Read Jinghpaw Common Language Bible 2009 EZEKELA 14 Bible Online

EZEKELA 14 - Jinghpaw Common Language Bible 2009 bible

EZEKELA 14

¹Israela amyu na ningbaw nkau mi gaw dai MADU a myit ra ai lam hte seng nna ngai hte bawng ban jahkrup na matu du sa ma ai.

²Dai hpang, dai MADU gaw ngai hpe ga shaga ai.

³Shi gaw, “Si chye ai masha wa e, ndai masha ni gaw shanhte a myit masin ni hpe hpara sumla ni kaw ap ya ma ai; dai hpara sumla ni gaw shanhte hpe yubak kata de woi sa wa ma ai. Ngai gaw shanhte hpe mahtai langai jaw na re ngu, shanhte myit nawn da ma ni?

⁴“Ya chyawm gaw, Tsaw Htum ai dai MADU ngai nan shanhte hte seng nna tsun nga ai ga, shanhte hpe htawn tsun u: Hpara sumla ni hpe tinang myit masin ni ap ya kau sai Israela masha shagu hte mung, shanhte nang hpe yubak kata de woi sa wa nna myihtoi wa hte bawng ban na matu sa du ai ni mung ngai kaw nna mahtai lu la na mara ai-dai gaw na a law la ai hpara sumla ni lu la ging ai mahtai rai nga a hka!

⁵Ndai hpara sumla ni yawng gaw Israela amyu masha ni hpe ngai kaw na kayin kau dat nga ai, rai ti mung, nye a mahtai hte maren, shanhte a sadi dung ai hpe ngai bai hkam la lu na myit mada nga nngai.

⁶“Dai re ai majaw, Tsaw Htum ai dai MADU ngai nan shanhte hte seng nna tsun ai ga, Israela amyu masha ni hpe htawn tsun u: Kayin wa marit, nanhte a matsat shabat re ai hpara sumla ni hpe kau da mu.

⁷“Israela amyu masha shing n rai Israela amyu ni hte rau hpawng nga ai maigan amyu masha langai ngai gaw ngai hpe myi man kayin kau da nhtawm, hpara sumla ni hpe nawku dingnyawm let, myihtoi wa hte bawng ban jahkrup na matu du sa wa ai shaloi, dai MADU ngai nan nang hpe mahtai jaw na we ai!

⁸Ngai nang hpe ninghkap na nngai. Ngai nang hpe kasi shatai kau na nngai. Ngai gaw nang hpe nye a amyu masha ni a hpawng kaw nna shapraw kau na we ai; ngai gaw dai MADU rai nga nngai hpe nanhte chye lu na rai myit dai.

⁹“Myihtoi wa gaw n teng n man ai mahtai jaw nna htoi shut ai rai yang, dai gaw dai MADU ngai nan shi hpe shut shangun ai rai nga sai. Ngai gaw dai wa hpe Israela amyu masha ni a hpawng kaw nna yeng seng kau na we ai.

¹⁰Myihtoi wa hte shi hte bawng ban jahkrup ai wa, shan lahkawng yan gaw maren mara re ai ari jaw hkrum na mara ai.

¹¹Israela amyu masha ni gaw ngai hpe n kau da ai hte shanhte hkum nan yubak hta awu asin n tai mat mu ga, dai lam ni hpe ngai shadik na nngai. Shanhte gaw nye a amyu masha ni tai nna, ngai gaw shanhte a Karai Kasang tai na nngai,” ngu nna dai Tsaw Htum ai MADU nan tsun wu ai.

¹²Dai MADU gaw ngai hpe ga shaga wu ai.

¹³Shi gaw, “Si chye ai masha wa e, mungdan gaw shut hpyit yubak galaw nna, ngai hta sadi n dung ai rai yang, ngai gaw lata ladawn nna dai mungdan hpe jaw ai lusha hpe jahten sharun kau na nngai. Ngai gaw kawsi kyet ai hkuwa hpe shangun dat nna, masha hpe mung, yam nga ni hpe mung sat shagrawm kau na nngai.

¹⁴Noa, Danela (Daniela) hte Yoba mying ai marai masum gaw, dai yang e nga nga ma ti mung, shanhte a mai kaja ai amu hte chyu sha shanhte a asak hpe hkye la lu na ma ai,” ngu nna tsun ai. Tsaw Htum ai dai MADU tsun nu ai.

¹⁵“Shing n rai, ngai gaw amyu masha ni hpe kawa amya sat na matu matse labye ni hpe shangun dat nhtawm, dai mungdan hta kadai mung n lai hkawm lu hkra, hkrit hpa shara shatai kau na we ai,

¹⁶marai masum hte gaw dai yang e nga nga ti mung Tsaw Htum ai dai MADU ngai nan ahkrung nga ai Karai Kasang rai nga nngai, dai majaw shanhte gaw shanhte a kashu kasha ni hpe pyi mawai la lu ai n rai. Shanhte gaw tinang a asak a matu chyu sha hkye la lu na ma ai. Dai mungdan gaw shingran sharat katsi ai shara tai mat na ra ai.

¹⁷“Shing n rai, ngai gaw dai mungdan a ntsa e hpyen majan baw dat nna masha hpe mung, yam nga ni hpe mung magawn jahten kau lu ai laknak ni hpe shangun dat na nngai,

¹⁸dai marai masum gaw dai yang e nga nga ma ti mung, Tsaw Htum ai MADU ngai nan ahkrung nga ai Karai Kasang rai nga nngai, dai majaw, shanhte gaw shanhte a kashu kasha ni hpe pyi mawai la lu na ma ai n rai, rai ti mung, shanhte a asak ni hpe chyu sha mawai la lu na ma ai.

¹⁹“Ngai gaw ndai mungdan a ntsa e ana zinli jahkrat dat nna nye a sindawng kahtet ai hta asak law law jasum kau nhtawm masha hpe mung, yam nga ni hpe mung sat kau ai rai yang,

²⁰dai shara hta Noa, Daniela hte Yoba ni nga nga tim pyi, Tsaw Htum ai dai MADU ngai nan ahkrung nga ai Karai Kasang rai nga nngai, dai majaw, shanhte gaw shanhte a kashu kasha ni hpe pyi mawai la lu na ma ai n rai. Shanhte galaw ai mai kaja ai amu hte chyu sha tinang a asak hpe hkye mawai la lu na ma ai.”

²¹Ndai gaw Tsaw Htum ai dai MADU tsun ai mungga rai nga ai: “Ngai gaw Yerusalem mare ntsa e sawng dik ai ari mali ngu ai hpyen majan, kawsi kyet si ai hkuwa, matse labye dusat hte ana zinli ni hpe dat dat na nngai, dai gaw masha hpe mung, yam nga ni hpe mung jahtum kau na ra ai.

²²Marai langai ngai asak naw hkrung nga nna shi a kashu kasha ni hpe hkye mawai la nhtawm nanhte hpang de du sa wa ai rai yang, shanhte hpe mada yu mu; shanhte kade n hkru nga ai hpe yu yu mu, dai hpe yu yu yang, Israela mare a ntsa e ngai shapraw ai tsin-yam tsindam ari jaw ai lam rap ra nga ai hpe chye na hkawn hkrang nga mu;

²³dai hpang, ngai galaw sai amu yawng mayawng hte gaw mai kaja lam a matu rai nga ai hpe nanhte chye lu na marin dai.” Tsaw Htum ai dai MADU tsun nu ai.