Read Jinghpaw Common Language Bible 2009 EZEKELA 25 Bible Online

EZEKELA 25 - Jinghpaw Common Language Bible 2009 bible

EZEKELA 25

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, Amon mung hpe myihtoi htoi u.

³Tsaw Htum ai dai MADU ngai nan tsun nga ai mungga madat na matu shanhte hpe tsun u: Nang gaw awu asin di kau hkrup sai nye a Nawku Htingnu hpe mung, shingran katsi mat sai Israela mungdan hpe mung, bawng dung hkrum ai Yuda amyu masha ni hpe mung, yu kabu ai hte yu sharawng nga nit dai majaw,

⁴ngai gaw sinpraw nam mali hkan shanu nga ai amyu bawsang ni a lata de ap kau na we ai. Shanhte gaw na a mungdan hta dap ni jung nna, dai shara ni hta shanu nga na mara ai. Shanhte gaw nanhte kalang mi hkam la yu sai namsi namsaw ni sha nna nga chyu lu na mara ai.

⁵Ngai gaw Raba mare hpe gawla-uk ulawng, Amon mungdan ting hpe sagu hpung ni a hpum shara ni shatai kau na nngai, shaloi ngai nan dai MADU rai nga nngai hpe nang chye lu na rin dai.

⁶“Ndai gaw Tsaw Htum ai dai MADU tsun ai mungga rai nga ai: Nang gaw lahpawk dum let kabu gumhtawn hkawm nga ndai. Nang gaw Israela mungdan hpe n kaw n law di kau nga ndai.

⁷Nang galaw ai amu a majaw, ngai nang hpe kashun kashe di nna hpya kau na kaga masha amyu baw ni a lata de ap kau na we ai. Ngai gaw nang hpe amyu baw langai hku loi mi pyi n grin nga lu hkra mung, na a mungdan re ngu nna masat da ai lamu ga galoi mung n nga mat hkra mung, htum hkra, tsai hkra jahten sharun kau na nngai. Dai hpang, ngai gaw dai MADU rai nga nngai hpe nang chye wa na rai ndai.”

⁸Tsaw Htum ai dai MADU gaw, “Yuda gaw kaga masha amyu baw ni yawng hte bung nga ai nga nna Moba wa tsun nu ai majaw,

⁹ngai gaw Moba mung a lamu ga jarit ni hpe makawp maga ya ai mare ni hte dai mungdan na tsawm htum ai mare ngu ai Bet Yeshimot, Bala Meon, hte Kiriahtim ni lawm hkra gasat hkrum shangun na nngai.

¹⁰Ngai gaw Moba mung hte hpawn Amon mung hpe mung sinpraw nam mali hkan shanu nga ai amyu bawsang ni a lata de ap kau na we ai, shaloi Moba mung gaw amyu baw masha ni shanu lu ai mungdan tai lu na ra ai n rai.

¹¹Ngai gaw Moba mung hpe ari jaw na nngai, Ngai nan dai MADU rai nga nngai hpe shanhte chye lu na mara ai,” ngu nna tsun wu ai.

¹²Tsaw Htum ai dai MADU gaw, “Edom masha ni Yuda amyu masha ni hpe gumshem ai hku matai htang ma ai; dai zawn matai htang ai gaw Edom a ntsa e mara jung nga ai.

¹³Ya chyawm gaw, Edom mung hpe ari jaw na matu mung, masha shagu hte dusat yam nga ni hpe sat kau na matu mung, ngai ndau na nngai. Ngai gaw dai mung hpe Teman mare kaw nna Dedan mare du hkra dai mung na shara hpe shingran katsi kau shangun na nngai; masha ni mung majan pa e sat kau ai hkrum na mara ai.

¹⁴Nye a amyu masha Israela ni gaw Edom masha ni hpe nye a matu matai dawp ya na mara ai; shanhte gaw Edom masha ni hpe nye a masin kahtet ai hpe hkam sha shangun na mara ai. Edom gaw nye a matai dawp ai lam kaning re ai majaw rai nga ai hpe shanhte chye lu na mara ai,” ngu nna tsun wu ai. Tsaw Htum ai dai MADU tsun nu ai.

¹⁵Tsaw Htum ai dai MADU gaw, “Hpilisti masha ni gaw shanhte a jaw prat gumlau hpyen tai nga ai ni hpe gumshem ai hku matai htang nna n dawng n yawt ai myit hte shanhte hpe jahten sharun kau ma ai.

¹⁶Dai rai nna, ngai gaw Hpilisti masha ni hpe htim gasat nna shamyit kau na nngai, ngu tsun ndau nga nngai. Ngai gaw Hpilisti pa layang hkan e naw hti ngam nga ai masha shagu hte hpe mung jahten shaza kau na we ai.

¹⁷Ngai gaw shanhte hpe ja ja ari jaw na nngai, shanhte hpe htum hkra matai dawp na nngai. Shanhte gaw nye a masin kahtet ai hpe hkam sha na mara ai. Dai hpang, ngai gaw dai MADU rai nga nngai hpe shanhte chye wa na mara ai,” ngu nna tsun wu ai.