Read Jinghpaw Common Language Bible 2009 EZEKELA 23 Bible Online

EZEKELA 23 - Jinghpaw Common Language Bible 2009 bible

EZEKELA 23

²Shi gaw, “Si chye ai masha wa e, kalang mi na aten hta, kanau kana lahkawng nga ma ai.

³Shan gaw hkawn ram prat e, Egutu mung hta shanu nga ma ai, shaloi shan a hkawn jet ai maka gaw hten mat ai hte shawa num tai wa masai.

⁴Kana a amying gaw Ohola rai nna (dai gaw Samari a malai rai nga ai), kanau a amying gaw Oholiba rai nna (dai gaw Yerusalem a malai rai nga ai.) Ngai gaw shan lahkawng yan hpe hkungran la ni ai, shan mung nye a matu kashu kasha shangai ya ma ai.

⁵Shi gaw nye a matu rai nga ti mung, Ohola gaw shawa num matut galaw ai hte Asuri mung na shi a sumtsaw ni hpe ra gasit ai myit shi hta hpring nga lu ai.

⁶Dai ni gaw shaba pu nsam rawng ai hpyen hking hpun palawng ni bu hpun da ai hpyenla ni rai ma ai, du magam ni hte arawng aya kaba ai du ni, shanhte yawng gaw hkum shingyan tsawm nna gumra dap hta lawm ai du shabrang ni rai ma ai.

⁷Shi gaw dai Asuri du salang ni yawng a matu shawa num tai ya nu ai; Asuri hpara sumla ni hpe nawku ai hku nna shi a ra gasit ai hpe shi hkum nan awu asin di kau wu ai.

⁸Shi gaw shi a hkawn jet ai hpe jahten kau nna Egutu mung e shawa num amu galaw hpang ai hte matut galaw nga wu ai. Shi a hkawn ram prat kaw nna lasha ni shi hte rau yup nna shi hpe shawa num zawn di ma ai.

⁹Dai re ai majaw, Ngai gaw shi hpe shi grai ra ai shi a Asuri sumtsaw ni a lata de ap kau nngai.

¹⁰Shanhte gaw shi a hpun palawng hpe raw sharun kau ya ma ai, shi a shadang sha ni hte shayi sha ni hpe rim la ma ai, dai hpang, shi hpe nhtu hte sat kau ma ai. Shara shagu hkan nga ai numsha ni gaw shi a maka hte seng ai lam hpe tsun shatan ma ai.

¹¹“Ya shi a kanau Oholiba gaw dai lam hpe mu nga ninglen, Ohola shut lai wa sai shawa num amu hta grau sawng ai hte gayut nga wu ai.

¹²Shi mung Asuri du magam ni, du salang ni, kabrim ai hpun palawng bu hpun da ai hpyenla ni hte gumra dap na du ni hpe ra gasit ai myit hpring nga ai; shanhte yawng gaw hkum shingyan tsawm ai shabrang ni hkrai rai ma ai.

¹³Kanau jan gaw kana jan zawn n shawp nga ai hte shi dik hkra akyang n shawp nga ai hpe ngai mu nngai.

¹⁴“Shi gaw n shawp n kap ai amu hta grau grau lup shang mat wa nga ai. Nshang ni hta shingkyit kyit nna bunghkaw hkaw da nhtawm kaba ai arawng aya hkam la ai Babelon du salang ni a hkrang bung sumla ni hpe shakum hta tawk da nna dai hpe hkyeng mang ai tsi hte chya da ai sumla ni a majaw, shi a myit gang la hkrum nga wu ai.

¹⁵

¹⁶Shi gaw shanhte hpe mu dat ai shaloi jang, shi gaw ngang gayut ai myit hte hpring wa nna Babelon mung e nga ai shanhte hpang de kasa dat dat wu ai.

¹⁷Babelon masha ni mung shi hte kanawn na matu du sa ma ai. Shanhte gaw shi hpe lang ai hte shi hpe grai sawng hkra awu asin di kau ma ai, jahtum e, shi hpe shanhte matsat kau ma ai.

¹⁸Shi gaw shawa man e shi hkum hpe hpaw madun nu ai rai nna masha shagu gaw shi shawa num rai nga sai hpe chye ma ai. Ngai gaw shi a kana hpe matsat kau ni ai zawn shi hpe matsat kau nngai.

¹⁹Shi gaw shawng de hkawn ram prat e Egutu mung hta shawa num naw tai nga yang na hta grau nna sawng ai shawa num tai wu nu ai.

²⁰Shi gaw lawze, laugung ni zawn ladu lai ngang gayut ai lasha ni hpe ra gasit ai myit hpring nga wu ai.”

²¹(Oholiba e, nang gaw Egutu mung hta hkawn ram prat naw rai yang lasha ni na a madoi chyu hpang ni hpe manat tarin ngang ginsup ya ai hte na a hkawn jet hpe jahten kau ya sai mara lu nga ndai, nang gaw dai zawn re ai n shawp n kap ai amu hpe bai galaw mayu nga ndai.)

²²“Dai rai nna, Oholiba e, ndai gaw Tsaw Htum ai dai MADU ngai nan nang hpe tsun nga ai ga rai nga ai. Ndai sumtsaw ni hpe nang yu jin mat ti mung, shanhte hpe ngai pawt sindawng shangun nna nang hpe wang da na matu shanhte hpe woi sa wa na nngai.

²³Ngai gaw Babelon masha ni hte Hkalde masha ni yawng hpe mung, Peku, Shoa hte Koa masha ni hte hpawn Asuri masha ni yawng hte hpe woi sa wa na nngai. Dai hkum shingyan tsawm ai du magam shabrang ni hte du salang ni, ahkyak ai du salang ni yawng hte gumra dap na arawng aya kaba hkam la ai du ni hpe ngai jahpawng da na nngai.

²⁴Shanhte gaw dingdung maga hku hpyen leng ni, rai htaw leng ni hte hpawn hpyen luksuk kaba ni hpe woi yu wa nhtawm nang hpe gasat na mara ai. Shanhte gaw tinang hkum hpe makawp maga ya ai hpyen ninggang ni hte hpyen gupchyawp ni hte nang hpe wang da na mara ai. Ngai gaw nang hpe shanhte a lata de ap kau nna shanhte gaw shanhte a htung tara hte maren nang hpe jeyang na mara ai.

²⁵Ngai gaw nang hpe pawt sindawng nga nngai majaw, shanhte a masin kahtet ai hta ngai nang hpe hkrup sha shangun na nngai. Shanhte gaw na a ladi hte ana ni hpe kahtam di kau nna, na a kashu kasha ni hpe sat kau na mara ai. Rai sa, shanhte gaw na a shayi shadang sha ni hpe na a lata kaw nna gare la nhtawm shanhte hpe jahkrung nat kau na mara ai.

²⁶Shanhte gaw na a bu hpun palawng ni hpe gang je kau ya nna na a manu dan ai ja lung seng ni hpe hpyu la na mara ai.

²⁷Ngai gaw nang Egutu mung hta naw nga nga yang, shut hpyit kau sai nse nsa matsat shabat re ai amu ni hte na a ngang gayut ai shawa num hking hpe ngai jahkring kau ya na we ai. Nang mung hpara sumla ni hpe loi mi mung mada yu na rin dai n rai, Egutu mung a lam hpe mung myit sana ndai n rai.”

²⁸Ndai gaw Tsaw Htum ai dai MADU tsun ai mungga rai nga ai: “Ngai gaw nang n dawng n yawt ai hte matsat kau sai masha a lata de nang hpe ap kau na we ai.

²⁹Shanhte mung nang hpe n dawng n yawt nga ma ai majaw, nang galaw shakut da ai arung arai shagu hpe shanhte la mat wa nna nang hpe mung, shawa num langai zawn shadan shadawng ai hte singgu krin jahti da na mara ai. Na a ngang gayut ai hte shawa num amu galaw ai dai lam gaw na a ntsa e dawng pru nit dai.

³⁰Nang gaw masha amyu baw ni a matu shawa num tai ya nit dai; nang gaw shanhte a hpara sumla ni hte na hkum hpe awu asin di kau nit dai.

³¹Nang gaw na a kana a lagaw hkang hta hkan nga nit dai majaw shi lu ai ari gawm hpe nang lu na matu ngai jaw da ni ai.

³²Tsaw Htum ai dai MADU gaw, “Nang gaw na a kana a gawm kaw na lu na rai ndai; dam lada nna sung nga ai. Masha shagu gaw nang hpe asawng asang di nna ashu na mara ai; dai gawm gaw hpring nga ai.

³³Na a kana Samari a gawm gaw hkrit ai hte hten run ai a gawm rai nna, dai gaw nang hpe nchyi nmu hte lu nang shangun na ra ai.

³⁴Nang gaw dai hpe lu nna hkyet mat hkra chyup lu na rai ndai, de a gawm chyen ni hte na a sinda shaje kau na rin dai. Tsaw Htum ai dai MADU ngai nan tsun ni ai,” ngu nna tsun wu ai.

³⁵Yu u, ndai gaw Tsaw Htum ai dai MADU tsun nga ai mungga rai nga ai: “Nang gaw ngai hpe malap kau nit dai, ngai hpe shingdu dat kau nit dai majaw na a ngang gayut ai amu hte shawa num amu galaw ai nni nkri hpe hkam sha na rai ndai.”

³⁶Dai MADU gaw ngai hpe, “Si chye ai masha wa e, nang gaw Ohola hte Oholiba yan hpe jeyang na matu jin jin rai nga sani? Shan galaw dan sai matsat shabat amu ni a lam hpe mara deng u.

³⁷Shan gaw numshaw lashaw ai amu, masha sat ai amu, hpara sumla ni a majaw numshaw lashaw ai amu hte nye a matu shaprat ya ai shadang sha ni hpe sat ai amu ni hpe shut hpyit tawt lai masai. Nye a shadang sha ni hpe mung shanhte a hpara sumla ni hpe wan nat hkungga nawng ya nga masai.

³⁸Shanhte galaw sai amu gaw dai yawng rai nga sai n rai. Shan gaw nye a Nawku Htingnu hpe awu asin di kau ma ai hte ngai shagrin da ni ai dai Bansa Nhtoi hpe mung n gawn n sawn di nga ma ai.

³⁹Shan gaw hpara sumla ni hpe nawng jau na shagu hkungga ni hpe zawn, nye a kasha ni hpe sat ma ai; shan gaw dai shani jang, nye a Nawku Htingnu de sa nna dai hpe awu asin di kau ma ai!

⁴⁰“Shan gaw kasa ni hpe lang hte lang shangun dat nna, sumtsan mung na lasha ni hpe saw shaga ga rai ma ai, dai lasha ni mung du sa wa ma ai. Dai kanau yan kana mung hka shin nna shan a myi hpe tsi chya nhtawm ja lung seng hte mawn sumli da ma ai.

⁴¹Shan gaw tsawm ai ku ntsa hta dung nna, de a man e, ngai shan a matu lajang da ya sai sha ku hta kaja ai arung arai ni hpe mara da ma ai; dai hta manam pyaw ai baw hte tsanlun sau mung lawm nga ai.

⁴²Pyaw daw kadaw hkawm ai masha hpung mi a nsen hpe na lu nga ai hte dai hpawng hta nam mali na la uhpung mi hpe mung shalawm la ma ai. Shanhte gaw numsha ni a lata hta lahkawn hkawn ya nna baw ni hta tsawm htap ai janmau ni hpe shagup ya ma ai.

⁴³Shanhte gaw numshaw lashaw amu hta gumgai hkra shawa num amu galaw ai jan hte shut hpyit hkyen nga masai ngu nna nye hkum ngai san nga nngai.

⁴⁴Shanhte gaw dai shawa num ni hpang de lang hte lang nhtang sa wa ma ai. Shanhte gaw dai nse nsa re ai Ohola hte Oholiba yan hpang de mung nhtang shang ma ai.

⁴⁵Shan gaw lashaw ai amu galaw ai hte shan a lata ni mung sai kap nga ma ai majaw, ding hpring ai ni gaw shan a lashaw ai hte masha sat ai amu ni hpe daw dan na mara ai.”

⁴⁶Ndai gaw Tsaw Htum ai dai MADU tsun ai mungga rai nga ai: “Shan hpe jahkrit shama nna kashun kashe hpyu la na matu masha wunawng wuwa woi wa na nngai.

⁴⁷Dai masha wunawng wuwa gaw shan hpe nlung hte kabai nna, nhtu ni hte htim mu ga; ma ni hpe mung sat kau nna nta ni hpe nat kau ya mu ga.

⁴⁸Shan shut hpyit sai amu zawn numsha shagu hta dai lashaw ai amu n shut n hpyit mu ga sadi jaw ai hku nna, dai mungdan ting na nse n sa ai amu hpe ngai jahtum kau na we ai.

⁴⁹Ngai gaw kanau kana rai nga ai nan nau hpe nan a nse nsa ai amu hte hpara sumla ni hpe nawku ai yubak mara ni a majaw, ari jaw na made ai. Dai shaloi, ngai nan dai Tsaw Htum ai dai MADU rai nga nngai hpe nan chye wa na marin dai.”