Read Jinghpaw Common Language Bible 2009 EZEKELA 26 Bible Online

EZEKELA 26 - Jinghpaw Common Language Bible 2009 bible

EZEKELA 26

¹Anhte bawng dung ai shi langai ning, shata langai ya shani hta, dai MADU ngai hpe ga shaga wu ai.

²Shi gaw, “Si chye ai masha wa e, ndai gaw Turu mare masha ni a kabu gara ai nsen rai nga ai. Shanhte gaw, ‘Yerusalem gaw run mat sai! Dai mare a sut n-gun mung htum mat sai! Dai mare gaw anhte hpe shingjawng lu sana n rai!,’ nga nna jahtau tsun ma ai.

³“Dai rai nna, Tsaw Htum ai MADU ngai nan tsun nga ai mungga gaw ndai rai nga ai: Turu mare e, ngai gaw na a hpyen rai nga nngai. Ngai gaw nang hpe gasat na matu masha amyu law law hpe woi sa wa na nngai, dai ni gaw panglai hka leng ni zawn rawt hta wa ai hte du sa wa na mara ai.

⁴Shanhte gaw na a mare bunghku ni hpe jahten kau nna, na a langchyi ni hpe run kau na mara ai. Ngai gaw ga nhpu yawng hpe ye kau nna krin ai lungrawk hpe chyu sha ngam da na nngai.

⁵Nga hkan sha ai ni gaw panglai hka hta dung ai dai krin ai lungrawk ntsa hta shanhte a sumgawn lam jahkraw da na mara ai. Tsaw Htum ai dai MADU ngai nan tsun ni ai. Masha amyu baw ni gaw Turu hpe gasat kashun kau na mara ai,

⁶dai ni a nhtu ni hte dai mung na ahkyak ai mare ni hta shanu nga ai ni hpe sat kau na mara ai. Shaloi, ngai nan dai MADU rai nga nngai hpe Turu mare masha ni chye lu na mara ai,” ngu nna tsun wu ai.

⁷Tsaw Htum ai dai MADU gaw, “Turu mare hpe gasat na matu, galu kaba htum ai hkawhkam ngu ai Babelon Hkawhkam Nebuhkadneza hpe ngai woi sa wa na nngai. Shi gaw hpyen gumra ni, hpyen leng ni, gumra jawn ai ni ngu ai hpyen luksuk kaba hte hpawn dingdung maga kaw nna yu sa wa na ra ai.

⁸Lamu ga madung na mare ni hta shanu nga ai ni mung hpyen majan hta sat kau hkrum na mara ai. Hpyen ni gaw kaduk htu nhtawm dap jung ai hte nang hpe ninghkap lu na matu ngang ai ninggang shakum ni jung da na mara ai.

⁹Shanhte gaw na a mare bunghku ni hpe run ai gawng ni hte adawt sharun kau ya ai hte na a langchyi ni hpe mung hpri htinggrang ni hte mala sharun kau ya na mara ai.

¹⁰Law la ai ga nhpu ni gaw hpyen gumra ni a majaw, mawng lung wa nna sumwi zawn nang hpe ka-up kau na mara ai. Shanhte gaw hten run sai mare chyinghka lam hku lai shang wa yang, arai htaw ai gumra leng ni hte hpyen leng ni a wu kadu ai nsen ni a majaw na a mare bunghku ni gari ashun na mara ai.

¹¹Gumra jawn ai ni mung na a mare nmaw lam hku kabye lai wa nna shanhte a nhtu ni hte na a masha ni hpe sat kau na mara ai. Na a ngang ai shadaw ni gaw ga de kadawng daw mat na mara ai.

¹²Shanhte gaw na a sut gan kashun la nna gun rai ni hpe lanep shatai kau na mara ai. Shanhte gaw na a mare bunghku ni hpe kanawng daw kau nna hkik hkam ai na a nta ni hpe hpya kau ya na mara ai. Shanhte gaw nlung, hpun ngau ni hte wut chyen ni yawng hpe magawn la nna panglai de kabai bang kau na mara ai.

¹³Ngai gaw na a mahkawn mangoi nsen hpe jahtum kau nna na a tingse mahku ni hpe shazim kau na we ai.

¹⁴Nga hkan ai ni shanhte a sumgawn ni lam jahkraw la ai dai krin ai lungrawk shara hpe chyu sha ngam tawn da na nngai. Dai mare hpe galoi mung bai de da lu na n rai. Tsaw Htum ai dai MADU ngai nan tsun ni ai,” ngu nna tsun wu ai.

¹⁵Tsaw Htum ai dai MADU gaw Turu mare hpe ndai lam tsun na lu nga ai: “Nang gasat hkrum ai hte sum ai shaloi, htau sat kau hkrum ai ni a kyek shabam ai nsen a majaw, panglai hkin-gau mayan hku shanu nga ai masha ni hkrit gari na mara ai.

¹⁶Panglai ntsa bu hkawm ai masha amyu baw ni a hkawhkam ni yawng gaw shanhte a tingnyang kaw nna yu mat na mara ai. Shanhte gaw palawng galu hte maka ka da ai palawng ni hpe raw kau nna hkrit gari ai hte ga e dung nga na mara ai. Shanhte gaw nang hta byin ai gam maka a majaw, nau hkrit mat nna gari ai pyi n hkring hkraw na mara ai.

¹⁷Shanhte gaw na a matu ndai makoi mayang mahkawn hkawn na mara ai: Gumhkawng ai mare gaw hten byak mat sahka! Shi a sanghpaw li ni panglai hka kaw nna yawng mat wa nga masai. Ndai mare masha ni gaw panglai ni hpe up ma ai, Hkin-gau mayan hku nga ai masha ni yawng hkrit gari nga ma ai.

¹⁸Ya chyawm gaw, nang kadawng mat ai shani e, Zunlawng ni gari ashun nga ai hte, Shanhte a masha ni dai zawn re ai jahten shabyak lam a majaw mau kajawng nga ma ai.”

¹⁹Tsaw Htum ai dai MADU gaw ning nga tsun ai: “Ngai gaw nang hpe masha kadai mung n shanu ai hte hten run mat sai mare ni zawn katsi katsang shara shatai kau na we ai. Ngai nang hpe sung ai nammukdara hka hte ka-up kau na nngai.

²⁰Moi chyaloi nhkoi kaw nna nga nga sai ni hte rau nga na matu, ngai nang hpe Katsan ga de shayu kau dat na de ai. Ngai gaw nang hpe si hkrung si htan hte tut e rau hpawng ai dai htani htana hten byak ai shara ngu ai shingran katsi ai ga kata de nga shangun na nngai. De a shabrai gaw, nang galoi mung bai dap wa lu na n rai, nang gaw hkrung nga ai ni a mungdan na shara hpe madu la lu na ndai n rai.

²¹Ngai nang hpe hkrit hpa kasi shatai nna dai gaw na a matu jahtum rai na ra ai. Masha ni nang hpe tam ti mung, galoi mung mu hkrum na ndai n rai.” Tsaw Htum ai dai MADU tsun nu ai.