Read Jinghpaw Common Language Bible 2009 YEREMIA 9 Bible Online

YEREMIA 9 - Jinghpaw Common Language Bible 2009 bible

YEREMIA 9

¹Nye a baw gaw hka htung hka, nye a myi ni gaw myi prwi hka hpawk tai mat na ngai ra sharawng nngai, shaloi ngai gaw sat kau hkrum sai nye a amyu masha ni a matu shani shana hkrap lu na rai nngai.

²Nye a amyu masha ni hpe tawn kau nna nam mali hta sa nga na matu, shara langai lu na, ngai ra sharawng nga nngai. Shanhte yawng gaw sadi n dung ma ai, gumle gumlau galaw ai hpung langai rai ma ai.

³Shanhte gaw tut nawng masu magaw ga tsun na jin jin rai ma ai; teng man ai a malai n ding n man ai hte mungdan up ma ai. Dai MADU gaw, “Nye a amyu masha ni n hkru ai amu langai hpang langai galaw nna ngai hpe mung shanhte a Karai Kasang hku n yin la ma ai,” ngu nna tsun ai.

⁴Masha shagu gaw shanhte a manang ni hpe makran na rai nga ai, jinghku jingyu ni yawng gaw Yaku zawn masu hkalem chye nga ai ma ai majaw kadai mung tinang a makyin jinghku ni hpe n kam ma ai; masha shagu gaw shanhte a manang ni hpe shatan ma ai.

⁵Shanhte yawng gaw shanhte a manang ni hpe lam woi shadam ma ai, kadai mung teng man ai ga n tsun ma ai; shanhte gaw shanhte a shinglet ni hpe masu ga tsun na matu sharin ya manu ai, shanhte gaw yubak galaw ai amu hpe kau da na ma ai n rai. Shanhte gaw kashun kashe du daw sai hkaw amu hpe langai hpang langai galaw ma ai, masu hkalem ai amu langai hpang langai galaw ma ai. Dai MADU gaw shi a amyu masha ni shi hpe ningdang kau nga ai ngu tsun ai.

⁷Ndai lam a majaw Chyahtum Chyalai N-gun Rawng ai dai MADU gaw, “Ngai gaw nye a amyu masha ni hpe nhprang arai hpe zawn jen yu na nngai, shanhte hpe ngai chyam dinglik yu na nngai. Nye a amyu masha ni gaw n hkru ai amu galaw masai- Shanhte hpe ngai kaning di lu na rai ta?

⁸Shanhte a shinglet ni gaw sat kau chye ai pala ni hte bung nna, shanhte gaw tut nawng e masu magaw ga ni tsun ma ai. Masha shagu gaw tinang a htingbu ni hpe hku hkau ga tsun ma ai, rai ti mung, shanhte gaw dai ni a matu mahkam hpe teng teng hkam da nga ma ai.

⁹Ngai gaw ndai amu ni a majaw shanhte hpe ari n jaw na rai nga a ni? Ngai gaw ndai zawn re ai amyu baw hpe matai n dawk na rai nga a ni? Dai MADU ngai nan tsun ni ai,” ngu nna tsun ai.

¹⁰Ngai gaw, “Bum ni a matu sharung shayawt nna udat shara ni a matu hkrap na nngai, hpa majaw nga yang, dai ni gaw hkun hkraw mat nna, kadai mung dai hku n lai hkawm nga ai. Sagu dumsu hpung ni a nsen mung n na lu sai; ntsa malen u ni hte matse labye dusat ni mung hprawng mat masai,” ngu nna tsun ai.

¹¹Dai MADU gaw, “Ngai gaw Yerusalem hpe marawng marang di sumpum tawn nna, gwi ma-a ni nga ai shara shatai na nngai; Yuda mare ni gaw katsi katsang shara tai mat nna kadai mung n shanu ai shara tai mat na ra ai,” ngu nna tsun ai.

¹²Ngai gaw, “MADU e, lamu ga gaw hten mat ai hte zaibru jang zawn hkun hkraw mat ai hte hpa majaw kadai mung n lai hkawm nga a ta? Ndai lam hpe hkum tsup ai hku chye na hkawn hkrang na matu, hpaji rawng ai wa kadai rai nga a ta? Kadai wa hpe dai lam nang shaleng dan lu nna dai wa gaw kaga masha ni hpe tsun dan lu nga a ni?,” ngu nna san nngai.

¹³Dai MADU gaw, “Ndai lam nye a amyu masha ni ngai shanhte hpe jaw da ai sharin shaga ai ga ni hpe lale kau mu ai majaw byin wa sai. Shanhte gaw ngai tsun ai ga hpe n madat ma ai hte ngai tsun ai lam hku n hkan galaw ma ai.

¹⁴Dai zawn hkan galaw na malai, shanhte gaw du ja ai hte shanhte a kaji kawa ni shanhte hpe hkan galaw na matu sharin da ya ai hte maren, Bala hpara sumla ni hpe nawku ma ai.

¹⁵Dai rai nna, Chyahtum Chyalai N-gun Rawng ai dai MADU Israela a Karai Kasang ngai nan hpa galaw na hpe la madat yu mu; ngai gaw nye a amyu masha ni sha na matu lashi pila jaw nna gung hte kayau ai ntsin hpe lu shangun na nngai.

¹⁶Ngai gaw shanhte mung, shanhte a kaji kawa ni mung n na yu ai amyu ni a ka-ang e, shanhte hpe shabra kau ai hte shanhte hpe atsai awai shamyit kau ai aten du hkra shanhte hpang de hpyen luksuk ngai shangun dat na nngai,” ngu nna htan wu ai.

¹⁷Chyahtum Chyalai N-gun Rawng ai dai MADU gaw, “Hpa byin nga ai hpe myit yu mu! Sharung sharawt chye ai ni sa na matu, shaga mu, makoi mayang mahkawn ni chye mahkawn ai numsha ni hpe shaga mu,” ngu nna tsun ai.

¹⁸Amyu masha ni gaw, “Anhte a myi ni hta myi prwi ni hpring wa ai hte hkrap agru ai majaw anhte a myi hpyi ni madi mat ai aten du hkra, anhte a matu makoi mayang mahkawn mangoi mahkawn hpe alawan sa mahkawn na matu shanhte hpe tsun mu,” ngu nna tsun mu ai.

¹⁹Ziun hta ning nga hkrap ngu hkrap ngoi ai nsen hpe madat mu: “Anhte hten run mat saga ai! Anhte gaw dik hkra jahpoi asawng ai hkrum saga ai! Anhte gaw anhte a mungdan hpe kau da ra sai; anhte a dum nta ni run kau hkrum sai.”

²⁰Ngai gaw, “Numsha ni e, dai MADU a ga hpe madat mu, shi a ga ni hta myit jung mu. na a shayi sha ni kaning rai sharung shayawt na lam sharin ya mu, na a manang ni kaning rai makoi mayang mahkawn hkawn na lam sharin ya mu.

²¹Si Du gaw anhte a hkuwawt hku tawt bang nna anhte a hkawhkam htingnu ni hta shang nga ai; ma kaji ni hpe lam nmaw hkan, shabrang ni hpe shawa gat ginra ni hkan sat sharu kau da nga ma ai.

²²Masha si mang ni gaw hkauna pa hkan sumpum nga ai namhpun ni hte man dan ai wa a hpang e, lahkawn shinggyin la ai wa n nga ai hkauling zawn shara shagu hkan ayai taw nga ai. Ndai gaw dai MADU ngai hpe tsun shangun mayu ai ga rai nga ai,” ngu nna tsun ai.

²³Dai MADU gaw, “Hpaji rawng ai masha ni gaw shanhte a hpaji byeng-ya hta, n-gun ja ai ni gaw shanhte a n-gun lagaw hta, sut su ai masha ni gaw shanhte a sut gan hta gumrawng na n mai ang nga ai.

²⁴Marai langai ngai gumrawng mayu ai rai yang, shanhte ngai hpe chye nna, chye na hkawn hkrang ai ni chyu sha gumrawng na mai ang nga ai, hpa majaw nga yang, nye a tsaw ra myit gaw tut nawng agrin nga ai hte ngai galaw ai amu mung teng man ai hte ding man nga ai. Dai amu ni gaw ngai hpe awng sharawng shangun nga ai. Dai MADU ngai nan tsun ni ai,” ngu nna tsun ai.

²⁵Dai MADU gaw, “Egutu, Yuda, Edom, Amon, Moba masha ni hte kara kadun daw nna zaibru jang e nga ai masha ni hpe ngai ari jaw na aten du wa ra ai. Ndai amyu masha ni yawng hte wa matu gadoi nga ma ti mung, dai hpe masat dingsat galaw ai ga shaka hpe n kam ma ai. Ndai amyu masha ni hte Israela amyu masha ni langai mi mung nye a ga shaka hpe n hkan nga ma ai,” ngu nna tsun ai.