Read Jinghpaw Common Language Bible 2009 EZEKELA 38 Bible Online

EZEKELA 38 - Jinghpaw Common Language Bible 2009 bible

EZEKELA 38

¹Dai MADU gaw ngai hpe ga shaga wu ai.

²Shi gaw, “Si chye ai masha wa e, Magoga mungdan na Meshek hte Tubala amyu baw ni a up hkang du kaba Goga hpe jahpoi u. Shi hpe jahpoi u.

³Tsaw Htum ai dai MADU ngai gaw shi a hpyen rai nga nngai lam shi hpe tsun u.

⁴Ngai gaw shi hpe kayin la nhtawm shi a shakap hta hpri chyinghkyi hte mahkai nna shi hpe mung, shi a hpyenla ni yawng hpe mung garawt shapraw kau na nngai. Shi a hpyen luksuk hte de a gumra ni hte hpyen hking sumraw da ai gumra jawn ai ni gaw grai law htam nga ai; dai sha n-ga, share shagan hpyenla shagu mung nhtu hte ninggang langai hpra lang da nga ma ai.

⁵Persi, Ehtiopi hte Libya mung na masha ni mung shi hte rau rai nna, shanhte yawng ninggang hte hpri gupchyawp ni lu shajang nga ma ai.

⁶Dingdung maga de nga ai Gome hte Bet Togama mung na gasat masha ni yawng mung, kaga masha amyu baw ni hta na hpyen masha law law ni mung, shi hte rau rai ma ai.

⁷Jin jin rai nga na matu mung, shi a hpyen hpung ni yawng shi a hkang da ai ga hta jin jin rai nga na matu shi hpe tsun u.

⁸Shaning law law lai mat wa ai hpang, masha amyu baw ni law law a lata kaw na rau sha woi nhtang wa nna hpyen majan hpa mung n hkrit n tsang ra sai hte amyu masha ni shanu nga ai mungdan hpe shang gasat na matu ngai shi hpe ahkang jaw ya na nngai. Shi gaw aten na na katsi katsang tai mat nna jahkam da sai rai ti mung, ya, dai mungdan hta amyu masha ni yawng shim lum ai hte shanu nga sai Israela bum ni hpe shang gasat na ra ai.

⁹Shi hte shi a hpyen luksuk ni hte shi hta lawm nga ai masha amyu baw law law ni gaw nbung laru hte sumwi ni zawn mungdan hpe gasat ka-up na mara ai,” ngu nna tsun wu ai.

¹⁰Ndai gaw Tsaw Htum ai dai MADU Goga hpe tsun ai mungga rai nga ai: “Dai aten du ai shaloi, nang gaw n hkru ai maw mawn lam hpe myit shapraw na rin dai.

¹¹Makawp maga lam hpa mung n nga ai hte mare bunghku n kum da ti mung, ngwi pyaw sim sa ai hte shim lum ai hku amyu masha ni tinang hkrai asan apan rai shanu nga ai mungdan hpe shang gasat na matu nang myit daw dan na rin dai.

¹²Nang gaw lang mi hten run mat nna katsi katsang rai mat sai mare ni hta nga ai amyu masha ni a lanep hpe shang hpya na rai ndai. Shanhte gaw amyu baw ni a lata kaw na shinggyin la hkrum ai hte ya yam nga hte sut gan hta shanhte ngamu ngamai wa ai hte mungkan lam mazup ni hta bai wa shanu nga ma ai.

¹³Sheba hte Dedan masha ni mung, Spain mare kahtawng hkan na hpaga ga ai ni mung nang hpe, ‘Lanep kashun la lu na matu, na a hpyen luksuk hpe nang jahpawng tawn nna gasat nga n ni? Ja, gumhpraw, yam nga hte sut gan amyu myu hpe jahten kau na matu nang myit shatawng nga n ni?,’” ngu nna san na mara ai.

¹⁴Dai rai nna, Tsaw Htum ai dai MADU gaw Goga hte seng nna tsun ai mungga shi hpe htawn tsun na matu, ngai hpe shangun dat wu ai: “Ya chyawm gaw, nye a amyu Israela ni shim lum ai hte shanu nga ma yang,

¹⁵masha amyu baw law law kaw na daru magam n-gun rawng ai hte gumra jawn ai hpyen luksuk kaba hpe woi awn nhtawm tsan ai dingdung maga na a shara kaw na nang du yu wa na lam shatawng shada da nga ndai.

¹⁶Nang gaw nye a amyu masha Israela hpe nbung laru ahpawt mat wa ai zawn htim gasat na rin dai. Ngai kadai rai nga nngai hpe masha amyu baw ni mu chye shangun na matu mung, na a jaw e, ngai galaw ai nye a chyoi pra ai amu hpe madun dan na matu mung, dai aten du ai shaloi, nye a mungdan hpe htim gasat na matu ngai nang hpe shangun dat na nngai.

¹⁷Dai aten du ai shaloi, Israela hpe htim gasat na matu, amyu langai mi hpe ngai shangun dat na ngu nna nye a shangun ma ni rai nga ai Israela myihtoi ni hpe moi prat kaw na ngai tsun ndau da nga sai shingran gaw, nang nan rai nga ndai.” Tsaw Htum ai dai MADU nan tsun nu ai.

¹⁸Tsaw Htum ai dai MADU gaw, “Israela hpe Goga shang gasat ai shani e, ngai gaw sindawng kahtet ai wa tai na ring ngai.

¹⁹Nye a sindawng kahtet ai shani e, Israela mungdan hta laja lana re ai nnang nawn kaba nawn wa na ra ai, ngu nna ngai tsun nga nngai.

²⁰Hka na nga hte ntsa malen u shagu mung, dusat yam nga kaji kaba shagu hte ginding aga ntsa e nga ai shinggyim masha shagu hte gaw ngai hpe hkrit gari na mara ai. Bum ni mung daw mat nna, ninggam ni ru hkrat wa ai hte mare bunghku shagu mung kadawng daw mat na ra ai.

²¹Ngai gaw dai zawn re ai ru yak tsin-yam tsindam yawng hte Goga hpe jahkrit na nngai. Tsaw Htum ai dai MADU ngai nan tsun ni ai. Shi a masha ni gaw shanhte a nhtu ni hte shada da kayin kahtam hkat na mara ai.

²²Ngai mung shi hpe ana zinli hte mung, sat kau ai hte mung ari jaw na nngai. Shi a ntsa e mung, shi a hpyen luksuk hte shi a maga de tsap nang ai masha amyu baw law law ni a ntsa e mung, sin hte marang kaba, wan hte kan hpe rau sha ru jaw jahtu na nngai.

²³Ndai lam hku nna ngai gaw galu kaba ai hte chyoi pra nga nngai hpe masha amyu baw ni yawng hpe madun dan na nngai. Dai shaloi, ngai nan dai MADU rai nga nngai hpe shanhte chye lu na mara ai.