Read Jinghpaw Common Language Bible 2009 EZEKELA 41 Bible Online

EZEKELA 41 - Jinghpaw Common Language Bible 2009 bible

EZEKELA 41

¹Dai hpang, masha wa gaw Chyoi Pra ai Shara ngu ai ka-ang na gawk nu de ngai hpe woi sa wu ai. Shi gaw dai de hkrang ai makau lam hpe shadawn wu yang, dai gaw pe 10 sung nga ai,

²dam maga de pe 18 rai nga ai; dai hta kade nde pe 8 htat ai shakum mung rawng nga ai. Shi gaw gawk nu shadawn yu wu yang, dai gaw galu de pe 68, nda de pe 34 rai nga ai.

³Dai hpang, shi gaw kata htum ai gawk de shang nna dai de sa wa ai lapran lam shadawn wu ai; dai gaw pe 3 sung nna galu de pe 10 rai nga ai, dai hta kade nde pe 12 htat ai shakum mung nga nga ai.

⁴Shi gaw dai gawk hpe nan shadawn nga ai, dai gaw kade nde man grup grup pe 34 rai nga ai. Dai gawk gaw ka-ang gawk nu a shingdu e rai nga ai. Shi gaw ngai hpe, “Ndai gaw Chyoi Pra Htum ai Shara rai nga ai,” ngu nna tsun wu ai.

⁵Dai masha wa gaw Nawku Htingnu kata shakum hpe shadawn yu yang, dai gaw pe 10 htat nga ai. Shakum hte man hkrum rai nga ai Nawku Htingnu grup yin na kaji ai gawk ni gaw nda de pe 7 rai nga ai.

⁶Dai gawk ni gaw htap masum rai nna, htap shagu hta gawk sumshi shi rawng nga ai. Htap shagu na Nawku Htingnu a shinggan shakum gaw lawu htap na shakum hta grau hpa nga ai; dai gaw shakum kata de n shangang da ti mung, shakum ntsa hta gawk ni hpe ngang ngang matut da lu nga ai.

⁷Shing rai Nawku Htingnu shakum ni hpe shinggan kaw na yu dat yang, lawu tsang kaw na ntsa htap hkren maren htat nga ai zawn mu lu nga ai. Nawku Htingnu a shinggan shakum hte man hkrum rai nga ai gawk ni a shinggan maga hku nna kaba ai lakang lahkawng htan da nga ai. Dai zawn lawu htap kaw nna ka-ang htap hte matut nna ntsa htap du hkra lung wa mai nga ai.

⁸Ndai gawk ni a shinggan shakum gaw pe 8 htat nna, Nawku Htingnu a dingdung maga hku nna gawk ni de shang wa na chyinghka lam langai mi nga nga ai; dai hte maren dingda maga de mung langai mi nga nga ai. Nawku Htingnu grup yin hta pe 8 dam ai numdawn langai mi nga ai hpe ngai mu nngai. Dai gaw ga kaw nna ntsa de pe 10 tsaw nga ai, dai gaw Nawku Htingnu shakum ni a makau na gawk ni a npawt hte madang maren rai nga ai. Nawku Htingnu numdawn hte hkinjawng ni lang ai nta lapran ni hta man ai shara gaw Nawku Htingnu a grup yin dingyang hkren nda de pe 34 rai nga ai.

¹²Nawku Htingnu a sinna maga de na man ai shara a jahtum na shara hta, galu de pe 150, nda de pe 116; re ai nta langai nga nga ai; de a shakum ni gaw grup grup de pe 9 htat nga ai.

¹³Dai masha wa gaw Nawku Htingnu shinggan de shadawn wu yang, dai gaw galu de pe 168 rai nga ai. Nawku Htingnu nbang kaw nna man ai shara hpe lai di nhtawm sinna maga na nta htum ai shara du hkra, de a galu de pe 168 rai nga ai.

¹⁴Nawku Htingnu a npan hpe lai nna man ai shara lahkawng maga lawm yang, pe 168 rai nga ai.

¹⁵Shi gaw sinna maga ngu na nta nbang hte de a lahkawng maga na madun gawk ni shadawn yang, dai gaw pe 168 rai nga ai. Nawku Htingnu a shawng du ai gawk, Chyoi Pra ai Shara hte Chyoi Pra Htum ai Shara

¹⁶ni yawng hta dun kaw nna hkuwawt chyinghka ni du hkra hpunpyen hte dawk shakap da nga ai. Ndai hkuwawt ni hpe magap da lu nga ai.

¹⁷Nawku Htingnu a kata na chyinghka ntsa du hkra tsaw ai shakum ni hta namhtan hpun ni hte singkaw tu ai hkrung kanu sumla ni hpe apa pat tawk ka da nga ai.

¹⁸Namhtan hpun ni hte hkrung kanu sumla ni hpe gawk grup yin ting hta gahti galai tawk ka da nga ai. Hkrung kanu shagu hta myi man lahkawng hkawng tu nga ai.

¹⁹Namhtan hpun a maga mi de masha myi man, maga mi de hkanghkyi myi man yawng nga ai. Dai gaw nta shakum yawng grup hkra hte

²⁰dun kaw nna chyinghka ntsa du hkra dai hku rai nga ai.

²¹Chyoi Pra ai Shara e jung da ai shadaw ni gaw jut mali rawng nga ai. Chyoi Pra Htum ai Shara a chyinghka lam a man e, hpunpyen tawn hkungri hte bung ai

²²arai langai mi nga nga ai. Dai gaw tsaw de pe 5 rai nna, nda maga de pe 4 rai nga ai; de a jut ni, madang hte shakum ni yawng hpun rai nga ai. Dai masha wa gaw ngai hpe, “Ndai gaw dai MADU a man e tawn da ai ku rai nga ai,” ngu nna tsun wu ai.

²³Chyoi Pra ai Shara de sa wa ai lapran lam a jahtum shara e chyinghka langai, Chyoi Pra Htum ai Shara de sa wa ai lapran lam a jahtum shara e chyinghka langai nga nga ai.

²⁴Dai ka-ang na chyinghka lam ni hta chyinghka lahkawng hkawng noi nga ai.

²⁵Shakum ni hta tawk ka da ai zawn dai Chyoi Pra ai Shara hta nga ai chyinghka ni hta mung namhtan hpun hte singkaw tu ai hkrung kanu ni hpe tawk ka da nga ai. Shang wa chyinghka gawk a shinggan chyinghka lam ni hta mung hpun hte magap da nga ai.

²⁶Dai gawk shakum kade nde hte de a hkuwawt chyinghka ni hte shakum ni hta namhtan hpun ni hte mawn shatsawm da nga ai.