Read Jinghpaw Common Language Bible 2009 EZEKELA 18 Bible Online

EZEKELA 18 - Jinghpaw Common Language Bible 2009 bible

EZEKELA 18

¹Dai MADU gaw ngai hpe,

²“Israela mungdan hta nga ai amyu masha ni bai atsun tsun re ai ndai ga shagawp gaw hpa wa rai nga a ta? ‘Kanu kawa ni gaw hkri ai sabyi si ni sha ma ai, Rai ti mung, kashu kasha ni gaw hkri ai namchyim lu ma ai.’

³Tsaw Htum ai dai MADU gaw, “Ngai gaw ahkrung nga ai Karai Kasang rai nga nngai, dai majaw nanhte gaw ndai ga shagawp hpe Israela mung e galoi mung bai tsun tsun rai lu na myit dai n rai.

⁴Ngai gaw masha shagu a asak hpe madu nngai. Kanu kawa a asak hpe mung, kashu kasha a asak hpe mung madu nngai. Yubak galaw ai wa chyawm gaw si na ra ai.

⁵“Masha langai ngai teng teng mai kaja nga nna, ding hpring ai hte myit malang ai wa nga nga ai ngu ga.

⁶Shi gaw Israela a hpara sumla ni hpe n nawku, hkum da ai hkungri ni hta nawng jau ai shagu hkungga shan n sha rai nga ai. Shi gaw kaga masha jan hpe n shut ai hte hking sa ai aten hta dai numsha hte n kanawn nga ai.

⁷Shi gaw kadai hpe mung mawp sha ai hte kashun kashe amu galaw nga ai n rai. Arai hkoi shap la ai wa shi hpe tang da ai arai jaw yang, shi bai nhtang ap ya nga ai; shi gaw kawsi hpang gara ai wa hpe lusha jaw nna, singgu krin re ai wa hpe hpun palawng gam ya nga ai.

⁸Shi gaw amyat lu na matu gumhpraw n hkoi sha nga ai. Shi gaw n hkru ai amu galaw na matu ningdang kau nna, ndang kalang ai amu hta teng man ai daw dan lam jaw ya nga ai.

⁹Dai zawn re ai myit rawng ai wa gaw nye a hkang da ai ga ni hpe hkan nna nye a tara ni hpe sadi sahka ai myit hte shadik shatup ya nga ai. Shi gaw ding hpring nga nna asak hkrung nga lu na ra ai,” ngu nna Tsaw Htum ai dai MADU tsun ai.

¹⁰“Dai hpang, ndai masha wa hta kashun kashe amu hte masha sat ai hte kawa galoi mung n galaw yu ai dai zawn re ai amu hpa hpe mung galaw ai shadang sha langai lu ai ngu ga.

¹¹Shi gaw hkum da ai hkungri ni hta nawng jau da ai shagu hkungga shan sha ai hte kaga masha jan ni hpe mung hkan shaw nga ai.

¹²Shi gaw matsan mayan ni hpe adip arip di nna maw lu maw sha ai hte hpya lu hpya sha nga ai. Hkoi la ai wa shi hpe tang da ai arung arai hpe mung mazing la kau ya nga ai. Shi gaw maigan htung tara hkan ai ni galaw da ai htingnu shara hkan sa nna matsat shabat re ai hpara sumla ni hpe nawku ai hte,

¹³amyat a matu gumhpraw hkoi sha nga ai. Shi hkrung nga na rai nga a ni? N rai law, shi hkrung nga lu na ra ai n rai. Shi gaw ndai matsat shabat amu ni yawng hpe galaw nu ai majaw, shi si na rai wu ai. Shi gaw shi a si hkrung si htan a matu shi nan mara shagun hkrum na ra ai.

¹⁴“Ya chyawm gaw ndai lahkawng ngu na masha wa hta kasha langai nga ai ngu ga. Shi gaw shi a kawa galaw ai arawn alai yawng hpe mu ti mung, shi kawa a kasi lailen hta n hkan dagraw nang nga ai.

¹⁵Shi gaw Israela a hpara sumla ni hpe n nawku, hkum da ai hkungri ni hta nawng jau ai shagu hkungga shan ni hpe n sha nga ai: kaga masha wa a madu jan hpe mung n shaw nga ai.

¹⁶Kadai hpe mung n dip gamyet sha, kadai hpe mung n zingri nga ai. Hkoi shap la ai wa shi hpe tang da ai arai ap da ai arai hpa hpe mung shi bai nhtang ap ya nga ai. Kawsi hpang gara ai wa hpe lusha jaw nna singgu krin re ai wa hpe hpun palawng gam ya nga ai.

¹⁷Shi gaw n hkru ai amu galaw na matu ningdang kau ai hte amyat lu na matu gumhpraw n hkoi sha nga ai. Shi gaw nye a tara ni hpe shadik nna hkang da ai nye a tara ni hpe hkan nang nga ai. Shi gaw shi kawa a shut hpyit ai yubak ni a majaw, si na ra ai n rai; shi gaw teng teng hkrung nga na ra ai.

¹⁸Lam maga mi hku tsun ga nga yang, shi a kawa chyawm gaw maw lu maw sha nna adip arip di wu ai hte masha shagu hpe n hkru ai amu tut nawng galaw nga ai. Dai rai nna shi hkum nan shut hpyit kau ai yubak ni a majaw shi si nga ai.

¹⁹“Rai ti mung, nang gaw, ‘Kasha gaw shi kawa a yubak ni a majaw hpa majaw n hkam na rai wu ni?,’ nga nna san yang, dai kasha wa gaw teng man ai hte mai kaja ai amu ni hpe galaw nu ai. Shi gaw nye a tara ni hpe shadik nhtawm dai ni hpe kangka ai hte hkan shatup nu ai majaw, shi gaw teng teng hkrung nga na rai nga ai.

²⁰Yubak galaw ai wa gaw si na ra ai. Kawa galaw ai yubak ni a majaw kasha hkam ra na n rai, kasha galaw ai yubak ni a majaw kawa hkam na ra ai n rai. Mai kaja ai masha wa gaw shi galaw ai mai kaja ai amu a majaw shagrau sha-a hkrum nna, n hkru ai masha wa gaw shi galaw ai n hkru ai amu a shabrai hpe hkam la na ra ai.

²¹“N hkru ai masha wa gaw yubak lam hpe kau da nna, nye a tara ni hpe hkan shadik nhtawm teng man ai hte mai kaja ai amu hpe galaw ai rai yang, shi si na ra ai n rai; teng teng hkrung nga na ra ai.

²²Shi gaw teng man ai amu galaw nu ai majaw, shi shut hpyit kau ai yubak ni yawng mara raw dat kau ai hkrum nna, shi hkrung nga na ra ai.

²³Dai Tsaw Htum ai MADU gaw, “N hkru ai wa si wa yang, ngai yu kabu na zawn nang myit nawn nga n ni?,” ngu nna san wu ai. Shi gaw, “Dai hku n rai law, shi myit malai wa nna hkrung nga na hpe ngai grau nna mu mayu nga nngai.

²⁴“Rai ti mung, ding hpring ai masha langai ngai, mai kaja ai amu galaw nga ai kaw na htak mat ai hte n hkru ai masha ni galaw nga ai matsat shabat amu mahkra hpe hkan galaw ai rai yang, dai wa gaw matut nna hkrung nga lu na rai nga a ni? N rai law, shi galaw yu sai mai kaja ai amu langai mi hpe mung matsing da ya na n rai. Shi galaw ai kang n ka ai amu hte yubak ni a majaw shi si na ra ai.

²⁵“Rai ti mung, nanhte gaw, ‘Dai Tsaw Htum ai MADU galaw ai amu gaw n teng n man nga ai,’ nga nna tsun myit dai. Dai rai nna Israela amyu masha ni e, ngai tsun ai ga hpe madat mara mu. Ngai galaw nga ai amu ni a lam n teng n man nga ai ngu nna nanhte myit nawn nga myit ni? Nanhte a lam mahtang n ding n man nga malit dai.

²⁶Ding hpring ai wa mai kaja ai amu galaw nga ai kaw na htak mat nhtawm n hkru ai amu hpe galaw hpang ai shaloi, shi si nga ai, shi galaw yu sai n hkru ai amu ni a majaw shi si nga ai.

²⁷N hkru ai masha wa gaw yubak lam shanang ai amu hpe kau da nhtawm teng man ai hte mai kaja ai amu hpe galaw ai rai yang, shi a asak hpe mawai la lu nga ai.

²⁸Shi gaw shi hpa galaw yu sai amu ni hpe chye myit dum wa ai hte yubak galaw ai amu hpe kau da ai rai yang, shi gaw teng teng n si na ra ai, shi matut nna asak hkrung nga lu na ra ai.

²⁹Nanhte Israela amyu masha ni gaw, ‘Dai Tsaw Htum ai MADU galaw ai amu gaw n teng n man nga ai,’ ngu nanhte myit nawn myit dai n rai ni? Dai nanhte hkan ai lam mahtang n ding n man nga malit dai.

³⁰“Ya chyawm gaw, nanhte galaw dan sai arawn alai hte maren, nanhte langai hte langai hpe tara jeyang na nngai, nga nna dai Tsaw Htum ai MADU ngai nan Israela amyu masha ni hpe tsun nga nngai. Nanhte galaw shut kau ai yubak gaw nanhte hpe n jahten kau u ga, nanhte galaw shut hpyit kau ai n hkru n shawp ai amu yawng kaw nna kayin wa marit.

³¹Nanhte galaw shut kau yu sai n hkru ai amu mahkra hpe kau da nhtawm myit nnan, myit masin nnan ni hpe hkam la mu. Israela amyu masha ni e, nanhte hpa majaw si mayu nga myit ni?

³²Dai Tsaw Htum ai MADU gaw, “Ngai gaw nanhte kadai hpe mung n si shangun mayu nngai, dai re ai majaw, nanhte shut hpyit kau ai yubak kaw nna kayin wa nhtawm hkrung nga mu law,” ngu nna tsun wu ai.