Read Jinghpaw Common Language Bible 2009 EZEKELA 37 Bible Online

EZEKELA 37 - Jinghpaw Common Language Bible 2009 bible

EZEKELA 37

¹Dai MADU a hpung shingkang gaw ngai hta nga ai rai nna, shi a wenyi gaw ngai hpe woi lakawn mat wa nna, nrut nra ni hte hpring ai kadit shara hta tawn da wu ai.

²Shi gaw dai kadit grup yin yawng de ngai hpe woi sa wa nga ai, dai shara hta nrut nra ni law law jawng nga nhtawm dai ni gaw grai wa hkraw taw nga sai hpe ngai mu lu nngai.

³Shi gaw ngai hpe, “Si chye ai masha wa e, ndai nrut nra ni gaw bai hkrung lu na rai nga a ni?,” ngu nna san we ai. Ngai gaw, “Tsaw Htum ai MADU e, dai lam hpe nang chyu sha htai ya lu nga ndai!,” ngu nna htan we ai.

⁴Shi gaw, “Ndai nrut nra ni hpe myihtoi htoi u. Ndai hkraw ai nrut nra ni dai MADU ma ga hpe madat mara na matu htawn tsun u.

⁵Tsaw Htum ai dai MADU ngai nan nrut nra ni hpe ning ngu nna tsun nga ai ga shanhte hpe htawn tsun u: Ngai gaw nanhte hpe nsoi nsa bang ya na nngai, shaloi nanhte asak bai hkrung nga na marin dai.

⁶Nanhte a lasaw lasa ni hpe gran da ya nna ahpyi ni hte kayawp da ya na nngai. Ngai gaw nanhte a kata de nsoi nsa bang ya ai hte nanhte mung bai hkrung nga na marin dai. Shaloi, ngai nan dai MADU rai nga nngai hpe nanhte chye lu na marin dai,” ngu nna tsun wu ai.

⁷Dai rai nna, Ngai hpe hkang da nu ai hte maren, ngai myihtoi htoi ni ai. Ngai myihtoi htoi nga yang, yu u, kawk e, kak e nga ai nsen hpe ngai na nngai. Shaloi nrut nra ni langai hte langai matut wa ma ai.

⁸Ngai mada azi yu nga yang, lasaw lasa ni gran wa nna ahpyi hte kayawp nga ai. Rai ti mung hkum shan kata ni hta nsoi nsa garai n rawng nga ai.

⁹Karai Kasang gaw ngai hpe, “Si chye ai masha wa e, nbung hpe myihtoi htoi u. Dai nbung gaw mungkan man shagu de nna bung wa nhtawm ndai si mang ni a kata de nsoi nsa bang ya nna shanhte asak bai hkrung wa lu mu ga, Tsaw Htum ai dai MADU hkang da ai hte maren, nbung hpe tsun u,” ngu nna tsun wu ai.

¹⁰Dai rai nna, ngai hpe hkang da ni ai hte maren, ngai myihtoi htoi se ai. Ya, hkum kata de nsoi nsa shang ai hte shanhte asak hkrung wa nna rawt tsap nga ma ai. Dai gaw hpyen luksuk kaba tai lu na daram grai law la nga ma ai.

¹¹Karai Kasang gaw ngai hpe, “Si chye ai masha wa e, Israela amyu masha ni gaw ndai nrut nra ni zawn rai ma ai. Shanhte gaw hkraw mat saga ai, myit mada shara hpa mung n nga mat sai, du na ra ai aten mung n nga sai, nga nna shanhte tsun nga ma ai.

¹²Dai rai nna, nye a amyu masha Israela ni hpe myihtoi htoi nna, Tsaw Htum ai dai MADU ngai nan shanhte a lup ni hpe hpaw nna shapraw la nhtawm, Israela mungdan de bai woi nhtang wa na lam, shanhte hpe htawn tsun u.

¹³Nye a amyu masha ni hpe makoi mayang da ai shara na lup ni hpe hpaw dat nna shanhte hpe shapraw la ai shaloi, ngai nan dai MADU rai nga nngai hpe shanhte chye lu na mara ai.

¹⁴Nye a nsoi nsa shanhte hta bang ya ai hte rau, shanhte asak bai hkrung wa nhtawm shanhte a mungdan hta ngai shanu nga shangun na nngai. Shaloi, ngai nan dai MADU rai nga nngai hpe shanhte chye lu na mara ai. Ngai gaw ga sadi tawn da sai hte maren, ngai myit ai hku ndai amu hpe shatup na we ai. Dai MADU ngai nan tsun ni ai,” ngu nna tsun wu ai.

¹⁵Dai MADU gaw ngai hpe ning nga nna bai tsun wu ai.

¹⁶Shi gaw, “Si chye ai masha wa e, hpun chyen langai la nna de a ntsa e, ‘Yuda mungdan,’ ngu ai ga hkum ni ka da u. Dai hpang, kaga hpun chyen langai mi hpe bai la nhtawm de a ntsa e, ‘Israela mungdan,’ ngu ai ga hkum ni hpe ka da u.

¹⁷Dai hpang, hpun chyen lahkawng yan a matu yan hpe langai sha tai mat hkra, na a lata hta lang da u.

¹⁸Na a amyu masha ni nang hpe de a lachyum kaning ngu a ni?, nga nna san yang,

¹⁹Tsaw Htum ai dai MADU ngai nan Israela a malai ka da ai hpun chyen hpe la nna, Yuda a malai ka da ai hpun chyen hte matut nna dai lahkawng hpe langai sha shatai nhtawm dai hpe nye a lata hta lang da na lam, shanhte hpe tsun u.

²⁰“Hpun chyen lahkawng yan hpe na a lata hta lang da u, shaloi amyu masha ni dai hpe mu na mara ai.

²¹Dai hpang, Tsaw Htum ai dai MADU ngai nan amyu baw ni hta bra nga ai nye a amyu masha ni yawng hpe ngai shapraw la nna shanhte hte rau sha shinggyin la let shanhte a mungdan majing de woi nhtang wa na lam, htawn tsun u.

²²Ngai gaw Israela a bum ni a ntsa e, shanhte hpe amyu baw langai sha shatai na nngai. Shanhte hpe up hkang na hkawhkam langai sha rai nna shanhte gaw htawm hpang e amyu baw lahkawng galoi mung tai na n rai, mungdan lahkawng gaw galoi mung ga garan mat na n rai.

²³Shanhte gaw matsat shabat re ai hpara sumla ni hte shanhte hkum hpe galoi mung awu asin di na n rai. Shanhte tawt lai ai yubak ni gaw shanhte hkum hpe jahten shabyak na n rai. Shanhte tawt lai ai yubak lam yawng kaw na mung, ngai hpe gumle gumlau galaw nga ai kaw na mung, shanhte hpe shalawt dat na nngai. Ngai shanhte hpe jasan jaseng na nngai; shanhte gaw nye a amyu masha ni tai nna ngai mung shanhte a Karai Kasang tai na nngai.

²⁴Nye a shangun ma Dawi hte bung ai hkawhkam langai mi mung shanhte a hkawhkam tai na ra ai. Shanhte yawng gaw up hkang ai du langai a npu hta taw nga nna nye a tara ni hpe kangka ai hte hkan sa madat mara na mara ai.

²⁵Nye a shangun ma Yaku hpe ngai jaw da ai lamu ga ngu ai shanhte a kaji kawa ni shanu yu sai mungdan hta shanhte shanu nga na mara ai. Shanhte gaw dai mung e prat tup nga lu na mara ai. Shanhte a kasha ni mung kashu ni hte dai ni a aru arat matu mara ni yawng mung, dai mungdan hta htani htana prat dingsa shanu nga na mara ai. Nye a shangun ma Dawi hte bung ai hkawhkam wa gaw shanhte hpe htani htana prat dingsa up hkang na ra ai.

²⁶Shanhte a matu htani htana prat dingsa na shim lam ga shaka hpe ngai tawn da na nngai. Ngai shanhte hpe de da nna shalaw jahtam na nngai, shanhte a mungdan hta nye a Nawku Htingnu htani htana agrin nga ai hpe mung mu lu na mara ai.

²⁷Ngai gaw dai yang e, shanhte hte rau anga nga nna, ngai gaw shanhte a Karai Kasang, shanhte gaw nye a amyu masha ni tai na mara ai.

²⁸Ngai gaw nye a Nawku Htingnu hpe shanhte a ka-ang e htani htana tawn da ai shaloi, dai MADU ngai nan lata la sai Israela ni gaw nye a amyu masha majing ni nan rai nga ai hpe masha amyu baw ni chye lu na mara ai,” ngu nna tsun wu ai.