Read Jinghpaw Common Language Bible 2009 EZEKELA 31 Bible Online

EZEKELA 31 - Jinghpaw Common Language Bible 2009 bible

EZEKELA 31

¹Anhte bawng dung hkrum ai shi langai ning a shata masum a langai ya shani e, dai MADU ngai hpe ga shaga nga ai.

²Shi gaw, “Si chye ai masha wa e, Egutu hkawhkam hte shi a masha ni yawng hpe ning ngu tsun u: Nang gaw daru magam n-gun kade wa rawng nga n hka! Nang hpe ngai kadai hte shabung lu na rai ta?

³Nang gaw Lebanon e tu ai arit hpun hte bung nga ndai, Dai hpun gaw tsawm nna shingnip tai ya ai lakung lakying ni hte rai nga ai; hpun gaw grai tsaw nga ai hte de a ndung gaw sumwi ni hpe dep nga ai.

⁴Dai hpun tu kaba wa shangun na hka nga nga ai, Dai hpe lusha tam jaw na ga npu na hka nu ni nga nga ai Shanhte gaw dai hpun tu nga ai shara hta hka jaw ma ai. Nam maling na hpun ni yawng hpang de hka shi ni lwi shangun da nga ai.

⁵Dai hpun gaw hka kaja lu lu ai majaw, Dai hpun gaw kaga hpun ni hta grau tsaw nga ai. De a lakung lakying ni gaw kaba ai hte galu nga ai.

⁶De a lakung lakying ni hta ntsa malen u hkum sumhpa atsip tsip ma ai; Matse labye dusat ni shanhte a hkalung ni hpe woi nna dai hpun a shingwung hta nga nga ma ai; Mungkan ga na masha amyu baw ni de a shingnip hta hkring sa la ma ai.

⁷Dai hpun gaw kade sha tsawm htap nga a hka! Dai hpun gaw galu ai lakung lakying ni hte grai galu nga ai. De a hpun ru ni gaw sung ai shara e lwi ai hka shi ni de du hkra jung nga ai.

⁸Karai Kasang a sun hta tu ai arit hpun gaw dai hte shabung lu nga ai n rai. Marau hpun hta dai zawn re ai lakung lakying ni galoi n nga nga ai, Pri tsawm ai hpun gaw shi a daw chyen daram pyi n rai nga ai. Karai Kasang a sun hta tu ai hpun pyi dai zawn grai tsawm htap lu ai n rai.

⁹Ngai gaw dai hpe kung dam ai lakung lakying ni hte shatsawm da ni ai. Dai gaw Karai Kasang a sun ngu ai Eden hta tu ai hpun shagu dai hpe manawn nga ai.

¹⁰“Dai rai nna, Tsaw Htum ai dai MADU ngai nan sumwi dep hkra tu kaba wa sai hpun hta hpa byin wa na lam, nang hpe tsun dan na we ai. Dai hpun grau tsaw lung wa magang gumrawng gumtawng ai mung grau jat wa rai nga ai;

¹¹dai majaw ngai gaw dai hpe ningdang kau ni ai, maigan up hkang du wa e dai hpe ka-up la nu ga. Dai wa gaw de a n hkru n shawp ai a matu lu la ging ai hte maren, dai hpun hpe jaw na ra ai.

¹²Gumshem ai maigan masha ni mung dai hpe kran kadawng kau nna tawn da na mara ai. De a lakung lakying ni hte daw agrawp mat sai hpun daw hpun shan ni gaw bum shagu a ntsa e mung, mungdan na kadit shagu hta mung hkrat taw nga na ra ai. De a hpun shingnip hta nga lai wa yu sai masha amyu baw ni yawng mung pru mat wa na mara ai.

¹³Ntsa malen u ni pyen sa wa nna dai kran daw da ai hpun ntsa e pyen gum jup na mara ai; matse labye dusat ni mung de a lakung lakying ntsa hku lai hkawm na mara ai.

¹⁴Dai rai nna, hka hkru hkru lu lu ai hpa hpun mung, tsaw ai shara na sumwi ni hpe dep lu hkra tu kaba shangun ai hpun ndung hpe mung, ya kaw nna bai tu kaba tsaw kung dam shangun sana n rai. Dai ni yawng gaw si chye ai masha ni zawn si mat nna, Katsan ga de yu wa ai ni hte mazum na matu dingnye hkrum nga masai.”

¹⁵Ndai gaw Tsaw Htum ai dai MADU tsun ai mungga rai nga ai: “Dai hpun gaw katsan ga de yu wa ai shani e, sharung shayawt ai kumla hku nna mungkan kata tsang na hka ni hte dai hpun hpe kaput kau shangun na nngai. Ngai gaw hka nu ni hpe dim da nna hka shi law law hpe mung n lwi shangun na nngai. Dai hpun si mat sai majaw, ngai gaw Lebanon Bum ni a ntsa e nsin sin shangun nna maling htinggram na hpun ni yawng hpe mung nyui kau shangun na nngai.

¹⁶Ngai gaw dai hpe Katsan ga de shayu kau dat ai shaloi, de a sum kadawng mat ai a wu kadu ai nsen gaw amyu masha ni yawng hpe gari ashun shangun na ra ai. Eden sun e tu ai hpun ni yawng hte mungkan ga a lawu tsang de yu mat wa sai dai hka hkru hkra lu lu ai Lebanon a hpun ni mung dai hkrat sum ai amu hta awng sharawng nga na mara ai.

¹⁷Shanhte gaw si mat nna Katsan ga de yu wa sai ni hpang de shi hte rau yu wa na mara ai. Shi a shingnip npu hta shanu nga ai ni yawng gaw amyu baw ni a lapran e, shabra kau hkrum na mara ai.

¹⁸“Dai hpun gaw Egutu hkawhkam hte shi a amyu masha ni yawng rai ma ai. Eden sun hta tu ai hpun ni hta pyi grau tsaw ai hte kung dam nga nit dai. Rai ti mung, ya chyawm gaw, Eden sun hta tu ai hpun ni zawn nang gaw Katsan ga de yu mat wa nna n kam n sham ai ni hte majan hta sat kau hkrum sai ni hte rau kanawn mazum nga lu na rin dai. Tsaw Htum ai dai MADU ngai nan tsun ni ai.”