Read Jinghpaw Common Language Bible 2009 EZEKELA 36 Bible Online

EZEKELA 36 - Jinghpaw Common Language Bible 2009 bible

EZEKELA 36

¹Dai MADU gaw, “Si chye ai masha wa e, Israela bum ni hpe tsun u, Tsaw Htum ai dai MADU ngai nan shanhte a matu tsun dan sai mungga hpe madat mara na matu, shanhte hpe htawn tsun u: Israela a gumlau hpyen ni mahtang, ‘Ya chyawm gaw, moi chyaloi nhkoi kaw na kawng ni anhte a lata hta rai nga sai!,’ ngu nna myit dik ai hte azi yu let tsun nga ma hka!’

³“Myihtoi htoi u, Tsaw Htum ai dai MADU ngai nan tsun ai mungga hpe tsun ndau u. Israela a bum ni hpe htingbu mungdan na amyu baw ni gasat nna lanep shatai kau ai shaloi, Israela hpe kadai mung mani asawng nga ma ai.

⁴Dai rai nna, bum ni hte kawng ni, hkaraw hkamwam ni hte kadit ni, jahten sharun tawn da sai shara ni, hte grup yin masha amyu baw ni yawng e lanep hta nna n kaw n law di hkrum let jahkam da sai mare ni hte seng nna Tsaw Htum ai dai MADU ngai nan tsun ai mungga madat la mu.

⁵“Grup yin masha amyu baw ni, grau nna Edom amyu masha ni hpe hkap daw na, Tsaw Htum ai dai MADU ngai nan nye a sindawng kahtet ai myit hte tsun shapraw dat ni ai. Shanhte gaw nye a mungdan hpe kabu gara ai myit hte mung, pagawn mi n gawn n sawn re ai myit hte mung ka-up la nna dai mung na udat shara ni hpe madu la nga ma ai.

⁶“Dai rai nna, Israela mung hte seng nna myihtoi htoi u: masha amyu baw ni shanhte hpe n kaw n law di kau mu ai hte kaya kahpa jahkrum ma ai majaw, Tsaw Htum ai dai MADU ngai nan myit na machyi nna sindawng kahtet ai hte tsun nga ai ga ni hpe bum ni hte kawng ni hpe mung, hkraw hkamwam ni hte kadit ni hpe htawn tsun u.

⁷Tsaw Htum ai dai MADU ngai nan gaw grup yin hkan nga ai masha amyu baw ni shagrit kau hkrum na mara ai lam ga sadi hte dagam nngai.

⁸Rai ti mung, nye a Israela amyu masha ni e, hpun ni gaw Israela bum ni hta e nanhte a matu kalang mi bai tu wa nna asi si wa na ra ai. Nanhte mung kade n na yang, buga dum nta de wa lu na marin dai.

⁹Ngai gaw nanhte hpang maga de rai nga nngai, nanhte a lamu ga hta yi hkauna ni hpe ngai teng teng galaw shangun nna, dai hta nli gat lu na rai myit dai.

¹⁰Ngai gaw nanhte hpe shalaw jahtam ya na nngai. Nanhte gaw mare ni hta shanu nga lu nna, hten run taw nga sai arai shagu hpe bai gaw gap da lu na marin dai.

¹¹Ngai gaw masha hte yam nga hpe mung shalaw jahtam ya na nngai. Nanhte gaw shawng na hta grau nna law htam wa ai hte kashu kasha law law mayat maya wa na marin dai. Dai shara hta shawng de shanu nga ai zawn, ngai nanhte hpe shanu nga shangun na nngai; ngai gaw nanhte hpe shawng na hta grau nna ngamu ngamai shangun na made ai shaloi, ngai nan dai MADU rai nga nngai hpe nanhte chye lu na rai myit dai.

¹²Nye a amyu masha ni e, ngai gaw nanhte hpe bai woi wa nna ndai mung hta bai shanu nga shangun na nngai. Dai shara gaw nanhte a mungdan majing tai wa nna dai mungdan gaw nanhte a kashu kasha ni hpe galoi mung kyet si shangun na n rai.

¹³“Tsaw Htum ai dai MADU ngai nan ning ngu tsun nngai: Amyu masha ni gaw mungdan gaw masha sha ai hte dai mung gaw amyu sha ni a kashu kasha ni hpe mya lu mya sha nga ai ngu ai ga gaw teng nga ai.

¹⁴Rai ti mung, ndai aten kaw na chyawm gaw, nanhte hte nanhte a kashu kasha ni hpe amya sha ai wa galoi mung nga sana n rai. Tsaw Htum ai dai MADU ngai nan tsun ni ai.

¹⁵Masha amyu baw ni mani asawng ai ga dai mungdan hta galoi mung na lu na n rai. Mungdan kashu kasha ni hpe kashun la ai gaw dai mungdan hta galoi mung nga sana n rai. Dai MADU Karai Kasang ngai nan tsun ni ai.”

¹⁶Dai MADU gaw ngai hpe ga shaga nga ai.

¹⁷Shi gaw, “Si chye ai masha wa e, Israela amyu masha ni gaw shanhte a mungdan hta naw shanu nga yang, shanhte a ngasat ngasa hte shanhte hkan galaw ai arawn alai gaw dai mung hpe awu asin di kau ma ai. Shanhte a sat lawat gaw shata shagu num hking sa ai num zawn n san n seng nga ai ngu, ngai nawn nga nngai.

¹⁸Shanhte gaw dai mung hta masha sat ai amu ni shut hpyit kau ma ai majaw mung, hpara sumla ni hte dai hpe awu asin di kau mu ai majaw mung, ngai gaw nye a sindawng kahtet ai n-gun shanhte hpe chyim shangun ni ai.

¹⁹Shanhte a ngasat ngasa lam hte shanhte galaw ai arawn alai hte maren, ngai daw dan ni ai, shing rai shanhte hpe maigan mungdan ni de shabra kau dat nngai.

²⁰Shanhte shara shagu de du hkawm mat wa yang, ‘Ndai ni gaw dai MADU a amyu masha ni rai nga ma ai, rai ti mung shanhte gaw shi a mungdan kaw nna pru wa nga masai,’ ngu nna masha amyu ni tsun ma ai majaw, shanhte gaw nye a chyoi pra ai mying ningsang hpe jahten kau ya nga ma ai.

²¹Israela amyu masha ni du hkawm ai shara shagu hkan, nye a chyoi pra ai mying ningsang hpe jahpoi kau ya ma ai majaw, dai gaw ngai hpe myit tsang shangun nga ai.

²²“Dai rai nna, Tsaw Htum ai dai MADU ngai nan Israela amyu masha ni a matu san da ai mungga shanhte hpe htawn tsun u. Israela amyu masha ni a majaw ndai amu hpe ngai tau nna galaw ai n rai, nanhte du hkawm nga sai mungdan shagu hta nye a chyoi pra ai mying ningsang hpe jahpoi kau ya ai majaw sha tau nna ngai galaw nga nngai.

²³Maigan amyu ni a ka-ang e, nanhte jahpoi kau ya ai nye a galu kaba ai dai chyoi pra ai mying ningsang hpe masha amyu baw ni a man e n-gun madun dan ai shaloi, ngai nan dai MADU rai nga nngai hpe shanhte chye lu na mara ai. Tsaw Htum ai dai MADU ngai nan tsun ni ai. Ngai nan chyoi pra nga nngai lam masha amyu baw ni hpe madun dan lu na matu, ngai nang hpe jai lang na nngai.

²⁴Ngai gaw nanhte hpe amyu baw shagu hte mungdan shagu kaw na shapraw la nhtawm nanhte a mungdan majing de woi nhtang wa na nngai.

²⁵Ngai gaw nanhte a ntsa e, san seng ai ntsin lapri bun nna, nanhte a hpara sumla ni yawng hta na mung, nanhte hpe awu asin di kau shangun ai arai shagu hta na mung, nanhte hpe jasan jaseng la na nngai.

²⁶Ngai gaw myit masin ningnan hte wenyi nnan nanhte hpe jaw ya na nngai. Nanhte a ja la ai nlung salum hpe ngai shaw kau nna madat mara ai myit masin bang ya na nngai.

²⁷Ngai gaw nanhte hta nye a wenyi bang ya na nngai, shaloi nanhte gaw ngai hkang da sai ga ni hpe shadik shatup nna nye a tara ni yawng hkan lu na rai myit dai.

²⁸Dai hpang, nanhte gaw nanhte a kaji kawa ni hpe ngai jaw da sai mungdan hta shanu nga lu na marin dai. Nanhte gaw nye a amyu masha ni tai nna, ngai gaw nanhte a Karai Kasang tai nga na nngai.

²⁹Ngai gaw nanhte hpe awu asin di ai arai yawng mayawng kaw na mung, nanhte hpe hkye hkrang la na nngai. Nanhte hta galoi mung hku wa n hkru u ga, nai mam ni law htam wa na matu ngai hkang da nngai.

³⁰Nanhte a namsi hpun ni hte yi hkauna na nai mam ni hpe shalaw jahtam ya na nngai, shing rai amyu ni a ka-ang e nanhte hpe kaya myi man sum shangun ai dai hku wa ni dai mungdan hta galoi mung nga na ra ai n rai.

³¹Nanhte gaw nanhte a n hkru ai arawn alai hte nanhte a shut hpyit amu ni hpe myit dum wa nna, nanhte shut kau sai yubak mara ni hte matsat shabat amu ni a majaw, nanhte a hkum ni hpe pyi matsat kau na marin dai.

³²Israela e, ngai gaw ndai lam yawng mayawng hpe nanhte a matu galaw ya nga ai lam n re ai hpe nanhte hpe chye shangun mayu nngai. Nanhte galaw ai kaya myi man jasum ai amu nanhte hpe ngai chyim shangun mayu nngai. Tsaw Htum ai dai MADU ngai nan tsun ni ai.”

³³Tsaw Htum ai dai MADU gaw, “Nanhte a yubak mara yawng kaw na ngai jasan jaseng kau ai shaloi, nanhte a mare ni hta ngai bai shanu nga shangun nna hten run mat sai shara ni hpe bai de da shangun na nngai.

³⁴Nanhte a yi hkauna makau hku lai wa ai ni mu mada ai dai shara ni gaw kade wa maling mala tai nga sai rai ti mung, dai ni hpe kalang mi bai yi hkauna shatai ya na nngai.

³⁵Lang mi na aten hta, nam maling tai mat sai ndai mungdan gaw Eden sun zawn tai nga sai; kashun kashe ashep ashin rai nna hten run mat sai mare ni mung ya chyawm gaw bunghku kum nna masha de nga masai, nga nna masha shagu tsun jahta na mara ai.

³⁶ai hpang, dai MADU ngai nan hten run mat sai mare ni hpe bai de da ai mung, jahkam da sai yi hkauna ni hta bai hkai lu na matu mung, naw ngam nga ai htingbu masha amyu baw ni chye lu na mara ai. Dai MADU ngai nan ga sadi tawn da sai hte maren, ngai myit ra ai hku galaw na nngai,” ngu nna tsun wu ai.

³⁷Tsaw Htum ai dai MADU gaw, “Ngai gaw karum la na matu ngai hpe hpyi ai Israela amyu masha ni a nsen hpe kalang mi bai madat ya na nngai. Dai hpang, ngai gaw shanhte hpe sagu hpung zawn shalaw jahtam shangun na nngai.

³⁸Madat da ai poi aten hta shagu hkungga ni hpe nawng ya na matu lai sai aten hta sagu ni hte hpring nga ai zawn, ya aten e, hten run mat sai mare ni mung amyu masha ni hte hpring nga na mara ai. Dai shaloi, shanhte gaw ngai nan dai MADU rai nga nngai hpe chye lu na mara ai,” ngu nna tsun ai.