Read Jinghpaw Common Language Bible 2009 EZEKELA 16 Bible Online

EZEKELA 16 - Jinghpaw Common Language Bible 2009 bible

EZEKELA 16

²Shi gaw, “Si chye ai masha wa e, Yerusalem galaw sai matsat shabat amu hpa rai nga ai hpe chye lu hkra, madun u.

³Tsaw Htum ai dai MADU gaw shi hte seng nna hpa tsun nga ai lam Yerusalem hpe htawn tsun u: “Nang gaw Hkanan mung hta shangai dai daw wa nit dai. Na a kawa gaw Amori masha, na a nnu gaw Hiti num rai nga ai.

⁴Nang shangai wa ai shaloi, na a shadai sumri hpe kadai n daw, nang hpe kashin shatsawm na n nga, jum hte nang hpe arut na n nga, nang hpe sanen hte kadai n kayawp ma ai.

⁵Na a matu shing re ai amu galaw ya na matu, nang hpe mu nna matsan yu dum na masha langai mi mung n nga nga ai. Nang shangai wa yang, kadai mung nang hpe yu tsaw ra ai n rai; nang gaw pa ga de kabai kau hkrum nga ndai.

⁶“Dai hpang, ngai gaw dai hku lai hkawm ai hte sai hta galu nga ai nang hpe ngai mu nngai. Nang gaw asai hta galu nga ti mung, ngai gaw nang hpe n si shangun mayu nngai.

⁷Ngai nang hpe kung dam wa ai hpun zawn tu kaba shangun nngai. Nang galu kaba wa nna num mahkawn tai wa nit dai. Na a madoi chyu hpang grai gawng tsawm nna, na a kara ni tu nga lit dai, rai ti mung, nang gaw singgu krin naw rai nga ndai.

⁸“Dai lam hku ngai kalang bai lai hkawm yang, na a matu sumtsaw sumra chye myit ai aten du nga sai hpe ngai mu lu nngai. Ngai gaw na a singgu krin re ai hkum hpe nye a palawng galu hte magap da nna, nang hpe tsaw ra nga na, ga sadi tawn da ni ai. Rai sa, ngai gaw nang hte hkungran ga shaka tawn da ni ai hte nang gaw nye a matu tai wa nit dai.” Dai gaw Tsaw Htum ai dai MADU tsun ai mungga rai nga ai.

⁹“Dai hpang, ngai gaw hka la nhtawm na hkum hta kap nga ai asai ni hpe kashin kau ya ni ai. Ngai gaw na a hkum hpe arut kashin kau nna tsanlun sau hte chya ya ni ai.

¹⁰Ngai gaw nang hpe maka ka ai hpun palawng ni hpe jahpun nna, kaja htum ai shanhpyi hkyepdin shadin nngai. Lachyit sumpan bunghkaw hte hkaw ya nna, lai hte da ai hpun palawng jahpun nngai.

¹¹Ngai gaw na a hkum hta manu dan ai ja lung seng hte mawn sumli ya nna, lata hta lahkawn hkawn, du hta kachyi chyi ya rai nngai.

¹²Na a ladi hta shanghkawng, na a na hta lakan ngai bang ya nna, na a baw ntsa e tsawm htap ai janmau shagup ya nngai.

¹³Nang gaw manu dan ai aja gumhpraw ni hte mawn sumli nhtawm, mani tsawm ai lachyit sumpan, alai hte maka ka ai hpun palawng ni hpe tut nawng bu hpun nga ndai. Nang gaw kaja htum ai hkaulan mam shadung hte galaw ai muk sha nhtawm, dwi ai lagat ntsin hte sau ai tsanlun sau hpe lu nga ndai. Na a ahpraw nsam gaw tsawm htap htoi kabrim nga nna hkawhkam jan tai wa nit dai.

¹⁴Ngai gaw nang hpe grai yu tsaw ra na zawn re ai tsawm htap ai ahpraw nsam hte ningja shapraw da ai wa rai nga nngai majaw, nang gaw na a hkum tsup ai ahpraw nsam hte maigan masha amyu baw shagu a man hta kajai gumhkawng ai jan tai wa nit dai.” Ndai mungga hpe Tsaw Htum ai dai MADU tsun ai.

¹⁵“Rai ti mung, nang gaw na a tsawm htap ai hpe zai hku nna nang kaw sa ai ni yawng hte rau yup ai hta kajai gumhkawng nga ndai.

¹⁶Nang gaw shawa num amu galaw sha ai jan zawn na a nawku ai shara ni hpe mawn sumli na matu, na a sumpan nkau mi hpe lang nga ndai, nang gaw na hkum hpe masha shagu hpe nawng ya nga ndai.

¹⁷Nang gaw ngai nang hpe ya da ai aja gumhpraw ni hpe la nna, dai ni hte la sumla ni galaw lang nhtawm shanhte hte shut hpyit ai amu galaw nit dai.

¹⁸Nang gaw ngai nang hpe jaw da ai maka ka ai sumpan ni hpe la nna, la sumla ni a ntsa e jahpun nhtawm, ngai nang hpe jaw tawn ai tsanlun sau hte manam pyaw ai baw hpe shanhte a man e, nang nawng jau ya nit dai.

¹⁹Na a matu lusha tai na kaja htum ai muk shadung, tsanlun sau hte lagat ntsin ni nang hpe jaw ti mung, nang gaw dai ni hpe hpara sumla ni myi man pa lu na matu, shagu hkungga zawn nat nawng kau nit dai.” Ndai gaw Tsaw Htum ai dai MADU tsun ai mungga rai nga ai.

²⁰“Dai hpang, nang gaw grau sawng ai amu hpe galaw nit dai-nang gaw na a kasha ni hpe nan dai hpara sumla ni hpe nawng ya nit hka!

²¹Nang gaw nye a kasha ni hpe htau sat kau nit dai, nang gaw shanhte hpe shagu hkungga ni zawn nawng ya nit dai.

²²Shawa num langai zawn na a matsat shabat amu galaw ai asak hkrun lam laman hte yang, nang singgu krin rai nga nna na a asai hta galu nga ai shaloi, nang gaw na a ma prat hpe kalang mi sha pyi galoi mung n dum yu nit dai,” ngu nna tsun wu ai.

²³Tsaw Htum ai dai MADU gaw, “Nang gaw dingnye hkrum nga ndai! Dingnye hkrum nga nit dai! Nang gaw dai shut hpyit ai n hkru ai amu mahkra hpe galaw nit dai, dai hpang,

²⁴nang gaw hpara sumla ni hpe nawku dingnyawm na matu nawku shara ni hte shawa num amu galaw sha na shara ni hpe lam makau shagu hkan gap da nga ndai.

²⁵Nang gaw na a tsawm htap ai hpe hkumpup hkumpa lam hku garawt achya kau nhtawm, dai lam hku lai wa ai masha shagu hte hpe na a hkum ap ya let, shawa num langai mi zawn shani shagu shut hpyit ai amu galaw nga ndai.

²⁶Nang gaw na a ngang gayut ai htingbu ni ngu ai Egutu masha ni hte rau yup nhtawm na a shawa num amu ngu ai hpye ai amu galaw nna, ngai hpe pawt bu shangun nit dai.

²⁷“Ya chyawm gaw, ngai nang hpe ari jaw na matu hte nye a shaman chyeju kaw na na a kamhtaw di kau ya na matu, nye a lata hpe sharawt da ni ai. Ngai gaw na a nse ai amu ni hpe matsat nga nngai, nang hpe n dawng ai Hpilisti ni a lata de nang hpe ap kau ni ai.

²⁸“Na a ngang gayut ai myit kaga masha ni hte myit n dik hkraw ndai majaw, nang gaw Asuri masha ni hpang de hkan hprawng shang mat nga ndai. Nang gaw shanhte a matu shawa num tai ya nga ti mung, shanhte gaw nang hpe mung myit dik nga ma ai n rai.

²⁹Nang gaw Babelon masha hpaga la ni a matu shawa num amu galaw ya ti mung, shanhte gaw nang hpe mung myit dik nga ma ai n rai,” nga nna tsun ai.

³⁰Ndai gaw Tsaw Htum ai dai MADU tsun nga ai mungga rai nga ai: “Nang gaw kaya n chye ai shawa num zawn, ndai amu yawng mayawng hpe galaw nit dai.

³¹Nang gaw nmaw lam makau shagu hkan hpara sumla ni hpe nawku dingnyawm na shara gaw gap ndai hte shawa num amu shut hpyit nga ndai. Rai ti mung, nang gaw kaga shawa num ni zawn shinggan pru nna manu jahpu n la nga ndai.

³²Nang gaw tinang a madu wa hpe tsaw ra na malai, tsasam masha ni hte shut hpyit nna la shaw ai num hte bung nga ndai.

³³Shawa num gaw manu jahpu la ti mung, nang gaw na a sumtsaw sumra ni hpe kumhpa jaw nna shara shagu na ni sa nna kanawn nga lu hkra, shanhte hpe mayun kumhpa jaw nna lau la nga ndai.

³⁴Nang gaw shawa num san ai jan rai nga ndai. Hkum shan langai sha tai na matu kadai mung nang hpe n shadut nga ai. Nang gaw manu jahpu n la nga ai hta n-ga, nang mahtang shanhte hpe jaw ya nga ndai! Rai sa, shing re ai majaw, nang gaw shawa num kaga ni hte shai nga ndai.”

³⁵Dai rai nna, Yerusalem e, nang gaw shawa num rai nga ndai! Dai MADU tsun nga ai ga na la u.

³⁶Ndai gaw Tsaw Htum ai dai MADU tsun ai mungga rai nga ai: “Nang gaw shawa num langai zawn na a hpun palawng ni hpe raw sharun kau nhtawm, na a hkum hpe na a sumtsaw sumra ni hte na a matsat shabat re ai hpara sumla ni yawng hpe nawng ya ndai, nang gaw hpara sumla ni hpe nat nawng na matu na a kashu kasha ni hpe sat kau nga ndai.

³⁷Ndai lam a majaw, ngai gaw na a moi na sumtsaw sumra ni rai nga ai ni yawng hpe mung, nang ra marit ai ni hte nang n dawng ai ni yawng hpe mung jahpawng tawn na nngai. Ngai gaw shanhte hpe na a grup yin e jahpawng da nhtawm na a singgu krin kaya kahpa hpe mu lu mu ga, na a hpun palawng ni hpe ngai raw sharun kau ya na nngai.

³⁸Ngai gaw nang hpe la shaw ai amu hte masha sat ai amu a matu daw dan na nngai; nye a pawt sindawng ai hte myit kahtet ai hta, ngai nang hpe si ari jaw na nngai.

³⁹Ngai gaw nang hpe shanhte a daru magam n-gun kata hta tawn da nna, shanhte gaw shawa num amu galaw sha ai shara ni hte hpara sumla ni hte nawku ai shara ni hpe agrawp jahten kau na mara ai. Shanhte gaw na a hpun palawng ni hte tsawm ai gali lakan ni hpe la kau ya nhtawm nang hpe malawng mala singgu krin di kau da na mara ai.

⁴⁰“Shanhte gaw nang hpe nlung hte kabai sat kau na matu, shawa masha ni hpe myit shalut ya na mara ai; shanhte gaw nang hpe shanhte a nhtu ni hte kahtum kadaw di kahtam kau na mara ai.

⁴¹Numsha law law ni gaw nang hpe jaw ai ari hpe mu la mu ga, shanhte gaw na a dum nta ni hpe nat kau ya na mara ai. Ngai gaw nang hpe shawa num n tai mat hkra mung, sumtsaw sumra ni hpe kumhpa jaw ai kaw na mung, jahkring kau shangun na nngai.

⁴²Dai hpang, nye a masin kahtet ai gaw kawp mat wa nna atsin sha nga nga na nngai. Ngai gaw loi mi mung pawt sindawng ai hte manawn masham ai myit mung rawng na nngai n rai.

⁴³Nang naw kaji nga yang, ngai nang hpe kade lakawn ai hpe mung nang malap kau nhtawm, nang galaw ai amu yawng hte nang ngai hpe pawt sindawng shangun nit dai. Dai lam a majaw, ngai gaw dai amu ni yawng a matu nang hpe matai htang jaw ni ai. Nang galaw ai kaga matsat shabat amu ni yawng hta ngang gayut ai nse nsa amu hpe nang hpa majaw shut hpyit nit ta?” Tsaw Htum ai dai MADU nan tsun nu ai.

⁴⁴Dai MADU gaw, “Yerusalem e, amyu masha ni gaw nang hte seng nna ndai ga malai hpe, ‘Kanu zawn, shayi sha zawn,’ nga nna tsun shajang wa na mara ai.

⁴⁵Nang gaw teng teng na nnu a shayi sha rai nga ndai. Shi gaw shi a madu wa hte shi a kashu kasha ni hpe matsat kau ai jan rai nga ai. Nang gaw na a kana ni zawn shanhte a madu wa ni hte kashu kasha ni hpe n ju n dawng ai jan rai nga ndai. nang hte kanau kana mare ni gaw Hiti kanu hte Amori kawa lu nga ndai.

⁴⁶“Na a kana hte shi a mare gaw dingdung maga de nga ai Samari rai nga ai. Na a kanau hte shi a mare gaw dingda maga de nga ai Sodom rai nga ai.

⁴⁷Nang gaw shanhte a lagaw lahkam hta hkan shachyaw nang nhtawm, shanhte a matsat shabat re ai amu hpe len la ai hta myit dik wu ni? N rai law, nang galaw ai lam shagu gaw, kaji sha re ai amu hta pyi shanhte galaw ai hta grau nna nse nga ndai.

⁴⁸“Ngai gaw ahkrung nga ai Karai Kasang rai nga nngai, dai majaw dai Tsaw Htum ai MADU gaw, “Na a kanau Sodom hte shi a mare ni gaw nang hte na a mare ni galaw mu ai zawn, dai n hkru n shawp ai amu hpe galoi mung n galaw nga ma ai.

⁴⁹Shanhte gaw nhpaw n-ya lu sha nna ngwi pyaw sim sa ai hte shanu nga ma ai majaw, shi hte shi a shayi sha ni gumrawng gumtawng nga ma ti mung, matsan mayan ni hte ahkaw ahkang tup hkrak n lu ai ni hpe n gawn n sawn di ma ai.

⁵⁰Shanhte gaw gumrawng gumtawng ai hte adu ja nna ngai yu matsat ai amu ni hpe galaw ma ai, nang atsawm sha chye ndai hte maren, ngai shanhte hpe jahten shaza kau we ai.

⁵¹“Samari mare gaw nang galaw ai yubak chyen mi daram pyi n galaw shut yu nga ai. Nang gaw shi galaw ai hta grau nna matsat shabat lai hku galaw ndai. Na a n san n seng ai matsat shabat re ai amu gaw, shadawn yu yang, na a kanau kana ni gaw mara n kap ai ni zawn rai nga ai.

⁵²Ya chyawm gaw na a myi man sum shangun ai kaya kahpa lam hpe nang hkam la na rai ndai. Na a shut hpyit ai yubak mara ni gaw na a makau na, nang hpe hpa n chye ai zawn yu nga ai na a kanau kana ni shut hpyit ai hta grau nna sawng nga ai. Nang gaw na a kanau kana ni hpe hpa mara mung n shakap shangun ndai majaw, ya dai na a kaya kahpa amu hpe hkam la u,” ngu nna tsun wu ai.

⁵³Dai MADU gaw Yerusalem hpe, “Ngai gaw Sodom hte de a kahtawng ni hpe mung, Samari hte de a kahtawng ni hpe mung bai ngamu ngamai shangun na we ai. Rai sa, ngai gaw nang hpe mung ngamu ngamai shangun na we ai.

⁵⁴Nang gaw nang hkum nan kaya kahpa hkrum na rin dai; na a myi man sum ai kaya kahpa amu gaw na a kanau kana ni hpe shanhte kade wa nga pyaw nga ma ai hpe madun na ra ai.

⁵⁵Shanhte gaw kalang mi bai ngamu ngamai wa na mara ai; nang hte na a mare ni mung ngamu ngamai ai hte de nga lu na mara ai.

⁵⁶Nang gumrawng gumtawng nga nna nang galaw ai n hkru n shawp ai amu ni garai n shadawng dan yang, dai nhtoi ni hta Sodom hte seng nna nang mani asan kau yu wu ni? Ya chyawm gaw, nang mung shi zawn sha, Edom masha ni, Hpilisti masha ni hte nang hpe n dawng ai kaga na a htingbu ni a man e mani hpa zawn rai nga ndai.

⁵⁷

⁵⁸Na a nse ai hte nang galaw ai matsat shabat amu a matu dai nni nkri hpe nang hkam la ra nit dai,” ngu nna tsun wu ai.

⁵⁹Tsaw Htum ai dai MADU gaw, “Nang gaw na a ga sadi ni hpe hpa n sawn ya ai hte ga shaka hpe jahten kau nit dai majaw, nang hpe ging dan ai hku ngai nang hpe di na nngai.

⁶⁰Rai ti mung, nang naw kaji nga yang, ngai nang hte tawn da ai ga shaka hpe ngai shagrau nga na nngai; ngai gaw nang hte htani htana agrin nga na ra ai ga shaka hpe tawn da na nngai.

⁶¹Nang gaw na a kanau kana ni hpe hkap la yang, nang galaw kau sai arawn alai kade n shawp nga ai hpe myit dum wa nna, dai hta kaya nga na rai ndai. Dai gaw nang hte tawn da ai nye a ga shaka daw chyen mi n rai nga tim pyi, ngai gaw shanhte hpe na a shayi sha ni zawn shatai na nngai.

⁶²Ngai gaw nang hte tawn da ai ga shaka hpe ningnan bai galaw da na nngai. Ngai gaw dai MADU rai nga nngai hpe nang chye wa lu na rai ndai.

⁶³Ngai gaw nang galaw yu sai shut hpyit amu mahkra hpe mara dat ya na nngai, rai ti mung, nang gaw dai lam ni hpe myit dum wa nna na a n-gup hpaw na matu, ja ja kaya bu na ndai.” Tsaw Htum ai dai MADU tsun nu ai.