Read Jinghpaw Common Language Bible 2009 EZEKELA 3 Bible Online

EZEKELA 3 - Jinghpaw Common Language Bible 2009 bible

EZEKELA 3

¹Karai Kasang gaw, “Si chye ai wa e, ndai laika katsu hpe sha u; dai hpang Israela amyu masha ni hpang de sa tsun su,” ngu nna tsun wu ai.

²Dai rai nna, Ngai gaw nye a n-gup hpe hpaw da nngai, dai laika katsu sha na matu shi ngai hpe jaw wu ai.

³Shi gaw, “Si chye ai masha wa e, ngai nang hpe jaw ai ndai laika katsu hpe sha u; dai hte na a kan jahpring u,” ngu nna tsun ai. Ngai mung dai hpe sha nngai, dai gaw lagat ntsin zawn dwi nga ai.

⁴Dai hpang Karai Kasang gaw, “Si chye ai masha wa e, Israela amyu masha ni hpang de sa nna ngai nang hpe tsun ai ga hpa hpe rai tim, shanhte hpe tsun dan u.

⁵Ngai gaw nang hpe chye na yak ai maigan ga shaga ai masha amyu baw hpang de n rai, Israela masha ni hpang de sha shangun dat nga nngai.

⁶Ngai gaw nang hpe nang n chye na lu ai hte chye na yak ai ga ni hte shaga nna galu kaba ai masha amyu baw ni hpang de shangun dat ai rai yang, shanhte na a ga hpe madat na ma ai.

⁷Rai ti mung, Israela amyu masha ni kadai mung na a ga hpe madat ya na ma ai n rai; shanhte gaw nye a ga hpe pyi madat ma ai n rai. Shanhte yawng gaw adu ja ai hte ninghkap chye nga ma ai.

⁸Ya chyawm gaw, shanhte adu ja nga ma ai zawn ngai nang hpe adu ja shangun na nngai.

⁹Ngai gaw nang hpe ngang ai lunghkrung hte ja ai lung seng zawn shaja ya na nngai; ndai gumlau ai masha ni hpe hkum hkrit et,” nga nna tsun wu ai.

¹⁰Karai Kasang gaw, “Si chye ai masha wa e, ngai nang hpe tsun dan ai lam yawng mayawng hpe myit maju jung ai hte dum nga u.

¹¹Dai hpang, bawng dung hkrum nga ai na a mungdan masha ni hpang de sa nna shanhte myit lawm ti mung, n lawm ti mung, Tsaw Htum ai MADU ngai nan shanhte hpe tsun ai ga shanhte hpe tsun u,” ngu nna matut hkang da wu ai.

¹²Dai hpang, Karai Kasang a wenyi gaw ngai hpe pawn mat wa nna, nye a shingdu e, “Sumsing lamu lahta tang hta dai MADU a hpung shingkang hpe shakawn mu!,” nga nna ja ja wu kade ai hte tsun ai nsen hpe ngai na nngai.

¹³Ngai gaw nbung kata e dusat ni a singkaw ni rau sha kayat ahpat ai nsen hte, leng dingsen ni a ngoi garu ai nsen ni gaw nnang nawn kaba hkrum ai nsen zawn wu kadu nga ai hpe na nngai.

¹⁴Dai MADU a daru magam n-gun gaw nye a ntsa e n-gun kaba hte du yu wa nna, shi a wenyi gaw ngai hpe shapoi mat wa wu ai, shing rai ngai gaw ja ja myit ru ai hte masin kahtet nga nngai.

¹⁵Dai rai nna, ngai gaw Hkebara hka nu makau na bawng dung ai masha ni shanu nga ai Telabiba shara de sa du nhtawm, ngai mu ai hte na sai lam ni hpe mau mat ai majaw, dai shara hta nhtoi sanit ya tup ngai sa nga nga nngai.

¹⁶Nhtoi sanit ya lai mat wa ai hpang, dai MADU gaw ngai hpe mungga tsun ni ai.

¹⁷Shi gaw, “Si chye ai masha wa e, ngai nang hpe Israela amyu masha ni a matu sin langa shatai nngai. Dai re ai majaw, ngai nang hpe tsun dan ai shadum jahprang ga ni hpe shanhte hpang de htawn shalai ya lu na rai ndai.

¹⁸N hkru ai masha gaw si na ra ai ngu nna ngai tsun ndau ti mung, nang gaw shi a lam ni hpe galai shai wa na matu hte shi gaw shi a asak lawt lu nna shim nga lu na matu shi hpe n shadum n jahprang ai rai yang, dai yubak naw kap nga ai wa gaw si na ra ai; rai ti mung, ngai gaw shi a si hkrung si htan a matu nang hta lit nga nga ai.

¹⁹Nang gaw dai n hkru ai masha wa hpe n shadum jahprang ai hte shi gaw yubak lam hpe n kau da ai rai yang, dai yubak naw kap nga ai wa gaw si na ra ai; rai ti mung, na a asak chyawm gaw lawt lu na ra ai.

²⁰“Teng teng mai kaja ai wa gaw n hkru ai amu hpe galaw hpang dat ai rai yang, ngai shi hpe hkrit hpa shoi chyum ai shara hta tawn da na nngai. Nang shi hpe n shadum ai rai yang, shi si na ra ai. Shi galaw shut kau ai yubak mara ni a majaw, shi si na ra ai. Shi galaw sai mai kaja ai amu ni hpe mung, ngai dum ya na nngai n rai; nang gaw shi a si hkrung si htan a matu lit nga nga na ra ai.

²¹Nang gaw mai kaja ai wa hpe yubak n galaw hkrup na matu shadum jahprang nna, shi gaw na a ga madat let yubak n galaw ai rai yang, shi asak hkrung nga na ra ai, na a asak mung lawt lu na ra ai,” ngu nna tsun wu ai.

²²Ngai gaw dai MADU a daru magam hte hpring ai hpung shingkang hpe mu mada hkam sha ai hte ngai hpe, “Rawt u, kadit hkam wam de pru sa wa su. Ngai gaw dai yang e nang hpe ga tsun na nngai,” ngu nna tsun ai ga hpe na ni ai.

²³Dai rai nna, ngai gaw kadit hkam wam de pru sa wa nhtawm dai yang e Hkebara hka kau kaw ngai mu yu sai dai MADU a hpung shingkang dan hkung nga ai hpe ngai mu nngai. Ngai gaw ga de myi man gum dagup da nngai.

²⁴Rai ti mung, Karai Kasang a wenyi gaw ngai hta shang nna ngai hpe tsap shangun nga ai. Dai MADU gaw ngai hpe, “Nta de wa nna kata e rawng nga u.

²⁵Si chye ai masha wa e, nang gaw sumri ni hte gyit hkang da hkrum na rai ndai, shawa hpawng de nang pru sa lu na ra ai n rai.

²⁶Ngai gaw na a shinglet hpe gumra hta kap mat shangun na nngai, shaloi nang gaw dai gumlau ai amyu masha ni hpe shadum jahprang lu na ra ai n rai.

²⁷Dai hpang, ngai nang hpe ga tsun ai hte shaga lu na n-gun atsam bai jaw ai shaloi, Tsaw Htum ai MADU ngai hpa tsun nga ai lam, nang shanhte hpe tsun dan na rai ndai. Shanhte hta na nkau mi gaw madat ti mung nkau mi gaw hpa zawn n nawn ya na mara ai, hpa majaw nga yang, shanhte gaw gumlau ai amyu masha ni rai nga ma ai,” ngu nna tsun ni ai.