Read Jinghpaw Common Language Bible 2009 YEREMIA 51 Bible Online

YEREMIA 51 - Jinghpaw Common Language Bible 2009 bible

YEREMIA 51

¹Dai MADU gaw, “Ngai hpe Babelon mung hte dai mung na masha ni hpe hkap daw na matu jahten shaza lu ai nbung bung shangun wu ai.

²Nbung gaw yihku hpe shapoi kau ai zawn, ngai gaw Babelon mung hpe jahten shaza kau na matu maigan masha ni hpe shangun dat na nngai. Shanhte gaw man maga shagu kaw nna gasat nna, dai mungdan hpe akrin akraw di tawn na mara ai.

³Dai mungdan na hpyenla ni hpe ndan gap na hte hpyen hking dagraw la na aten pyi shanhte hpe hkum jaw myit. Shabrang ni hpe hkum ngam tawn myit! Hpyen luksuk mahkra hpe jahten kau mu!

⁴Shanhte gaw hkala nba hkrum ai hte mare lam ni hta si taw nga na mara ai.

⁵Chyahtum Chyalai N-gun rawng ai dai MADU Karai Kasang ngai gaw Israela a Chyoi Pra ai Wa ngu ai ngai hpe yubak galaw ma tim pyi ngai gaw Israela hte Yuda hpe kau da na n rai.

⁶Babelon a shut hpyit ai yubak a majaw sat kau ai n hkrum myit ga, Babelon mung kaw nna hprawng mat wa mu! Ngai gaw shanhte hkam la ging ai ari hkam la na matu nye a matai hpe ya dawp na nngai.

⁷Babelon gaw nye a lata hte lang nna mungkan ting hpe shanang kau ai ja gawm zawn rai nga ai. Masha amyu baw ni gaw dai hta rawng ai sabyi ntsin hpe lu nang nna, shanhte chye ai hku hkawm nga ma ai.

⁸Babelon mung gaw akajawng sha kadawng daw mat ai hte hten run mat sahka! Shi a matu sharung shayawt nga mu! Shi a hkala nba hpe shamai shatsai ya lu dam nhten, tsi hkrung tsi nan la wa marit.

⁹Dai mung hta shanu nga ai maigan masha ni gaw, ‘Babelon hpe karum la na matu anhte shakut ga ti mung, dai gaw grai hpang hkrat mat sai. Ya chyawm gaw anhte tawn kau da nna tinang a buga dum nta de wa mat saga. Karai Kasang gaw shi a chyalai n-gun mahkra hte Babelon hpe ari jaw nu ai, dai mung hpe atsai awai shamyit kau nu ai,’” ngu nna tsun ma ai.

¹⁰Dai MADU gaw, “Nye a amyu masha ni e, ‘Anhte ding hpring nga ga ai gaw dai MADU madun dan nu ai. Dai MADU anhte a Karai Kasang hpa galaw nu ai lam Yerusalem hta nga ai amyu masha ni hpe sa tsun dan saga,’” ngu nna jahtau ma ai.

¹¹Dai MADU gaw Babelon mung hpe shamyit kau na matu shatawng shada da nu ai majaw shi gaw Medi hkawhkam ni a myit hpe jasu ya nu ai. Dai gaw shi a Nawku Htingnu hpe jahten shaza kau ya ai a matu matai htang ai lam rai nga wu ai. Gasat na du salang ni gaw, “Nanhte a pala ni hpe mayoi da mu! Nanhte a hpyen ninggang ni hpe jin jin galaw da mu!

¹²Babelon mare bunghku ni hpe htim gasat na matu masat dawnghkawn sharawt mu. Sin langa shalaw da mu! Sin masha ni hpe tawn da mu! Makoi gasat na matu masha jahkrat tawn mu!,” ngu nna hkang da ma ai. Dai MADU gaw Babelon masha ni hpe galaw na ngu tsun nu ai hte maren galaw shadik nu ai.

¹³Dai mung gaw hka nu law law nga nga ai hte sut pungding e ningngai nga ti mung, de a aten htum mat sai, de a asak sumri dan kau hkrum nga sai.

¹⁴Chyahtum Chyalai N-gun rawng ai dai MADU gaw dinggam-yaw kamawng ai zawn Babelon hpe gasat na matu, masha law law woi sa wa nna awng padang a matu garu jahtau na mara ai, nga nna shi nan dagam da nu ai.

¹⁵Dai MADU gaw shi a daru magam n-gun hte ginding aga hpe galaw da nu ai; shi a hpaji byeng-ya hte mungkan ga hpe hpan da nna, sumsing lamu ni hpe kahpyan da nu ai.

¹⁶Shi a hkang da ai ga a majaw, sumsing lamu ntsa na hka ni wu kadu wa nna, shi gaw mungkan ga htum kaw nna sumwi ni hpe shamawng dat wu ai. Shi gaw marang kata hta myihprap gala shangun nna, shi a dum kata kaw na nbung hpe shangun dat wu ai.

¹⁷Ndai lam hpe mu ai majaw, masha gaw myit n gring ai hte nyan kata lam hkam sha nga ai; Hpara sumla galaw ai ni gaw shamak kau hkrum nga ai, hpa majaw nga yang, shanhte galaw karai ni gaw n teng ai hte asak n rawng nga ma ai.

¹⁸Shanhte gaw manu n dan ai hte jahpyak kau ging nga ma ai; Dai MADU shanhte jahkrup yu ai shaloi, shanhte hten za hkrum na mara ai.

¹⁹Yaku a Karai Kasang gaw shanhte hte bung ai n rai; shi gaw ngayawng danghta hpe hpan da ai wa rai nna, shi gaw Israela hpe shi a amyu tai na lata la nu ai. Chyahtum Chyalai N-gun rawng ai dai MADU gaw shi a amying rai nga ai.

²⁰Dai MADU gaw, “Babelon e, nang gaw nye a sumdu, nye a majan laknak rai nga ndai. Ngai gaw masha amyu baw ni hte mungdan ni hpe agrawp mani kau na matu mung,

²¹gumra ni hte gumra jawn ai ni hpe mung, hpyen leng ni hte dai hpe gau ai ni hpe gamang kau na matu mung,

²²lasha hte numsha ni hpe sat kau na matu mung, dingla ni hte ma ram ni hpe sat kau na matu mung, shabrang ni hte mahkawn kasha ni hpe sat kau na matu mung,

²³sagu rem ai ni hte sagu hpung ni hpe sat sharu kau na matu mung, hkauna galaw ai ni hte ga shawt ai gumra ni hpe sat sharu kau na matu mung, mung up du ni hte lahta tsang du salang ni hpe agrawp mani kau na matu mung, nang hpe lang ni ai,” ngu nna tsun ai.

²⁴Dai MADU gaw, “Babelon mung hte de a mung masha ni gaw Yerusalem e shanhte galaw ai n hkru ai lam yawng a matu ngai matai htang na hpe nanhte mu na rai myit dai.

²⁵Babelon e, nang gaw mungkan ga ting hpe jahten kau ai bum zawn rai nga ti mung, dai MADU ngai nan na a hpyen rai nga nngai. Ngai gaw nang hpe magra jum da nhtawm ga madang hte maren adit jahkrat kau nna a mani di tawn na we ai.

²⁶Na a mung na agrawp jahten kau sai nlung ni gaw bai gaw gap ai hta langai mi mung shaw lang lu na n rai. Nang gaw htani htana katsi katsang rai mat ai shara zawn tai na rin dai. Dai MADU ngai nan tsun ni ai.

²⁷“Gasat na matu masat dawnghkawn sharawt mu! Pahtau dum dat mu! Shaloi amyu baw ni na lu na mara ai! Babelon hpe gasat na amyu baw ni hpe hkyen da mu! Shi hpe gasat na matu Ararat, Mini, Ashkena mungdan ni hpe tsun mu. Woi gasat ningbaw na dap hpareng wa hpe san da mu. Dinggam-yaw zawn law nna kamawng ai hpyen gumra ni hpe woi lung wa mu.

²⁸Babelon hpe gasat na masha amyu baw ni hpe hkyen da mu. Medi hkawhkam ni, shanhte a ningbaw ni hte du salang ni, shanhte up ai mungdan na hpyen luksuk ni hpe shangun dat mu.

²⁹Dai MADU gaw Babelon mung hpe masha kadai n shanu ai hte katsi katsang shara tai mat na matu maw mawn nga ai majaw mungkan ga gaw gari ashun nga ai.

³⁰Babelon hpyenla ni gaw majan n hkap gasat ai sha, shanhte a dap kata hkan rawng nga ma ai. Shanhte gaw shanhte a share shagan ai myit htum mat manu ai, karum la lam n lu ai ni tai mat nga masai. Mare chyinghka ni agrawp daw mat nna dum nta ni wan hkru nga sai.

³¹Babelon gaw man maga shagu agrawp daw mat sai lam, Babelon hkawhkam wa hpe wa tsun dan na nga, shiga htinglet ai ni langai hpang langai kagat sa ma ai.

³²Dai hpyen wa gaw hka nu uhkan hpe madu la kau ai hte hpyen dap ni hpe wan nat kau ya wu ai. Babelon hpyenla ni hkrit kajawng nga manu ai.

³³Kade n na yang, hpyen wa gaw shanhte hpe kran kadang kau nna chyarang pa ntsa e mam kabye ai zawn shanhte hpe kabye anut kau na mara ai. Chyahtum Chyalai N-gun rawng ai dai MADU Israela a Karai Kasang ngai tsun ni ai,” ngu nna tsun ai.

³⁴Babelon hkawhkam gaw Yerusalem hpe azat mani nna sha kau nu ai. Shi gaw namtau zawn; baren numraw gaw dai hpe mayu kau ai zawn mare hpe kaman di kau wu ai. Shi gaw shi ra sharawng ai hpe la nna ngam ai hpe kabai kau nu ai.

³⁵Ziun amyu masha ni gaw, “Babelon gaw anhte hpe di mi ai kashun kashe du daw sai hkaw amu a matu lit nga nga u ga law!,” nga nna tsun mu ga. Yerusalem amyu masha ni gaw, “Babelon gaw anhte hkrum sha lai wa sai nni nkri a matu lit nga nga u ga law!,” ngu nna tsun mu ga.

³⁶Dai rai nna dai MADU gaw Yerusalem amyu masha ni hpe, “Na a amu ngai lit la ya nhtawm, na a gumlau hpyen ni nang hpe di ai hte maren, shanhte hpe ngai matai htang na nngai. Ngai gaw Babelon mung a hka hpawk ni hpe jahkyet kau ya nna dai mung na hka nu hka ni hpe hkun hkraw shangun na nngai.

³⁷Dai mungdan gaw nam na gwi ma-a ni shanu ai hte marawng marang rai hten sumpum taw ai mung tai mat na ra ai. Dai mungdan gaw yu mau na zawn rai mat nhtawm, kadai mung dai shara hta shanu nga na ma ai n rai, dai mungdan hpe mu ai ni yawng hkrit kajawng mat na mara ai.

³⁸Babelon mung masha ni yawng gaw hkanghkyi ni zawn shabam nna, hkanghkyi hkalung ni zawn nying na mara ai.

³⁹Shanhte gaw lawhpa myit marin nga ma ni? Ngai gaw shanhte a matu lusha poi langai mi hkyen lajang ya nna shanhte hpe kabu gara lu nang shangun na nngai. Shaloi, shanhte yup pyaw mat wa nna galoi mung hprang wa na mara ai n rai.

⁴⁰Ngai gaw shanhte hpe sat kau na matu sagu kasha ni, bainam ni hte sagu la ni hpe zawn dun la na nngai. Dai MADU ngai nan tsun ni ai,” ngu nna tsun wu ai.

⁴¹Dai MADU gaw Babelon hte seng nna ning nga tsun ai: “Mungkan ting jawm shakawn ai mare gaw hpya kau ai hkrum nga nu hka! Babelon gaw masha amyu baw ni a man e yu hkrit hpa shara tai mat sahka!

⁴²Panglai hka gaw Babelon mung de ka-up lung wa nna wu kadu ai hka leng ni hte dai mung hpe lim kau nga sai.

⁴³Dai mung na mare ni gaw yu hkrit hpa shara tai mat nna, hka mung n nga ai ahkun ahkraw re ai zaibru jang zawn rai mat sai, kadai mung n shanu nga ai, kadai pyi n lai hkawm sai.

⁴⁴Ngai gaw Babelon hpara ngu ai Bela hpara hpe ari jaw na nngai, shi lagu tawn da ai arung arai ni hpe nhtang ap shangun na nngai. Masha amyu baw ni gaw dai hpara hpe htawm hpang de galoi mung nawku na mara ai n rai. “Babelon mare bunghku ni kadawng mat masai.

⁴⁵Israela amyu masha ni e, dai mung kaw na kagat pru wa mu! Nye a sindawng kahtet ai kaw na nanhte a asak lawt na matu hprawng mu.

⁴⁶Nanhte na ai shi wawn ga ni a majaw, nanhte a myit marai hkum shayaw kau myit, hkrit mung hkum hkrit myit. Mungdan kata na kashun kashe du daw sai hkaw shiga, hkawhkam langai gaw kaga langai wa mi hpe gasat ai zawn nga ai shiga gaw shaning shagu pru shajang nga ai.

⁴⁷Babelon a hpara sumla ni hte ngai hkrum kadup na aten du ra ai. Shaloi mungdan ting gaw jahpoi jahpyak ai hkrum nna mung masha ni yawng sat kau ai hkrum na mara ai.

⁴⁸Dai mungdan hpe jahten kau na matu du yu wa ai dingdung maga de na masha ni a lata hta, Babelon mung hkrat sum mat ai shaloi, ginding aga hte sumsing lamu hta nga ai ngayawng ngapra mahkra hte gaw kabu gara ai hte jahtau garu na mara ai.

⁴⁹Babelon gaw mungkan ga ntsa na masha amyu baw ni yawng a si hkrung si htan amu hpe woi shabyin nu ai; shi gaw Israela amyu masha law law a si hkrung si htan amu hpe mung shabyin nu ai majaw, ya gaw Babelon mung kadawng daw mat na ra ai. Dai MADU ngai nan tsun ni ai.

⁵⁰Babelon mung hta nga ai shi a amyu masha ni hpe tsun ai dai MADU a mungga gaw ndai rai nga ai: “Nanhte gaw si hkrung si htan kaw na lawt manit dai! Ya jang pru wa mu! Hkum hkring nga masa! Nanhte gaw dum nta hte tsan gang nga myit ti mung, nanhte a MADU rai nga ai ngai hta myit manoi nga mu, Yerusalem hpe mung adum nga mu.

⁵¹Nanhte gaw, ‘Nawku Htingnu kata na chyoi pra ai shara ni hpe maigan masha ni e madu sha kau mu ai majaw, anhte gaw myi man sum ai hte kaya kahpa di hkrum nga saga ai; anhte gaw dik hkra garen gari rai hkam sha saga ai,’ ngu nna tsun myit dai.

⁵²Dai rai nna, Ngai gaw Babelon hpara sumla ni hte hkrum kadup na aten du ra ai rai nna, hkala nba hkrum ai ni gaw mungdan ting hta madai sharung na mara ai, ngu nna ngai tsun ai.

⁵³Babelon gaw sumsing lamu de lu lung nna dai yang e n-gun ja ai hpyen dap lu gap tim pyi, dai hpe jahten kau na matu masha ni hpe ngai naw shangun na nngai. Dai MADU ngai nan tsun ni ai.”

⁵⁴Dai MADU gaw, “Babelon mung na hkrap shabam ai nsen, dai mung hpe jahten shaza ai a majaw sharung shayawt ai nsen hpe madat mu.

⁵⁵Ngai gaw Babelon mung hpe jahten shaza nga nngai dai mung hpe shazim kau ni ai. Hpyen luksuk ni gaw wu kadu nga ai hka leng ni zawn adawt shang wa nna, garu gachyi marawn jahtau ai nsen hte gasat ma ai.

⁵⁶Shanhte gaw Babelon hpe jahten na matu du sa ma ai; dai mung na hpyenla ni gaw rim hkrum nga ma ai, shanhte a ndan ni agrawp daw mat manu ai. Ngai gaw n hkru ai amu galaw ai ni hpe ari jaw ai Karai Kasang rai nga nngai, Ngai gaw Babelon wa hkam la ging ai mara hte maren, di na we ai.

⁵⁷Ngai gaw dai mung na du ni, hpaji rawng ai masha ni, ningbaw ni hte hpyenla ni hpe chyaru shanang na nngai. shanhte gaw yup pyaw mat wa nna galoi mung hprang na mara ai n rai. ngai hkawhkam wa nan tsun ni ai; Ngai gaw chyahtum Chyalai N-gun rawng ai dai MADU rai nga nngai.

⁵⁸Chyalai n-gun rawng ai Babelon a bunghku ni ga de daw ru mat nna, de a tsaw ai chyinghka ni mung nat kau hkrum nga sai. Masha amyu baw ni a amu yawng gaw kaman lila rai nga ai; shanhte a shakut shaja ai gaw wan shinglet sha rai nga ai. Chyahtum Chyalai N-gun rawng ai dai MADU ngai nan tsun ni ai.”

⁵⁹Masea a kashu, Neria a kasha Seraia gaw Hkawhkam Zedekia kam lu ai shangun ma rai nga ai. Yuda Hkawhkam Zedekia hkaw dung ai mali ning hta e, shi hte rau Babelon mung de lung wa ai shaloi, ngai shi hpe hkang da ai ga nkau mi matsun da ni ai.

⁶⁰Ngai gaw Babelon a ntsa e du wa na jahten shaza lam yawng hte seng nna mung, Babelon hte seng nna kaga lam yawng mayawng hte hpe mung, laika shabawn hta ka da ni ai.

⁶¹Ngai gaw Seraia hpe, “Nang Babelon mung de du lung wa ai shaloi, ndai laika hta rawng ai lam magup hte hpe mung masha ni a man e teng teng ja ja hti dan u.

⁶²Dai hpang, nang gaw, ‘MADU e, ndai shara hta masha mung, yam nga mung n shanu nga lu hkra htani htana shingran katsi ai zaibru jang zawn shatai kau nna, ndai shara hpe jahten kau na lam, nang tsun nit dai,’ ngu nna hpyi jahtau u.

⁶³Seraia e, nang ndai laika hpe mung masha ni a man e hti dan ngut jang, dai laika hpe nlung hta gyit noi nna Uhprat hka nu de kabai bang nhtawm,

⁶⁴‘Dai MADU gaw Babelon mung a ntsa e jahten shaza ai amu shabyin na ra ai majaw, dai laika shabawn lup mat nna, galoi mung bai waw lung wa na ra ai n rai. Dai lam Babelon mung hta byin wa na ra ai,’” ngu nna tsun wu ai. Yeremia a mungga ni ndai yang e htum sai.