Read Jinghpaw Common Language Bible 2009 EZEKELA 32 Bible Online

EZEKELA 32 - Jinghpaw Common Language Bible 2009 bible

EZEKELA 32

¹Anhte bawng dung hkrum ai shi lahkawng ning a shata shi lahkawng a langai ya shani e, dai MADU ngai hpe ga shaga wu ai.

²Shi gaw, “Si chye ai masha wa e, Egutu hkawhkam hpe dagam ai shadum jahprang ga hte htawn tsun u. Ngai kaw na lu la ai ndai mungga hpe mung tsun u: Nang gaw masha amyu baw ni a lapran e, hkanghkyi zawn galaw dan nga ndai; rai ti mung hka yan hku kapruk hkawm ai hkangse hte grau nna bung nga ndai. Nang gaw na a lagaw ni hte hka kata na hkumpup ni mahkyit sharawt la nna, hka nu ni hpe hkanu kau nga ndai.

³Masha amyu baw law law ni zup hpawng nga ma yang, nye a sumgawn hte nang hpe ka-up la nna shanhte gaw dai hpe hkin-gau de karawt shapraw da mu ga.

⁴Ngai nang hpe hkarang ntsa de kabai shapraw tawn nna mungkan ting na ntsa malen u ni hte dusat ni yawng nang hpe amya sha na matu jahpawng da na nngai.

⁵Ngai gaw bum ni hte kadit ni hta yat nga ai na a moi mang hte ka-up da na nngai.

⁶Na a asai hpe bum ga de du hkra ru jaw nna hka shi ni hta mung na a asai hte jahpring da na nngai.

⁷Ngai nang hpe jahten shaza kau ai shaloi, sumsing lamu hpe ngai magap kau nna, shagan ni hpe mung la kau na nngai. Ajan gaw sumwi a shingdu e makoi nga nna shata mung nhtoi n jaw lu na ra ai.

⁸Sumsing lamu na htoi tu ala nga ai nhtoi hkum ni yawng hpe ngai jasin kau nna na a mungkan hpe nsin hte ka-up kau na nngai. Tsaw Htum ai dai MADU ngai nan tsun ni ai.

⁹“Nang galoi mung garai n na yu ai na a hten byak shiga hpe mungdan amyu ni hpang de ngai shana shabra dat ai shaloi, masha amyu baw law law ni ru yak tsin-yam tsindam hkrum hkra na mara ai.

¹⁰Ngai nang hpe galaw ai amu a jaw e, masha amyu baw law law ni mau kajawng mat na mara ai. Ngai gaw nye a nhtu hpe ningwat dat ai shaloi, hkawhkam ni hkrit gari mat na mara ai. Nang kadawng taw ai shani e, shanhte yawng gaw tinang a asak a matu mara, hkrit gari nga na mara ai.”

¹¹Tsaw Htum ai dai MADU gaw Egutu hkawhkam wa hpe, “Nang gaw Babelon hkawhkam a nhtu hte hkrum kadup na ndai.

¹²Gumshem ai masha amyu baw ni kaw na hpyenla ni shanhte a nhtu ni shaw nna na a masha yawng hpe sat kau shangun na nngai. Na a masha ni yawng hte nang gumrawng ai arung arai mahkra gaw hten mat na mara ai.

¹³Ngai gaw hka la-ing shagu hta nga ai yam nga ni hpe jahten kau na nngai. Masha mung, yam nga mung dai shara na hka la-ing ni hpe galoi mung hka nu lu na mara ai n rai.

¹⁴Ngai gaw de a hka hpe asim sha nga shangun ai hte jasan nna hka nu ni hpe asim sha lwi shangun na nngai. Tsaw Htum ai dai MADU ngai nan tsun ni ai.

¹⁵Ngai gaw Egutu mung hpe katsi katsang shara hte akrin akraw shara shatai kau let, dai mung hta shanu nga ai ni yawng hpe jahten shaza kau ai shaloi, ngai nan dai MADU rai nga nngai hpe shanhte chye lu na mara ai.

¹⁶Ndai dagam let shadum jahprang ai ga gaw sharung shayawt ai mahkawn tai na ra ai. Masha amyu baw ni a shayi sha ni mung Egutu mung hte de a mung masha ni a matu sharung shayawt ai mahkawn hkawn na mara ai. Tsaw Htum ai dai MADU ngai nan tsun ni ai.”

¹⁷Anhte bawng dung ai shi lahkawng ning a shawng na shata a shi manga ya shani e, dai MADU gaw ngai hpe ga shaga wu ai.

¹⁸Shi gaw, “Si chye ai masha wa e, Egutu mung masha yawng a matu sharung shayawt nga u. Shanhte hpe kaga daru magam n-gun rawng ai masha amyu baw ni hte hpawn katsan ga de shayu kau dat u.

¹⁹Shanhte hpe ning ngu tsun u: “Nang gaw kaga wa hta grau nna tsawm nga ai ngu, myit nawn da wu ni? Nang gaw katsan ga de yu wa na rai nna, dai shara na n kam n sham ai ni a lapran e kaleng taw nga u.

²⁰“Egutu masha ni gaw majan hta sat kau hkrum ai ni hte rau kadawng taw na mara ai. Shanhte yawng hpe nhtu hte sat kau na matu jin jin rai nga sai.

²¹N-gun ja htum ai share ninghkrin ni hte Egutu masha ni maga de majan gasat lawm nga ai ni gaw katsan ga de yu wa na matu Egutu masha ni hpe hkalum la nga ma ai. Shanhte gaw, ‘Majan hta sat kau hkrum sai dai n kam n sham ai ni gaw ndai shara de du nga sai hte kaleng taw nga ma hka!,’ ngu nna jahtau tsun ma ai.

²²“Asuri mung gaw dai yang e, grup grup shi a hpyenla ni a lup sung hku ni hte nga nga ai. Shanhte yawng gaw majan hta sat kau hkrum nga ma ai,

²³shanhte a lup sung hku ni gaw katsan ga a sung htum ai shara hta nga nga ma ai. Shi a hpyenla ni yawng gaw majan hta hkrat sum mat ai hkrai rai nna shanhte a lup sung hku ni gaw shi a lup wa grup yin e dingren nga ma ai. Shanhte gaw lang mi na aten hta asak hkrung ai dinghta ga hpe jahkrit shama yu manu ai.

²⁴Elam mung gaw dai yang e, shi a grup grup hta shi a hpyenla ni a lup sung hku ni hte nga nga ai. Shanhte yawng gaw majan hta sat kau hkrum nga ma ai; shanhte gaw matu gadoi n hkam la ai sha katsan ga de yu mat wa masai. Shanhte gaw asak naw hkrung nga yang, hkrit hpa lam shapraw ma ti mung, ya chyawm gaw shanhte si taw ai hte myi man sum nga masai.

²⁵Elam gaw majan hta sat kau hkrum sai ni a lapran e kaleng taw nga ai, shi a hpyenla ni a lup sung hku ni mung shi a grup yin e nga nga ma ai. Shanhte yawng gaw matu gadoi n hkam ma ai, yawng hte mung majan hta sat kau hkrum nga masai. Shanhte gaw asak naw hkrung nga yang, hkrit hpa lam hpe shapraw ti mung, ya chyawm gaw majan hta sat kau hkrum sai ni a gam maka hpe karan ya ai lam rai nga ai.

²⁶“Meshek yan Tubala hte shan a grup yin e, shan a hpyenla ni a lup sung hku ni mung nga nga ma ai. Shanhte yawng gaw matu gadoi n hkam ai ni rai nna majan hta sat kau hkrum ai ni hkrai rai ma ai. Shanhte gaw asak hkrung ai dinghta ga hpe lang mi jahkrit shama yu masai.

²⁷Shanhte gaw katsan ga de hpyen laknak hkum dingnum hte yu hkrat wa nna, shanhte a nhtu ni hpe bunghkum hkum da let shanhte a moi mang ntsa ni hta ninggang ni hte magap da nga ai moi shawng de na share ninghkrin ni zawn shagrau hkam nna lup makoi da hkrum nga ma ai n rai. Ndai share ninghkrin ni gaw asak hkrung nga ai dinghta ga hpe jahkrit shama na matu lang mi daru magam n-gun hpring hkra rawng yu masai.

²⁸“Ndai gaw Egutu masha ni mung matu gadoi n hkam ai hte majan e sat kau hkrum ai ni a lapran e kaning rai agrawp taw mat na lam rai nga ai.

²⁹“Edom gaw shi a hkawhkam ni hte mung du ni hte rau rai nga ai. Shanhte gaw daru magam n-gun hte hpring ai hpyenla ni rai nga ma ai, rai ti mung, ya chyawm gaw matu gadoi n hkam ai hte majan hta sat kau hkrum sai ni hte rau katsan ga e shanhte kaleng taw nga ma ai.

³⁰“Dingdung maga de na hkawhkam kasha ni ngu ai Sidon masha ni yawng mung dai shara hta nga nga ma ai. Shanhte a n-gun atsam hpe lang mi na aten hta hkrit hpa hku shapraw dan lai wa masai; rai ti mung ya chyawm gaw, matu gadoi n hkam ai sha si kaleng taw nga ai ni hte majan hta sat kau hkrum sai ni hte rau nsung hku de yu wa ai hte kaya kahpa sum hkrum nga ma ai. Shanhte gaw katsan ga de yu wa ai ni hte rau kaya kahpa hkrum nga ma ai.

³¹“Ndai zawn majan hta sat kau hkrum sai ni yawng a lam hpe mu mada ai a jaw e, Egutu hkawhkam hte shi a luksuk ni myit shalan ai lu la na mara ai,” nga nna Tsaw Htum ai dai MADU tsun ai.

³²“Ngai gaw asak hkrung ai ni hpe jahkrit shama na matu Egutu hkawhkam hpe shabyin dat ni ai; rai ti mung shi hte shi a hpyen luksuk ni yawng sat kau hkrum nna, matu gadoi n hkam ai hte majan hta si taw nga ai ni hte rau kaleng taw nga na mara ai.” Tsaw Htum ai dai MADU tsun nu ai.