Read Jinghpaw Common Language Bible 2009 EZEKELA 35 Bible Online

EZEKELA 35 - Jinghpaw Common Language Bible 2009 bible

EZEKELA 35

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, Edom mung jahpoi u.

³Dai masha ni hpe Tsaw Htum ai dai MADU ngai hpa tsun nga nngai lam hpe tsun dan u: “Edom a bum ni e, ngai gaw na a hpyen rai nga nngai! Ngai gaw nang hpe katsi katsang shara shatai kau na we ai.

⁴Ngai gaw na a mare ni hpe jahten sharun kau na nngai, Na a mungdan gaw katsi katsang shara tai mat na ra ai; Dai hpang nang gaw ngai nan dai MADU rai nga nngai hpe chye wa na rai ndai.

⁵“Nang gaw Israela hte galoi mung hpyen ai gumlau hpyen rai nga ndai; shanhte tsin-yam tsindam hkrum ai aten hte shanhte galaw ai yubak ni a majaw jahtum ari jaw ai aten hta, shanhte a amyu masha ni hpe sat kau nga ndai.

⁶Dai re ai majaw, Tsaw Htum ai dai MADU ngai gaw teng teng ahkrung nga ai Karai Kasang rai nga nngai, dai majaw si hkrung si htan gaw na a hpang jahtum na maka rai nga ai hte dai kaw na nang hprawng lawt lu na ndai n rai. Nang gaw masha sat ai mara lu nga ndai majaw, dai gaw nang hpe hkan shachyut na ra ai.

⁷Ngai gaw Edom mung na bum hpe katsi katsang shara shatai kau nna dai mungdan hku ga lai ai masha shagu hpe sat kau na nngai.

⁸Ngai gaw bum ni hpe si mang ni hte jahpring da nna, majan hta sat kau hkrum sai ni a moi mang ni kawng ni hte hkaraw kadit ni hta hpring nga na mara ai.

⁹Ngai gaw nang hpe htani htana katsi katsang shatai kau na nngai, na a mare ni hta kadai mung bai shanu nga lu na n rai, nang gaw ngai nan dai MADU rai nga nngai hpe chye lu na rai ndai.

¹⁰“Dai MADU ngai nan shanhte a Karai Kasang rai nga tim pyi, nang gaw ndai amyu lahkawng rai nga ai Yuda hte Israela ngu ai shanhte a mungdan ni hpe mung rau hpawn nang madu la na nngai, ngu nna nang tsun nit dai.

¹¹Dai rai nna, Tsaw Htum ai dai MADU ngai gaw teng teng ahkrung nga ai Karai Kasang rai nga nngai, dai majaw nye a amyu masha ni hpe nang madun dan ai masin kahtet ai, manawn masham ai hte n dawng n yawt ai myit ni a matai hpe ngai dawp na nngai. Shanhte hpe nang galaw nit dai hte maren nang hpe ngai ari jaw ai gaw shanhte chye lu na mara ai.

¹²Nang gaw Israela bum ni katsi katsang shara tai mat nna, shanhte gaw na a shahpa rai nga sai nga nna nang tsun ai shatan nhkan ga hpe dai MADU ngai nan na ni ai hpe nang chye lu na rin dai.

¹³Ngai gaw zai ai hte shakawng shakat ai hku ngai hpe ninghkap tsun ai na a ga hpe na ni ai.”

¹⁴Tsaw Htum ai dai MADU gaw, “Ngai gaw nang hpe katsi katsang shara shatai kau ai majaw, mungkan ting gaw na a hkrat sum ai lam hpe kabu gara na mara ai,

¹⁵Ngai madu tawn ai Israela a hten run ai hpe nang yu kabu nga ndai hte maren, Seira bum ni e, rai sa, Edom mungdan yawng gaw katsi katsang shara tai mat na ra ai. Masha shagu hte gaw ngai nan dai MADU rai nga nngai hpe chye lu na mara ai,” ngu nna tsun wu ai.