Read Jinghpaw Common Language Bible 2009 EZEKELA 12 Bible Online

EZEKELA 12 - Jinghpaw Common Language Bible 2009 bible

EZEKELA 12

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, nang gaw gumlau ai masha ni a lapran e nga nga ndai. Shanhte gaw na tu ti mung hpa tsun ai hpe n na ma ai, hpa majaw nga yang, shanhte gaw gumlau chye ai masha ni rai ma ai.

³“Ya chyawm gaw, si chye ai masha wa e, hprawng shingbyi hkawm ai wa gaw shana nsin garai n sin yang htawt hkawm na matu arai shajin ai zawn arung arai majaw hkyen makai shajin da u, shaloi masha shagu gaw nang pru mat wa nna kaga shara de sa mat wa ai hpe mu la mu ga. Dai sha n-ga, shing re ai lam hpe ndai gumlau chye ai masha ni mung nang hpe yu matsing lu mai yang matsing lu mu ga.

⁴Shani aten naw rai nga yang, bawng dung ai a matu, na a arung arai majaw hpe makai shajin da u, shaloi shanhte nang hpe mu lu na mara ai. Shanhte gaw nang hpe azi yu lu mu ga, nang nan bawng dung hkrum mat wa ai wa zawn shana de na aten e nang pru mat wa u.

⁵Shanhte azi yu nga ma yang, na a nta na wang bunghku hpe htu waw nhtawm na a arai majaw hpe dai hku la shapraw u.

⁶Shanhte nang hpe azi yu lu mu ga, na a arung arai majaw hpe na a lahpa ntsa e hpai mara nhtawm na a myi man htinggrum kau let htat ai nsin kata de hkawm sa wa su. Nang kade hkawm sa nga ai hpe nang n mu lu na ndai. Ya nang hpa galaw nga ai lam gaw Israela masha ni hpe sadi jaw ai kumla tai na ra ai,” ngu nna tsun ai.

⁷Ngai gaw dai MADU tsun matsun ai hte maren, galaw ni ai. Ngai gaw hprawng shingbyi hkawm ai wa zawn, dai shani e arung arai majaw hpe makai nna dai shana nsin htat wa ai aten e, ngai gaw nye a lata hte bunghku hpe htu waw nna pru mat wa ni ai. Masha shagu ngai hpe azi yu nga ma yang, ngai gaw nye a arung arai majaw hpe nye a lahpa ntsa e hpai mara nhtawm pru mat wa ni ai.

⁸Hpang jahpawt e, dai MADU a mungga ngai kaw du ai.

⁹Shi gaw, “Si chye ai masha wa e, ya chyawm gaw ndai gumlau ai Israela amyu masha ni nang hpa galaw nga ai lam nang hpe san yu nga ma ai,

¹⁰Tsaw Htum ai dai MADU ngai nan shanhte hpe tsun nga ai ga, shanhte hpe htawn tsun u. Dai mungga gaw Yerusalem hpe up hkang nga ai mung du hte dai mare hta shanu nga ai amyu masha ni yawng a matu rai nga ai.

¹¹Nang galaw lai wa sai amu gaw shanhte hta hpa byin wa na lam a kumla rai nga ai lam shanhte hpe tsun dan u. Shanhte gaw hprawng shingbyi hkawm ai ni hte bawng dung sharen da hkrum ai ni tai na mara ai.

¹²Shanhte up hkang nga ai mung du gaw shi a arung arai majaw hpe lahpa hta hpai nna htat ai nsin aten e, shanhte gaw shi a matu bunghku htu waw ya ai hte dai lam hku hprawng lawt mat wa na ra ai. Shi gaw shi a myi hpe htinggrum magap da wu ai majaw shi hkawm sa nga ai shara hpe pyi n mu lu nga ai.

¹³Rai ti mung, ngai gaw nye a sumgawn hte shi hpe ka-up la nna dai hta shi hpe hkam la na nngai. Dai hpang, ngai gaw shi hpe Babelon mare de woi wa nna dai shara hpe shi n mu lu ai sha, si mat na ra ai.

¹⁴Ngai gaw shi a grup yin hkan nga ai hkaw wang na amyu bawsang ni yawng hte shi a hpaji jaw ninghkrin ni hte sin langa ni hpe man ang ai shara shagu de shabra ayai kau na nngai. Amyu masha ni gaw shanhte hpe sat kau na matu hkan tam na mara ai.

¹⁵“Ngai gaw shanhte hpe kaga masha amyu baw ni a lapran hte maigan mungdan ni hkan shabra ayai kau dat ai shaloi, shanhte gaw ngai nan dai MADU rai nga nngai hpe chye lu na mara ai.

¹⁶Ngai gaw shanhte hta na nkau mi hpe hpyen majan, kawsi kyet si ai hte ana zinli kaw nna shalawt dat na nngai, masha amyu baw ni a lapran e shanhte galaw lai wa sai arawn alai ni kade daram matsat shabat rai nga sai hpe myit dum wa nhtawm, ngai nan dai MADU rai nga nngai hpe shanhte yin la na mara ai,” ngu nna tsun wu ai.

¹⁷Dai MADU ngai hpe ga shaga wu ai.

¹⁸Shi gaw, “Si chye ai masha wa e, nang lusha sha ai shaloi, gari ashun nga nna nang ntsin lu ai shaloi hkrit gari ai hte ashun nga u.

¹⁹Ndai gaw Tsaw Htum ai dai MADU shi nan Yerusalem mare masha ni hpe lakap nna shanhte a mungdan hta naw shanu nga ai ni hpe tsun ai mungga rai nga ai; dai hpe amyu baw ting hpe htawn tsun dan u; shanhte lusha sha ai shaloi gari na mara ai, shanhte ntsin lu ai shaloi hkrit gari ai hte ashun na mara ai. Shanhte a mungdan hta shanu nga ai masha shagu hte gaw hkang da ai tara hpe n hkan ma ai majaw shanhte a mungdan gaw katsi katsang akrin akraw shara tai mat na ra ai.

²⁰Ya aten mare masha ni hte hpring nga ai mare ni hten run mat nna, mungdan gaw shingran katsi ai shara tai mat na ra ai. Shanhte gaw ngai nan dai MADU rai nga nngai hpe chye lu na mara ai,” ngu nna tsun wu ai.

²¹Dai MADU gaw ngai hpe ga shaga ai.

²²Shi gaw, “Si chye ai masha wa e, hpa majaw Israela amyu masha ni gaw, ‘Aten ladaw lai mat nna tau tsun ga ni hpa rai n byin ai kun?,’ nga nna dai ga shagawp hpe kahtap tsun tsun rai nga ma ni?

²³Ya chyawm gaw, Tsaw Htum ai dai MADU ngai nan dai hpe lakap nna tsun ai ga, shanhte hpe htawn tsun u. Ngai gaw dai ga shagawp hpe shamat shaprai kau na nngai. Dai ga hpe Israela amyu masha ni hta galoi mung kahtap tsun sana ma ai n rai. Shing nga tsun na malai, dai aten ladaw gaw du sai, tau tsun da ai ga ni mung teng teng byin nga sai!, ngu nna shanhte hpe tsun u, nga ai.

²⁴“Israela amyu masha ni a lapran e n teng n man ai shingran ni hte lam shadam ai myihtoi ga ni galoi mung nga sana n rai.

²⁵Dai MADU ngai nan shanhte hpe tsun na nngai. Ngai tsun ai hte maren dik wa na ra ai. Dai gaw galoi mung aten la, htingnai nga na ra ai n rai. Gumlau chye ai ni e, nanhte asak hkrung nga ai laman, ngai galaw na ngu nna nanhte hpe shadum jahprang da ni ai hte maren ngai shadik na nngai. Ngai nan dai ga hpe tsun ni ai, nga nna Tsaw Htum ai dai MADU nan tsun ai.

²⁶Dai MADU gaw ngai hpe,

²⁷“Si chye ai masha wa e, Israela amyu masha ni mung na a shingran ga ni hte myihtoi ga ni gaw htawm hpang prat hte seng nga ai nga nna myit nawn da ma ai.

²⁸Dai rai nna, Tsaw Htum ai dai MADU ngai nan shanhte hpe ning ngu tsun nga ai lam tsun u: Dai gaw loi mi pyi aten la htingnai nga na ra ai n rai, ngai tsun ni ai hte maren byin wa na ra ai. Tsaw Htum ai dai MADU ngai nan tsun ni ai!,” ngu nna tsun ai.