Read Jinghpaw Common Language Bible 2009 SHARUNG SHAYAWT 2 Bible Online

SHARUNG SHAYAWT 2 - Jinghpaw Common Language Bible 2009 bible

SHARUNG SHAYAWT 2

¹Dai Madu gaw shi a masin kahtet ai majaw, Ziun hpe nsin hte ka-up da nga wu ai. Shi gaw sumsing lamu a hkik hkam ai hpung shingkang hpe jahten sharun kau nu ai. Shi a masin kahtet ai shani e, shi gaw shi a Nawku Htingnu hpe pyi kabai kau nga ai.

²Dai Madu gaw Yuda mung hta nga ai mare shagu hpe matsan n dum ai sha jahten sharun kau nu ai, Mungdan hpe makawp maga ai hpyen dap ni hpe mung ashep ashin di kau nu ai. Shi gaw mungdan hte de a mungdu ni hpe jahpoi jahpyak lam shapraw nu ai.

³Shi masin kahtet ai majaw, Israela a n-gun makru hpe agrawp daw kau nu ai; Shi gaw gumlau hpyen wa du sa wa ai shaloi anhte hpe karum la na matu ningdang kau nu ai. Shi gaw wan zawn anhte hpe n-yun bu ai hte arai yawng mayawng hpe shaza kau nu ai.

⁴Shi gaw gumlau hpyen wa zawn anhte hpe shi a ndan pala ni hte shading da nga ai; Shi gaw anhte a kabu gara lam hte awng sharawng lam lu la ai masha ni yawng hpe sat kau nu ai. Wan zawn hkru nga ai shi a masin kahtet ai hpe ndai Yerusalem kata hta anhte hkam sha saga ai.

⁵Dai Madu gaw gumlau hpyen wa hpe zawn Israela hpe jahten sharun kau nu ai; Shi gaw hpyen dap ni hte hkawhkam htingnu ni hpe mung jahten shabyak kau nu ai. Shi gaw Yuda amyu masha ni a ntsa e htum n chye ai yawn hkyen lam hpe shapraw nu ai.

⁶Shi gaw anhte shi hpe nawku ai Nawku Htingnu shara hpe adaw atang di agrawp daw kau nu ai; Shi gaw dai chyoi pra ai nhtoi ni hte Bansa Nhtoi ni hpe mung jahtum kau nu ai. Hkawhkam wa hte hkinjawng wa mung shi a pawt sindawng ai n-gun hpe maren hkam sha manu ai.

⁷Dai Madu gaw shi a tawn hkungri hpe kabai kau nna shi a chyoi pra ai Nawku Htingnu hpe katsi katsang di kau nu ai; Shi gaw de a htingnu bunghku ni hpe adawt kau na matu gumlau hpyen wa hpe ahkang jaw nu ai. Shanhte gaw shawng de anhte kabu gara ai hte nawku yu sai shara hta awng padang hte jahtau garu nga ma ai.

⁸Dai MADU gaw Ziun a bunghku ni hpe agrawp daw kau na nga nna, myit daw dan da wu ai; Shi gaw dai mare hpe teng teng atsai awai shamyit kau na matu dai ni hpe shen dingdaw da nu ai. Ya chyawm gaw langchyi ni hte bunghku ni rau sha agrawp taw mat sai.

⁹Mare chyinghka ni adaw atang rai, ga hta lup taw nga nna, shanhte a chyinghka htinggrang ni adaw atang rai agrawp daw mat manu ai. Hkawhkam wa hte arawng lu ai du magam ni bawng dung hkrum nga masai. Tara a lam n sharin la nga ma ai, myihtoi ni mung dai MADU kaw na shingran hpa mung n hkam la lu nga ma ai.

¹⁰Yerusalem na asak kaba sai salang ni gaw ga ntsa e atsin sha dung nga nhtawm, Shanhte a baw ntsa hkan e ga nhpu kap nga nna, shanhte a hkum ni hta lachyit nba ni lawai da nga ma ai. Num mahkawn ma ni mung ga de gum dagup nga ma ai.

¹¹Nye a myi ni gaw hkrap ngu hkrap ngoi hte hki ba nga ai; nye a wenyi nchyi nmu hkrum nga ai. Ngai gaw nye a amyu masha ni a hten byak ai yawn hkyen lam hte atsu atsa nga nga nngai. Ma kaji ni hte ma chyangai ni mung mare nmaw lam hkan e malap mali ndum ndam rai ma ai.

¹²Kawsi kyet ai ni hte hpang gara ai ma ni gaw shanhte a kanu ni hpe hpyi jahtau ma ai; Shanhte ni gaw hkala nba hkrum ai ni zawn mare nmaw lam ni hkan kadawng taw ma ai, Shanhte a kanu ni a lahpyen hta angwi ngwi sha nsa htum mat ma ai.

¹³O Yerusalem, tsaw ra htum ai Yerusalem e, ngai kaning ngu tsun lu na rai nga a ni? Nang hpe ngai gara hku shalan shabran lu na rai nga a ta? Ndai zawn re ai nni nkri hpe kadai mung n hkam sha yu ma ai. Na a ru yak tsin-yam tsindam gaw nammukdara zawn shadawn masat n lu hkra dam lada nga ai; mai byin na zawn re ai myit mada shara hpa mung n nga nga ai.

¹⁴Na a myihtoi ni gaw masu magaw ga htoi ai hta jan nna hpa mung nang hpe n tsun yu mu ai; Shanhte a hkaw tsun ai myihtoi ga gaw na a shut hpyit ai mara hpe n tsun shapraw, n madun dan ai hku nna, nang hpe masu hkalem kau nu ai. Nang gaw myit malai n lu ra nit dai nga nna, shanhte nang hpe myit sawn kau shangun mu ai.

¹⁵Dai mare hku lai wa ai masha ni gaw nang hpe yu nna jahpoi asawng nga ma ai. “Ndai mare gaw yu tsawm na zawn rai nga a ni? Ndai mare gaw mungkan ting a gumrawng shara rai nga a ni?,” nga nna shanhte a baw ni kanga nhtawm Yerusalem mare a hten run mat ai hpe yu nna ashu nga ma ai.

¹⁶Na a gumlau hpyen ni yawng nang hpe jawm ashu nhtawm n dawng ai myi hte nang hpe yu shati da ma ai. “Anhte ndai mare hpe jahten kau lu saga ai! Anhte myit mada ala nga ai shani gaw dai shani nan rai nga ai,” nga nna shanhte gaw shanhte nten ni maka let jawng kau ma ai.

¹⁷Dai MADU gaw galaw na matu shi sharim da ai amu hpe jahtum e galaw shadik nu ai; Moi kaw nna anhte hpe shi sadi jaw da mi ai hte maren, anhte hpe matsan dum ai myit n nga ai sha, jahten sharun kau nu ai. Shi gaw anhte a gumlau hpyen ni hpe awng padang jaw nu ai; anhte a hkrat sum ai hta shanhte hpe kabu gara ai lam jaw ya nu ai.

¹⁸O Yerusalem e, na a bunghku ni gaw Madu hpe jahtau nga mu ga! Na a myi prwi ni mung hka nu ni zawn shani shana alwi nga u ga; Na hkum nan hkrap ngu hkrap ngoi ai hte yawn hkyen ai hta hki si ba si nga u!

¹⁹Shana tup lang hte lang rawt nna Madu hpe hpyi jahtau u; Na a myit masin hpe ru shapraw dat nhtawm lam jut shara shagu hkan e si na daram Kawsi kyet nga ai ma kaji ni hpe matsan dum la na matu, shi hpe hpyi nem u!

²⁰O MADU e, yu u! Nang gaw hpa majaw anhte hpe ndai zawn ari jaw nga n ni? Numsha ni gaw shanhte tsaw ra ai kashu kasha ni a hkum shan ni hpe sha nga ma hka! Hkinjawng ni hte myihtoi ni mung tinang a Nawku Htingnu kata hta nan sat kau ai hkrum nga ma ai.

²¹Shabrang ni hte numsha ni n nga nmaw lam hkan e si kadawng taw nga ma ai, Shabrang ni hte numsha ni mung gumlau hpyen wa a nhtu ni hte sat kau hkrum nga masai. Na a pawt sindawng ai shani e, shanhte hpe matsan n dum ai sha, nang htau sat kau nit dai.

²²Nang gaw nye a grup yin ni yawng hta hkrit hpa poi langai galaw na matu gumlau hpyen ni hpe shaga da nit dai, Dai na a masin kahtet ai shani e, kadai mung n hprawng lawt lu nga ai. Ngai tsaw ra nna bau maka tawn ai nye a ma ni hpe shanhte sat kau ya ma ai.