Read Jinghpaw Common Language Bible 2009 EZEKELA 1 Bible Online

EZEKELA 1 - Jinghpaw Common Language Bible 2009 bible

EZEKELA 1

¹Ya sumshi ning ngu na shata mali a manga ya shani e, Babelon mung na Hkebara hka nu makau hta bawng dung ai Yuda masha ni hte Buzi a kasha ngai hkinjawng Ezekela ni nga nga yang, sumsing lamu hpaw malang wa nna Karai Kasang a shingran hpe ngai mu nngai.

²(Dai gaw Hkawhkam Yehoiahkin bawng rim hkrum mat wa ai manga ning na ai hpang byin wa ai lam rai nga ai.)

³Dai Babelon mung Hkebara hka nu hka kau e, MADU ngai hpe tsun ai ga na ai hte shi a daru magam n-gun atsam hpe ngai hkam sha ni ai.

⁴Ngai sharawt mada yu ai shaloi, dingdung maga de na bung sa wa ai nbung laru hpe mu nngai. Htat ai sumwi kata kaw na gala ai myihprap wan gaw gala nga nna sumsing lamu grup grup hkan htoi gala ai hte myihprap wan gala ai shara mi hta magri mang zawn htoi tu kabrim ai arai lama mi mung nga nga ai.

⁵Dai nbung laru a ka-ang hta shinggyim masha hkrang hte bung ai dusat amyu mali nga nga ai hpe ngai mu nngai,

⁶rai ti mung, shanhte langai hte langai hta myi man mali li, singkaw mali li tu nga ai.

⁷Shanhte a lagaw ni malang nga ai, shanhte a lahkru ni gaw dumsu usu lahkru zawn rai nga ai. Shanhte gaw arut shatsawm tawn ai magri mang zawn htoi kabrim nga ai.

⁸Dai sha n-ga, shanhte a myi man man mali hte singkaw mali hta jan nna masha lata mali hpra tu nga ma ai, singkaw shagu a npu hta lata langai hpra tu nga ai.

⁹Dusat amyu mali a singkaw lahkawng hkawng hpe hpyan shapraw da ma ai; dai dusat mali ni gaw shanhte a singkaw matu ni shada da hkra nhtawm, man mali bung ai hkrang shapraw ma ai. Shanhte shamu hkawm wa ai shaloi, shanhte a hkum ni hpe n kayin ra ai sha, man ang ang de hkawm wa ma ai.

¹⁰Dai hkrung nga ai dusat shagu hta kaga ga re ai myi man amyu mali rawng nga ai. Dai ni gaw man maga de masha a myi man, hkra maga de hkanghkyi myi man, pai maga de usu myi man hte shingdu maga de galang myi man ni rai ma ai.

¹¹Dai dusat amyu shagu a singkaw lahkawng sharawt da ma ai, langai hte langai a singkaw matu shada da hkra hkat ma ai; shanhte a kaga singkaw lahkawng hpra hpe gaw tinang a hkum ni hta gumba bang da nga ma ai.

¹²Dai dusat shagu gaw man mali de myi man yawng ma ai, shaloi dai hpung gaw shanhte hkawm mayu ai shara de hkum n kayin la ra ai sha hkawm sa lu ma ai.

¹³Dai dusat ni a lapran e agrung nga ai wan shanan zawn re ai arai lama mi tut e shamu hkawm nga ai. Dai wan shanan gaw grung wa nna myihprap wan gala ya nga ai.

¹⁴Dai dusat ni gaw shanhte hkum hpe myi hprap wan gala ai daram lawan ai hku shawng de, hpang de akajawng sha kagat sa ma ai.

¹⁵Ngai gaw dai dusat mali hpe mada yu nga yang, shanhte langai hte langai hta maga mi de langai ngai rawng nna ga de hkra nga ai leng dingsen mali hpe ngai mu nngai.

¹⁶Dai leng dingsen mali hte gaw maren bung nga ai; langai hte langai gaw manu dan nlung zawn htoi tu nga ai, dingsen kata e dingsen chyai ai zawn bang da nga ai,

¹⁷shaloi, dai leng dingsen ni gaw kaning re ai man mali de mung hkawm lu nga ai.

¹⁸Leng hkawp ni gaw myi ni hte hpring nga ai.

¹⁹Dai dusat ni hkawm sa ai aten shagu, leng dingsen ni mung shanhte hte rau chyai nang nga ai, dai dusat ni ga ntsa kaw nna rawt lung wa ai yang, leng dingsen ni mung hkan nang nga ai.

²⁰Dai dusat ni gaw leng dingsen ni hpe hkang da mu ai majaw, dusat ni shanhte ra ai de hkawm sa shagu, leng dingsen ni mung tup hkrak hkan nang nga ma ai.

²¹Dai rai nna, dai dusat ni hkawm ai shing n rai hkring sa ai aten hte ntsa de rawt lung wa ai aten shagu hta dai leng dingsen ni mung tup hkrak hkan nang nga ma ai.

²²Dai dusat ni a baw ntsa e pat zawn kabrim gala nga ai lamu madin lama mi nga nga ai.

²³Dai lamu madin npu e dusat ni tsap nga ma ai, shanhte langai hte langai a singkaw lahkawng hpe shada da ang ang kahpyan da nhtawm shanhte a hkum ni hpe ngam ai singkaw lahkawng hpra hpra hte ka-up da ma ai.

²⁴Shanhte pyen hkawm wa ai shaloi, dai singkaw a ngoi wu ai nsen gaw panglai hka wu kadu ai nsen zawn mung, hpyen luksuk kaba jahtau garu ai nsen zawn mung, Chyahtum Chyalai N-gun Rawng Ai Karai Kasang a nsen zawn nga nna wu kadu ai nsen hpe ngai na nngai; shanhte gaw pyen ai kaw na hkring ai shaloi, shanhte a singkaw ni hpe gumba bang da nga ma ai.

²⁵Rai ti mung, shanhte a baw ntsa lamu madin a ntsa kaw na wu kadu ai nsen gaw naw ngoi nga ai.

²⁶Dai lamu madin a ntsa e nila lung seng hte galaw da ai tingnyang zawn re ai lama mi mung naw nga nga ai; dai tingnyang a ntsa e masha zawn san ai wa langai mi dung nga ai.

²⁷Dai wan shinglet a ka-ang e, magri mang zawn htoi kabrim ai hkrang nga nga ai rai nna, dai gaw htoi kabrim ai nhtoi hte yawng a ntsa e htoi tu nga ai;

²⁸dai yawng a ntsa e htoi tu ai nsam gaw n-goi latum a nsam ni rai nga ai. Dai gaw dai MADU a hpung shingkang dan hkung ai nsam hpe shapraw dan ai shi a htoi kabrim ai shara rai nga ai. Dai lam hpe ngai mu ai shaloi, ngai gaw ga ntsa e myi man dagup da nngai. Dai hpang nsen langai hpe ngai na nngai. Dai lam hpe ngai mu ai shaloi, ngai gaw ga ntsa e myi man dagup da nngai. Dai hpang ngai gaw nsen langai na nngai.