Read Jinghpaw Common Language Bible 2009 EZEKELA 33 Bible Online

EZEKELA 33 - Jinghpaw Common Language Bible 2009 bible

EZEKELA 33

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, ngai gaw mungdan langai mi de majan byin shangun dat ai shaloi, hpa byin wa na lam, na a amyu masha ni hpe htawn tsun u. Dai mungdan na amyu masha ni gaw shanhte kaw na marai langai mi hpe sin langa tai shangun na matu lata nga ma ai.

³Shi gaw gumlau hpyen wa shani sa wa ai hpe mu ai shaloi, masha shagu hpe tau shadum na matu hpyen kajawng nsen shangoi dat wu ai.

⁴Marai langai ngai dai nsen hpe na ti mung, hpa n nawn ya nga ai majaw, gumlau hpyen wa sa wa nna shi hpe sat kau nga ai; shaloi shi gaw shi a si lam a matu, mara shagun hkrum nga wu ai.

⁵Shi a si lam gaw shi galaw shut ai mara a majaw rai nga ai, hpa majaw nga yang, shi gaw shadum ai nsen hpe na ninglen hpa n nawn ya nga ai. Shi lama marawn jahtau ai nsen hpe madat ai rai yang, shi lawt lu na wu ai.

⁶Shing n rai, sin langa wa gaw gumlau hpyen sa wa ai hpe mu nna shadum ai nsen n shapraw ai rai yang chyawm gaw gumlau hpyen wa sa wa nna mara kap ai ni hpe sat kau na ra ai; rai ti mung ngai gaw shanhte a si hkrung si htan a matu lit nga ai dai sin langa wa hpe bunglat hka hpyi na nngai.

⁷“Ya chyawm gaw, si chye ai masha wa e, Israela amyu baw a matu ngai nang hpe sin langa san da na nngai. Ngai nang hpe tsun dan ai shadum jahprang ga ni hpe shanhte hpang de du hkra len shalai ya ra nga ndai.

⁸Ngai gaw n hkru ai wa hpe nang teng teng si lu na ndai, ngu nna tsun ti mung, shi gaw shi a asak hkye la lu u ga, shi a lam ni galai shai mat wa hkra nang n shadum jahprang ai rai yang chyawm gaw yubak mara naw kap nga ai wa zawn shi si wa na ra ai. Ngai gaw shi a si hkrung si htan a matu lit nga ai nang hpe bunglat hka hpyi na nngai.

⁹Nang gaw n hkru ai wa hpe shadum jahprang ai lam galaw ti mung, yubak galaw ai lam hpe shi n jahkring ai rai yang, yubak kap ai wa naw rai nga ai majaw, shi si na rai wu ai, rai ti mung na a asak gaw lawt lu na ra ai.”

¹⁰Dai MADU gaw ngai hpe ga shaga wu ai. Shi gaw, “Si chye ai masha wa e, Israela ni kaning nga tsun nga ai ga shanhte hpe kahtap tsun dan u: ‘Anhte gaw anhte a yubak ni hte shut kau sai mara ni hte lit li nga ga ai. Anhte gaw n-gun lagaw mung htum mat saga ai. Anhte kaning rai hkrung lu na ga ta?’

¹¹Tsaw Htum ai dai MADU ngai gaw ahkrung nga ai Karai Kasang rai nga nngai, dai majaw yubak kap ai wa si mat wa na hpe yu kabu nga nngai n rai. Yubak galaw ai hpe kau da nna hkrung nga na hpe ngai yu sharawng nga nngai ngu shanhte hpe htawn tsun u. Israela e, nang galaw nga ai dai n hkru n shawp ai amu hpe kau da u. Nang hpa majaw si mayu nga n ta?

¹²“Ya chyawm gaw, si chye ai wa e, mai kaja ai wa yubak galaw shut ai shaloi, shi galaw sai dai mai kaja ai amu gaw shi hpe hkye hkrang la lu nga ai n rai. N hkru n shawp ai wa gaw shi galaw nga ai n hkru ai amu hpe rap di kau ai rai yang, ari ahpri hkrum na n rai; mai kaja ai wa yubak galaw hkrup ai rai yang, shi asak hkrung nga lu na ra ai n rai, ngu ai ga Israela masha ni hpe tsun u.

¹³Mai kaja ai wa asak hkrung nga na ra ai ngu nna ngai ga sadi jaw lu ti mung, lai sai aten na shi a mai kaja ai lam hta myit dik dum nna yubak galaw ai rai yang, shi galaw sai mai kaja ai amu hpa hpe mung ngai dum ya na nngai n rai. Shi galaw sai yubak mara a majaw shi si na ra ai.

¹⁴Ngai gaw n hkru n shawp ai wa hpe shi si na ra ai ngu nna ngai ga sadi mai jaw nga ti mung, dai wa gaw yubak galaw nga ai amu hpe rap di kau tawn da nna, jaw hkrak ai hte mai kaja ai amu galaw nhtawm,

¹⁵ga shadawn, gumhpraw hkoi ya na matu pahkam hkam ai arung arai hpe nhtang ya, shi lagu la sai arung arai ni hpe bai nhtang jaw ya ai hte yubak lam de n shanang ai sha, hkrung ai asak jaw ya nga ai tara ni hpe hkan yang, shi si na ra ai n rai, ahkrung nga na ra ai.

¹⁶Shi shut hpyit kau sai yubak mara ni hpe ngai raw dat ya na nngai, shi gaw jaw hkrak ai hte mai kaja ai amu hpe galaw nu ai majaw teng teng hkrung nga lu na ra ai.

¹⁷“Ngai galaw ai amu gaw teng man nga ai n rai, nga nna na a amyu masha ni tsun nga ma ai! N rai law, Shanhte a lam ni mahtang n ding nga ai.

¹⁸Ding hpring ai wa gaw mai kaja ai amu galaw nga ai hpe kau da nna n hkru n shawp ai amu hpe galaw hpang ai rai yang, dai amu a majaw shi si na ra ai.

¹⁹N hkru n shawp ai wa gaw yubak galaw ai amu hpe kau da nna teng man ai hte mai kaja ai amu hpe galaw ai rai yang, shi a asak hkye la lu nga nu ai.

²⁰Rai ti mung, Israela e, nang gaw ngai galaw ai amu teng man nga ai n rai, nga nna tsun myit dai. Dai re ai majaw, nang galaw ai amu hte maren, ngai nang hpe jeyang na nngai.”

²¹Anhte bawng dung hkrum ai shi lahkawng ning a shata shi a manga ya shani e, Yerusalem kaw na hprawng lawt wa ai langai mi, ngai kaw du nna, Yerusalem hkrat mat sai lam ngai hpe tsun dan wu ai.

²²Shi garai n du shang ai shawng shana de kaw nna daru magam n-gun rawng ai dai MADU a hpung shingkang hpe ngai hkrum hkra ni ai. Dai wa du wa ai hpang jahpawt hta, dai MADU gaw ngai hpe tsun shaga na n-gun atsam bai jaw ya nga sai.

²³Dai MADU gaw ngai hpe ga shaga wu ai.

²⁴Shi gaw ngai hpe, “Si chye ai masha wa e, Israela mung na hten run mat sai mare ni hta shanu nga ai amyu masha ni gaw, ‘Abraham shi hkrai sha nga ti mung, mungdan ting ap ya hkrum nga ai, ya dai mung hta e, anhte law law wa rai nga ga ai, dai rai nna dai mungdan gaw anhte a mungdan rai nga sai,’ ngu nna tsun nga ma ai.

²⁵Tsaw Htum ai dai MADU ngai tsun nga ai ga shanhte hpe ning ngu htawn tsun u: Nanhte gaw sai hte hpawn ashan sha nga myit dai. Nanhte gaw hpara sumla ni hpe nawku nga myit dai. Nanhte gaw masha sat ai amu hpe mung shut hpyit nga myit dai. Nanhte gaw ndai mungdan hpe madu lu na re ngu myit nawn nga myit ni?

²⁶Nanhte gaw nhtu kam nga myit dai. Nanhte galaw ai amu ni mung matsat shabat rai nga myit dai. Masha hkum shagu mung numshaw lashaw amu shut hpyit nga ma ai. Hpa lam a majaw ndai mungdan hpe madu lu na re ngu myit nawn nga myit ni?

²⁷“Ngai gaw teng teng ahkrung nga ai Karai Kasang rai nga nngai, dai majaw dai hten run mat sai mare ni hta shanu nga ai amyu masha ni sat kau hkrum na mara ai hpe Tsaw Htum ai dai MADU ngai nan shadum ai ga, shanhte hpe htawn tsun u. Dai mungdan hta shanu nga ai ni mung nam na matse labye ni e sha kau hkrum na mara ai. Bum na makoi shara ni hte ginlawng hku ni hta rawng nga ai ni mung ana zinli ni hte si mat na mara ai.

²⁸Ngai gaw dai mungdan hpe katsi katsang shara shatai kau nna shanhte a gumrawng ai daru magam n-gun hpe jahtum kau ya na nngai. Israela a bum ni gaw grai htat ai mali tai mat nna kadai mung dai lam hku n lai lu na mara ai.

²⁹Amyu masha ni shut ai yubak a majaw, ngai shanhte hpe ari jaw ai hte mungdan hpe katsi katsang di kau ai shaloi, ngai nan dai MADU rai nga ai hpe shanhte chye lu na mara ai.”

³⁰Dai MADU gaw, “Si chye ai masha wa e, na a amyu masha ni gaw mare bunghku makau hkan mung, nta chyinghka lam hkan e mung hkrum zup ma ai shaloi, na a lam tsun hkat shajang nga ma ai. Shanhte gaw, ‘Ya jang, dai MADU kaw na pru ai mungga hpe anhte sa madat la saga,’ nga nna shada da tsun shajang nga ma ai.

³¹Dai rai nna, nye a amyu masha ni gaw nang tsun na lam hpe madat la na matu sa hpawng nga ma ti mung, nang tsun ai ga hte maren shanhte n hkan galaw nga ma ai. Shanhte nten ni hta ga ngwi ga pyaw ni hte hpring nga ti mung, lawhpa myit marin ai lam ni hta hkan dingyang rai ma ai.

³²Nang gaw mahkawn shangwi shapyaw nna madum sumpyi hte shapyaw chye ai hta jan nna shanhte a matu hpa mung akyu n rawng nga ndai. Shanhte gaw na a ga mahkra madat nga ma ti mung, dai ga ni hta na langai mi hpe pyi hkan galaw nga ma ai n rai.

³³Rai ti mung, nang tsun ai ga ni yawng teng tup wa ai shaloi, dai ni yawng teng teng byin wa na ra ai. Dai shaloi, myihtoi wa gaw shanhte hta e nga nga ai hpe shanhte chye lu na mara ai,” ngu nna tsun wu ai.