Read Jinghpaw Common Language Bible 2009 EZEKELA 17 Bible Online

EZEKELA 17 - Jinghpaw Common Language Bible 2009 bible

EZEKELA 17

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, Israela amyu masha ni hpe

³shanhte chye na la mu ga, Tsaw Htum ai dai MADU ngai nan tsun nga ai ga shadawn hpe htawn tsun u: Yu tsawm ai u mun law law tu nhtawm, galu kaba ai singkaw ni hpe dam lada kahpyan da ai galang kaba langai nga nga ai. Shi gaw Lebanon bum ni nga ai de pyen sa wa nhtawm, arit hpun ndung na makrung hpe kawa di let,

⁴dai hpe hpaga ga ai mung de makrang wa nhtawm, gun rai dut sha ai mare hta tawn da wu ai.

⁵Dai hpang, shi gaw Israela mungdan na hkai bawng baw la nna dai hpe ga sau rawng nhtawm tu kaba wa shangun na hka tut nawng jaw ya lu ai shara hta hkai da wu ai.

⁶Dai gaw makrung prut lung wa nna nem ai hte dam lada hkrawn ai sabyi hpun tai wa sai. Lakung lakying ni mung galang nga ai maga de tu hkrawn mat wa nna ru ni mung sung sung jung nga ai. Dai sabyi ru gaw shi a lakung lakying ni hta lali tsawm ai alap ni hte ka-up nga ai.

⁷Htat ai u mun law law tu nna, galu kaba ai singkaw tu ai galang kaga langai mi mung nga ai. Ya dai sabyi ru gaw galang hpang de, shi a ru ni hkram sa wa ai hte alap ni mung shi hpang de man yawng nga ai. Dai sabyi ru gaw shi tu kaba wa ai sun hta grau nna hka lu lu na myit mada nga ai.

⁸Rai ti mung, dai sabyi ru hpe ga sau kaja nna hka hkru hkru lu lu ai lamu ga hta hkai da mu ai; dai sabyi ru gaw alap ni lali wa nna asi si wa nhtawm hpun ru kaja tai nga ai.

⁹“Dai rai nna, Tsaw Htum ai dai MADU ngai nan san yu nngai: Ndai sabyi ru gaw hkrung nga ai hte tu kaba wa lu na kun? Shawng na galang gaw dai aru hpe baw kau nna asi ni hpe di la nhtawm, lakung lakying ni hpe krum kau ai hte dai ni hpe nyui nyip shangun na rai wu ni? Dai hpe gang baw na matu n-gun law dat ra na n rai; shing nrai n-gun rawng ai amyu baw ra na n rai.

¹⁰Rai sa, dai hpe hkai da sai, rai ti mung, dai gaw hkrung nna tu kaba wa na rai ni? Sinpraw nbung gaw dai hpe ahpawt kau ai shaloi, dai gaw nyip mat wa na n rai ni? Dai gaw shi tu kaba wa ai shara hta nyip mat wa na ra ai n rai ni?”

¹¹Dai MADU gaw ngai hpe,

¹²“Dai gumlau chye ai ni hpe shanhte dai ga shadawn a lachyum chye na ai rai yang, tsun dan na matu san yu u. Babelon hkawhkam gaw Yerusalem mare de du nna, hkawhkam wa hte shi a mung du salang ni hpe rim la nhtawm, shi hte rau Babelon mung de woi wa manu ai.

¹³Shi gaw hkawhkam wa a dinghku masha langai hpe woi la nhtawm shi hte ga shaka tawn da nna, shi hta sadi dung nga na matu shi hpe dagam shangun wu ai. Shi gaw dai mungdan hta bai n kasu kabrawng na matu

¹⁴hte shanhte galaw tawn ai ga shaka grin nga na matu ahkyak ai masha kaba ni hpe sat hkam na masha ni hpe zawn woi mat wa wu ai.

¹⁵Rai ti mung, Yuda hkawhkam wa gaw gumlau ai hte gumra hte hpyen luksuk kaba karum hpyi na matu Egutu mung de kasa shangun dat sai. Shi awng dang na rai wu ni? Shi gaw dai zawn re ai amu galaw nga ai kaw nna hprawng lawt lu na rai wu ni? Shi gaw ga shaka hpe n run lu ai hte ari ahpri n hkrum na rai wu ni!

¹⁶“Ngai gaw ahkrung nga ai Karai Kasang rai nga nngai, dai majaw dai Tsaw Htum ai MADU gaw, “Ndai hkawhkam wa gaw shi hpe hkawhkam tingnyang shadun da ai Babelon hkawhkam hte shaka da ai hte dagam da ai ga shaka hpe jahten kau nu ai majaw shi gaw Babelon mung e si mat na ra ai.

¹⁷Babelon masha ni gaw masha law law hpe sat kau na matu hpyen ninghkap shara ga bum ni hte kaduk ni hpe htu tawn ai shaloi, Egutu hkawhkam a n-gun ja ai hpyen luksuk ni pyi hpyen gasat karum lu ai n rai.

¹⁸Shi galaw tawn da ai dagam ga hte ga shaka hpe jahten kau nu ai. Shi gaw dai amu ni yawng hpe galaw nu ai rai nna, ya shi lawt lu na ra ai n rai,” ngu nna tsun nga ai.

¹⁹Tsaw Htum ai dai MADU gaw, “Ngai gaw ahkrung nga ai Karai Kasang rai nga nngai, dai majaw, shi hpe nye a mying hta agrin nga na matu shi dagam da nu ai ga shaka hpe jahten kau nu ai rai nna shi hpe ari jaw na we ai.

²⁰Ngai gaw jaugawng wa lang ai mahkam sumgawn hpe hpyan tawn nna dai hta e, shi hpe lu shangun na nngai. Shi gaw ngai hta sadi n dung nga ai majaw, ngai shi hpe Babelon mung de woi wa nna dai mung e shi hpe ari jaw na nngai.

²¹Shi a magrau grang htum ai hpyenla ni gaw majan pa hta sat kau ai hkrum na mara ai, naw ngam nga ai ni gaw man ang ai shara de shaden kau ai hkrum na mara ai. Dai shaloi, dai MADU ngai nan tsun ni ai hpe nang chye lu na rai ndai.”

²²Ndai gaw Tsaw Htum ai dai MADU tsun ai mungga rai nga ai: “Ngai gaw tsaw ai arit hpun ndung la nhtawm kya ai makrung langai di la na nngai; Ngai gaw dai hpe tsaw ai bum ntsa e mung,

²³Israela a tsaw htum ai bum ntsa e mung hkai da na nngai. Dai gaw lakung lakying ni kra wa nhtawm asi si ai hte reng htum ai arit hpun tai na ra ai. U amyu shagu mung dai hpun hta sa shanu na mara ai lakung lakying ni a shingnip ni hta pyen dung shara mu tam na mara ai.

²⁴Dai mung na hpun ni yawng gaw ngai nan dai MADU rai nga nngai hpe chye na mara ai. Ngai gaw hpun galu ni hpe kran kau nna hpun kaji ni hpe tu galu shangun na nngai. Ngai gaw tsit lali ai hpun ni hpe shanyip kau nna hkraw ai hpun ni hpe tsit lali shangun na nngai. Dai MADU ngai nan tsun ni ai. Ngai galaw na ngu tsun sai amu hpe ngai galaw na we ai.”