Read Jinghpaw Common Language Bible 2009 EZEKELA 29 Bible Online

EZEKELA 29 - Jinghpaw Common Language Bible 2009 bible

EZEKELA 29

¹Anhte a bawng dung ai shi ning na shata shi a shi lahkawng ya shani e, dai MADU gaw ngai hpe ga shaga wu ai.

²Shi gaw, si chye ai masha wa e, Egutu hkawhkam hpe jahpoi u. Shi hte Egutu mungdan yawng kaning rai ari hkrum sha na lam tsun u.

³Egutu hkawhkam hte seng nna Tsaw Htum ai dai MADU tsun nga ai mungga hpe tsun u: Hka kata e hpum nga ai hkangse numraw nang e, ngai gaw na a hpyen rai nga nngai. Nila hka gaw na a rai nga ai, dai hpe nang hpan da ndai ngu nna nang tsun ndai.

⁴Ngai gaw na a shinggyeng hpe hpri chyinghkyi hte mahkai nna na a hka hta rawng nga ai nga ni hpe nang hta alawan kap shangun na nngai. Dai hpang, ngai gaw nang hte hpawn nang hta kap nga ai nga ni hpe Nila hka kaw nna garawt shapraw kau na we ai.

⁵Ngai gaw nang hte hpawn nga ni mahkra hpe zaibru jang e kabai tawn na nngai. Na a hkum gaw dai hku n lup makoi ai sha ga ntsa e taw nga na ra ai. Ngai gaw ntsa malen u ni hte matse labye dusat ni a shahpa a matu dai hpe jaw na nngai.

⁶Dai hpang, Ngai nan dai MADU rai nga nngai hpe Egutu masha ni yawng chye lu na mara ai,” ngu nna tsun ni ai. Dai MADU gaw, “Israela masha ni shanhte hpe karum la na matu nang Egutu wa hpe shamyet shanat yu masai, rai ti mung, nang gaw kya ai shingna hta pyi grau nna n kaja nga ndai.

⁷Shanhte nang hpe shamyet shanat yang, shanhte a lahpa hpe galun htinggrang ya nna shadaw kau ya ndai; shanhte a shingma ni hpe manai kabun ya nga ndai.

⁸Dai rai nna, ngai gaw nang hpe nhtu hte gasat na masha ni lu nngai hte maren, shanhte gaw na a masha ni hte yam nga ni hpe sat kau na mara ai, ngu nna Tsaw Htum ai MADU ngai nan nang hpe tsun nga nngai.

⁹Egutu gaw akrin akraw hte katsi katsang shara tai mat ai shaloi, ngai nan dai MADU rai nga nngai hpe nang chye lu na rai ndai. “Nila hka gaw na a rai nga ai, dai hpe nang hpan da ndai ngu nna nang tsun nit dai majaw,

¹⁰ngai gaw na a hpyen hte na a Nila hka a hpyen rai nga nngai. Ngai gaw Egutu mung hpe dingdung maga Migdola mare kaw nna dingda maga Aswan mare du hkra hte Ehtiopi lamu ga jarit yawng htum hkra, akrin akraw hte katsi katsang shara shatai kau na nngai.

¹¹Masha mung, yam nga mung dai hku kadai lai lu na n rai, dai mung hta shaning mali shi ning tup kadai mung nga lu na ra ai n rai.

¹²Ngai gaw Egutu mung hpe ndai mungkan hta shingran katsi dik ai shara shatai kau na nngai; Egutu mung na mare ni gaw kaga hten run mat sai mare ni hta shaning mali shi ning tup marawng marang rai hten run taw mat na ra ai. Ngai gaw Egutu masha ni hpe hprawng shingbyi hkrum ai masha ni shatai kau na we ai. Shanhte gaw mungdan shagu de hprawng bra mat wa nna, maigan masha amyu ni a lapran e shanu nga na mara ai.”

¹³Dai Tsaw Htum ai MADU gaw, “Mali shi ning a hpang e, ngai shabra kau dat ai masha amyu baw ni a lata kaw na Egutu masha ni hpe bai woi nhtang wa na nngai,

¹⁴ngai gaw shanhte hpe shanhte a daidaw buga nta nga ai Egutu mung a dingda daw de shanhte hpe nga shangun na nngai. Dai yang e shanhte gaw n-gun kya ai mungdan,

¹⁵yawng hta n-gun kya htum ai mungdan tai na ra ai, shanhte gaw kaga masha amyu baw ni hpe galoi mung bai up lu na mara ai n rai. Shanhte myit ra ai hku kaga amyu ni hpe n dagup lu mu ga, shanhte hpe kachyi mi mung ahkyak n shatai na we ai.

¹⁶Israela gaw shi hpe karum la na matu shanhte hpe galoi mung bai shamyet shanat na mara ai n rai. Egutu hpe kam hpa ai gaw kade sha shut nga sai lam, shanhte hta byin ai maka hpe yu nna Israela hpe myit dum shangun na ra ai. Ngai nan Tsaw Htum ai MADU rai nga ai hpe Israela ni chye lu na mara ai,” ngu nna tsun wu ai.

¹⁷Anhte a bawng dung hkrum ai hkun sanit ning a shawng na shata langai ya shani e, dai MADU gaw ngai hpe ga shaga wu ai.

¹⁸Shi gaw, “Si chye ai masha wa e, Babelon Hkawhkam Nebuhkadneza gaw Turu mare hpe htim gasat nu ai. Shi gaw hpyenla ni hpe li ai lit ni hpai shangun nu ai majaw shanhte a baw ni mahkyit shakrin kau ma ai; shanhte a lahpa ni mung shan katsing hpye mat mu ti mung, hkawhkam wa hte shi a hpyen luksuk ni kadai mung shanhte hkrum sha ai tsin-yam tsindam shabrai a matu hpa mung n lu la ma ai.

¹⁹Dai rai nna, ndai gaw Tsaw Htum ai dai MADU ngai nan tsun nga ai mungga rai nga ai: Ngai gaw Egutu mung hpe Babelon Hkawhkam Nebuhkadneza a lata de ap ya na nngai. Shi gaw lanep hpya la nna, Egutu mung na sut gan yawng la wa na ra ai, dai gaw shi a hpyen luksuk ni a shabrai tai na ra ai.

²⁰Shi a hpyen luksuk ni gaw nye a matu amu galaw ya mi ai hte shi a daw jau ai amu hpe bai htang jaw ai hku ngai shi hpe Egutu mung ap ya nngai. Tsaw Htum ai dai MADU ngai nan tsun ni ai.

²¹“Dai amu byin pru wa ai shaloi, ngai gaw Israela amyu masha ni hpe n-gun shaja shangun nna nang Ezekela hpe mung, masha shagu nang tsun ai ga na lu hkra tsun shapraw shangun na nngai, shaloi shanhte gaw ngai nan dai MADU rai nga nngai hpe chye wa na mara ai.”