Read Jinghpaw Common Language Bible 2009 SHARUNG SHAYAWT 3 Bible Online

SHARUNG SHAYAWT 3 - Jinghpaw Common Language Bible 2009 bible

SHARUNG SHAYAWT 3

¹Ngai gaw Karai Kasang kaw na ari hkrum sha ang ai hpe chye ai wa rai nga nngai.

²Shi gaw ngai hpe grau grau sung ai nsin kata de gau bang kau nga ai.

³Matsan dum myit n rawng ai sha, ngai hpe lang hte lang kayat adup da nga ai.

⁴Shi gaw nye a ashan hpe katsing kalang hpaw malang da tawn nna, nye a nrut nra ni hpe agrawp kau nu ai.

⁵Shi gaw ngai hpe nchyi nmu hte nni nkri re ai hkyuk htawng hta sharen da ni ai.

⁶Shi gaw ngai hpe si hkrung si htan a nsin kata hta anga nga na matu aja awa shadut nu ai.

⁷Shi gaw ngai hpe hpri sumri ni hte gyit hkang da nu ai; ngai gaw hprawng lawt lam a myit mada shara n nga ai bawng masha langai rai nga nngai.

⁸Ngai gaw karum la hkrum na matu aja wa jahtau nngai, rai ti mung Karai Kasang madat ya nga ai n rai;

⁹Ngai kayin hkawm ai shara shagu hta nlung shakum ni hte pat shingdang da ai majaw, ngai hkawm sa wa yang, ndi nda rai nga nngai.

¹⁰Shi gaw ngai hpe htim amya na tsap zawn ala nga nna, hkanghkyi zawn nye a ntsa e htim gamyet da ni ai.

¹¹Shi gaw ngai hpe lam dingyang hkan shachyut nhtawm ngai hpe amya je nna ngai hpe tawn kau da nga ai.

¹²Shi gaw ndan shaw nna ngai hpe shi a pala shing te shara shatai nu ai.

¹³Shi gaw nye a hkum kata de pala ni hpe sung hkra gap bang nu ai.

¹⁴Amyu masha ni mung ngai hpe shani tup mani ashu ma ai; ngai gaw shanhte yawng a shatu shakra shara tai nga nngai.

¹⁵Shi ngai hpe jaw ai shahpa hte luhpa yawng gaw ahkup ahka nga ai nni nkri hkrai rai nga ai.

¹⁶Shi gaw nye a myi man hpe ga hta arut ya nna, nye a wa hpe lunghkrung ntsa e agrawp daw kau ya ni ai.

¹⁷Ngai gaw hkam kaja ai, ngwi pyaw ai hte kabu gara ai gaw hpa rai nga ai hpe malap kau ni ai.

¹⁸Ngai gaw asak grau galu hkra nga lu na n rai; dai MADU hpe myit mada ai mung htum mat sali ai.

¹⁹Nye a nchyi nmu hpe myit mang ai lam, ngai hta dum nta n lu ai gaw ahkup ahka nga ai gung rai nga ai.

²⁰Ngai gaw dai hpe dingyang myit yu ai hte nye a wenyi gaw hten run mat nga li ai.

²¹Ti mung, dai lam langai mi hpe ngai dum wa ai shaloi, myit mada lam bai lu la nga nngai.

²²Dai MADU a n htum n wai ai tsaw ra myit hte matsan dum ai gaw ya du hkra matut manoi rai nga ai,

²³Dai gaw jahpawt manap zawn ningsing nga nna jan rawt wa ai zawn teng teng kam hpa mai nga ai.

²⁴Ngai lu ai arai yawng mayawng dai MADU rai nga ai, dai rai nna shi hpe ngai myit mada nngai.

²⁵Dai MADU gaw shi hpe kam hpa nga ai masha shagu hte hpe mai kaja lam madun dan nga ai.

²⁶Dai rai nna, shi hpe myit galu ai hte ala nga let, anhte hpe hkye hkrang la na matu shi hpe la dingda nga ai gaw mai kaja htum nga ai.

²⁷Anhte a ram prat e, ndai myit galu ai hpe sharin la na gaw mai kaja htum nga ai.

²⁸Anhte nni nkri hkrum ga ai shaloi, anhte chyu sha atsin sha hkam sharang ai hte dung nga na ang nga ai;

²⁹Myit mada shara naw nga ang ai majaw anhte gaw hkungga lara ai hte dingnyawm na ang nga ga ai.

³⁰Kayat hkrum nna n kaw n law roi hkrum ti mung, anhte gaw dai lam yawng mayawng hpe hkam la na ang nga ga ai.

³¹Dai Madu gaw matsan dum ai wa rai nga nna, anhte hpe htani htana kau da na ra ai n rai.

³²Shi gaw anhte hpe yawn hkyen ai amu shapraw dan ti mung, anhte a matu shi a tsaw ra myit gaw kam ram ai hte n-gun ja nga ai.

³³Shi gaw anhte hpe yawn hkyen ai hte nchyi nmu re ai amu byin shangun na matu awng sharawng ai n rai.

³⁴Anhte a wenyi ni bawng dung hkrum nna agrawp mani kau hkrum ai shaloi, dai Madu chye nga ai.

³⁵Shi jaw ya ai ahkaw ahkang hpe anhte ndang kau nga ai hpe shi chye nga ai.

³⁶Tara rung hta teng man ai lam yit mat nga ai hpe shi chye nga ai.

³⁷Dai Madu a myit chyu sha hpa lam hpe rai tim tut nawng shabyin ya lu nga ai.

³⁸Mai kaja ai hte n mai kaja ai mung shi a hkang da ai ga kaw nna maren sha byin pru nga ai.

³⁹Anhte a shut hpyit kau ai yubak a matu anhte ari hkrum nga ga yang, hpa majaw aput angun nga nna tsun ang nga ga ni?

⁴⁰Anhte hkan nga ai lam ni hpe sagawn yu ga; dai MADU hpang de nhtang kayin wa ga.

⁴¹Sumsing lamu hta nga ai Karai Kasang hpang de anhte a myit masin ni hpe hpaw da nna, akyu hpyi ga;

⁴²O MADU e, “Anhte yubak galaw kau saga ai hte gumlau kau saga ai. anhte a yubak mara ni hpe mung nang raw dat kau ya nit dai n rai.

⁴³“Nang gaw anhte hpe hkan shachyut nna sat kau nit dai; na a matsan dum ai hpe sindawng kahtet ai hte magap kau nit dai,

⁴⁴Anhte a akyu hpyi ga nang hpang de hkrang lung wa na matu laru sumwi ni grai htat nga ai.

⁴⁵Nang gaw anhte hpe mungkan ga a shanut shanaw maza mala shatai kau nit dai.

⁴⁶“Anhte a gumlau hpyen ni yawng e n kaw n law jawm galaw ai hte asawng asang di ai mung hkrum sha saga ai.

⁴⁷Anhte gaw ru yak tsin-yam tsindam hte hten byak lam hku lai mat wa saga ai; anhte gaw shoihpa shoirang hte hkrit gari ai hta shanu nga ga ai.

⁴⁸Nye a myi ni gaw nye a amyu masha ni a hten za ai hta hka nu ni lwi hkrat wa ai zawn myi prwi si ni lwi hkrat nga li ai.

⁴⁹“Nye a myi prwi ni gaw hka shi ni zawn n sim n sa alwi nga na ra ai gaw

⁵⁰Dai MADU anhte hpe sumsing lamu kaw nna gum yu nhtawm anhte hpe mu mada ai aten du hkra rai nga ai.

⁵¹Ndai mare na numsha ni a byin hkrum sha ai hpe ngai mu mada ai shaloi, nye a myit masin yawn nga li ai.

⁵²“Ngai hpe mara kata n dawng ai gumlau hpyen ni a majaw, u hpe zawn ngai mahkam hkam hkrum nga nngai.

⁵³Shanhte gaw ngai hpe nhkun kata de chyahkrung kabai bang nna nhkun mahka hpe nlung hte pat da ma ai.

⁵⁴Nye a ntsa de hka lim kaput bang wa ai shaloi si hkrung si htan gaw ni wa ra ai ngu nna ngai myit nawn kau ni ai.

⁵⁵MADU e, ngai gaw nang hpe nhkun htumpa kaw nna marawn jahtau ni ai,

⁵⁶Nye a hpyi jahtau ai nsen hpe madat ya na matu ngai nang hpe hpyi lajin ai shaloi, nang na ya nit dai.

⁵⁷Nang gaw ngai hpe hpa hkrit tsang shara n nga ra ai nga nna htan ni ai hte tsun nit dai.

⁵⁸“Madu e, ngai hpe hkye mawai la na nang du sa nit dai hte nye a asak hpe hkye hkrang la nit dai.

⁵⁹Ngai hpe gumlang ai shut hpyit ai amu hpe nang chye nit dai majaw, nye a matu teng man ai amu daw dan ya e.

⁶⁰Nye a gumlau hpyen ni ngai hpe kade n dawng nga ai hte shanhte ngai hpe gara hku maw mawn nga ai hpe nang chye ndai.

⁶¹“O MADU e, shanhte ngai hpe n kaw n law di ai nsen hpe nang na nit dai; nang gaw shanhte a maw mawn ai lam yawng mayawng hpe mung chye nga ndai.

⁶²Shanhte gaw shani tup ngai hpe shatan nhkan ga tsun nna n hkru ai hku maw mawn nga ma ai.

⁶³Shanhte gaw ngai hpe jahpawt kaw nna shana du hkra, asawng asang di mi ai.

⁶⁴“O MADU e, shanhte galaw sai amu hte maren, shanhte hpe ari jaw u;

⁶⁵Shanhte hpe dagam kau nna myit daw myit htum ai hte jahpring ya u!

⁶⁶Shanhte hpe hkan hkwi la ai hte ndai mungkan ga kaw nna shamyit kau u!”