Read Jinghpaw Common Language Bible 2009 EZEKELA 27 Bible Online

EZEKELA 27 - Jinghpaw Common Language Bible 2009 bible

EZEKELA 27

¹Dai MADU gaw ngai hpe,

²“Si chye ai masha wa e, panglai daru nten e nga nna

³hkin-gau mayan shagu hta shanu nga ai masha ni hte hpaga ga ai mare ngu ai dai Turu a matu sharung shayawt ai mahkawn hkawn u. Tsaw Htum ai dai MADU tsun nga ai mungga shi hpe htawn tsun u: “Turu e, nang gaw na a hkum tsup tsawm htap ai hta shakawng nga nit dai.

⁴Na a dum nta gaw panglai hta rai nga ai. Na a matu gaw gap ai ni gaw tsawm ai sanghpaw li zawn nang hpe shachyaw da ma ai;

⁵Shanhte gaw hpunpyen a matu Hermon Bum kaw na marau hpun ni hpe mung, Dawnghkawn shadaw a matu Lebanon kaw na pru ai arit hpun ni hpe lang ma ai.

⁶Shanhte gaw li lashap galaw na matu Bashan mung na wamyi hpun ni lang ma ai; Kupru zunlawng na pru ai marau hpun hpe mung shanhte la nna dai hpe magwi kawng ni hte hkrep nhtawm li hpe mawn shatsawm nga ma ai.

⁷Na a li sumpan ni hpe lachyit sumpan, Egutu mung na maka ka ai lachyit sumpan ni hte galaw da nga ndai; Dai hpyan sharawt da ai sumpan li ni hpe tsan tsan kaw na aloi sha yu matsing lu nga ai. Na a li magap ni hpe Kupru zunlawng na pru ai shaba pu nsam rawng nna ngang ai sumpan ni hte galaw da nga ai.

⁸Na a li shap ai ni gaw Sidon hte Arwadi mare ni kaw na rai ma ai. Li hkang ai ni gaw na a mare na kung kyang ai masha ni rai ma ai.

⁹Dai sanghpaw li ni hpe hkan lajang nang ai lasama ni gaw Biblos mare na hpaji kung kyang ai ni rai ma ai. Na a gat seng ni hta hpaga yumga galaw ai ni gaw Sanghpaw li hte shara shagu hkan hkawm sa nga ai li ma ni hte li hkang ai ni rai ma ai.

¹⁰“Persi, Luda hte Libya mung na hpyenla ni gaw na a hpyen luksuk hta hpyen amu shang galaw ma ai. Shanhte gaw tinang a ninggang ni hte gupchyawp ni hpe na a hpyen dap ni hta noi da nga ma ai. Shanhte gaw na a arawng sadang hpe dan hkung shangun nga ma ai.

¹¹Na a hpyen luksuk hta lawm ai Arwadi hpyenla ni gaw na a mare bunghku ni hpe mung, Gamad hpyenla ni gaw na a langchyi ni hpe mung sin nga ma ai. Shanhte gaw shanhte a hpyen ninggang ni hpe bunghku ntsa hkan e noi da nhtawm, nang hpe shatsawm da nga ma ai.

¹²“Nang gaw Spain mung hte hpaga yumga galaw nna na a law la ai gun rai ni hpe galai la na matu, gumhpraw hpri, ajang hte machyu ni hpe la sa wa nga ndai.

¹³Nang gaw Grik, Tubala hte Meshek masha ni hte hpaga yumga galaw nna na a gun rai ni hpe mayam ni hte mung, magri mang gawm ni hte mung galai hkat nga ndai.

¹⁴Nang gaw Bet Togama mare kaw na pru ai daw htaw gumra ni, hpyen gumra ni hte lawze ni hpe mari la lu na matu na a gun rai ni hpe dut nga ndai.

¹⁵Dedan masha ni gaw nang hte hpaga ga ma ai; zunlawng law law na masha ni mung nang hte gun rai galai hkat na matu magwi kawng hte hpun chyang dut ya ma ai.

¹⁶Suri masha ni mung gun rai hte nang galaw shapraw ai hpaga gun rai ni mari la ma ai. Shanhte gaw mya lung seng tsit, shaba pu nsam rawng ai sumpan, maka ka ai sumpan, mani ai lachyit nba, tanda ngu ai chyahkat nlung hte lung seng hkyeng ni hpe la sa nna na a gun rai ni hte galai la nga ma ai.

¹⁷Yuda hte Israela mung gaw na a gun rai ni hte galai la na matu hkaulan mam, lagat ntsin, tsanlun sau hte namji namya ni la sa ma ai.

¹⁸Damasku mare masha ni gaw na a gun rai ni hte nang galaw shapraw ai sut rai ni hpe mari la na matu, Helbon sabyi ntsin hte Sahara sagu mun ni la sa ma ai. Shanhte gaw gang rawng ai hpri hte manam pyaw ai namji namya ni la sa nna na a gun rai ni hte hpaga ga ma ai.

²⁰Dedan mare masha ni gaw gumra jawn ai ni lang ai nba ni dut nna nang hte hpaga ga ma ai.

²¹Arabi masha ni hte Kedara mung du ni gaw na a gun rai ni lu la na matu, sagu kasha ni, sagu ni hte bainam ni dut nna hpaga ga ma ai.

²²Sheba hte Rama mare na hpaga ni gaw na a gun rai ni hpe lung seng amyu myu, aja hte manam pyaw ai namji namya ni hte hpaga ga ma ai.

²³Haran, Hkane, Eden, Sheba, Asuri, Hkimada mare na hpaga ga ai ni gaw nang hte hpaga ga ma ai.

²⁴Shanhte gaw hpu la ai bu hpun palawng, shaba pu nsam rawng ai sumpan, maka ka ai arung arai, nsam amyu myu hte kabrim ai sagu panep ni, ngang ai rit sumri ni hte hkang ai sumri ni nang hpe dut ya ma ai.

²⁵Na a gun rai gaw kaba la ai gun rai htaw sanghpaw li wunawng hte htaw mat wa ma ai. “Nang gaw li ai gun rai hte hpring nna Panglai hta nga ai sanghpaw li langai zawn rai nga ndai.

²⁶Na a li shap ai ni nang hpe panglai hka de woi sa wa ai shaloi, Tsan la ai hkarang de na bung wa ai sinpraw nbung gaw nang hpe agrawp kau nit dai.

²⁷Na a sanghpaw li agrawp mat ai shaloi, Na a gun rai, rai nga ai sut gan ni yawng, Na a li ma ni hte li hkang ai ni yawng, Li lajang ai lasama ni hte hpaga ga ai ni, Sanghpaw li hta lawm ai hpyenla shagu hte shawa masha ni yawng, Panglai hta e lup bang mat masai.

²⁸Lup mat wa nga ai li hkang masha ni a marawn jahtau ai nsen gaw Panglai hkin-gau de du hkra hpungtang kashaw nga ai.

²⁹“Ya chyawm gaw sanghpaw li shagu hpe shakram kau da nga masai; Li hkang ai ni mung hkin-gau de pru mat wa masai.

³⁰Shanhte yawng gaw na a matu ahkup ahka nga hkra sharung shayawt nga ma ai, Shanhte a baw ni hta nhpu hte bun nna dap ni hta galu nga ma ai.

³¹Shanhte gaw na a matu kara doi kau ai hte, tinang hkum hpe lachyit nba bu hpun da ma ai. Shanhte a myit masin ni gaw shanhte hkrap magang ahkup ahka rai ma ai.

³²Shanhte gaw na a matu sharung shayawt ai mahkawn hkawn ma ai: ‘Ya panglai ka-ang e atsin sha nga mat sai Turu mare hte kadai wa shabung lu nga a ta?

³³Na a gun rai ni hpe sumtsan mung de shapraw dat ai shaloi, Masha amyu baw shagu a ra kadawn ai lam ni hpe nang jahpring ya nit dai. Na a sut gan gun rai ni hte hkawhkam ni hpe lu su shangun nga nit dai.

³⁴Ya chyawm gaw, panglai ka-ang e agrawp daw mat ai nang hkrum nga ndai; Nang gaw nammukdara a sung ai shara de lup mat nit dai. Na a hpaga gun rai ni hte na a matu hpaga amu galaw ya ai ni yawng gaw Nang hte rau panglai ka-ang e htum mat manit dai.’

³⁵Panglai hkin-gau mayan hku shanu nga ai ni mung nang hta hkrum hkra ai lam a majaw, mau kajawng mat ma ai. Shanhte a hkawhkam ni pyi hkrit gari ai hte myi man ni hta nshung si ni hprwi rai ma ai.

³⁶Nang gaw htum mat nga nit dai, htani htana htum mat sai, Mungkan ting hta hpaga ga ai ni gaw hkrit kajawng nga masai, shanhte gaw na a hpang jahtum na maka karan la na matu hkrit ma ai.”