dai MADU ngai gaw shanhte hpe ndai amu ni a matu ari jaw na nngai; ngai gaw ndai amyu baw ni hpe matai dawk na nngai.

³⁰Hkrit hpa hte kajawng kaja re ai amu gaw ndai mung hta byin nga sai:

³¹myihtoi ni gaw masu magaw ga ni hta jan nna hpa mung n tsun ma ai; hkinjawng ni gaw myihtoi ni hkang da ai hte maren up hkang ma ai, nye a amyu masha ni hkum da ai lam hpa mung n nga nga ma ai. Rai ti mung, hpang jahtum e, ndai lam yawng byin wa ai shaloi shanhte hpa galaw na rai ma ta?,” ngu nna tsun ai.