Read Jinghpaw Common Language Bible 2009 EZEKELA 30 Bible Online

EZEKELA 30 - Jinghpaw Common Language Bible 2009 bible

EZEKELA 30

¹Dai MADU gaw ngai hpe bai ga shaga wu ai.

²Shi gaw, “Si chye ai masha wa e, Tsaw Htum ai dai MADU ngai tsun nga ai mungga hpe myihtoi htoi nna tsun dan u. Nang gaw ndai mungga ni hpe jahtau tsun na rai ndai: Hkrit hpa nhtoi gaw du wa ra ai!

³Dai shani gaw ni wa nga ai. Dai MADU amu galaw na ra ai shani ni wa ra ai. Dai shani gaw sumwi htat ai hte masha amyu baw ni a matu ru yak tsin-yam hkrum ai shani gaw ni nga sai.

⁴Egutu mung hta e hpyen majan byin wa na ra ai, Ehtiopi mung hta myit ru lam kaba pru na ra ai. Egutu mung hta law law wa sat kau ai hkrum na mara ai; Mungdan gaw hpya kau hkrum ai hte Hten run taw nga na ra ai.

⁵“Dai majan gaw Ehtiopi, Libya, Luda, Arabi hte Hkuba mung kaw nna saw shaga da ai hpyenla ni hpe mung, nye a amyu masha ni hpe mung sat kau na ra ai.”

⁶Dai MADU gaw, “Dingdung maga Migdola mare kaw nna dingda maga Aswan mare du hkra dai Egutu mung hpe shadaw ai ni yawng majan hta sat kau hkrum na mara ai. Egutu mung a gumrawng shara hpyen luksuk mung jahten shaza kau hkrum na ra ai. Tsaw Htum ai dai MADU ngai nan tsun ni ai.

⁷Dai mungdan gaw mungkan hta katsi katsang htum ai mung tai mat nna de a mare ni mung atsai awai hten run mat na ra ai.

⁸Egutu mung hta ngai wan shachyi dat ai shaloi, dai mung hpe makawp maga ai ni yawng sat kau hkrum na mara ai, dai hpang shanhte gaw ngai nan dai MADU rai nga nngai hpe chye wa na mara ai.

⁹Dai nhtoi du ai shaloi, Egutu gaw jahten shaza kau hkrum nga sai, ngai gaw hpa n nawn ai Ehtiopi masha ni hpe myit shalau ya na matu kasa ni hpe sanghpaw li ni hte shangun dat na nngai. Shanhte gaw hkrit gari na mara ai. Dai nhtoi gaw du wa ra ai!”

¹⁰Tsaw Htum ai dai MADU gaw, “Babelon Hkawhkam Nebuhkadneza hpe ngai lang nna Egutu mung a sut gan hpe jahtum kau na nngai.

¹¹Shi hte shi a gumshem ai luksuk ni gaw dai mung hpe agrawp jahten kau na matu du sa na mara ai. Shanhte gaw Egutu mung hpe nhtu ni hte gasat nna dai mung gaw si mang ni hte hpring nga na ra ai.

¹²Ngai gaw Nila hka hpe jahkyet kau nna Egutu mung hpe n hkru ai masha ni a lata de ap kau na nngai. Maigan masha ni gaw mungdan ting hpe agrawp jahten kau na mara ai. Dai MADU ngai nan tsun ni ai,” ngu nna tsun wu ai.

¹³Tsaw Htum ai dai MADU gaw, “Memhpi mare na hpara sumla ni hte n teng n man ai karai ni hpe jahten kau na nngai. Kadai mung Egutu mung hpe up hkang lu na n rai, ngai gaw mungdan masha yawng hpe jahkrit shama na nngai.

¹⁴Ngai gaw Egutu mung a dingda daw ni hpe katsi katsang shara shatai kau nna, dingdung maga de nga ai Zoan mare hpe mung wan nat kau na nngai. Mungdan a mare daju rai nga ai Thebe mare hpe mung ari jaw na nngai.

¹⁵Ngai gaw nye a sindawng kahtet ai hpe Pelusim mare hta nga ai Egutu mung na kaba htum ai hpyen dap hpe hkam sha shangun na nngai. Ngai gaw Thebe mare a sut gan hpe jahten kau na we ai.

¹⁶Ngai gaw Egutu mung hpe wan nat dat na nngai, Pelusim gaw tsin-yam tsindam hkrum na ra ai. Thebe mare bunghku ni agrawp daw kau hkrum ai hte mare gaw hka mawru e kaput, kau hkrum na ra ai.

¹⁷Heliopoli hte Bubasti mare na shabrang ni gaw majan hta si mat na mara ai, kaga masha ni gaw bawng woi la hkrum na mara ai.

¹⁸Ngai gaw Egutu mung a daru magam n-gun hpe shadaw kau nna shanhte grai gumrawng gumtawng ai n-gun atsam hpe jahtum kau ya ai shaloi, Tahpan mare a ntsa e, nsin sin wa na ra ai. Sumwi gaw Egutu mung hpe ka-up kau na ra ai; shi a mare masha ni yawng mung bawng woi la hkrum na mara ai.

¹⁹Ngai gaw ndai hku nna Egutu hpe ari jaw ai shaloi, shanhte gaw ngai nan dai MADU rai nga nngai hpe chye wa na mara ai.

²⁰Anhte bawng dung hkrum mat wa ai shi langai ning a shawng shata a sanit ya shani e, dai MADU gaw ngai hpe ga shaga wu ai.

²¹Shi gaw, “Si chye ai masha wa e, ngai gaw Egutu hkawhkam wa a lahpum hpe daw kau ya ni ai. Kadai mung shi a nma hpe kayawp kau ya nga ai n rai, nhtu bai lang lu na matu n-gun rawng wa hkra ahkyen ya nga ai n rai.

²²Yu u, ndai gaw Tsaw Htum ai dai MADU ngai nan tsun ai mungga rai nga ai: Ngai gaw Egutu hkawhkam a hpyen rai nga nngai. Ngai gaw shi a lahpum ngu ai kaja ai lahpum hte daw mat sai lahpum lahkawng yan hpe agrawp kau na nngai, shaloi shi a lata na nhtu mung hkrat mat na ra ai.

²³Ngai gaw Egutu masha ni hpe mungkan ting de shabra kau dat na nngai.

²⁴Dai hpang, ngai gaw Babelon hkawhkam wa a lahpum hpe n-gun shaja ya nna nye a nhtu hpe mung shi a lata hta ap ya na nngai. Rai ti mung Egutu hkawhkam a lahpum hpe chyawm gaw agrawp kau ya na nngai; shi gaw shi a gumlau hpyen ni a man e madai ai hte si mat na ra ai.

²⁵Rai sa, ngai gaw shi hpe n-gun shakya kau ya nna Babelon hkawhkam hpe n-gun shaja ya na nngai. Babelon hkawhkam wa hpe nye a nhtu ap ya ai shaloi, shi gaw dai hpe Egutu mung de ladawn dat yang, ngai nan dai MADU rai nga nngai hpe kadai mung chye lu na mara ai.

²⁶Ngai gaw Egutu masha ni hpe mungkan ting de shabra kau na nngai. Dai shaloi, ngai nan dai MADU rai nga nngai hpe shanhte chye lu na mara ai,” ngu nna tsun wu ai.