Read Jinghpaw Common Language Bible 2009 EZEKELA 42 Bible Online

EZEKELA 42 - Jinghpaw Common Language Bible 2009 bible

EZEKELA 42

¹Dai hpang, dai masha wa gaw ngai hpe shinggan wang kata de woi wa nna Nawku Htingnu a dingdung maga de nga ai nta de mung, grai wa n tsan ai Nawku Htingnu a sinna jahtum na nta de mung woi sa wa wu ai.

²Dai nta gaw galu de pe 168 rai nna, nda de pe 84 rai nga ai.

³Maga mi hta Nawku Htingnu dingyang man yawng nna nda de pe 34 gang ai shara rai nga ai; kaga maga mi gaw shinggan wang lung nep maga de man yawng nga ai. Dai nta hpe htap masum hku gap nna, ntsa htap gaw lawu na hta loi kaji ai hku gap da nga ai.

⁴Ndai nta a dingdung maga de pe 16 gang nna pe 168 galu ai lapran lam nga ai hte chyinghka lam ni mung dai maga de man yawng nga ai.

⁵Dai nta a lahta tsang na gawk ni gaw lapran hte lawu tsang madang hta grau gyip nga ai, hpa majaw nga yang dai ni gang nga ai majaw, kaji da nga ai.

⁶Dai gawk ni gaw wang kata na kaga nta ni zawn shadaw ni hte jung da ai n rai; htap masum ting hpe ninggam hte ninggam gaw da ai gawk ni rai nga ai.

⁷Lawu tsang ngu na nta a shinggan shakum gaw pe 84 galu nna de a ka-ang hkup ngu na naw ngam ai pe 84 hta gawk ni nga nga ai. Ntsa htap mahkra hta gawk ni hkrai rai nga ai.

⁹Nta a sinpraw jahtum maga e nga ai gawk ni a npu ngu na wang shakum hta shinggan wang de shang sa wa ai lam langai nga nga ai. Nawku Htingnu a dingda maga hta Nawku Htingnu a sinna jahtum e nga ai nta hte n tsan ai kaw bung ai nta langai nga nga ai.

¹¹Gawk ni a man e nga ai lapran lam gaw dingdung maga de nga ai lapran lam hte maren rai nga ai. Dai ni hta nga ai shadawn shadang ni, hkrang kasi ni hte shang wa lam ni yawng maren rai nga ai.

¹²Nta a dingda maga de na gawk ni a npu hta chyinghka langai mi nga nna, dai gaw sinpraw jahtum shakum garet hpang wa ai lam hta byawn rai nga ai.

¹³Dai masha wa gaw ngai hpe, “Ndai nta lahkawng gaw chyoi pra nga ai. MADU a man de sit sa ai hkinjawng ni gaw chyoi pra htum ai hkungga lusha hpe dai shara ni hta sha ma ai. Dai gawk ni chyoi pra nga ai majaw, hkinjawng ni dai shara ni hta chyoi pra htum ai hkungga ni, shadung hkungga ni, mara raw shagu hkungga ni hte htingrai htingrat hkungga ni hpe tawn da na mara ai.

¹⁴Hkinjawng ni Nawku Htingnu kata nga ai hte wang shinggan de pru hkawm sa mayu ai shaloi, dai MADU a matu daw jau yang lang ai chyoi pra ai hpun palawng ni hpe dai gawk ni hta galai da ra nga ma ai. Shanhte gaw masha hpawng de ai shara de garai n pru sa yang, kaga hpun palawng ni hpe hpun la ra nga ma ai,” ngu nna tsun ai.

¹⁵Dai masha wa gaw Nawku Htingnu kata shadawn ngut ai hpang, sinpraw chyinghka hku ngai hpe woi shapraw mat wa nna Nawku Htingnu a shinggan shara ni hpe shadawn wu ai.

¹⁶Shi gaw shadawn ningren la nna sinpraw maga de shadawn wu yang, dai gaw pe 840 galu nga ai.

¹⁷Dai hpang, dingdung maga de mung, dingda maga de mung, sinna maga de mung, shi shadawn wu yang, maga shagu pe 840 galu nna maren rai nga ai.

²⁰Dai rai nna, bunghku du hkra lawm yang, man mali grup grup pe 840 rai nga ai. Dai bunghku gaw chyoi pra ai hte n chyoi n pra ai shara ni hpe garan ginhka na matu kum da nga ai.