Read Jinghpaw Common Language Bible 2009 EZEKELA 11 Bible Online

EZEKELA 11 - Jinghpaw Common Language Bible 2009 bible

EZEKELA 11

¹Karai Kasang a wenyi gaw ngai hpe pawn la nna, Nawku Htingnu a sinpraw chyinghka de ngai hpe woi wa nga ai. Shaloi dai chyinghka lam a makau e marai hkun manga nga nga ai hpe ngai mu nngai; shanhte hta amyu baw a ningbaw rai nga ai Azura a kasha Yazania hte Benaia a kasha Pelatia yan mung lawm nga ma ai hpe ngai mu nngai.

²Karai Kasang gaw ngai hpe, “Si chye ai masha wa e, ndai masha ni gaw ndai mare hta n hkru ai amu maw mawn nna n kaja ai lam hpaji jaw ma ai.

³Shanhte gaw, ‘Anhte gaw kade n na yang, dum nta ni hpe bai gaw gap lu na saga ai. Ndai mare gaw di zawn rai nna, anhte gaw dai di na ashan zawn rai nga ga ai, rai ti mung dai gaw yawm dik htum anhte hpe wan kaw nna makawp maga la nga ai,’ ngu nna tsun ma ai.

⁴Ya chyawm gaw, si chye ai masha wa e, shanhte hpe jahpoi kau u,” ngu nna tsun wu ai.

⁵Dai MADU a wenyi gaw ngai hpe up hkang ai hte amyu masha ni hpe ndai mungga htawn tsun na matu ngai hpe hkang da ni ai: “Israela amyu masha ni e, nanhte hpa tsun nga myit dai hte kaning re ai amu maw mawn nga myit dai gaw ngai chye nngai.

⁶Nanhte gaw ndai mare hta amyu masha law law hpe sai jahkaw ai amu galaw manit dai majaw nmaw lam ni hta si mang ni hte hpring nga ai.

⁷“Dai rai nna, ndai gaw Tsaw Htum ai dai MADU ngai nan nanhte hpe tau tsun nga ai mungga rai nga ai. Rai sa, ndai mare gaw shadu sha ai di rai nga ti mung, shan gaw kaning re ai rai nga a ta? Dai gaw nanhte sat kau manit dai si mang ni rai nga ai! Nanhte gaw ndai mare e nga lu na n rai. Ngai nanhte hpe ndai mare kaw na shapraw kau na made ai!

⁸Nanhte ri nhtu ni hpe hkrit nga myit ni? Ngai gaw nanhte hpe htim gasat na matu ri nhtu lang ai masha ni hpe shangun dat na nngai.

⁹Ngai gaw nanhte hpe ndai mare kaw na shapraw kau nhtawm maigan masha ni a lata de ap kau na nngai. Ngai gaw nanhte hpe si hkrung si htan hte jeyang na nngai,

¹⁰shaloi nanhte gaw nanhte a mungdan kata e byin ai majan hta sat kau hkrum na marin dai. Ngai gaw dai MADU rai nga nngai hpe masha shagu chye lu na ra ai.

¹¹Di gaw dai kata na shan hpe makawp maga da lu ai zawn, dai mare gaw nanhte hpe makawp maga da lu na ra ai n rai; Ngai gaw Israela mungdan shara shagu hkan nga ai nanhte hpe ari jaw na nngai.

¹²Nanhte gaw nye a hkang da ai ga hte matsun maroi tara ni hpe n madat n mara ai sha, jahten kau nhtawm nanhte a grup yin na masha amyu baw ni a htung tara ni hpe shadik shatup myit dai shaloi, ngai nan dai MADU rai nga nngai hpe nanhte chye lu na rai myit dai.

¹³Ngai myihtoi htoi nga yang pyi, Pelatia gaw du krung shakya kau ai hte si mat sai. Ngai gaw nye a myi man hpe ga de gum dagup let, “Tsaw Htum ai MADU e, nang gaw Israela mung hta naw ngam nga ai masha shagu hte hpe sat kau na ngu wu ni?,” ngu nna jahtau tsun nngai.

¹⁴Dai MADU gaw ngai hpe ga shaga ai.

¹⁵Shi gaw, “Si chye ai masha wa e, Yerusalem hta nga ai amyu masha ni gaw na a lam hte bawng dung hkrum nga ai na a Israela kahpu kanau ni hte seng nna tsun jahta nga ma ai. Shanhte gaw, ‘Bawng dung hkrum ai masha ni gaw dai MADU hpe nawku na matu grai tsan gang mat wa masai. Shi gaw ndai lamu ga anhte hpe jaw mani ai,’ ngu nna tsun ma ai.

¹⁶Ya chyawm gaw, na a bawng dung kahpu kanau ni hpe ngai tsun shaga ai mungga tsun dan u. Ngai gaw shanhte hpe sumtsan mung na masha amyu baw ni kaw shanu nga na matu, shangun kau dat ai wa rai nna, shanhte hpe kaga mungdan ni de shabra ayai kau ni ai. Rai ti mung, shanhte sa nga ai mungdan ni hta ngai gaw shanhte hte tawng marang mi rau nga nga na nngai.

¹⁷“Dai majaw, Tsaw Htum ai dai MADU ngai nan tsun sai mungga shanhte hpe htawn tsun u. Ngai gaw shanhte hpe shabra ayai kau dat ai mungdan ni kaw na shinggyin la nhtawm Israela mungdan hpe shanhte a lata de bai nhtang ap ya na nngai.

¹⁸Shanhte bai nhtang wa ma ai shaloi, shanhte lu da ai awu asin re ai hte matsat shabat re ai hpara sumla ni yawng hpe shanhte htawm kabai kau na mara ai.

¹⁹Ngai gaw shanhte hpe salum nnan hte myit masin nnan jaw bang ya na nngai. Ngai gaw shanhte a ja la ai nlung salum hpe shaw kau ya nna madat mara ai salum shanhte hpe jaw bang ya na nngai.

²⁰Dai hpang, shanhte gaw nye a tara ni hpe shadik shatup lu na mara ai; nye a hkang da ai ga yawng hpe kangka ai hte madat mara hkan sa na mara ai. Shaloi, shanhte gaw nye a amyu masha ni tai wa ai hte ngai mung shanhte a Karai Kasang tai nga na nngai.

²¹Rai ti mung, awu asin re ai hte matsat shabat re ai hpara sumla ni hpe nawku na myit manoi tsaw ra nga ai ni hpe chyawm gaw ngai ari jaw na nngai. Shanhte galaw lai wa sai amu hte maren, shanhte hpe ngai ari jaw na nngai,” ngu nna dai Tsaw Htum ai dai MADU nan tsun wu ai.

²²Dai hkrung kanu ni pyen hpang wa yang, leng dingsen ni mung rau hkan nang nga ma ai. Israela a Karai Kasang a htoi tu ai hpung shingkang mung shanhte a ntsa e rai nga ai.

²³Dai hpang, htoi tu kabrim ai gaw dai mare kaw nna pru mat wa nhtawm mare a sinpraw maga e nga ai bum de htawt sit mat wa ai.

²⁴Karai Kasang a wenyi gaw shi a shingran hta ngai hpe pawn la nna Babelon mung na bawng dung ai ni hpang de ngai hpe bai woi nhtang wa ni ai. Dai hpang shingran hkoi mat wa nna,

²⁵ngai gaw dai MADU ngai hpe madun lai wa sai lam yawng mayawng, bawng dung masha ni hpe tsun dan ni ai.