Read Jinghpaw Common Language Bible 2009 EZEKELA 2 Bible Online

EZEKELA 2 - Jinghpaw Common Language Bible 2009 bible

EZEKELA 2

¹Dai MADU gaw ngai hpe, “Si chye ai masha e, rawt tsap u. Ngai nang hpe ga shaga mayu nngai,” ngu nna tsun nga ai.

²Dai nsen tsun nga yang, Karai Kasang a wenyi gaw ngai hta shang wa nna, ngai hpe tsap shangun nga ai, ngai gaw dai nsen hpe matut nna,

³“Si chye ai masha wa e, ngai gaw nang hpe Israela amyu masha ni hpang de shangun dat nga nngai. Shanhte gaw ngai hpe gumlau nna hpyen tai ma ai, shanhte a kaji kawa ni zawn ya du hkra naw gumlau ma ai.

⁴Shanhte gaw adu ja ai hte ngai hpe hkungga n chye ma ai, dai rai nna, Tsaw Htum ai MADU ngai nan shanhte hpe kaning ngu tsun nga ai lam, shanhte hpe htawn tsun na matu, ngai nang hpe shangun dat nngai.

⁵Ndai zawn gumlau ai ni gaw na a ga hpe madat ti mung, n madat ti mung, shanhte a lapran e myihtoi langai mi nga nga sai hpe shanhte chye lu na mara ai.

⁶“Rai ti mung, si chye ai masha wa e, nang gaw shanhte hpe hkrit ra ai n rai, shanhte tsun ai ga hpa hpe mung hkum hkrit et. Shanhte gaw nang hpe ninghkap nna n kaw n law di na mara ai; dai gaw n-gaw gawk ni a lapran e nga nga ai zawn rai na ra ai. Shanhte gumlau ai hpe mung, shanhte tsun ai ga hpa hpe mung hkum hkrit nga et.

⁷Shanhte madat ai rai tim, n madat ai rai tim, shanhte hpe htawn tsun na matu ngai nang hpe tsun ai lam hpa hpe rai tim, nang shanhte hpe tsun na rai ndai. Shanhte gaw gumlau ai ni rai nga ma ai hpe adum nga u.

⁸“Si chye ai masha wa e, ngai nang hpe tsun ai ga hpe madat u. Shanhte zawn gumlau na myit hkum rawng nga et. Na a n-gup hpaw nna ngai nang hpe jaw na arai hpe sha u,” ngu tsun ai nsen hpe na nngai.

⁹Ngai hpang de lata ladawn nga ai hpe ngai mu nngai, dai lata gaw laika katsu hpe lang da nga ai.

¹⁰Dai lata hta rawng ai laika katsu hpe hpyan dat yang, laika man lahkawng maga hta ka da ai yawn hkyen hkrap ngu hkrap ngoi nsen ga, hkrap agru ai nsen hte yawn madai sharung shayawt ai ga ni hte ka da ai hpe ngai mu nngai.