Read Jinghpaw Common Language Bible 2009 EZEKELA 20 Bible Online

EZEKELA 20 - Jinghpaw Common Language Bible 2009 bible

EZEKELA 20

¹Ndai lam gaw anhte bawng dung ai sanit ning na shata manga a nhtoi shi ya shani byin ai rai nga ai. Dai shani e, Israela shawa hpawng na ningbaw nkau mi gaw dai MADU a myit ra sharawng ai hte seng nna ngai hte bawng ban jahkrup na matu du sa ma ai, shanhte gaw nye a man e dung nga ma ai.

²Dai hpang, dai MADU gaw ngai hpe ga shaga wu ai.

³Shi gaw, “Si chye ai masha wa e, Tsaw Htum ai dai MADU tsun nga ai mungga ndai masha ni hte shanhte hpe htawn tsun u: Nanhte gaw nye a myit ra sharawng ai lam hpe san yu na matu du sa ai ni n rai myit ni? Ngai gaw ahkrung nga ai Karai Kasang rai nga nngai, dai majaw nanhte ngai hpe hpa lam hte seng nna san ti mung, san na ahkang jaw na n rai. Tsaw Htum ai dai MADU ngai nan dai ga tsun ni ai.

⁴“Si chye ai masha wa e, nang gaw shanhte a ntsa e daw dan na matu jin jin rai nga n ni? Dai amu hpe shadik u. Shanhte a kaji kawa ni shut hpyit ai matsat shabat amu ni, shanhte hpe shadum u.

⁵Ngai hpa tsun nga ai lam shanhte hpe htawn tsun u. Israela amyu masha ni hpe ngai lata la ai shaloi, shanhte hpe ga shaka tawn da ni ai. Ngai gaw Egutu mung hta shanhte hpe nye hkum nan shadan dan ai hte nanhte a MADU Karai Kasang rai nga ai lam, shanhte hpe tsun dan ni ai.

⁶Dai gaw ngai shanhte hpe Egutu mung kaw nna shapraw la nhtawm mungdan yawng hta grau kaja htum nna ngamu ngamai ai sut hte ningru ningja ai mung ngu ai shanhte a matu ngai san da ai mung de woi wa na lam, ga shaka tawn da ni ai.

⁷Ngai gaw shanhte a MADU Karai Kasang rai nga nngai majaw, shanhte myit kap ai matsat shabat re ai hpara sumla ni hpe kabai kau nhtawm, n san n seng ai Egutu mung na lam shadam ai hpara ni hte shanhte hkum shanhte awu asin n galaw na matu, ngai shanhte hkang da ni ai.

⁸Rai ti mung, shanhte gaw ngai hpe ninghkap ma ai hte nye a ga hpe n madat mara nga ma ai. Shanhte gaw shanhte a matsat shabat re ai hpara ni hpe n kabai kau ma ai; Egutu hpara ni hpe mung n kau da lu ma ai. Nye a masin kahtet ai n-gun gaw dai Egutu mung hta hpring tup hkam sha shangun na, ngai shajin da ni ai.

⁹Rai ti mung, shanhte shanu nga ai masha amyu ni a man e, nye a amying jahpoi kau n hkrum mat hkra, shanhte hpe Egutu mung kaw nna woi shapraw la na, Israela amyu masha ni hpe ngai tsun ndau ni ai.

¹⁰“Dai rai nna, ngai gaw shanhte hpe Egutu mung kaw nna nam mali de woi wa ni ai.

¹¹Ngai gaw shanhte hpe nye a hkang da ai matsun maroi ga ni jaw ya ni ai; dai lam ni hpe hkan sa madat mara ai ni kadai rai ti mung, asak hkrung nga shangun lu na, nye a tara ni shanhte hpe sharin achyin ya ni ai.

¹²Shanhte hpe shachyoi shapra nga ai dai MADU ngai nan rai nga nngai hpe shanhte dum hprang wa lu hkra, anhte a lapran e myit hkrum ai kumla tai nga u ga, Dai Bansa Nhtoi hpe shadik na, ngai hkang da ni ai.

¹³Rai ti mung, shanhte gaw ngai hpe nam mali hkan e pyi nye a hkang da ai ga hpe ninghkap lale nga ma ai. Shanhte gaw nye a tara ni hpe jahten kau ma ai; dai lam ni hpe hkan sa madat mara ai ni kadai rai ti mung asak hkrung nga shangun na, nye a hkang da ai matsun maroi ga ni hpe kau da mu ai. Shanhte gaw Bansa Nhtoi hpe awu asin di kau ma ai. Shanhte hpe jahten shaza kau na matu dai nam mali hkan e nye a sindawng kahtet ai n-gun hkam sha shangun lu na matu ngai shajin da ni ai.

¹⁴Rai ti mung, dai hku ngai n galaw nngai, hpa majaw nga yang, Egutu mung kaw na Israela amyu masha ni hpe ngai woi wa sai lam mu ai masha amyu baw ni a man e nye a amying jahpoi kau ai lam n tai shangun nngai.

¹⁵Dai rai nna, shanhte a matu ngu nna ngai jaw da sai, dai yawng hta grau kaja htum nna ngamu ngamai ai hte sut hte ningru ningja ai mungdan de shanhte hpe n woi wa na ngu, dai nam mali kata e ngai ga sadi tawn da ni ai.

¹⁶Shanhte gaw shanhte a hpara sumla ni hpe nawku na matu sharawng awng nga ma ai; nye a hkang da ai matsun maroi ga ni hpe kau da nhtawm nye a tara ni hpe jahten kau ai hte Bansa Nhtoi hpe awu asin di kau mu ai majaw ngai dagam kau ni ai.

¹⁷“Rai ti mung, ngai shanhte hpe matsan yu dum ai myit rawng nga nngai. Ngai gaw shanhte hpe dai nam mali hkan e n sat kau na matu myit daw dan da nngai.

¹⁸Shing rai galaw na malai, nanhte a kaji kawa ni hkan ai tara ni hpe hkum hkan shadik myit, shanhte hkan ai htung lailen ni hpe hkum hkan dagraw myit; shanhte a hpara sumla ni hte nanhte hkum nan awu asin matsat shabat hkum rai nga myit, ngu nna shanhte hta lawm nang ai shabrang ni hpe ngai shadum ni ai.

¹⁹Ngai gaw dai MADU nanhte a Karai Kasang rai nga nngai. Nye a tara ni hte nye a hkang da ai ga ni hpe madat mara nga mu.

²⁰Bansa Nhtoi hpe chyoi pra ai nhtoi hku nna shachyoi shapra nga mu, dai gaw anhte tawn da sai ga shaka a kumla tai na ra ai; ngai gaw dai MADU nanhte a Karai Kasang rai nga nngai gaw nanhte hpe dum shangun na ra ai.

²¹“Rai ti mung, dai ban na masha ni mung ngai hpe gumlau ninghkap ma ai. Shanhte gaw nye a tara ni hpe jahten kau ma ai hte dai lam ni hpe hkan sa madat mara ai ni kadai hpe mung asak hkrung shangun lu ai nye a hkang da ai matsun maroi ga ni hpe n hkan ma ai. Shanhte gaw dai Bansa Nhtoi hpe awu asin di kau ma ai. Shanhte yawng hpe dai nam mali e jahtum kau na matu nye a sindawng kahtet ai a n-gun hkam sha lu mu ga, ngai shajin da ni ai.

²²Rai ti mung, ngai dai hku n galaw nngai, hpa majaw nga yang, Israela amyu masha ni hpe Egutu mung kaw nna woi shaw wa ai ngai hpe mu ai masha amyu baw ni a ka-ang e nye a amying nsang jahpoi kau shangun ai tai nga ai.

²³Dai re ai majaw, ngai gaw nam mali e kaga ga sadi hpe tawn da ni ai. Shanhte hpe mungkan mungdan shara shagu de shaden shabra kau na ni ai ngu nna ngai dai ga sadi hpe dagam da ni ai.

²⁴Shanhte gaw nye a hkang da ai matsun maroi ga ni hpe n hkan, nye a tara ni hpe jahten, Bansa Nhtoi hpe awu asin di nhtawm shanhte a kaji kawa ni nawng jau ai hpara sumla ni hpe nawku ma ai majaw, ndai amu hpe ngai galaw ni ai.

²⁵“Dai hpang, ngai gaw shanhte hpe n kaja ai tara ni hte asak n jahkrung ya lu ai matsun maroi ga ni hpe jaw da nngai.

²⁶Shanhte a hkungga nawng jau ai hta mung, shanhte a kasha alat ni hpe wan nat hkungga nawng jau ai hta mung ngai shanhte hpe awu asin di kau nngai. Ngai nan dai MADU rai nga ai lam shanhte hpe madun dan lu na matu, shanhte hpe ndai zawn ari jaw ai lam rai nga ai.

²⁷Ya chyawm gaw, si chye ai masha wa e, Tsaw Htum ai dai MADU ngai nan gaw shanhte hpe kaning ngu tsun shadum nga ai lam, Israela amyu masha ni hpe htawn tsun u. Ndai gaw shanhte a kaji kawa ni n sadi sahka ai hku nna n sawn n sang di ai kaga lam rai nga ai.

²⁸Shanhte hpe jaw na ngu nna ngai ga sadi dagam da ai mungdan de shanhte hpe ngai woi wa ni ai. Shanhte gaw tsaw ai kawng ni hte tsit lali ai hpun ni hpe mu mada ma ai shaloi, dai shara ni yawng hta shagu hkungga nawng ya ma ai. Shanhte gaw dai hkan e manam pyaw ai baw wan nat hkungga hte sabyi hkungga ru jaw ai lai hte ngai hpe pawt bu shangun ma ai.

²⁹Nanhte sa sa re ai dai Tsaw ai Shara ni gaw kaning re ai shara ni rai nga a ta?, ngu nna ngai shanhte hpe san yu ni ai. Shanhte gaw dai hpe dai ni du hkra, “Tsaw ai Shara” ngu nna shamying da ma ai.

³⁰Nanhte gaw nanhte a kaji kawa ni galaw shut hpyit ai yubak hte maren shanhte a hpara sumla hpang de hpa majaw hkan nang mayu nga myit ni?, ngu nna ngai san nga ai ga, dai Israela amyu masha ni hpe ya jang tsun dan u.

³¹Nanhte gaw dai ni du hkra pyi, dai zawn re ai kumhpa ni hte nawng jau nhtawm, dai zawn re ai hpara sumla ni a man e nanhte a kashu kasha ni hpe wan nat hkungga nawng jau ai hte nanhte hkum nanhte awu asin di myit dai. Israela amyu masha nanhte gaw ya du hkra nye a myit ra sharawng ai lam hpa rai nga a ni?, nga nna sa san nga myit dai! Ngai gaw Tsaw Htum ai dai MADU, ahkrung nga ai Karai Kasang rai nga nngai, dai majaw hpa lam hte seng nna mung, nanhte ngai hpe san yu lu na myit dai n rai.

³²Nanhte gaw kaga masha amyu baw ni zawn byin mayu myit dai; maigan mungdan hkan shanu nga ai amyu masha ni zawn hpun, nlung hpara ni hpe nawku na matu nanhte myit makun da nga myit dai. Rai ti mung, dai zawn re ai maw mawn ai lam galoi mung byin wa na ra ai n rai.

³³“Ngai gaw Tsaw Htum ai dai MADU, ahkrung nga ai Karai Kasang rai nga nngai, dai majaw nye a masin kahtet ai hta ngai nanhte hpe nye a n-gun ja ai lata, nye a daru magam n-gun mahkra hte up na nngai, ngu ngai nanhte hpe shadum nngai.

³⁴Ngai gaw nanhte hpe bra ayai hkawm nga ai mungdan yawng kaw na bai shinggyin jahpawng nna woi wa ai shaloi, nye a daru magam n-gun hte masin kahtet ai lam, ngai nanhte hpe madun dan na nngai.

³⁵Ngai gaw nanhte hpe, ‘Masha Amyu baw ni a Nam Mali’ ngu ai shara de woi jashawn nna dai yang e, nanhte hpe myi man chyaw ngai daw dan na nngai.

³⁶Nanhte a kaji kawa ni hpe Sina Nam mali e ngai daw dan ni ai zawn, ya mung nanhte hpe ngai daw dan na nngai,” ngu Tsaw Htum ai dai MADU tsun ai.

³⁷“Ngai gaw nanhte hpe ja ja tek jum ai hte nye a ga shaka hpe madat mara hkan sa shadik shangun na nngai.

³⁸Nanhte a lapran na gumlau ai ni hte yubak galaw ai ni hpe ngai tsan kau na nngai. Ngai gaw dai ni hpe shanhte shanu nga ai mungdan kaw nna shapraw kau na nngai, rai ti mung dai ni hpe Israela mungdan de ngai bai nhtang wa shangun na n rai. Shaloi nanhte gaw ngai nan dai MADU rai nga nngai ai hpe chye na mara ai.

³⁹Dai Tsaw Htum ai MADU gaw, “Israela amyu masha yawng hte e, nanhte pyaw pyaw rai nga mu! Shing rai matut nna nanhte a hpara sumla ni hpe daw jau mu! Rai ti mung nanhte a hpara sumla ni hpe kumhpa ni hte nawng jau ya ai hte nye a chyoi pra ai amying hpe jahpoi ai amu, ndai kalang a hpang jahkring kau nhtawm nye a ga hpe madat na rai myit dai, ngu nna ngai nanhte hpe sadi jaw nngai.

⁴⁰Israela amyu masha ni yawng gaw dai mungdan hta nga ai nye a chyoi pra ai bum ngu ai Israela a bum hta ngai hpe nawku daw jau na mara ai; ngai mung nanhte hta awng sharawng wa nna nye a matu ngu nna nawng jau na matu la sa wa ai nanhte a shagu hkungga ni, nanhte a kaja htum ai wan nat hkungga ni hte chyoi pra ai kumhpa ni hpe ngai myit mada nga na nngai.

⁴¹Ngai gaw nanhte hpe shabra kau dat ai mungdan ni kaw nna woi wa nhtawm nanhte hpe shinggyin la ai hte jahpawng da ai hpang, nanhte nat nawng ai shagu hkungga ni hpe hkap la na nngai. Ngai nan chyoi pra nga nngai hpe amyu masha ni mu lu na mara ai.

⁴²Nanhte a nji nwa ni hpe jaw na ngu, ngai ga sadi tawn da ai Israela mung de nanhte hpe ngai bai woi nhtang wa ai shaloi, ngai nan dai MADU rai nga nngai hpe nanhte chye lu na marin dai.

⁴³Dai hpang, nanhte galaw kau sai matsat shabat amu mahkra hte kaning rai nanhte hkum ni hpe awu asin di kau sai lam ni hpe nanhte dum wa na marin dai. Nanhte galaw hkrup kau sai n hkru n shawp ai amu mahkra a majaw nanhte nan nanhte a hkum hpe matsat kau na marin dai.

⁴⁴Nye a arawng sadang hpe makawp maga na matu, ngai galaw ai shaloi, ngai nan dai MADU rai nga nngai hpe nanhte Israela amyu masha ni chye lu na marin dai, hpa majaw nga yang nanhte galaw ai n hkru n shawp lam hte n hkru ai amu ni a majaw hkam la ging ai hte maren ngai nanhte hpe di ai n rai. Dai Tsaw Htum ai MADU nan tsun nu ai.

⁴⁵Dai MADU gaw ngai hpe ga shaga wu ai.

⁴⁶Shi gaw, “Si chye ai masha wa e, dingda maga de yu yu u. Dingda maga de ga tsun nna, dingda maga na maling hpe hkap daw nhtawm myihtoi htoi u.

⁴⁷Dai Tsaw Htum ai MADU kaning nga tsun ai mungga hpe na la na matu dingda maga de na maling hpe htawn tsun u: Yu u, ngai gaw wan shachyi dat na nngai; dai wan gaw nang hta tu ai tsit lali ai hte hkun hkraw mat ai hpun shagu hte hpe hkru kau na ra ai. Dai wan hpe hpa hte mung sat shangap kau lu na ra ai n rai, dai wan gaw dingda maga kaw nna dingdung maga de du hkra hkru mat wa nna masha shagu gaw kang kahtet ai wan numli ni hpe hkam sha na mara ai.

⁴⁸Dai MADU ngai nan dai wan hpe shachyi ai hte dai wan hpe kadai mung n sat shangap lu ai lam, shanhte yawng mu lu na mara ai,” ngu nna shi tsun wu ai.

⁴⁹Rai ti mung, ngai gaw, “Tsaw Htum ai MADU e, ngai hpe dai amu hkum galaw shangun et! Ngai gaw tut nawng e gumwai ga ni hpe tsun nngai nga nna, masha shagu tsun aput shatsang na jin jin rai nga ma ai,” ngu nna ninghkap htan kau we ai.