Read Jinghpaw Common Language Bible 2009 SHARUNG SHAYAWT 5 Bible Online

SHARUNG SHAYAWT 5 - Jinghpaw Common Language Bible 2009 bible

SHARUNG SHAYAWT 5

¹O MADU e, anhte hta hpa byin nga sai lam hpe dum nga u. Anhte hpe mada yu nna, anhte hpe jahpoi jahpyak ai lam hpe mu ya e.

²Anhte a sut gan sali wunli gaw tsasam masha ni a lata de shang mat nna; maigan masha ni mung anhte a dum nta ni hkan e shanu nga ma ai.

³Anhte a kawa ni gumlau hpyen ni a lata hta sat kau hkrum masai, ya chyawm gaw anhte a kanu ni mung gaida da nga ma ai.

⁴Anhte lu na ntsin a matu manu jahpu jaw ra ga ai; anhte hta ra ai ju hpun hpe anhte mari ju ra ga ai.

⁵Lawze shing n rai gawla-uk ni hpe zawn ja ja shaden kau hkrum nga ga ai; anhte gaw hki ba ai hkrum nga ga tim, ban sa na ahkang n lu nga ga ai.

⁶Lusha alaw mi lu na matu hte asak hkrung nga lu na matu, anhte gaw Egutu hte Asuri mung de sa hpyi lajin ga ai.

⁷Anhte a kaji kawa ni yubak galaw masai, rai ti mung ya chyawm gaw shanhte htum mat masai, anhte gaw shanhte a yubak ni a majaw nni nkri hkrum sha nga ga ai.

⁸Anhte gaw mayam ni hta grau n kaja ai masha ni a up hkang ai hkrum ga ai, kadai mung shanhte a lata kaw nna anhte hpe n hkye mawai la lu nga ai.

⁹Masha sat ai ni gaw mungdan jut shingnaw hkan e brak hkawm nga ma ai; anhte shahpa tam ai shaloi, anhte a asak dan let shakut tam ga ai.

¹⁰Wan htung zawn kahtet ai gaw anhte a ahpyi ni chyang mat ai aten du hkra, kawsi kyet ai gaw anhte hpe machyi makaw hte hkru kau shangun mi ai.

¹¹Anhte a madu jan ni gaw Ziun Bum ntsa hta nan roi rip hkrum manu ai; Yuda mung kahtawng shagu hta nga ai anhte a shayi sha ni mung adip arip rai woi yup kau hkrum nga masai.

¹²Anhte a ningbaw ni woi la hkrum ai hte noi jen da ai hkrum manu ai; anhte a myit su salang ni hkungga hkrum ma ai n rai.

¹³Anhte a shabrang ni gaw mayam ni zawn maja e htum rin rin hkrum ma ai; la kasha ni mung li ai hpun lit gun let, ndi nda n dang nla rai ma ai.

¹⁴Asak kaba salang ni gaw mare chyinghka hta galoi mung n sa dung masai; shabrang ni mung sumpyi loi mi sha pyi n dum ma ai.

¹⁵Kabu gara ai gaw anhte a asak hkrun lam hta htum mat sai; yawn hkyen ai gaw anhte a ka manawt ai shara hta shang la kau nu ai.

¹⁶Anhte a gumrawng shara yawng hpa mung n nga sai. Anhte yubak galaw ga ai hte, ya chyawm gaw ari hkrum saga ai.

¹⁷Anhte gaw gawng run gawng tsang hkrum nga ga ai; myi prwi si ni a majaw asan awan mu mada lu na yak nga ai.

¹⁸Ziun Bum gaw shi chyu sha re re rai shingran katsi mat ai majaw; nam na matse ai gwi ma-a ni de a hten run shara ni hkan lanyan hkawm nga ma ai.

¹⁹Rai ti mung, O MADU e, nang gaw htani htana na hkawhkam wa rai nga ndai; aten ladaw htum mat ai aten du hkra a up nga na rin dai.

²⁰Nang anhte hpe hpa majaw dai daram na hkra kau da n ni? Nang anhte hpe bai dum nga na kun?

²¹MADU e, anhte hpe nang hpang de nhtang woi la mi! Anhte hpe nhtang woi la mi! Moi na anhte a arawng sadang hpe bai jaw ya mi!

²²Shing n rai, anhte hpe htani htana kau da na nu ni? Na a masin kahtet ai hta shadaw shadang hpa mung n nga sana kun?