Read Jinghpaw Common Language Bible 2009 SHARUNG SHAYAWT 4 Bible Online

SHARUNG SHAYAWT 4 - Jinghpaw Common Language Bible 2009 bible

SHARUNG SHAYAWT 4

¹Anhte a htoi kabrim ai aja gaw n kabrim mat nu ai; Nawku Htingnu nlung ni mung nmaw lam hkan e taw nga ai.

²Ziun a shabrang ni gaw ja zawn manu dan ma ai, rai ti mung, ya chyawm gaw shanhte ni yawng ga di bu ni hpe zawn di kau hkrum nga manu ai.

³Chyahkyawn kanu pyi shi a hkalung ni hpe bau maka nga ai, rai ti mung, nye a amyu masha ni gaw u gawla-uk ni zawn shanhte a kasha kaji ni hpe gumshem nga ma ai.

⁴Shanhte gaw shanhte a chyu chyu ai ma ni hpe kawsi kyet ai hte hpang gara ai hku si jahtum kau shangun ma ai; ma kaji ni lusha hpyi nga ma ti mung, shanhte hpe jaw sha na masha langai mi mung n nga nga ai.

⁵Lang mi mu mai htum ai lusha ni sha yu sai masha ni gaw lusha kyet ai majaw nmaw lam hkan e si taw nga ma ai; pyaw hpa lam hta len yu sai ni gaw lusha a matu shanut shanaw hkan tam mahkai hta nga ma ai.

⁶Karai Kasang a lata hta akajawng sha hkrat sum mat ai Sodom mare masha ni a yubak hta, nye a amyu masha ni hkrum sha ai ari gaw grau nna pyi kaba nga ai.

⁷Anhte a hkawhkam shadang sha ni gaw matsat shabat awu asin n re ai sha hkyen zawn san seng nna; wa-ngan marai hte n-gun ja nhtawm shanhte hta hkam kaja ningchya rawng nga ma ai.

⁸Ya chyawm gaw, shanhte a myi man nsam ni chyang mat nna nmaw lam hkan e kadai n chye ai sha si taw nga ma ai; shanhte a ahpyi ni gaw nrut nra ni a ntsa e kap mat nna dai gaw hpun hpyi zawn hkraw mat nga ai.

⁹Hpyen majan hta si mat wa ai ni gaw lusha kyet nna angwi ngwi sha nsa hkyet mat wa ai hkrum let, si mat wa ai ni hta grau nna kaja nga ma ai.

¹⁰Dai ru yak tsin-yam tsindam gaw nye a amyu masha ni hpang de hkrit hpa la sa nga ai; tsaw ra myit manoi ai kanu ni gaw shanhte a kashu kasha ni hpe lusha a matu shadu ma ai.

¹¹Dai MADU gaw shi a sindawng kahtet ai n-gun tup hpe ru dat nu ai; shi gaw Ziun hpe ga du hkra hkru kau ai wan shachyi nu ai.

¹²Kadai wa rai ti mung gara shara kaw nna kade e mung, maigan masha amyu baw ni a mungdu ni pyi Yerusalem mare chyinghka lam hku shang gasat lu na re ngu, n kam ma ai.

¹³Rai ti mung, dai gaw mara n kap ai amyu masha ni a si hkrung si htan lam shabyin ai myihtoi ni a shut hpyit ai yubak ni hte hkinjawng ni a shut hpyit ai mara ni a majaw byin wa sai.

¹⁴Shi a ningbaw ni gaw myi n mu ai ni zawn nmaw lam ni hkan lamawm hkawm ma ai; dai rai nna shanhte a hkum gaw asai ni hte numsha nga ma ai rai nna kadai mung shanhte hpe n hkra lu ma ai.

¹⁵Masha ni gaw, “Yen mu! Nang gaw matsat shabat agang chyalang rai nga ndai! Ngai hpe hkum hkra myit!,” nga nna jahtau ma ai. Dai re ai majaw, shanhte gaw masha amyu baw mi kaw nna masha amyu baw mi de brak hkawm nga ma ti mung, kadai mung n hkalum la nga ma ai.

¹⁶Dai MADU gaw shanhte a matu loi mi pyi n myit tsang ya nga ai; shi gaw shi hkum nan shanhte hpe shaden kau nu ai. Shi gaw anhte a hkinjawng ni hte ningbaw ni hpe hpa n sawn wu ai.

¹⁷Anhte gaw galoi mung n karum yu ai karum la lam hpe kachyi mi pyi n lu yu mat ai aten du hkra mada yu ga ai. Anhte gaw karum la lam n jaw ya lu ai masha amyu baw a karum la lam hpe la nga dingyang rai nga ai.

¹⁸Dai gumlau hpyen wa gaw anhte hpe azi yu nga ai; anhte gaw nmaw lam hkan e pyi n hkawm lu saga ai. Anhte a nhtoi ni mung lai mat sai; jahtum aten du nga sai.

¹⁹Shanhte gaw lamu ntsa kaw nna htim yu wa ai galang ni hta pyi grau lawan nna anhte hpe htim shachyut ma ai. Shanhte gaw anhte hpe bum lang hkan e hkan tam ma ai, anhte hpe nam mali hkan e akajawng sha rim woi la ma ai.

²⁰Shanhte gaw dai MADU lata san da sai anhte a asak hka hpawk rai nga ai, Anhte hpe shang gasat ai hpyen shagu a lata kaw na anhte hpe makawp maga la na matu, anhte kam hpa nga ai dai hkawhkam wa hpe mung rim la ma ai.

²¹Edom hte Uza mung masha ni e, mani sumsai rai nga mu; nang dang lu ai made kabu gara nga u. Na a ru yak tsin-yam tsindam mung du wa ra ai; nang mung ndi nda rai lam hkawm nhtawm singgu krin kaya kahpa hkrum na rin dai.

²²Ziun gaw shi shut hpyit ai yubak a matu shabrai lu nu ai; Dai MADU gaw anhte hpe galoi mung bawng dung shangun sana n rai. Rai ti mung, Edom e, dai MADU gaw nang hpe ari jaw na ra ai; shi gaw na a shut hpyit ai arawn alai ni hpe shadan dan na ra ai.